1. Mose 19
19
Daut Jerecht äwa Sodom un Gomorra – Loot woat jerat
1Un dee beid Enjel kaumen Oppenowent no Sodom; un Loot saut aum Dooa von Sodom. Un aus Loot an sach, stunt hee opp, an entjäajen, un bekjt sikj rauf, met däm Aunjesecht bat to Ieed; 2un hee säd: Ach kjikjt, miene Harn! Komt doch en daut Hus von junem Kjnajcht un äwanacht un wauscht june Feet; un jie moaken junt tiedich opp un got junem Wajch. Oba see säden: Ne, sonda wie wellen oppem Plauz äwanachten. 3Un hee kroagd an sea; un see jinjen bie am nenn un kaumen en sien Hus. Un hee muak an een Mol, un hee backt onjesuade Kuaken, un see auten. 4Noch hauden see sikj nich doljelajcht, doa omrinjden de Mana de Staut, de Mana von Sodom, daut Hus, von Jinjlinkj bat toom Jreis, daut gaunze Volkj von aule Enj de Staut. 5Un see roopten Loot un säden to am: Woa sent de Mana, dee dise Nacht no die jekomen sent? Brinj an no ons rut, daut wie an erkjanen! 6Un Loot jinkj no an rut aun däm Engank un schlot de Däa hinja sikj too; 7un hee säd: Doot doch nich iebel, miene Breeda! 8Kjikj doch, ekj ha twee Dajchta, dee kjeen Maun erkjant ha; lot mie an doch no junt rutfieren, un doot an, aus et goot es en june Uagen; blooss dise Mana doot nuscht, doa see nu eenmol unja däm Schauten von mienem Dak jekomen sent. 9Oba see säden: Go wajch! Un see säden: Doa, de eena es jekomen, aus een Framdlinkj om hia too bliewen, un well däm Rechta spälen? Nu, wie wellen die oaja doonen aus jane. Un see jreepen hoat aun opp däm Maun, opp Loot, un kjeemen doatoo, om de Däa optobräakjen. 10Un de Mana strakjte äare Henj ut un brochten Loot no sikj em Hus un veschlooten de Däa. 11Un de Mana, dee em Engank vom Hus wieren, schluagen see met Blintheit, vom kjlansten bat toom jratsten; un see worden meed, däm Engank too finjen.
12Un de Mana säden to Loot: Hast du noch wäm hia, eenen Schwiasän un diene Säns un diene Dajchta un wäm irjent du enne Staut hast, leid an ut disem Uat rut! 13Dan wie wellen disem Uat vedoawen, wiels äa Jeschrecht groot jeworden es ver Gott; un de Har haft ons jeschekjt, de Staut too vedoawen. 14Un Loot jinkj rut un räd to siene Schwiasäns, dee siene Dajchta nämen sullen, un säd: Moakt junt opp, got ut disem Uat; dan Gott well dise Staut vedoawen. Oba hee wia enne Uagen von siene Schwiasäns aus eena, dee Spoos drift.
15Un soo aus daut Morjenroot oppjinkj, doa drenjden de Enjel en Loot un säden: Moak die opp, nemm diene Fru un diene twee Dajchta, dee doa sent, doamet du nich wajchjeropt woascht en de Ojjerajchtichkjeit de Staut! 16Un aus hee daut vetrock, pakten de Mana siene Haunt un de Haunt von siene Fru un de Haunt siene twee Dajchta, wiels de Har am veschoond, un fieed am rut un leet am butre Staut. 17Un daut passieed, aus see an en Frieen rutjefieet hauden, doa säd hee: Rad die om dien Läwen wellen; kjikj nich hinja die, un bliew nich enne Läacht stonen; rad die oppe Boaj, doamet du nich wajchjeräten woascht! 18Un Loot säd to an: Nich doch, Har! 19Kjikj doch, dien Kjnajcht haft Jnod jefungen en diene Uagen, un du hast diene Jnod groot jemoakt, dee du aun mie erwesse hast, miene Seel aum Läwen too erhoolen; oba ekj kaun mie nich opp de Boaj raden, doa kaun mie daut Onjlekj ennholen, daut ekj stoaw. 20Kjikj doch, dise Staut es dichtbie, om doahan too ranen, un see es kjlien; lot mie doch doahan - mie to raden, (es see nich kjlien?), doamet miene Seel aum Läwen blift. 21Un hee säd to am: Kjikj, uk en disem Stekj ha ekj die erhieet, daut ekj de Staut nich vedoaw, von dee du jerät hast. 22Spood die, rad die doahan; dan ekj kaun nuscht doonen, bat du doa han jekomen best. Doahäa haft maun de Staut däm Nomen Zoar jejäft.
23De Sonn jinkj äwa de Ieed opp, aus Loot en Zoar aunkaum. 24Un de Har leet opp Sodom un opp Gomorra Schwäwel un Fia räajnen vom Harn ut däm Himmel; 25un hee dreit dise Städa om un de gaunze Läacht un aule Bewona de Städa un daut waut oppem Launt jewossen wia. 26Un [Loot] siene Fru kjikjt sikj no hinjen om un wort too eenen Soltstenda.
27Un Abraham muak sikj Zemorjes tiedich opp aun däm Uat, wua hee ver däm Harn jestonen haud; 28Un hee kjikjt no Sodom un Gomorra han un nom gaunzen Läachtlaunt; un hee sach: Un kjikj, een Ruak stieech vonne Ieed opp, aus de Ruak von eenem Schmeltowen.
29Un daut passieed, aus Gott de Städa enne Läacht vedorw, doa docht Gott aun Abraham un fieed Loot medden ut däm Vedoawen, aus hee de Städa omdreid, en dee Loot jewont haud.
Loot un siene Dajchta
30Un Loot jinkj nopp von Zoar un wond oppe Boaj, un siene beid Dajchta met am; dan hee haud Angst, en Zoar too wonen. Un hee wond en eene Heel, hee un siene beid Dajchta. 31Un de Ieeschtjebuarne säd to de Jinjre: Ons Voda es oolt, un kjeen Maun es em Launt, om no ons entogonen no de Wies aula Welt. 32Komm, lot ons onsem Voda Wien to drinkjen jäwen un bie am ligjen, doamet wie von onsem Voda Somen aum Läwen erhoolen. 33Un see gauwen äarem Voda Wien to drinkjen en dee selje Nacht, un de Ieeschtjebuarne jinkj nenn un läd sikj bie äaren Voda dol; un hee wist nich om äa Hanlajen noch om äa Oppstonen. 34Un daut passieed aum Morjen, doa säd de Ieeschtjebuarne to de Jinjre: Kjikj, ekj ha jistren Nacht bie mienem Voda jeläajen; lot ons am uk dise Nacht Wien to drinkjen jäwen, un go nenn, ligj bie am, doamet wie von onsem Voda Somen aum Läwen erhoolen. 35Un see gauwen uk en dee selje Nacht äarem Voda Wien to drinkjen, un de Jinjre stunt opp un läd sikj bie am; un hee wist nich om äa Hanlajen noch om äa oppstonen. 36Un de beid Dajchta von Loot worden schwanga von äarem Voda. 37Un de Ieeschtjebuarne jebua eenen Sän, un see jeef am däm Nomen Moab; disa es de Voda de Moabita bat opp disem Dach. 38Un de Jinjre, uk see jebua eenen Sän, un see jeef am däm Nomen Ben Ammi; disa es de Voda de Kjinja Amon bat opp disem Dach.
Currently Selected:
1. Mose 19: PBJHF
Tõsta esile
Share
Kopeeri
Want to have your highlights saved across all your devices? Sign up or sign in
© SW-Radio e.V.