1. Mose 18
18
Gott besieekjt Abraham
1Un de Har erschien am bie de Terebinten Mamre; un hee saut aum Engank vom Zelt bie de Doageshett. 2Un hee hoof siene Uagen opp un sach: Un kjikj, dree Mana stunden ver am; un aus hee an sach, rand hee an entjäajen vom Zelt Engank un bekjt sikj bat oppe Ieed dol; 3un hee säd: Har, wan ekj Jnod en diene Uagen jefungen ha, soo go doch nich aun dienem Kjnajcht vebie! 4Daut woat doch een bät Wota jeholt, un wauscht june Feet; un loagat junt unja däm Boom, 5un ekj well een Stekj Broot holen, un stokjt jun Hoat; nodäm kjenn jie wiedagonen; dan doarom sent jie bie junem Kjnajcht vebiejekomen. Un see säden: Doo aulsoo, aus du jerät hast.
6Doa spood Abraham sikj no Sara em Zelt un säd: Neem schwind dree Mot fienet Mäl, kjnäd un bak Kuaken! 7Un Abraham rand no de Rinda un neem een Kaulf, zoat un goot, un jeef daut de Junges; un dee spooden sikj, daut reedtomoaken. 8Un hee hold dikje un seete Malkj un daut Kaulf, daut hee reedjemoakt haud, un sad an daut väa; un stunt ver an unjrem Boom, un see auten.
9Un see säden to am: Wua es Sara, diene Fru? Un hee säd: Kjikj, em Zelt. 10Un hee säd: Jewess woa ekj om een Joa wada no die komen, un kjikj, diene Fru, woat eenen Sän haben. Un Sara hieed daut em Engank vom Zelt, daut hinja am wia. 11Un Abraham un Sara wieren oolt, oolt aun Doag; daut haud oppjehieet, Sara no de Frues Wies [ute Kjinjajoaren] to gonen. 12Un Sara lacht en äarem Ennalichen un säd: No däm ekj oolt jeworden sie, sull ekj noch Lost ha? Un mien Har es uk oolt! 13Un de Har räd too Abraham: Wuarom haft Sara jelacht un jesajcht: Sull ekj werkjlich jebäaren, doa ekj doch oolt sie? 14Es fa däm Harn eene Sach too wundaboa? Too bestemde Tiet, om een Joa, woa ekj no die wada komen, un Sara woat eenen Sän haben. 15Un Sara luach un säd: Ekj ha nich jelacht! Dan see haud Angst. Oba hee säd: Ne, sonda du hast jelacht.
Abraham sien Bedden fa Sodom
16Un de Mana stunden opp von doa un kjikjten no Sodom; un Abraham jinkj met an, an too bejleiten. 17Un Gott säd: Sull ekj fa Abraham veheimliche, waut ekj doonen well? 18Abraham woat doch jewess eene groote un majchtje Nazion woaren, un en am sellen jesäajent woaren aule Nazionen de Ieed! 19Dan ekj ha am erkjant, om daut hee siene Kjinja un sienem Hus no am befält, daut see däm Wajch Gottes bewoaren, Jerajchtichkjeit un Rajcht too eewen, doamet Gott de Har opp Abraham komen lat, waut hee äwa am jerät haft. 20Un Gott säd: Wiels daut Jeschrecht von Sodom un Gomorra groot, un wiels äare Sind sea schwoa es, 21soo well ekj doch raufgonen un kjikjen, auf see no äarem Jeschrecht, daut ver mie jekomen es, soo jedonen ha; un wan nich, soo well ekj daut weeten.
22Un de Mana jinjen von doa un jinjen no Sodom; oba Abraham bleef noch ver däm Harn stonen. 23Un Abraham kaum noda un säd: West du dan däm Jerajchten met däm Gottloosen wajchschoawen? 24Veleicht sent 50 Jerajchte enne Staut; west du an dan wajchschoawen un däm Uat nich vejäwen om de 50 Jerajchte wellen, dee doabennen sent? 25Daut es nich dien väahaben, soowaut to doonen, däm Jerajchten met däm Gottloosen omtobrinjen, soo daut de Jerajchta aus de Gottloosa es; daut es nich dien väahaben! Sull nich de Rechta vonne gaunze Ieed Rajcht eewen? 26Un de Har säd: Wan ekj en Sodom, enne Staut, 50 Jerajchte finj, soo well ekj om äatshaulwen däm gaunzen Uat veschoonen. 27Un Abraham auntwuad un säd: Kjikj doch, ekj ha mie äwawunden toom Harn to räden, un ekj sie Stoff un Ausch. 28Veleicht kjennen aun de 50, fief väle; west du wäajen de fief de gaunze Staut vedoawen? Un hee säd: Ekj well an nich vedoawen, wan ekj 45 doa finj. 29Un hee deed wieda to am räden, un säd: Veleicht kjennen doa 40 jefungen woaren. Un hee säd: Ekj well daut nich doonen om de 40 äa wellen. 30Un hee säd: Mucht daut mienem Harn nich oajren, un ekj well räden. Veleicht kjennen doa 30 jefungen woaren. Un hee säd: Ekj well daut nich doonen, wan ekj 30 doa finj. 31Un hee säd: Kjikj doch, ekj ha mie äwawunden, toom Harn to räden; veleicht kjennen doa 20 jefungen woaren. Un hee säd: Ekj well nich vedoawen om de 20 äa wellen. 32Un hee säd: Mucht de Har doch nich oajalich sennen, un ekj well blooss noch ditmol räden. Veleicht kjennen doa 10 jefungen woaren. Un hee säd: Ekj well an nich vedoawen om de 10 äa wellen. 33Un de Har jinkj wajch, aus hee met Abraham utjeräd haud; un Abraham jinkj aun sienen Uat trigj.
Currently Selected:
1. Mose 18: PBJHF
Tõsta esile
Share
Copy
Want to have your highlights saved across all your devices? Sign up or sign in
© SW-Radio e.V.