Lũka 6
6
Omwatsi wʼeSabato
(Mt 12.1-8; Mk 2.23-28)
1Yesu abere akalaba omo malima wʼengano omo kiro kyʼeSabato. Abiga buwe babya bakatwa amakũndĩ wʼengano ĩbakanyũgũsũlago omo byala byabo ibanemulyayo. 2Nĩkwa abandi bʼoko Bafarĩsayo mobabũga bati, Busana nakĩ mukakola ebyo Migambo ĩkaganaya erikola omo Sabato kwehĩ? 3Yesu mwasũbĩryabo ati, Simwetasoma ekyo Dawĩdĩ akola omugulu akwa enzala, iye nʼabandu buwe? 4Mwingira omo nyũmba ya Nyamuhanga, kandi mwĩmya amandu awahigulawa busana na Nyamuhanga. Neryo mwalya kugo, kandi mwahago oko bandu buwe. Nĩkwa Emigambo ĩkaganaya abandu erirya kugo, ba nʼabahererĩ basa. 5Neryo Yesu mwabwirabo ati, Omugala wʼomundu ni Mukama wʼeSabato.
Omundu wʼebyala bĩrehemĩre
(Mt 12.9-14; Mk 3.1-6)
6Oko yindi Sabato Yesu mwaya omo nyũmba yʼerĩhĩndanamo mwakangĩrĩrya. Nʼeyo habya omundu oyũlehemĩre kwʼebyala biwe byʼamali. 7Neryo abakangĩrĩrya bʼEmigambo nʼAbafarĩsayo mobalebya Yesu ngʼakandĩlamya omo kiro kyʼeSabato, ibatoka erimutsongera. 8Nĩkwa Yesu mwaminya obũlengekanĩa bwabo, neryo mwabwira omundu oyũlehemĩre kwʼebyala biwe ati, Uhangane, wimane embere eno. Neryo mwahangana, mwimanaho. 9Neryo Yesu mwabwirabo ati, Ngababũlaya nyiti, nga linatolere omo Migambo erikola ebibuya omo kiro kyʼeSabato, kutse erikola nabi, erĩlamya engebe yʼomundu, kutse erĩheryayo kwehĩ? 10Neryo Yesu mwatĩmbya ameso wuwe oko bosĩ, neryo mwabwira omundu oyo ati, Ulambule ebyala byawe, Neryo omundu oyo mwakola atya, nʼebyala biwe mobyalama. 11Nĩkwa mobahitana kutsibu, mobakanĩa haguma ebyo bangakola uku Yesu.
Yesu akayisoga abakwenda ĩkũmĩ nʼababiri
(Mt 10.1-4; Mk 3.13-19)
12Oko mugulu oyo Yesu mwaya oko kitwa eriyasabirayo, neryo mwasiba omo kiro kyosĩ erisaba Nyamuhanga. 13Neryo bwabere bwakya, mwabirikira abiga buwe, neryo mwayisoga ĩkũmĩ nʼababiri kubo, mwahulabo mo bakwenda. 14Ye Sĩmonĩ, oyo ahula mo Petero, na Anderea mugala wabo; Yakobo na Yoane; Fĩlĩpo na Bartolomayo; 15Matayo; na Toma; na Yakobo mugala wa Alufayo, na Sĩmonĩ oyo wahulawa mo Zelote; 16na Yũda Ĩskarĩota, oyo wamuhotera.
Yesu akalamaya nʼerĩkangĩrĩrya
(Mt 4.23-25)
17Neryo Yesu mwandagala akalũa oko kitwa, neryo mwahangana ahabondere haguma nʼendeko nene yʼabiga buwe. Kandi endeko nene yʼabandu yabyaho eyalũa eYũdea hosĩ, nʼeYerũsalema, nʼoko mũsĩke wʼeTĩro nʼeSĩdona, mobasa erimuhulikirira, nʼerĩlamĩbwa kwʼesyondwala syabo. 18Nʼabagalawa nʼebĩrĩmũ bibi, mobalamĩbwa. 19Nʼabandu bosĩ mobasonda-sonda erĩmũtũlako, kusangwa obũtokĩ bwabya bũkamũlũako nʼerĩlamya abosĩ.
Obutseme nʼobũlĩge
(Mt 5.1-12)
20Nʼerisamalira abiga buwe, Yesu mwatsũka erĩbũga ati,
Obutseme buli nenyũ ĩnywe bera,
Kusangwa obwami bwa Nyamuhanga nĩ bwenyũ!
21Obutseme buli nenyũ ĩnywe mũkakwa enzala yo lino, Mwasyũgũtĩbwa!
Obutseme buli nenyũ ĩnywe mukalira lino, kusangwa mwasyaseka!
22Obutseme buli nenyũ omugulu abandu bakabakwa obusu, nʼeribagana, nʼeribatsuma, nʼeribahula bati, Muli babi, busana nʼomugala wʼOmundu! 23Mutseme ekiro ekyo, muyisumbe omo butseme, kusangwa, oluhembo lwenyũ ni lungi elubula; kusangwa aboso-kulu wabo mobakola abamĩnyererĩ bo batya. 24Nĩkwa obũlĩge kwĩnywe abateke, kusangwa mwabĩrĩkala mbolere! 25Obũlĩge kwĩnywe mwabĩrĩũgũta lino, kusangwa mwasyawira! Obũlĩge kwĩnywe mukaseka lino, kusangwa mwasyasũsũmana nʼeririra! 26Obũlĩge kwĩnywe omugulu abandu bosĩ basyabahula ndeke, kusangwa aboso-kulu wabo mobakola abamĩnyererĩ bʼamabehĩ bo batya.
Erianza esyonzĩgũ
(Mt 5.38-48; 7.12a)
27Nĩkwa ngabũga nenyũ ĩnywe mũkanyowa nyiti, Mwanze esyonzĩgũ syenyũ, abakabakwa obusu mukolerebo ndeke. 28Mutsumule abakabatakira, musabire abakabakola nabi nʼepono. 29Oyũkakũswĩraya okwʼĩtema, ũmũbĩndũkĩraye nʼerindi; nʼoyũkakũhũnga kwʼerĩkotĩ ryawe, uleke aheke nʼekanzu yawe nibya. 30Uhe obuli mundu oyũkakũbũlaya ekindu, nʼoyũkakũhũnga kwʼebyawe, sũmũbũlayebyo kandi. 31Ngoko mwanzĩre abandu ibabakolera, nenyũ ko munakolerebo mutya. 32Kandi mwamanza ababanzĩre, ĩmwamowanĩa kyahĩ kwehĩ? Kusangwa abakola-nabi nabo bakakola batya. 33Kandi mwamakola ndeke abakabayira ndeke, ĩmwamowanĩa kyahi kwehĩ? Kusangwa abakola nabi nabo bakakola batya. 34Kandi mwamabweka abandu imune nʼamaha wʼerĩswatũhwa, ĩmwamowanĩa kyahi kwehĩ? Abakola-nabi nabo bakabweka oko bakola-nabi ĩbaswatũhwa ebiringene nabyo. 35Nĩkwa mwanze esyonzĩgũ syenyũ, mokolerebo ebibuya, mubweke, simusonde eribwekulwa. Nʼoluhembo lwenyũ lwasyabya lungi, kandi nenyũ mwasyabya bagala bʼOwendata Kutsibu; kusangwa ni mwenge oko batesĩma nʼabandu babi. 36Mubye nʼeriganyira ngoko Tata wenyũ ali nʼeriganyira.
Eritswera abandi
(Mt 7.1-5)
37Simutswere abandi, na Nyamuhanga siendisyabatswera; sĩmũhĩre abandu bʼomo musango, neryo Nyamuhanga siendisyabahĩra omo musango; mubuyire, neryo Nyamuhanga asyababuyira. 38Mũhĩtaye, na Nyamuhanga asyabaha, mwasyabagalira olulengo lowene, olũsokĩre, olũtsĩngĩre, oluli kwʼomutswago. Kusangwa olulengo olo mukalengamo, mwasyalengerwalo.
39Neryo Yesu mwatwĩrabo omũsyo ati, Endĩmatĩme yanganatoka erisondola eyindi ndĩmatĩme kwehĩ? Ababiri sibendisyatogera omo kyũna kwehĩ? 40Omwiga sĩalengĩre omũkangĩrĩrga wuwe; nĩkwa obuli mundu ukiga amabibuga erĩĩgĩsĩbwa asyabya ngʼomũkangĩrĩrya wuwe.
41Kandi busana nakĩ ukasamalira akati akali omo lĩso lya mũlĩkyenyũ, nĩkwa sulilangira ekĩtĩka ekiri omo lĩso lyawe kwehĩ? 42Kutse wangatoka eribwira mũlĩkyenyũ uti kwehĩ? Uti, Mũlĩkyetu, uleke nyilole akati akali omo lĩso lyawe, nawe isulilangira ekĩtĩka ekiri omo lĩso lyawe. Uwe mũtebya, Ũtsũke erilola ekĩtĩka ekiri omo lĩso lyawe, neryo wasyalangira ndeke erilola akati akali omo lĩso lya mũlĩkyenyũ.
Omuti nʼebĩgũma byago
(Mt 7.16-20; 12.33-35)
43Kusangwa sihali omuti owene owakaheta kwʼebĩgũma bibi, kandi omuti mubi owakaheta kwʼebĩgũma byowene. 44Obuli muti akaminyikala busana nʼebĩgũma byago. Kusangwa abandu sibalioha ebĩgũma byʼemĩtĩnĩ oko muti wʼemisakisaki, kandi sibalioha ebĩgũma byʼebĩnyũ oko kisaka kyʼamahwa.
45Omundu mubuya akahũlũkaya ebibuya byʼomo kigona kyʼemyatsi mibuya vʼomutima wuwe; nʼomundu mubi akahũlũkaya emyatsi mibi omo kigona kyʼemyatsi mibi yʼomutima wuwe. Kusangwa obuno bũkabũga ebyoswĩre omo mutima.
Abahĩmbĩ babiri
(Mt 7.24-27)
46Busana nakĩ mukanyahula mo Mukama, Mukama, isimulikola ebyo ngababwira kwehĩ? 47Obuli mundu oyukasa kwĩngye, kandi akowa ebĩnywa byage nʼerikolabyo ngandĩbakangya kwʼasosĩre. 48Asosĩre ngʼomundu wahĩmba enyũmba: mwatakula omwisi mo hali neryo mwahĩra ekibanza okwʼĩbwe. Neryo omugulu erigunga lyʼamagetsi lyasa, olũsĩ molwayĩswĩrya oko nyũmba eyo neryo molutatoka erĩsũka-sũkanĩayo, kusangwa yabya yĩhĩmbĩre ndeke-ndeke. 49Nĩkwa omundu oyũkowa ebĩnywa byage atekolabyo, asosĩre omundu oyo wahĩmba enyũmba yʼoko kitaka ahate kibanza; nʼolũsĩ molwayĩswĩrya kuyo, neryo-neryo moyatera, nʼerihera lyʼenyũmba eyo molyabya ĩnene.
Currently Selected:
Lũka 6: KB80
Tõsta esile
Share
Kopeeri
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.