Jesu Tondiba Tuona 3
3
Pieli leni Jan paagi o wabo Jesu yeli nni
1Li yenlebidili jaandi yogunu, Pieli leni Jan den gedi U Tienu diegu po. 2Bi niba den cuani yaa joa n mali ki tie wabo. Daali kuli bi den yuani o ki kaandi o U Tienu diegu buliñoajabu yaabu n yi bu Buliñoaŋanbu kani, ke wan yaa miadi yaaba n koa U Tienu diegu nni. 3Wan den laa Pieli leni Jan ke bi baa kua U Tienu diegu nni, o den mia ba mi todima. 4Pieli leni Jan den nuali o, ke Pieli yedi o: «Diidi ti!» 5O den diidi ba, ki tama ke o baa baa bi kani liba. 6Pieli den yedi o: «Mii pia ŋanjilifa, mii pia wula mo, ama min pia yaala, n puni a: Jesu Kilisiti, Nasareti yua yeli nni, fii ki yaa cuoni.» 7Lani, o den cuo o jienu ki fiini o. Lanyogunu lanyogunu, o taana leni o kpagima den paagi. 8O den fii yenma ki sedi, ki ji cuoni. O den yegi leni ba ki kua U Tienu diegu nni, ki cuoni, ki yugi ki ciini, ki pagi U Tienu.
9Bi niba kuli den laa o ke o cuoni ki pagi U Tienu. 10Bi den bandi ke o tie yua n den maani ki kaa U Tienu diegu Buliñoaŋanbu kani, ki miadi mi todima. Li den paki ba hali boncianla leni yaala n tieni o.
Pieli ñoamabonli U Tienu diegu nni
11O joa yeni n den taabi Pieli leni Jan, li pakili den cuo bi niba kuli ke bi sani ki gedi bi kani Salomon janli kani.#3.11 Janli: Bi tianba baa yedi ku ciagu. 12Pieli n den laa ba, o den yedi bikuli: «Yinba Isidayeli yaaba, be yaa po ke yaala n tieni na paki yi? Be yaa po ke yi nua ti nani li tie tinba n teni ke o joa na cuoni kelima ti banma po, yaa ka kelima tin fangi U Tienu maama yaa po? 13Abalahama, Isaaka leni Jakob Tienu, wani, ti yaajanba Tienu, den kpiagi o naacemo Jesu. Yi den cuo o ki teni li bali danba, ki yie o Pilati bujiali kani, ba ke o den jagi ke o baa faabi o. #Ñam 3.15. 14Ama yi den yie o, wani o Nigagidiŋamo leni o Niteginka. Yi den mia ban faabi yi po o nikpalo. #Mat 27.15-23; Mrk 15.6-14; Luk 23.13-23; Jan 19.12-15. 15Yi den kpa li miali yaa Diedo U Tienu n den fiini yua bi tinkpiba siiga. Ti tie siedinba laa bonla kuli po. 16Li tie li dandanli wani Jesu yeli nni n teni ke yaa joa n tie ne, yin nua ki go bani yua, paagi kelima Jesu yeli po. Li tie li dandanli wani Jesu po n teni ke o joa na paagi cain yikuli nintuali.
17Moala, n kpiiba, n bani ke yinba leni yi yudanba den tieni lani kuli kelima yii den bani yin tieni yaala. 18Ama U Tienu den kuani wan den tuodi ki teni ke bi saawalipuaba kuli pua saawali ki waani yaala: O den bili ke wan Gandi Yua baa le fala. 19Lani yaa po, yin lebidi yi yama ki daani U Tienu ke wan n ŋuudi ki ñani yi tuonbiadi. 20Yeni, o Diedo baa cuani mi fuodima yogini, ki soani Jesu Kilisiti, wan den tuodi ki jagi ke o baa soani yi po yua. 21Wani Jesu yeni, baa yaa ye tanpoli po hali li yogunu n baa ti pundi. Lanyogunu U Tienu baa go ŋanbi li bonla kuli nani wan den tuodi ki teni ke o saawalipua-gagidiŋanba pua saawali ki yedi yaala hali yogu. 22Bi siiga, Musa den yedi: ‹O Diedo yi Tienu baa gandi ki fiini yi buolu siiga o saawalipualo, nani mini yeni. Cengi mani wani n baa yedi yi yaala kuli.#Tia 18.15,18. 23Yua n kan tuo ki cengi laa saawalipualo maama, bi baa ñani o U Tienu niba siiga ki bolini o.› #Tia 18.19. 24Ki cili Samueli leni bi saawalipuaba yaaba n ŋoadi o ki soagini U Tienu maama kuli, bikuli den tuodi ki waani yaa dana n tie ne maama fuuli. 25U Tienu n den teni ke o saawalipuaba maadi yaa maama yeni tie yinba yaa po yo. Wan go den kuani yaa ŋantaado leni ti yaajanba moko tie yinba yaa po. O ŋantaado yeni tie wan den kuani yua leni Abalahama ki yedi o: ‹Ŋanduna nibuoli kuli baa baa li seli kelima a puoliŋuani po.›#3.25 Puoliŋuani: Poli n diani Galati yaaba po, o soagini ki yedi ‹a puoliŋuanu.› Diidi Mi Cilima 17.7; 22.18. 26U Tienu den cuani o naacemo Jesu ki kpa soani o yinba yaa kane, ke wan seligi yi, ki teni yuakuli n lebidi ki ŋaa o tuonbiadi.»
Currently Selected:
Jesu Tondiba Tuona 3: BGP
Tõsta esile
Share
Kopeeri
Want to have your highlights saved across all your devices? Sign up or sign in
Gulmancema Protestant Bible © Bible Society of Burkina Faso, 2013.