Lik 9
9
Misyon Douz Disip
(Mat 10.5-15; Mrk 6.7-13)
1Zezi ti reini son douz disip. I ti donn zot pouvwar ek lotorite lo bann demon e pour geri bann maladi. 2Apre, i ti anvoy zot proklanm Rwayonm Bondye e geri bann malad. 3I ti dir zot, “Pa bezwen anmenn nanryen avek zot, ni baton, ni sak, ni dipen, ni larzan, pa menm en semiz de resanz. 4Dan nenport ki lakaz kot zot antre, reste lanmenm ziska ler zot kit sa landrwa. 5Partou kot zot pa ganny resevwar, kan zot kit sa lavil, sekwe lapousyer ki avek zot lipye. Sa i ava en temwannyaz kont sa bann dimoun.”
6Bann disip ti ale. Dan sak vilaz kot zot ti pase, zot ti anons Bonn Nouvel e geri dimoun.
Herod I dan Konfizyon lo Size Zezi
(Mat 14.1-12; Mrk 6.14-29)
7Lerwa Herod ti aprann tou sa ki ti pe pase. I ti etonnen akoz dimoun ti pe dir ki Zan ti'n resisite. 8Serten ti dir ki Eli ki'n aparet, e lezot, ki enn bann ansyen profet ki'n resisite. 9Herod ti dir, “Zan, mon'n fer sot son likou. Alor lekel sa zonm lo ki mon antann dir tousala?”
E i ti rod en fason pour war Zezi.
Zezi I Nouri Senk Mil Zonm
(Mat 14.13-21; Mrk 6.30-44; Zn 6.1-14)
10Kan zot ti retournen, bann zapot ti rakont Zezi tou sa ki zot ti'n fer. I ti anmenn zot alekar dan en lavil ki ti apel Betsayda. 11Kan lafoul ti remark sa, zot ti swiv li. Zezi ti byen akey zot e i ti koz avek zot lo Rwayonm Bondye. I ti geri bann ki ti bezwen gerizon.
12Me soley ti pre pou kouse. Son douz disip ti vin dir li, “Fer sa lafoul ale, pour zot kapab ganny manze ek landrwa dormi dan bann vilaz ek bann laferm dan zalantour; akoz isi nou dan en landrwa dezer.”
13Me Zezi ti dir zot, “Donn zot keksoz pour manze zot menm.”
Bann disip ti reponn, “Nou annan zis senk dipen ek de pwason; amwen ki nou al aste manze pour tou sa bann dimoun.”
14Annefe, ti annan anviron 5,000 zonm. Zezi ti dir son bann disip, “Fer zot asiz par group anviron 50.”
15Bann disip ti fer parey Zezi ti'n dir zot.
16Apre, Zezi ti pran sa senk dipen ek sa de pwason, i ti lev lizye ver lesyel, i ti beni sa manze, kas zot an morso, e donn son bann disip pour partaz avek lafoul. 17Tou dimoun ti manze ziska zot ti rasazye. Apre, zot ti anmas bann morso ki ti reste. Zot ti ranpli 12 pannyen.
Pyer I Deklare ki Zezi I Li menm Kris
(Mat 16.13-19; Mrk 8.27-29)
18En zour, Zezi ti pe priye li tousel alekar. Zis son bann disip ki ti avek li. I ti demann zot, “Ki dimoun i dir mon ete?”
19Zot ti reponn, “Pour en bann, Zanbatis; pour lezot, Eli, e lezot ankor, enn bann ansyen profet ki'n resisite.”
20Zezi ti demann zot, “Me zot, ki zot dir mon ete?”
Pyer ti reponn, “Ou menm Mesi sorti kot Bondye.”
Zezi I Anons Son Lanmor pour Premye Fwa
(Mat 16.20-28; Mrk 8.30—9.1)
21Zezi ti ordonn zot severman pour pa dir sa personn. 22I ti azoute, “Fodre ki Fis-de-Lonm i soufer bokou e ganny rezete par bann ansyen, bann gran-pret ek bann profeser Lalwa. I pou ganny met anmor, e trwazyenm zour i pou resisite.”
23I ti dir avek zot tou, “Sa enn ki oule swiv mwan, fodre ki i aret mazin zis li. I bezwen pran son lakrwa sak zour e swiv mwan. 24Sa enn ki oule sov son lavi pou perdi li, e sa enn ki perdi son lavi akoz mwan, pou sov son lavi.
25Ki lavantaz pour en zonm ganny lemonn antye si i perdi, oubyen rin son prop lavi? 26Annefe, sa enn ki onte akoz mwan ek mon parol, Fis-de-Lonm osi pou onte kont li, kan i pou vini dan son mazeste e dan laglwar son Papa ek son bann lanz sen. 27Mon dir zot, sa i laverite: I annan parmi zot isi ki pa pou mor avan zot war Rwayonm Bondye.”
Transfigirasyon
(Mat 17.1-8; Mrk 9.2-8)
28Anviron wit zour plitar, Zezi ti anmenn avek li Pyer, Zan ek Zak, lo en montanny pour priye. 29Pandan ki i ti pe priye, son figir ti sanze e son lenz ti vin en kouler blan, klate. 30De zonm ti pe koz avek li. Sa ti Moiz ek Eli ki 31ti aparet dan milye en laglwar. Zot ti pe koz avek Zezi lo fason ki i pou realiz son misyon an mouran dan Zerizalenm.
32Pyer ek son bann zanmi ti pe mor sonmey. Me zot ti reveye, e la, zot ti war mazeste Zezi ek sa de zonm ki ti avek li. 33Koman sa de zonm ti pe kit Zezi, Pyer ti dir li, “Met! Nou byen isi. Annou mont trwa latant, enn pour ou, enn pour Moiz e enn pour Eli.”
I pa ti vreman konnen ki i ti pe dir.
34Pandan ki i ti pe dir sa, en nyaz ti desann e kouver zot tou; bann disip ti per. 35En lavwa sorti dan nyaz ti dir, “Sa i mon Garson ki mon'n swazir, ekout li!”
36Kan lavwa ti'n fini koze, zot ti war Zezi tousel. Bann disip ti gard silans e pandan tou sa letan, zot pa ti rakont personn nanryen lo sa ki zot ti'n war.
Zezi I Geri En Zanfan Posede par En Move Lespri
(Mat 17.14-18; Mrk 9.14-27)
37Lannmen, zot ti kit montanny e desann anba. En gran lafoul ti vin zwenn Zezi. 38En zonm dan lafoul ti kriye, “Met! Mon sipliy ou, zet en regar lo mon garson, mon sel zanfan. 39En lespri i sezi li, i fer li kriye en kou an gran, i sekwe li for ziska i kimen, e apenn si i oule kit li. 40Mon ti sipliy ou bann disip pour sas sa lespri, me zot pa ti kapab.”
41Zezi ti reponn, “Zenerasyon san lafwa e ranpli avek mesanste! Ziska kan mon pou reste avek zot e siport zot? Anmenn sa garson isi.”
42Letan sa garson ti pe vini, sa demon ti zet li ater e sekwe li byen for. Me Zezi ti reprimann sa move lespri. I ti geri sa garson e rann li avek son papa. 43Tou dimoun ti vreman etonnen par grander Bondye.
Zezi I Anons Ankor Son Lanmor ek Son Rezireksyon
(Mat 17.22-23; Mrk 9.30-32)
Tou dimoun ti dan letonnman lo tou sa ki Zezi ti'n fer. Alor, Zezi ti dir son bann disip, 44“Ekout byen sa bann parol ki mon pou dir zot: Fis-de-Lonm pou ganny livre dan lanmen bann zonm.”
45Me bann disip pa ti konpran sa parol. Sa ti reste en mister pour zot. Zot ti per pour kestyonn li lo sa size.
Lekel ki Pli Enportan
(Mat 18.1-5; Mrk 9.33-37)
46En diskisyon ti'n leve ant bann disip lo size lekel parmi zot ki ti pli enportan.
47Kan Zezi ti realize sa ki zot ti pe mazinen, i ti pran en zanfan ki i ti met obor li. 48I ti dir zot, “Sa enn ki resevwar sa zanfan an mon non, i resevwar mwan menm, e sa enn ki resevwar mwan, i resevwar sa enn ki'n anvoy mwan. Sa enn ki pli pti parmi zot, li menm ki pli enportan.”
Sa Enn ki pa kont Ou I avek Ou
(Mrk 9.38-40)
49Zan ti dir Zezi, “Met! Nou ti war en zonm pe servi ou non pour sas demon. Nou ti anpes li, akoz i pa ti avek nou.”
50Me Zezi ti dir li, “Pa anpes li, akoz sa enn ki pa kont ou i avek ou.”
En Vilaz dan Samari I Refize Resevwar Zezi
51Kan letan ti pe aprose pour Zezi ganny anleve dan lesyel, i ti deside pran semen ki al Zerizalenm. 52I ti anvoy son bann mesaze devan. Zot ti antre dan en vilaz Samari pour fer preparasyon pour larive Zezi. 53Me bann zabitan ti refize resevwar li akoz i ti pe al Zerizalenm. 54Kan son bann disip Zak ek Zan ti war sa, zot ti dir, “Senyer, ou dakor ki nou fer dife sorti dan lesyel desann e detri sa bann dimoun?”
55Me Zezi ti vire e reprimann zot. 56Alor, zot ti al dan en lot vilaz.
Bann ki Dakor Swiv Zezi
(Mat 8.19-22)
57Letan zot ti pe ale, en zonm ti dir Zezi, “Mon pou swiv ou partou kot ou pou ale.”
58Zezi ti dir li, “Renar i annan zot trou, zwazo dan lesyel, zot annan zot nik, me Fis-de-Lonm napa en landrwa kot i kapab repoz latet.”
59Zezi ti dir avek en lot, “Swiv mwan.”
Me sa zonm ti reponn, “Senyer! Les mwan al anter mon papa avan.”
60Me Zezi ti dir li, “Les bann mor anter zot mor. Me ou, al proklanm Rwayonm Bondye.”
61En lot zonm ankor ti dir li, “Senyer! Mon pou swiv ou, me les mwan al dir orevwar mon fanmir.”
62Zezi ti dir li, “Sa enn ki konmans travay e apre i get deryer li, i pa bon pour Rwayonm Bondye.”
Currently Selected:
Lik 9: BSK
Tõsta esile
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.