Matay 26
26
Naknakmen da o kawakwak da si Yeso
(Make 14:1-2; Locya 22:1-2; Yowani 11:45-53)
1Teyka na ni Yeso o ciring na am maniring do macinanao jya am, 2“Nyo katenngan o na kadwa rana araw no yakapamaring so kanen do Iyeci.#26:2 O ipamaring da so kanen am isaray da ji Ama ta do to o kaniomzat na jira do kanginanawan da no ineynapo da no kakwa. Mangay o kapanazang da no Nipamnekan na ni Ama ta do to a tao a padketen do jyojika.”
3No kano nang am o panipanirsirngen no mapatanatanang so nakem a kano kamanrarakehan da am malovot sira meysirisiring do vahay no kabtekan da panirsirngen no mapatanatanang so nakem da si Ama ta do to a meyngaran so Keyava. 4Naknakmen da o karakep da si Yeso a wakwaken da do ikabo no tao. 5Am maniring sira am, “Ji ta pa peyvazaya do ipamarimaring so kanen no tao, ta meyvonag sira o tao.”
No kapaglo na ni Madiya so mahangno a haneng do oo ni Yeso
(Make 14:3-9; Yowani 12:1-8)
6Amyan si Yeso do Potani a ili am nimyan do vahay da da Simong. Iya o nimlabyab so kolit no kakwa. 7Amyan so asa ka mavakes a nimangai so asa ka tagaw a kapnowan no masingat a mahangno a haneng. Macihanghang jira koman si Yeso am paglowen na do oo ni Yeso. 8Macita da no macinanao jya am maoya sira so onowned. Maniring sira am, “To na gagidan ori am 9ikongo peypeypangayan no akman sang. Jingbeywani o yatey masingat a haneng ang. Apyapya rana o kapamalit nya so nizpi a ipanidong so ikasi a tao.” 10Maniring jira si Yeso do pakamizngan na sya am, “Nyo kazyakan no mavakes ang. O vazay na jyaken am ney yapya na vazay. 11Ta yamasangib sira o makasi a tao a yamacikaop jinyo. So ji na salici jinyo no kasidong nyo sira. Am yaken am ko jyasangib, ta yalikey rana o ipacikaop ko jinyo. 12O na paglowan do oo ko no mavakes so mahangno a haneng am yavat na ori do bobwan da jyaken. 13To ko na macitangayan jinyo am no ipeylimwang o Mapasaray a Ciriciring na ni Ama ta do to do karawan eya am abo ji makalavat so mina vazay na jyaken no mavakes eya.”
Naknakmen na ni Yota o kapanazang na ni Yeso
(Make 14:10-11; Locya 22:3-6)
14Amyan do rarwa so ikakarwan a macinanao ji Yeso so asa ka tao a meyngaran so Yota a tao do Isecyadi. Iya rana am nimangay do panipanirsirngen da no mapatanatanang so nakem da si Ama ta do to. 15Maniring am, “No si itoro ko jinyo si Yeso am amyan so nakem nyo jyaken an?” Karahan am mangap sira so atlo a poo (30) a nizpi a itoro da jya. 16Nimacipinda do dang o ji na rana pehmai ji Yeso a itoro jira.
Tomalakanen sira so pamaringan da so kanen
(Make 14:12-16; Locya 22:7-13)
17Omanam o kasaraw do ipamaring da so kanen a iyakan da so ji nimimway a pang am pacicin da si Yeso no macinanao jya. Maniring sira am, “Do wanjin mo tovoyan jyamen a tomalakanen so pamaringan ta so kanen do Iyeci.” 18Maniring si Yeso am, “Angay kamo do ili. Si makasinmo kamo so tao am si maniring kamo jya am, ‘Kwan na no yamnanao jyamen am: Yarana marateng o araraw no ikawakwak ko. So yana raran so macinanao jya yamangay do vahay nyo a yamamaring so kanen do Iyeci.’ ” 19Karahan am to da mangozai o ciring ni Yeso a somdep do vahay a mapeykakasa so yaven da.
Pazimanen ni Yeso o keyyan no manazang nya
(Make 14:17-21; Locya 22:21-23; Yowani 13:21-26)
20Maseyrem am macihanghang si Yeso do rarwa so ikakarwan a macinanao jya. 21Koman sira am maniring si Yeso jira am, “To ko na macitangayan jinyo am yamyan jinyo so yasa ka tao a yamanazang nyaken.” 22Mamizing da ori am marahet o aktokto da no macinanao jya. Am ori o nikateyteyras da manangangay nya ji Yeso. Maniring sira am, “Mo Panirsirngen, yaken ori an?” 23Maniring si Yeso am, “O yamapazanod so lima na jyaken a yatomahem so kanen na do kakanan am iya ori o yamanazang nyaken. 24Akman so ciring do Seysyo, ta mangay o kawakwak da so Nipamnekan na ni Ama ta do to a tao. Am o manazang nya tao am to makasi. Apyapya rana o kaji na nimatazakan a tao do karawan.” 25O manazang ni Yeso a tao a meyngaran so Yota am maniring am, “Mo Mangnanao, yaken ori an?” Maniring si Yeso am, “Mo na to yoyoi o na ka imo.”
Ney manowji rana pamaringan da so kanen ni Yeso a kano macinanao jya
(Make 14:22-26; Locya 22:14-20; 1 Kedinto 11:23-25)
26Koman sira am ahapen ni Yeso o pang a isaray na ji Ama ta do to a kakcikcil na sya a itoro do macinanao jya. Maniring am, “Ahap kamo a kakan nyo sya, ta kataotao ko ya.” 27Makarahan am ahapen na o kopo a yanan no potaw cyo a isaray ji Ama ta do to a katoro na rana nya jira. Maniring am, “To kamo a mimin a amyop sya. 28Oya rana am rala ko a nimvoyog a omaing do aro a tao a omvonas so raraten da. O rala ko rana ya am yongkad nyo do vayo a pangozayan nyo a ciring na ni Ama ta do to. 29To ko na macitangayan jinyo am ji ko na ngyop so potaw cyo a mangay do araraw no ikeypirwa ko a macikaop jinyo do teyngato, no si papwen na ni Ama ta do to o katalamozong na no vayo a karawan.”
30Meyyanwanood sira so asa ka anwanood a sarayan da ni Ama ta do to a kapakowbot da rana a mangay do meyngaran so Kanlan a tokon.
Pazimanen na ni Yeso ji Pite o kalalas na jya
(Make 14:27-31; Locya 22:31-34; Yowani 13:36-38)
31Makarahan am maniring si Yeso do macinanao jya am, “Sicyamahep eya am mamimin kamo a amlikolikod jyaken a peymakarwan. Ta maniring do Seysyo am ‘Wakwaken ko o mapamangan so kagling a kapeyvwak da no kagling.’#26:31 Sacyadiya 13:7. 32Am no si mirwa ko a mavyay am manmanma ko a ka ninyo a mangay do Cyadidi.” 33Maniring si Pite ji Yeso am, “Tana peymakarwan da imo no karwan no tao am jyabo kakaro ko jimo a.” 34Maniring si Yeso ji Pite am, “To ko na macitangayan jimo am sicyamahep eya am no si omanam o manok a tomazokokok am ipitlo ka omalalas jyaken.” 35Maniring si Pite am, “Tana macizanod ko na jimo a mawakwak am jyabo kato ko ngalalasan jimo a.” O karwan da no macinanao jya am akman sang o ciring da.
Inozi na ni Yeso do Kesimani
(Make 14:32-42; Locya 22:39-46)
36Nimangay si Yeso a kano macinanao jya do meyngaran so Kesimani. Maniring si Yeso jira am, “To kamo ngyan do jya, ta mangay ko meynozi do kwang ito.” 37Karahan am palolwen na si Pite a kano rarwa ka anak no meyngaran so Sipitay. So niyapo na rana dang no keyngen na rana so onowned ni Yeso. 38Maniring jira am, “Yako toda jyangay so inawan a yamazabab so onowned. So ipacizanod nyo jyaken do jya meytataziman.” 39Omalam a meypanam am meyrorokma. Maniring do inozi na am, “Mo Ama, no si apyahen mo am ji mo norwan jyaken o yatey rako a alalaw ko. Am ji mo na mangozai o nakenakem ko, ta ahahapan mo na sya.”
40Meysinaoli a mangay do tatlo a ka macinanao jya am macita na sira mitkeh. Maniring ji Pite am, “Manngwa, ji nyo nahap o asa ka vatvatek a ipacizanod nyo jyaken a meytataziman? 41Meytataziman kamo a meynozi an, ta kalittan kamo an. Tana nyo apyahen do onowned nyo am nyo jyapakongo o nyo kapeynozi.”
42Maniring do ipidwa na kangay a meynozi ni Yeso am, “Mo Ama, no ji mo amya o alalaw ko a komaro jyaken am to mo na mangozai o nakenakem mo.” 43Meysinaoli do macinanao jya am macita na pa sira mitkeh, ta tey makaha rana sira. 44Karwan na sira am ikeypitlo na rana ori a mangay meynozi. To meyyangay o ciring na kano kapanmanma na meynozi. 45Karahan am meysinaoli do macinanao jya am maniring am, “Kamo pa mitkeh? Kamo pa meywalam? Cita kamo o Nipamnekan na ni Ama ta do to a tao a yarana makeykai a ipanazang do meyraraten a tao. 46Kayokay kamo na, ta mangay tamo na. Cita kamo o yamanazang nyaken a tao a yarana mai.”
Rakpen da si Yeso
(Make 14:43-50; Locya 22:47-55; Yowani 18:3-12)
47Ji pa vitos o ciring na ni Yeso am mai rana si Yota a ikararwa da so ikakarwan no macinanao jya a kapacilolo da no aro a tao a meyhavit so takzes a kano sisipzot da kayo. Sira ori am nitovoy da no panipanirsirngen da no mapatanatanang so nakem da si Ama ta do to a kano kamanrarakehan da no tao do Yotay. 48Amyan so nipaziman na sira no manazang ni Yeso a tao. Maniring am, “O rapongen ko a tao am ori o rakpen nyo.” 49Makaranes si Yota am to meytopos a mangay do tangain ni Yeso. Maniring am, “Mo Mangnanao, kokay.” Karahan am rapongen na rana si Yeso. 50Maniring si Yeso am, “Mo kahakay, peyvazay rana o yamo ipeynanakem a vazay mo.” Karahan am paciralayan da na no tao a omrakep si Yeso. 51O nimacihza ji Yeso a tao am amyan jira so asa to rana ngahap so takzes na pacipasen do talinga na no lamlamsoy no panirsirngen no mapatanatanang so nakem da si Ama ta do to a kakas na no asa ka talinga na. 52Maniring si Yeso jya am, “Pasoot rana o takzes mo, ta o mangap so tao no takzes am akman sang a mangay da wakwaken no takzes. 53Manngwa, mo jyatenngi yaken? Ta si tawagan ko si Ama am jyabo kaji na manovoyan so makazivo a tinsi a somidong jyaken a. 54Am ji kongmana so sang o nakem ko. Ta makongo so wanjin a yatodey mangononong do ciring a yadomket do Seysyo, do keyyan no makdeng a vazay a mangay jyaken.”
55Karahan am maniring si Yeso do aro a tao am, “Kamo mapalolo so takzes a kano sisipzot a yamrakep jyaken? Nyo patpehen yaken do manakaw a tao? Ko mangday a yamangnanao so tao do rako a panaralayan am nyo ji rakpa yaken. 56Am o na todey mangononongi no aro a vazay eya am manoyong o ciring da no panoyonoywan na so ciring ni Ama ta do to do Seysyo a yatodey mangononong.” Karahan am peykarokarwan da rana si Yeso no macinanao jya a meyvwak.
Pacicin da si Yeso do peykeykaygyan da
(Make 14:53-56; Locya 22:66-71; Yowani 18:13-14,19-24)
57O nimrakep si Yeso a tao am yangay da si Yeso do vahay no panirsirngen no mapatanatanang so nakem da si Ama ta do to a meyngaran so Keyava. Amyan sira do dang o mangnanao no iwawalam ni Ama ta do to a kano kamanrarakehan a meykaygi. 58To na macyazizazawi si Yeso ni Pite. Makaranes sira do tezantehed no vahay no panirsirngen da no mapatanatanang so nakem da si Ama ta do to am somdep si Pite a kapacihezsad na do pamzaten da tao a tomita so vazay da ji Yeso no aro a tao. 59O panipanirsirngen no mapatanatanang so nakem da si Ama ta do to a kano aro a meykaygi a tao am meykala sira so tao a mangamaog so iraherahet da si Yeso a ciring a iwakwak da sya. 60Tana aro tao a meykala so iraherahet sya am ji sya makakala. Mownay am maniring o rarwa ka tao am, 61“Nipanci no tao ang o kabalinas na so yata raralayan ni Ama ta do to a kapatnek na rana sya do ikatlo na araw.” 62To rana meytatanek o panirsirngen no mapatanatanang so nakem da si Ama ta do to. Maniring ji Yeso am, “Manngwa, yamyan so yamo pasapahen do ciring da no tao a yada iraherahet jimo ang?” 63Am abo o asa ka ciring a pasapahen na jya ni Yeso. Ipirwa na pacicin no panirsirngen no mapatanatanang so nakem da si Ama ta do to am maniring ji Yeso am, “Ko na to mancyan o ngaran ni Ama ta do to a yamanci nimo a manci nya jyamen so manoyong rana ciring mo. Manngwa, manoyong ka ya Misayya, Anak na ni Ama ta do to an?” 64Maniring si Yeso am, “Yamanoyong o mo ipanci ang. Am ko pa ipanci jinyo am macipinda sicyaikwaya o kapakacita nyo jyaken a Nipamnekan na ni Ama ta do to a tao a amlisna do wanan na ni Ama ta do to a maciralay do cinalab a meygegcin do karawan.”
65Mamizing na ori no panirsirngen no mapatanatanang so nakem da si Ama ta do to am to na rana misipisinga o ayob na. Maniring am, “Na to ngolala si Ama ta do to no ciring na. Taosya rana o kakala ta so karatan na. Tamo nimamimin a yanimakamizing so na iraherahet si Ama ta do to. 66Manngo kamo.” Maniring sira am, “Na kakzeben na kawakwak.” 67Karahan am cicippan da o moing na a kapatoki da pa jya kasiplang da sya. Maniring sira am, 68“Pancyaney, mo Misayya. Sino o yanimbakbak jimo ang.”
Alalasan ni Pite si Yeso
(Make 14:66-72; Locya 22:56-62; Yowani 18:15-18,25-27)
69Amhezsad si Pite do pantaw am amyan so lamlamsoy da a mavakes a mangay jya. Maniring am, “Imo asyo o yamacihcihza do tao do Cyadidi a Yeso?” 70Maniring si Pite a omalalas jya do tangain no aro a tao am, “Ko jyatenngi o mo ipanci ang.” 71Karahan am mangay do ngoso no pazezevngen am macita na pa no asa ka mavakes a lamlamsoy da. Maniring do aro a tao a amyan dang am, “O tao eyto am kararay na ori no tao do Nasale a meyngaran si Yeso.” 72Maniring si Pite do ikeypirwa na omalalas jya am, “Ko jyatenngi o tao a nyo ipanci ang.” 73Mownay am to da rana limota si Pite no meytatanek do dang a tao. Maniring sira ji Pite am, “Ka manoyong a kararay da nira ori. Ta yameyyangay o ciriciring nyo.” 74Maniring si Pite am, “Ko jyatenngi o tao ang. No yamalas o ciring ko am cyaha, ta amyan si Ama ta do to a mapasingsingkad jyaken.” Teyka na ori a ciring am tomazokokok o manok. 75Karahan am manakem na rana ni Pite o mina ciring na ni Yeso a manci no, “Do yanam no manok a tomazokokok am ipitlo ka omalalas jyaken.” Karahan am makowbot rana si Pite a kapeykaoo na omzezezeng rana amlavi.
Currently Selected:
Matay 26: snt
Tõsta esile
Share
Kopeeri
Want to have your highlights saved across all your devices? Sign up or sign in
The Bible Society in Taiwan