Lik Lentrodiksyon
Lentrodiksyon
Pour prezant son Levanzil, Lik i adopte en menm plan zeneral parey Matye ek Mark:
Diskour Zanbatis, koman sa enn ki prepar larive Zezi (3.1-20), swivi par batenm ek tantasyon Zezi (3.21—4.13).
Lavi piblik Zezi dan Galile, kot i prese e geri bann malad (4.14—9.50).
Vwayaz Zezi ki anmenn li depi Galile ziska Zerizalenm (9.51—19.28). Me Lik i konplemant bann detay ki Mark pa rakonte, tel ki parabol Bon Samariten, en ris ensanse, garson perdi e retrouve, etc.
Aktivite Zezi Zerizalenm (19.29—21.38).
Lapasyon, bann dernyen soufrans ek lanmor Zezi (sapit 22–23).
Sa liv i termin avek lazournen Pak (sapit 24), kot Lik i plas laparisyon Zezi resisite avek bann disip Emais, avan prezant lasansyon.
Dan en pti prolog, Lik i dedye son liv e eksplike ki mannyer i'n konpoz li (1.1-4). Apre, i entrodwir son Levanzil par en preanbil, kot i prezant lorizin Zezi ek Zanbatis (sapit 1-2). Nou osi lir lanons lanz avek Mari, nesans Zanbatis, nesans Zezi, ladorasyon par bann berze, kantik Mari (Manifikat), e lo Zakari ek Simeon.
Dan son preanbil, Lik i eksprim lesansyel son temwannyaz: Lorizin Zezi, son rasin Izraelit, sa gran levennman ki nesans Zezi lo later i reprezante pour limanite. Lik i prezant lanmour ki Bondye i montre pour bann dimoun senp (bann ki'n ganny rezete, fanm, pov, etranze, etc.), aksyon partikilye Lespri Bondye, ensi ki latmosfer lazwa, louanz ek lapriyer ki akonpanny lanons Bonn Nouvel.
Levanzil Lik i annan en karakter pli Grek ki lezot. I adres li avek bann lekter ki pa tro abitye avek tradisyon Izrael, e son sousi se pour touzour eksplik sa ki pa tro kler. Pour zonm modern, se sa Levanzil pli senp e pli abordab. Si ou lir atantivman, pa par pa, ou ava kapab dekouver ladan, Sover lemonn.
Currently Selected:
Lik Lentrodiksyon: BSK
Tõsta esile
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.