Matay 24
24
Pazimanen na o kabalinas no rako a panaralayan
(Make 13:1-2; Locya 21:5-6)
1Makowbot si Yeso a apo do rako a panaralayan am mangay sira o macinanao jya do tangain na kapanci da no katey yapya no kamamaogan na no rako a panaralayan. 2Maniring si Yeso jira am, “O nyo macita panaralayan eya am to ko na macitangayan jinyo am mamimin o vato a da nyamaog sya mazdazday a kabwata na rana no asa ka veysen a mavezed do dang.”
Omanam a alalaw
(Make 13:3-13; Locya 21:5-19)
3Amyan si Yeso do tokon a meyngaran so Kanlan am mangay sira o macinanao jya a mapacici sya. Maniring sira am, “Ipanci mo pala jyamen o araraw no ipakaranes no nang. Akman so wanjin no mai ka. Akman so wanjin o pangavosan no karawan.” 4Maniring si Yeso am, “Makapzat kamo an. Ji kamo a litai an. 5Ta aro o tao a amvood so ngaran ko a manci no, ‘Yaken am si Kizisto ko,’ a ilita da do aro a tao. 6Makamizing kamo na do katangked no ili nyo so meyyarap a kapakamizing nyo do marai a ili so meyyarap. No si manoyong o kakman na so sang am ji kamo anyahey, ta kangay na no akman sang a vazay. Am beken a pangavosan na ori no karawan. 7Meyyarap sira o meytarek so iteytetngehan a kapeyyarap da no teyhesa ka mahataw. So iyan na no rako a kanini a kano abcil do karawan. 8Am ori rana am papwan na rana so kapakaranes na rana no alalaw.
9“No marateng ori am rakpen da inyo a pakakasin a kawakwak da jinyo. So pacioyyan da jinyo a mahap so vazay ko. 10Aro o tao a ji rana manaralay. O karwan da am masipatwatolin do kapanaralay da kaji da manaralayan. So ipeykaokaoya da rana omalalas so kadwan jira. 11Meyparo sira o malas so ipangnanao a tao a mapeycyakawad so onowned no tao. 12Ikongo do to meyzangkap o meyraraten a tao, am ori o ikabo na rana no pangangarilawan no tao. 13Am o to ngotokot a jyahayo so nakem a omraralay nyaken am mahap da o to meyyonong a ikavyay no pahad da. 14O Mapasaray a Ciriciring a omaing do italamozong na ni Ama ta do to am manmanma a meylimwang do karawan a peyyamyamizngan da no tao do peycyamahamahatawan na a kapakaranes na rana no pangavosan no karawan.
Tey manganyahey a alalaw
(Make 13:14-23; Locya 21:20-24)
15“Macita nyo no makwa o nipanci ni Taniar a mapaoya a somazovaz si Ama ta do to#24:15 Taniar 9:27; 11:31; 12:12. a mangay da patneken do ji nyo mamyapyan a tankan na. (No vilangan nyo o ciring eya am to nyo na naknakma o peypeypangayan na.) 16O meyvahay do Yotay am mangay sira do takey a somazok. 17So ji da ranandepi no tao do vahay da a mangap so apzapzatan da. 18O amyan do nihakawan da am ji rana ngoli sira mangap so ayob da. 19Do araraw no nang am to sira makasi o mamlis so kanen a kano mangahanas a mavakes. 20Mapasyasi kamo ji Ama ta do to a kaji na mapasarawan sya do ahemyan a kado ipeywalam no tao. 21Ta o alalaw rana ori am ney makdeng na pa ori a alalaw do na cinamaog no karawan. No makwa am ji rana meytotoro o akman so sang a vazay. 22No ji na pazikenkeni ni Ama ta do to o araraw no alalaw no tao ori am abo o tao a mavyay. Am na kapakanakem so na nipamnekan a tao a yamraralay nya. Am ori o na pazikenkenan do araraw no ipakaranes no alalaw ang.
23“No amyan so tao a manci nya jinyo so, ‘Oya si Kizisto do jya,’ ‘Ori do kwang si Kizisto,’ am ji nyo nganoyngi. 24Ta amyan so tao no makwa a manci no ka si Kizisto da tao a kano malas so ipangnanao a tao. Sira rana am meyvazay sira so mapangyangyalak a vazay a ipeycyakawad da so tao. So icyakman da so sang a mapeycyakawad so nipamnekan na ni Ama ta do to a yamraralay nya tao. 25No makwa am manakem nyo o ko rana nipaziman jinyo a ciring eya.
26“No amyan so tao a manci nya jinyo so, ‘Yamyan si Kizisto do kabwan no nihakawan no tao,’ am ji kamo angay. No amyan so manci no, ‘Yamyan si Kizisto do sahad no vahay,’ am ji nyo to nganoyngi. 27Ta no mai o Nipamnekan na ni Ama ta do to a tao am abo ji makacita sya tao akmey meycicilat a maniray. 28O yanan no nimawakwak a omalalam am ori o pacilolwan da no meyyasasalap.
No meygegcin o Nipamnekan na ni Ama ta do to a tao
(Make 13:24-37; Locya 21:25-33; 17:26-30,34-36)
29“No si mavitos rana o aro a alalaw do teyrahem am to rana kedep o araw. Ji rana manikap o vehan. Makas rana o mata no hanit. Mablis rana o masamasaod no hanit.#24:29 Isayya 13:10; 34:4. 30No si marateng ori am meytotwaw rana o tovil no Nipamnekan na ni Ama ta do to a tao a meygegcin do karawan. Amzikzik rana sira manyahey o aro a tao do karawan. Ta macita da rana yaken a Nipamnekan na ni Ama ta do to a tao a meygegcin do cinalab no rako a oyowyat ko a kano azwazway ko. 31Manovoy ko so aro a tinsi a meyzapa a ipatao ko so tao do peycyavanovanwan na a mapeylovolovot so nipanop ni Ama ta do to a tao do teyhesa ka mahataw.
32“To nyo na nita o ovako a kayo. No to naod rana do yangayangaw na o tomyok am to nyo na tenngi o ka teyteyka na rana. 33Akman sang, ta no macita nyo o makakaday a alalaw do teyrahem am to nyo na tenngi o kakeykai ko na mai. 34Naknakmen nyo an. Amyan so tao sicyaikwaya a makapis pa so vazay ang. 35Mabalinas o hanit a kano teyrahem. Am jyablis o ciring ko a mangay do kaidan no karawan.
36“Abo o tao a makateneng do araraw no yai ko. Tana tinsi do teyngato a tana Anak na ni Ama ta do to am ji da tenngi. Ta si Ama ta do to o makateneng jya. 37No meygegcin o Nipamnekan na ni Ama ta do to a tao am akman so cinasasaodan da da Noya no kakwa. 38No kaji na pa meykehnepan am to sirangned so ninyakan a mapazagzagpit, mangay do araraw no isdep da rana da Noya do avang da. 39Ji da azyaziman o kapakaranes rana no henep. Am ori o nikabalinas da rana. Akman sang o araraw no yai ko a Nipamnekan na ni Ama ta do to a jyaziman. 40Si marateng ori am o rarwa ka mahakay a amyan do nihakawan da am asa jira o ahapen ko. Asa o vezeden ko do dang. 41O rarwa ka mavakes a manworod so kanen da am asa o ahapen ko. Asa o vezeden ko. 42Am ori o ipeytataziman nyo, ta ji nyo a tenngi o araraw no yai ko a Panirsirngen nyo. 43Naknakmen nyo o yameykasayan. Ta no katenngan no mapeyvahay sya o araraw no yai na no manakaw a tao am jyabo kaji na nazimanan jya kaji na makasdepan no manakaw a tao. 44Am ori o ipeytataziman nyo an. Ta no ji nyo aktoktwan am makaranes ko rana a Nipamnekan na ni Ama ta do to a tao.
Ipeyhanhan a kano ji meyhanhanan a lamlamsoy
(Locya 12:41-48)
45“Sino ipeyhanhan a tey mapatak a lamlamsoy. Iya rana am ipeyhanhan no lawpan a omaponged no vahay na do kapeyyangangay na so isovo da kanen no karwan no lamlamsoy na. 46No mai o lawpan a kapakacita na so lamlamsoy na a makapeyvazay so vazay na am manoyong ori o ipanlanlag na. 47To ko na macitangayan jinyo am manoyong rana o akman so sang a lamlamsoy a pahanhanen no lawpan a tomalamozong no peymeymasaodan na. 48Am no maniring o onowned no lamlamsoy na am, ‘Cyaha, ta yapa mahay o lawpan ko a yamai. 49So sipsipzotan ko do aro a lamlamsoy na a kapaciyoyop ko so saki,’ 50am ji na aktoktwan am to rana makaranes o lawpan. 51Jyabo kaji na bakbakan do dang a pazanoden do yatanwasiwasi a tao a yamlavi a mapeygazicigit so ngepen a maneneseh.
Currently Selected:
Matay 24: snt
Tõsta esile
Share
Kopeeri
Want to have your highlights saved across all your devices? Sign up or sign in
The Bible Society in Taiwan