Matay 25
25
Pehngehngain na o ciring na do asa ngarnan a mavakes
1“O ipakaranes no araraw no italamozong ni Ama ta do to am akman so asa ngarnan a mavakes a meypinan so zampo a mangay a omrapong so mapazagpit a tao. 2O lalima jira am ji sira patapatak. O lalima am tey mapatak sira. 3O jyapatapatak a tao am nimapalolo sira so peyzazampwan da am ji sira nimapalolo so atkaw da abyab. 4O mapatapatak a tao am nimapalolo sira so peyzazampwan da a kapalolo da pa so atkaw da abyab. 5Ikongo do mahay a nimai o mapazagpit a tao, am ori o nipeykaititkeh da no mavavakes. 6Avak no ahep am amyan so tao a amlololos a manci no, ‘Oyto rana o yamatarek so vahay a tao. Pakowbot kamo rana omrapong sya.’ 7So nipeykayokayokay da no asa ngarnan a mavakes a manoik so abyab no zampo da. 8No kanang am maniring sira o jyapatapatak a mavakes do mapatapatak a mavakes am, ‘Ipanta nyo pa yamen so abyab an, ta yarana toda jyahesep o zampo namen.’ 9Maniring sira o mapatapatak a mavakes am, ‘Yamasalit, ta yarana ji makanet jyamen. Am ori o namen ji makaktoi sya jinyo. To kamo rana angay do pananazangan a manazang.’ 10Mangay sira manazang so abyab do pananazangan o jyapatapatak a mavakes am pakaransan na rana no mapazagpit a tao a kapacihza da rana jya somdep no lalima ka mapatapatak a mavakes a macihanghang jya kaneb da rana do pangengneban. 11Mownay am makaranes rana sira o jyapatapatak a mavakes. Maniring sira to rana lololos am, ‘Mo kahakay, iwangan mo pa yamen an.’ 12Maniring o mapasakasakay a tao am, ‘Ko inyo jyatenngi.’ ” 13Maniring rana si Yeso am, “Ori an, ipeytataziman nyo an. Ta ji nyo a tenngi o araraw na no yai ko.
Pehngehngain na o ciring na do tatlo a ka lamlamsoy
(Locya 19:11-27)
14“O italamozong ni Ama ta do to am akman so asa ka tao a mangilili. Karahan am rarahen na o lamlamsoy na a katoro na no peymasaodan na jira. 15To na palololwa do kowyowyat da pongden sira no nizpi na. O asa am nipanta na so alima zivo. O asa am nipanta na so adwa zivo. O asa am nipanta na so asa zivo. Karahan am karwan na rana sira. 16Mahap na o alima zivo no asa ka tao ori am mangay na ipanazang so makakaday a apzapzatan a ipeynizpi na. Karahan am makanizpi so alima zivo. 17Akman sang o nimakahap so adwa zivo a nizpi, ta nimangay na nipeynizpi a kapakanizpi na so adwa zivo. 18Am o nimakahap so asa zivo a nizpi ori am nimeykali so nibobwan na nya. 19Mownay am mai rana o lawpan da omami so nizpi jira. 20Mai o nipanta na so alima zivo am paciralayan na o alima zivo a nipeyparwan na no nizpi na. Maniring do lawpan am, ‘O nitoro mo jyaken a alima zivo asyo am nimeyparo so yalima zivo.’ 21Maniring o lawpan am, ‘Imo rana am ka tey yapya ipeyhanhan a lamlamsoy. Tana yapereh o yako nitoro jimo am yamo ji ngolala. So to ko rana mapahanhani jimo a tomalamozong no arwaro pa kano nang. So ipacizanod mo jyaken a somaray.’
22“Mai o nipanta na so adwa zivo am maniring do lawpan am, ‘O mo nitoro jyaken a yadwa zivo am yadwa zivo o na nipeyparwan.’ 23Maniring o lawpan am, ‘Ka tey yapya ipeyhanhan a lamlamsoy. Tana yapereh o yako nitoro jimo am mo ji ngolala. So to ko na meyhanhani nimo a tomalamozong no arwaro paha kano nang. So ipacizanod mo jyaken a somaray.’
24“Mai o nipanta na so asa zivo am maniring do lawpan am, ‘Ko imo katenngan a tey malanlansoken a tao. O ji mo nipeymowan am kakdain mo o asi na. 25Ikongo do ko ikanyahey imo, am ori o ko na to meykalii so nibobwan ko no nizpi mo. So na iyan pa jya no nizpi mo.’ 26Maniring o lawpan am, ‘Imo rana am tana ka marahet pa ka jyalma a lamlamsoy am no mo katenngan yaken a yakomakzeb so keyyan no mahap ko do kabwan no nimowa ko am 27mo na jya todey pangain sya do pangapangayan so nizpi a peyyananaken. Ta no mai ko na am peralain mo o ananak na a itoro mo jyaken.’ 28Meyratateng am maniring do karwan da lamlamsoy na am, ‘Ayyaney kamo o nizpi na a katoro nyo nya do yasa laksa so nizpi ang. 29Ta o yanan na am arwaro pa o padpehen jya a kato na meypanpanan jya. O kabwan na am pehsen jya o apereh a amyan jya. 30Iya rana ya yabo so yakapsepsekan a lamlamsoy am powbot kamo na do pantaw a keyyan na do kasarisaryan a meylavilavi a meygazicigit so ngepen a maneneseh.’
Imanowji rana mapacici a kapeykapyapinpinan na rana ni Ama ta do to so tao
31“No si meypanirsirngen o Nipamnekan na ni Ama ta do to a tao a macihza do tinsi ni Ama ta do to am amlisna do mazway a lilisnan na. 32Mamimin o tao a malovot do tangain na a kapeykapyapinpin na sira akman so mangonong so kagling a mapeykapyapinpin so kagling na. 33Pain na o ji meylimoteng so onowned a tao do wanan na a kapangay na so meyraraten a tao do ozi na. 34Karahan am maniring o panirsirngen do amyan do wanan na tao am, ‘Inyo rana yana nipanlanlag ni Ama am sijya kamo do italamozong na ni Ama ta do to, ta amoonen nyo o nakem na jinyo no kapangamaog na pa so karawan. 35Ta no kakcin ko am nipakan nyo yaken. No kawaw ko am nipeyyop nyo yaken. No kapangilili ko am nitaotao nyo yaken do vahay nyo. 36No kabo no ayob ko am nipanta nyo yaken so ayob. No keyngen ko am nipeyveyveken nyo yaken. No kapteng da jyaken am nimai kamo a meyminaminasi nyaken.’ 37Maniring sira o ji meylimoteng so onowned a tao am, ‘Mo Panirsirngen, no kango o kapakacita namen jimo a makcin a kapakan namen jimo. No kango o kapakacita namen jimo a mawaw a kapeyyop namen jimo. 38No kango o kapakacita namen jimo a nimangilili a kataotao namen jimo do vahay namen. No kango o kapakacita namen jimo a abo so ayob a kapanta namen nimo so ayob. 39No kango o kapakacita namen jimo a meyngen. No kango o kapakacita namen jimo do pamemtengan a kangay namen a meyminaminasi nimo.’ 40Maniring o Panirsirngen am, ‘To ko na macitangayan jinyo am no manidong kamo so akma nyoy kakteh do cinai a ipangoyongoyod no tao am kataotao ko na sira ori.’
41“Karahan am maniring o Panirsirngen do tao a amyan do ozi na am, ‘Kazey kamo a yana panircirngan ni Ama ta do to. Ji kamo macisngen jyaken. Angay kamo a pacilovot do na sokzan si Satan a kano kararay na a yamyan do to meyyonong a yajyahesep a makotokotod a lila no apoy. 42Ta no kakcin ko am ji nyo nipakan yaken. No kawaw ko am ji nyo nipeyyop yaken. 43No kapangilili ko am ji nyo nitaotao yaken do vahay nyo. No abo ayob ko am ji nyo nipanta yaken so ayob ko. No keyngen ko a no kapteng da jyaken am ji kamo nimai a meyminaminasi nyaken.’ 44No maniring rana sira am, ‘Mo Panirsirngen, no kango o kapakacita namen jimo a makcin. No kango o kapakacita namen jimo a mawaw am mangilili. No kango o kabo no ayob mo. No kango o keyngen mo. No kango o kapteng da jimo. No kango o kato namen macipanadngan jimo a ji nidonga.’ 45No maniring rana o Panirsirngen am, ‘To ko na macitangayan jinyo am no ji nyo nidonga o ipangoyongoyod no tao am yaken rana ori a ikasekeh nyo a sidongen.’ 46O akman rana sang a tao am todangay no makwa o pasingsingtan jira. Am sira rana o ji meylimoteng so onowned a tao am mahap da o to meyyonong a ikavyay no pahad da.”
Currently Selected:
Matay 25: snt
Tõsta esile
Share
Kopeeri
Want to have your highlights saved across all your devices? Sign up or sign in
The Bible Society in Taiwan