Matay 23
23
Marahet a iyangay da no mangnanao no iwawalam ni Ama ta do to a kano tao a macyagom do Vadisay
(Make 12:38-39; Locya 11:13-46; 20:45-46)
1Maniring si Yeso do aro a tao a kano macinanao jya am, 2“Sira rana mangnanao no iwawalam ni Ama ta do to a kano tao a macyagom do Vadisay am manoyong ori a vazay da a yamangnanao so iwawalam ni Ama ta do to a nitaid na ji Moyse. 3Inyo rana am amizngen nyo o nanao da. Am ji nyo ngapa o icicirawat da. Ta sira rana am o ciring da yajyapsa a yada ji peyvazaya. 4Sira rana am da nanawen sira o tao a mahap so tey masalit a nanao ni Moyse. Am sira am da ji mangozai. 5O yamakakaday a vazay da am yamamimin a yada ipacita do tao. Pangain da do kataotao da o akmey kavangan a adketan no ciring do Seysyo.#23:5 O peypeypangayan no akmey kavangan am adketan no ney makekdeng na ciring do Seysyo. Tatasa ka tao do Yotay am pangain da do zozogwan a kapabtek da sya do peysagatan da a mapacita nya do tao so katey makdeng da omraralay ni Ama ta do to. Da kangednged do aywayob da yapadketan so azwazong na. 6No macyakakan sira am amlisna sira do pamanongan na. No somdep sira do peyneynozyan am mangay sira amlisna do lilisnan no meynakem a tao. 7Ikakza da o kararalay da nira no tao do karwarwan no tao. Ikakza da o kapanci da nira a mangnanao. 8Am ji nyo akzan o kapanci da ninyo a mangnanao. Ta sira rana kadwan jinyo am akma nyoy kakteh do cinai sira. Yasa saon o yamanoyong a Sinsi nyo am. 9Ji nyo mancyan o tao do karawan a ama nyo, ta yasa o Ama nyo a Tao do to. 10Malas o kapanci da ninyo a panirsirngen, ta si Kizisto o meyngongyod a Panirsirngen nyo. 11No si myan jinyo so ney rakeh na am inarahen na o kakma ney lamlamsoy a omilamnay jinyo. 12Pavevehen na ni Ama ta do to o mapahama so nakem a tao a kakatkat na sira so ji makazyazyak a tao.
Ioya na sira ni Yeso o yatanwasiwasi a tao
(Make 12:40; Locya 11:39-51; 20:47)
13“Inyo rana yatanwasiwasi a yamangnanao no iwawalam ni Ama ta do to a kano tao a macyagom do Vadisay am to kamo makasi. Ta inyo rana am nyo taywen o oyowyat ni Ama ta do to do tangain no tao. Nyo ji mya o kataotao nyo a macikaop do italamozong ni Ama ta do to. Akman sang o tao a nyo ji mya a yamacikaop do italamozong ni Ama ta do to. 14[To kamo makasi an. Nyo littan o vao a mavakes a yahapen so kangangay. Nyo to ngida o inozi nyo a to napyapya so nakem. So ikanoyong nyo a peydednan no rako a peyoyaoyyan na ni Ama ta do to.] 15Inyo rana yamangnanao no iwawalam ni Ama ta do to a kano tao a macyagom do Vadisay am to kamo makasi. Ta inyo rana am kamo amlivolivon do peycyavanovanwan na yamapanod so tao. No sira omanod rana am nyo abwangen sira yaominara jinyo. So da ikaraherahet pa ka ninyo. So ikaraherahet da pa ioya na ni Ama ta do to.
16“Inyo rana yakmey mavota tao a yatomirara so tao am to kamo makasi. No kamo maniring am, ‘No amyan so tao a macipeyyeyyan so nakem do rako a panaralayan am jyanoyong o akman sang. Am no si pagazen da do vowawan a yamyan do panaralayan am pangononongan da o ciring da.’ 17Inyo rana yakmey mavota tao am manngwa, yamakdekdeng o vowawan an? No yamakdekdeng o rako a panaralayan a yanan no vowawan. 18No kamo maniring pa am, ‘No amyan so tao a macipeyyeyyan so nakem do patanatanangan so nakem ji Ama ta do to am jyanoyong o akman sang. Am no si pagazen da o ciring da do akma dey nakem ori a makakaday am pangononongan da o akman sang.’ 19Inyo rana yakmey mavota tao am manngwa, yamakdekdeng o nakem nyo ori an? Ano yamakdekdeng o nyo pangayan so akma nyoy nakem si Ama ta do to. 20Am ori an, no myan so macipeyyeyyan so nakem a tao a kapagaz da so ciring da do patanatanangan so nakem ji Ama ta do to am akmey to da pazanoda o makakaday a nipatanang da ji Ama ta do to. 21No myan so macipeyyeyyan so nakem a tao a da pagazen do rako a panaralayan am akmey to da pazagoma si Ama ta do to. 22Akman sang, ta no myan so macipeyyeyyan so nakem a tao a kapagaz da sya do teyngato am akmey to da pazagoma o amyan do teyngato a Tao do to.
23“Inyo rana yatanwasiwasi a yamangnanao no iwawalam ni Ama ta do to a kano tao a macyagom do Vadisay am to kamo makasi. Tana mapasina kamo so ipeykingking nyo ji Ama ta do to so meykamadadayan a monganay jinyo am yanyo to nazibwan o yamanoyong a yamakdeng a nanao ni Ama ta do to a ji mapeycyakaban a kano pangangasyan a kano ji mangalalas. Ahapen nyo o akman sang a nanao, ta yamakekdeng ori a nanao. Akman sang o karwan na, ta ji nyo ngolala. 24Inyo rana yakmey mavota a yatomirara so tao am nyo katenngan a peyvazain o todalapit a iwawalam ni Moyse. Am o ney makdeng na am nyo jyatenngi. Am ori o nyo ji peyvazai sya.
25“Inyo rana yatanwasiwasi a yamangnanao no iwawalam ni Ama ta do to a kano tao a macyagom do Vadisay am to kamo makasi. Inyo rana am nyo ji peylolita o kakanan nyo. Am onowned nyo am yamapno no yamakakaday a nyo peyraratenan. 26Inyo rana yakmey mavota tao a macyagom do Vadisay am apyapya pa o kayavayo nyo so onowned nyo. Ta ori o ikapiya na rana no icicirawat nyo.
27“Inyo rana yatanwasiwasi a yamangnanao no iwawalam ni Ama ta do to a kano tao a macyagom do Vadisay am to kamo makasi. Ta inyo rana am kamo akmey niwadwadan a heseb no tao a yarana mawadwad, apiya do mata. Am o teyrahem na am kasongisongyan no totowang no nimawakwak a tao. 28Kamo akman sang, ta no kamo citahen so kataotao am yabo nyo karatan. Am onowned nyo am yamangalalas a yameysaod so raraten.
29“Inyo rana yatanwasiwasi a yamangnanao no iwawalam ni Ama ta do to a kano tao a macyagom do Vadisay am to kamo makasi. Ta inyo rana am nyo peyveyveknen o heseb da no panoyonoywan na so ciring ni Ama ta do to no kakwa a nyo kapatnek nira so ngaran da 30a nyo kapanci no, ‘No nimyan ta pa no kapeyigegen no ineynapo ta am jyabo kaniominara ta sira nimwakwak so panoyonoywan na so ciring ni Ama ta do to a.’ 31So nyo na to nganoyngi do kataotao nyo a ineynapo da no nimwakwak so panoyonoywan na so ciring ni Ama ta do to. 32No komwan am tongtongan nyo pa o raraten da no ineynapo nyo no kakwa. 33Inyo rana yakmey katonodan no tokza am jyabo kapakaliklik nyo so pasingsingtan na jinyo ni Ama ta do to do kararatan a. 34Amizngen nyo an, ta manovoy ko so panoyonoywan ko so ciring a kano yanan no teneng na ni Ama ta do to a tao a kano mangnanao a tao a mangay jinyo. So iyan na jira ang no wakwaken nyo. Amyan jira ang so padketen nyo do jyojika. Amyan jira ang so bakbakan nyo do peyneynozyan nyo a paksozen do teyhesa ka ili. 35So yangay na meydedna jinyo no peyoyaoyyan na ni Ama ta do to, do kanimwakwak da sira no ineynapo nyo so ji meylimoteng so onowned a tao. So ikapo na ji Yapo a kato nangayan do anak ni Peylecya a meyngaran so Sacyadiya a niwakwak da do panaralayan a masngen do patanatanangan so nakem si Ama ta do to. 36To ko na macitangayan jinyo am o pasingsingtan ko do nimwakwak sira tao am mangay do tao sicyaikwaya!
Ikarilaw na ni Yeso o tao do Yelosaleng
(Locya 13:34-35)
37“Inyo rana tao do Yelosaleng am nyo niwakwak o panoyonoywan na so ciring ni Ama ta do to a nyo kabhebhes jira wakwaken so yana nitovoy jinyo ni Ama ta do to a lamlamsoy na. Ko ikakza o kapahawa ko jinyo do kanginanawan nyo, akman so manok a komalopkop so ananak na no panid na. Am nyo jyakzan. 38So peymakarwan na jinyo ni Ama ta do to. 39Am ko pa ciring jinyo am ji nyo rana cita yaken an, todangay do pancyan nyo no, ‘Azwazwain ta o mai a nitovoy ni Ama ta do to.’ ”#23:39 Anwanood 118:26.
Currently Selected:
Matay 23: snt
Tõsta esile
Share
Kopeeri
Want to have your highlights saved across all your devices? Sign up or sign in
The Bible Society in Taiwan