Lũka 8
8
Abakalĩ abakolera Yesu nʼabiga buwe
1Enyũma wʼaho Yesu mwatsũka erilaba ehosĩ omo mĩyĩ nʼomo hĩyĩ, ĩnĩakatũlaganaya Engulu Yowene nʼerĩtũla omwatsi wʼobwami bwa Nyamuhanga. Abiga erĩkũmĩ nʼababiri mobagenda haguma naye, 2nʼabakalĩ nibya abalamĩbawa kwʼebĩrĩmũ bibi nʼesyondwala. Ye Marĩa oyukahulawa mo Magdalene, oyo walũsĩbawa kwʼesyombĩnga sirinda, 3na Yoana, muka Kũza, omũbĩkĩ wʼebindu bya Herode, na Susana, nʼabandi bakalĩ bangi ababya bakawatĩkya Yesu nʼabiga buwe omo bindu byabo.
Omũsyo wʼomũbĩbĩ wʼembuto
(Mt 13.1-9; Mk 4.1-9)
4Abandu mobahĩka uku Yesu bakalũa oko mĩyĩ mingi; nʼomugulu endeko nene yahĩndana haguma, Yesu mwatwa omũsyo ati,
5Omundu mwayabiba esyombuto siwe. Neryo omugulu abibasyo esindi mosyatogera oko mũsĩke wʼenzira; mosyalyatangirirwa, nʼesyonyonyũ syʼomo kyanya mosyatomengerasyo. 6Nʼesindi mosyatogera oko kitaka kyʼamabwe, nʼomugulu syalasa mosyuma kusangwa mosyabula amagetsi. 7Nʼesindi mbuto mosyatogera omo mahwa; nʼamahwa mwatasa haguma nasyo, mwakũsyasyo. 8Nʼesindi mbuto mosyatogera oko kitaka kyowene, Mosyalasa, mosyasohola esyombuto ĩgana. Omugulu Yesu abya akabũga emyatsi eyĩ, mwabya akabirikira ati, Oyuwite amatwĩ wʼerĩowa, owe!
Enzumwa yʼemĩsyo
(Mt 13.10-17; Mk 4.10-12)
9Neryo abiga mobabũlya Yesu enzumwa yʼomũsyo oyũ. 10Neryo Yesu mwasũbĩrya ati, Mwabirihabwa eriminya erĩkũmbo lyʼobwami bwa Nyamuhanga; nĩkwa abandi bakahabawa omo mĩsyo: neryo erilangira sibalangire, nʼerĩowa, sibaminye.
Yesu akakũmbũla omũsyo wʼomũbĩbĩ wʼembuto
(Mt 13.18-23; Mk 4.13-20)
11Nĩkwa enzumwa yʼomũsyo yeyĩ: embuto kye kĩnywa kya Nyamuhanga. 12Esyombuto esyatogera oko mũsĩke wʼenzira ni bandu abakowa; nĩkwa Satanĩ yĩkahĩka nʼerĩlũsya omwatsi gʼomo mitima yabo, ibatatoka erĩkĩrĩrya nʼerĩlamĩbwa. 13Esyombuto esyatogera oko kitaka kyʼamabwe ba bandu abakowa ekĩnywa nʼeriangirirakyo nʼobutseme. Nĩkwa ekĩnywa ekyo sikiribana emĩrĩhĩ; bakĩkĩrĩraya katambĩ kake, neryo oko mugulu wʼerirengwako, bakatswa. 14Nʼesyombuto esyatogera omo mahwa ni bandu abakowa; nĩkwa amaganĩryo nʼebindu nʼerĩyĩtsemesya lyʼengebe yʼeno, bĩkakũsaya ekĩnywa ekyo, neryo ikitera ndeke. 15Esyombuto esyatogera oko kitaka kyowene ba bandu abakowa ekĩnywa ekyo omo mutima ogowene wʼekwenene, ibakahambakyo ndeke omo mutima, neryo ibakahatikana, nʼerĩerya esyombuto syʼekĩnywa kya Nyamuhanga.
Etala omwisi wʼekibindi
(Mk 4.21-25)
16Nĩkwa sihali mundu oyũkakaya etala nʼerĩkũnĩngĩrayo omo kibindi, kutse erĩhĩrayo eyĩkwa oko ngyingo, nĩkwa akahĩrayo oko mbaniko, neryo abandu abakahĩkamo batoke erilangira etala. 17Kusangwa sihali ekĩbĩsamĩre ekitendisyamĩnyĩkalĩbwa, kutse erĩkũmbo eritendisyakũmbũlwa. 18Muyirenge busana nʼebyo mũkowa! Kusangwa omundu oyuwite kindu, asyahabwa ebindi, nʼomundu oyutawitekĩ asyasagulwa nʼekyo alwe aganĩrye ati awite.
Abagala babo Yesu na nyĩnya wuwe
(Mt 12.46-50; Mk 3.31-35)
19Neryo nyĩnya nʼabagala babo Yesu mobahĩka, nĩkwa mobataluka erĩhĩka hakũhĩ naye busana nʼendeko. 20Neryo omundu mwabwira Yesu ati, Koyo wawe nʼabagala benyũ banimene eyĩhya, bakasonda erikulolako. 21Nĩkwa Yesu mwasũbĩryabo ati, Koyo wage, nʼabagala betu ba bakowa ekĩnywa kya Nyamuhanga, nʼerikolakyo.
Yesu akakunga ekihunga
(Mt 8.23-27; Mk 4.35-41)
22Neryo ekiro kiguma Yesu mwingira omo bwato haguma nʼabiga buwe, neryo mwabwirabo ati, Tusokere eyisirya wʼengetsi. Neryo mobahongoka. 23Babere bakahongola obwato, Yesu mwayato. Neryo ekihunga mokyandagalira omo ngetsi, nʼobwato mobwasonda erĩũsũla mwʼamagetsi, mobabya omo bwĩko. 24Neryo abiga mobahĩka uku Yesu, mobamũbũkya bati, Mukama, Mukama, tukahwa! Neryo Yesu mwahangana, mwakunga ekihunga, nʼerikarama lyʼebisunda, nabyo mobyatekana mohahita esĩsyerere. 25Neryo Yesu mwabwira abiga ati, Erĩkĩrĩrya lyenyũ liri hahi kwehĩ? Nabo mobubaha, mobasweka, ibakabwirana bati, Omundu oyũ nindi Oyukahana ebihunga nʼamagetsi, ibyamukenga kwehĩ?
Yesu akahiyira esyombĩnga syʼeyĩhya
(Mt 8.28-34; Mk 5.1-20)
26Neryo mobahongola obwato eriya oko kihugo kyʼAbagerase ekiri eyisirya kwʼeGalĩlaya. 27Neryo Yesu abere ahĩka oko mũsĩke wʼengetsi oko kitaka, omundu muguma mwahĩndana naye ĩnĩakalũa omo mũyĩ. Omundu oyo abya kwʼesyombinga, kandi isialiambala esyongimba oko biro binene, ĩsĩalĩkala omo nyũmba, nĩkwa omo katĩkatĩ kʼesisinda, 28Abere alola uku Yesu, neryo mwalaka, mwawa ahisi embere siwe, neryo mwabũga nʼomulenge munene ati, indi nʼomwatsi wahi nawe, uwe Yesu, Mugala wa Nyamuhanga Wʼendata Kutsibu, ngakulemba-lemba nyiti sũnyagalaye. 29Kusangwa Yesu iniabirihana ekĩrĩmũ kibi ekyo ati kĩlũe omo mundu oyo. Esyongendo nyingi ikyabirimuhamba; kandi abya iniabiribohwa omo mahulula nʼemisege, nʼerĩteyĩbwa, nĩkwa mwabya akatwa amahulula wuwe iniakatwalawa nʼembĩnga omo mbwarara. 30Neryo Yesu mwabũlyayo ati, Uwendi kwehĩ? Nayo moyasũbĩrya yiti, Erĩna lyage ni ndeko, kusangwa esyombĩnga nyingi isyabirimũhĩkako. 31Nʼesyombĩnga esyo mosyalemba-lemba Yesu siti siahanesyo eriya omo kũlĩmũ.
32Nĩkwa ekihangulo kinene kyʼesyongulube kyabya ikikalira oko kitwa, nʼesyombĩnga mosyalemba-lemba Yesu siti alĩgĩresyo eriingira omo syongulube. Neryo mwalĩgĩrasyo. 33Neryo esyombĩnga mosyalũa oko mundu oyo, mosyingira omo syongulube; nʼekihangulo kyosĩ ekyo mokyatibita eyĩkwa ahasenzere erĩhĩka omo ngetsi, neryo mosyasenda.
34Neryo omugulu abalĩsya basyo balangira ebyamabya, mobatibita mobayatũla omwatsi oyũ omo mũyĩ nʼomo kihugo ekyo. 35Neryo abandu mobayalebya ebyabere; mobahĩka uku Yesu, mobeya omundu oyo wabya kwʼesyombĩnga ĩsyabĩrĩmũlũako ĩnĩanĩkere oko bisando bya Yesu, iniambite esyongimba, iniabiribya mundu wʼobũlengekanĩa, neryo abosĩ mobubaha. 36Neryo abandu abalangira omwatsi oyo, mobabwira abandu ngoko oyo wabya kwʼesyombĩnga kwʼalamĩbawa. 37Neryo abandu bosĩ bʼekihugo kyʼAbagerase nʼekindi kihugo kyayo, mobabũlya Yesu bati alũe kubo, kusangwa mobubaha kutsibu. Neryo Yesu mwingira omo bwato, mwasubula. 38Neryo omundu oyo walũa kwʼesyombĩnga mwalemba-lemba Yesu eribya haguma naye. Nĩkwa Yesu mwamutuma ati, 39Usube eka wawe, ubwirebo emyatsi minene eyo Nyamuhanga abirikukolera. Neryo omundu oyo mwayatũlago omo mũyĩ gosĩ emyatsi minene eyo Yesu amukolera.
Mwali wa Yaĩro nʼomũkalĩ oyo watũla oko lukimba lwa Yesu
(Mt 9.18-26; Mk 5.21-43)
40Neryo omugulu Yesu asubula, endeko moyamũkokya, kusangwa abosĩ babya ibakamulindirira. 41Neryo omundu oyukahulawa mo Yaĩro mwasa. Iye abya mũtabalĩ wʼenyũmba yʼerĩhĩndanamo, neryo mwawa oko bisando bya Yesu nʼerimulemba-lemba ati ahĩke omo nyũmba yiwe. 42Kusangwa abya awite mwali muguma musa, wʼemyaka ĩkũmĩ nʼĩbĩrĩ, neryo abya hakũhĩ nʼerihola.
Nĩkwa omugulu Yesu abya akayayo, esyondeko mosyamũhatatanĩa. 43Neryo omũkalĩ muguma abyaho oyo wabya akwĩre obũkonĩ bwʼerĩlũsya omusasi oko myaka ĩkũmĩ nʼĩbĩrĩ. Kandi abya iniabiribugira ebindu biwe byosĩ oko banganga, kandi sihabya mundu watoka erĩmũlamya. 44Omũkalĩ oyo mwasa omo ndeko enyũma uku Yesu, mwatũla oko mũsĩke wʼolukimba luwe, neryo-neryo erisenda lyʼomusasi wuwe molyũmbya. 45Yesu mwabũlya ati, Nindi yo wamanyĩtũlako kwehĩ? Neryo abosĩ mobayigana. Petero mwabũga ati, Mukama, esyondeko sĩkakũkũna nʼerĩkũhatatanĩa! 46Nĩkwa Yesu mwabũga ati, Omundu amanyĩtũlako, kusangwa namaminya kʼobũtokĩ bwamanyĩlũako. 47Neryo omũkalĩ abere alangira kwʼate angatoka erĩbĩsama, mwahĩka nʼerititimana, mwawa ahisi embere sya Yesu, neryo mwatũlago embere syʼabandu bosĩ ekirialeka ĩnĩamũtũlako, kandi ngoko alamĩbawa neryoneryo. 48Nĩkwa Yesu mwamubwira ati, Mwali wage, erĩkĩrĩrya lyawe lyamabĩkũlamya; ugende buholo.
49Kandi omugulu Yesu abya akĩnabũga, omundu mwahĩkaho ĩnĩakalũa omo nyũmba yʼomũtabalĩ wʼenyũmba yʼerĩhĩndanamo. Ati, Mwali wawe abirihola; sũswelũhaya Omũkangĩrĩrya. 50Nĩkwa omugulu Yesu owa ebyo, mwabwira Yaĩro ati, Sigubahe Wĩkĩrĩraye lisa. Akandilama. 51Neryo abere ahĩka omo nyũmba, Yesu mwatalĩga mundu akayamo haguma naye, nina Petero, na Yoane, na Yakobo, nʼĩse na nyĩnya bʼomwana oyo. 52Abandu bosĩ babya bakalira nʼerĩsũsũmana. Nĩkwa Yesu mwabũga ati, Muleke eririra, kusangwa sĩaholĩre, nĩkwa alito. 53Nabo mobamuseka, kusangwa ĩbanasĩ kwʼaholĩre. 54Nĩkwa Yesu mwahamba ebyala biwe, mwabirikira ati, Iwe mwana, hangana! 55Nʼekĩrĩmũ kiwe mokyamusubako, neryo mwahangana lũba. Yesu mwabũga ati bamuhe ebyʼerirya. 56Neryo abamubuta mobasweka; nĩkwa Yesu mwahanabo ati, Sibabwire mundu ebyabere.
Currently Selected:
Lũka 8: KB80
Tõsta esile
Share
Kopeeri
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.