Lũka 7
7
Yesu akalamaya omukobe wʼOmuroma
(Mt 8.5-13)
1Neryo Yesu abere abibuga eribwira abandu emyatsi yosĩ eyĩ, mwingira eKapernaũmũ. 2Neryo habya omukulu wʼabasĩrĩkanĩ bʼAbaroma oyuwite omugombe wuwe mwanze. Neryo omugombe oyo inialwere hakũhĩ nʼerihola. 3Omugulu omukulu oyo owa engulu ya Yesu, mwatuma abakulu bʼAbayũda uku Yesu erĩmũbũlya ati ase alamaye omugombe wuwe. 4Abakulu abo mobahĩka uku Yesu, mobamulemba-lemba kutsibu bati, Omundu oyũ atolere ĩwamũwatĩkya. 5Anzĩre ekihanda kyetu, kandi abĩrĩtũhĩmbĩra enyũmba yetu yʼerĩhĩndanamo. 6Neryo Yesu mwagenda nabo. Abere ahĩka hakũhĩ nʼenyũmba, omukulu wʼabasĩrĩkanĩ mwamutumira abĩra buwe ati. Mukama, Sũyĩlũhaye, kusangwa sinyitolere ukingira omo nyũmba yage; 7kandi nage sĩnyĩyĩganzĩre nga nyitolere erĩkũhĩkako. Nĩkwa ũbũge kĩnywa kiguma, nʼomugombe wage asyalamĩbwa. 8Kusangwa nage ngwite abakanyihamula, kandi nyiwite abasĩrĩkanĩ bage, ngabũga nʼoyũ nyiti, Ugende, iniagenda; nʼoko gundi nyiti, Wase, iniasa; kandi ngabwira omukobe wage nyiti, Kola ekĩ, iniakoiakyo. 9Neryo omugulu Yesu owa ebĩ mwaswekera omukulu oyũ, neryo mwakebera endeko eyamukwama ati, Ngababwira nyiti, Sinditabana erĩkĩrya ĩnene ngʼerĩ, kutse omo Baĩsraelĩ. 10Abakwenda abo mobasuba omo nyũmba yʼomukulu oyo, neryo mobeya omugombe oyo iniabirilama.
Yesu akalũbũkaya omugala wʼomũkwakalĩ
11Neryo enyũma wʼaho akatambĩ kake Yesu mwaya oko mũyĩ owakahulawa mo Naĩna. Kandi abiga buwe nʼabandu bangi mobagenda haguma naye. 12Neryo abere ahĩka hakũhĩ nʼolũkyo lwʼomũyĩ oyo, mweya bakaheka ekĩnda kyʼomundu. Oyo abya abũtĩrwe ĩyowene na nyĩnya wuwe. Kandi nyĩnya abya mũkwakalĩ, nʼendeko nene yʼomũyĩ oyo yabya haguma naye. 13Neryo mugulu Omukama amulolako, mwamuganyira, mwamubwira ati, Sulire. 14Neryo Yesu mwahĩkaho mwatũla okwʼĩsandũkũ eriri mwʼekĩnda, nʼabandu abahekĩreryo mobimana. Nĩkwa Yesu mwabũga ati, Mũlwana, ngakubwira nyiti, Hangana! 15Nʼomũholĩ oyo mwĩkala, mwatsũka erĩbũga, neryo Yesu mwamũhererya nyĩnya wuwe. 16Neryo abosĩ mobubaha, mobatsũka eripipa Nyamuhanga, bati, Omũmĩnyererĩ mukulu abirihangana omo katĩkatĩ ketu! Kandi, Nyamuhanga abĩrĩhĩka erĩwatĩkya abandu buwe. 17Nĩkwa engulu eyĩ moyagenda-genda eYũdea hosĩ, nʼomo bihugo byosĩ ebĩhererenĩe naho.
Abakwenda bakalũa ewa Yoane Mũbatĩsya
(Mt 11.2-19)
18Nĩkwa abiga ba Yoane mobamubwira emyatsi yosĩ eyĩ. 19Neryo Yoane mwabirikira abiga buwe babiri, mwatumabo oko Mukama ati, Nina we oyukasa, kutse tulindirire gundi kwehĩ? 20Nʼomugulu bahĩka uku Yesu, mobabũga bati,
Yoane Mũbatĩsya amatutuma ukʼuwe ati, Nina we oyukasa, kutse tulindirire gundi kwehĩ? 21Nʼoko ndambĩ eyo nyisa-nyisa Yesu mwalamya bandu bangi kwʼamakonĩ wabo, nʼesyondwala, nʼebĩrĩmũ bibi; kandi mwaha esyondĩmatĩme nyingi erilangira. 22Neryo Yesu mwasũbĩrya abakwenda abo ati, Mugende, mubwire Yoane, ebyo mwabirilangira nʼebyo mwabĩrĩowa, muti, esyondĩmatĩme sirimulangira, nʼebirema birimugenda, abahaga bakalamĩbawa, abatsiha balĩmowa, abaholĩ balĩmũlũbũkĩbwa, nʼEngulu Yowene ĩkatũlawa oko bera. 23Nʼobutseme buli oko yutehũkahũkaya omutima busana nage.
24Neryo abakwenda ba Yoane babere babigenda, Yesu mwatsũka erĩbũga nʼesyondeko busana na Yoane ati, Mwaya omo mbwarara eriyalola mʼũkũkĩ kwehĩ? Mwayalangira ekibingu ekikatengatenganĩbawa nʼerihunga kwehĩ? 25Nĩkwa mwayayo erilangirakĩ kwehĩ? Muti, Omundu oyo wambite esyongimba nyolo-nyolo kwehĩ? Mũlebaye, abambite esyongimba sĩkangabasenĩe nʼabakalya ebisi-bisi bali omo manyũmba wʼabami. 26Nĩkwa momwayayo eriyalola kũkĩ kwehĩ? Muti, Omũmĩnyererĩ kwehĩ? Ega, ngababwira nyiti, Mwabirilangira oyũlengĩre omũmĩnyererĩ. 27Yoyo Masako akahula ati,
Lebaya, ngatuma omukwenda wage embere syenyũ,
Oyo wasyowanĩa enzira yawe embere syawe.
28Kandi Yesu mwabũga ati, Ngababwira nyiti, Yoane ni mukulu kwilaba abandu bosĩ abakabutawa; nĩkwa Omuke kutsibu omo bwami bwa Nyamuhanga amũlengĩre.
29Neryo omugulu abandu bosĩ nʼabasolesya bowa ebĩnywa ebĩ, mobaganza Nyamuhanga kwʼali wʼerĩbanza, kusangwa mobabatĩsĩbwa na Yoane. 30Nĩkwa Abafarĩsayo nʼabakangĩrĩrya bʼEmigambo mobagana erisonda lya Nyamuhanga busana nabo, isibetabatĩsĩbwa na Yoane.
31Neryo Yesu ati, Nasyalĩngĩrĩranĩa abandu ba sesene bo nakĩ kwehĩ? Kandi basosĩre ngakĩ kwehĩ? 32Bali ngʼabana abĩkere omo katale ibakabirikirana bati, Twabiribabuhira amalenga, neryo momutetasata; motwimba Olwimbo lwʼerita omundu, nenyũ momutetalira. 33Kusangwa Yoane Mũbatĩsya mwasa iniakatsira akalyo, nʼerĩtendĩpũlya ebĩnyũ; nenyũ muti, Ali ko mbĩnga. 34Omugala wʼOmundu abĩrĩhĩka, iniakalya nʼerĩpũlya; nenyũ muti, Lebaya, owʼomururu, nʼomũkũndĩrya, omwĩra wʼabasolesya nʼabakola-nabi. 35Abandu bosĩ abakalĩga amenge wa Nyamuhanga bakakangaya kwʼamenge ayo ni wʼekwenene.
Yesu akalira ewʼOmũfarĩsayo ye Sĩmonĩ
36Neryo Omũfarĩsayo muguma mwabirikira Yesu erirya haguma naye. Neryo mwaya omo nyũmba yʼOmũfarĩsayo oyo, neryo mwĩkala okwʼirya. 37Neryo oko mũyĩ oyo habya omũkalĩ mukola-nabi. Neryo abere aminya ko Yesu abya akalira omo nyũmba yʼOmũfarĩsayo oyo, neryo mwaleta erĩtambya lyʼerĩbwe lyowenenga lyʼamagũta awakakumba ndeke kutsibu. 38Neryo mwimana enyũma wa Yesu hakũhĩ nʼebisando biwe, iniakalira nʼerĩtsapya ebisando bya Yesu omo mĩsonĩa yiwe. Neryo mwasangula ebisando bya Yesu omo nzwiri syʼomutwe wuwe, nʼeriryatsirirabyo, neryo mũtũlĩra amagũta ayo awakakumba ndeke kutsibu oko bisando biwe. 39Neryo omugulu Omũfarĩsayo oyo wabirikira Yesu alangira ekyo, mwayibwira omwisi wuwe ati, Kumbe omundu oyũ nga nĩ mũmĩnyererĩ, kumbe angaminyerera omũkalĩ oyũkamũtũlako, nʼomũsĩndo wuwe kwʼali mukola-nabi. 40Neryo Yesu mwabwira Sĩmonĩ ati, Sĩmonĩ nyiwite ekyʼerikubwira. Naye ati, Mũkangĩrĩrya, ũtũlego. 41Neryo Yesu mwabũga ati, Mohabya omũbwekĩ muguma wʼesyofranka oyo wabweka abandu babiri. Abandu aba babya kʼomwĩnda, omuguma wʼesyofranka magana atanu, nʼogundi amakũmĩ atanu. 42Babere babula ebyʼerĩmũtũha, omũbwekĩ oyũ mwabuyira ababiri bosĩ. Nĩkwa nindi wa kubo yo wasyamwanza kwilaba kwehĩ? 43Sĩmonĩ mwamũsũbĩrya ati, Mbino oyo abuyira bingi. Neryo Yesu mwamubwira ati, Wamatswera ndeke. 44Neryo mwakebera omũkalĩ oyo, mwabwira Sĩmonĩ ati, Wamalangira omũkalĩ oyũ kwehĩ? Mongingira omo nyũmba yawe; mutetamba amagetsi busana nʼebisando byage, nĩkwa iye abĩrĩtsapya ebisando byage omo mĩsonĩa yiwe nʼerisangulabyo omo nzwiri siwe. 45Mũtetariyĩkokya nʼerinyiryatsirira; nĩkwa iye erĩtsũka omugulu indingira sĩalĩtũmbya eriryatsirira ebisando byage. 46Mutetahakabya omutwe wage wʼamagũta, nĩkwa iye abĩrĩhakabya ebisando byage omo magũta awakakumba ndeke kutsibu. 47Kikaleka inakubwira nyiti, Ebibi biwe bingi byabiribuyirwa, kusangwa abirianza kutsibu; nĩkwa oyukabuyirawa bike, akanza hake. 48Neryo Yesu mwabwira omũkalĩ oyo ati, Ebibi byawe byamabibuyirwa. 49Neryo ababya okwʼirya haguma naye, mobatsũka erĩbũga bati, Oyũ nindi oyukabuyira ebibi kwehĩ? 50Neryo Yesu mwabwira omũkalĩ ati, Erĩkĩrĩrya lyawe lyamakũlamya; ugende buholo.
Currently Selected:
Lũka 7: KB80
Tõsta esile
Share
Kopeeri
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.