Lik 8
8
Bann Fanm ki ti Akonpanny Zezi
1Apre sa, Zezi ti pas dan sak lavil ek vilaz pour anons Bonn Nouvel Rwayonm Bondye. Son douz disip ti avek li. 2Plizyer bann fanm dan ki Zezi ti'n sas move lespri e geri zot maladi, ti osi swiv li: Mari, ki ti osi apel Madlenn, dan ki set demon ti'n sorti; 3Zann, fanm Souza, en zofisye Herod, Sizann ek plizyer lezot ankor ki ti servi sa ki zot ti annan pour ed Zezi ek son bann disip.
Parabol Senmer Lagrenn
(Mat 13.1-9; Mrk 4.1-9)
4En gran lafoul sorti dan plizyer lavil ti rasanble otour Zezi. I ti dir dan en parabol, 5“En senmer ti sorti pour al senm lagrenn. Pandan ki i ti pe senmen, en parti lagrenn ti tonm obor semen. Dimoun ti mars lo la e bann zwazo ti vin manz tou.
6En lot parti lagrenn ti tonm kot ti annan ros. Zot ti pouse, me apre zot ti fletri akoz ti napa delo.
7En lot parti lagrenn ti tonm parmi bann brousay pikan; sa bann brousay pikan ti pouse e touf zot.
8En lot parti lagrenn ti tonm dan bon later. Zot ti pouse; zot ti prodwir 100 fwa plis.”
Zezi ti dir byen for, “Sa ki annan zorey pour antann, tande!”
Akoz Zezi I Koz an Parabol
(Mat 13.10-17; Mrk 4.10-12)
9Son bann disip ti demann li sinifikasyon sa parabol. 10Zezi ti dir zot, “Pour zot, sekre Rwayonm Bondye in ganny revele. Me pour lezot, i ganny dir an parabol, pour ki menm si zot gete, zot pa war, e menm si zot ekoute, zot pa konpran#8.10 Eza 6.9..”
Zezi I Eksplik Parabol Senmer Lagrenn
(Mat 13.18-23; Mrk 4.13-20)
11“La sinifikasyon sa parabol: Lagrenn, se Parol Bondye. 12Bann lagrenn ki tonm lo bor semen, i sa bann ki'n antann, me dyab i vin retir Laparol dan zot leker pour ki zot pa krwar e ganny sove.
13Bann ki tonm kot i annan ros, se bann ki antann Laparol; zot resevwar li avek lazwa, me zot napa rasin. Zot krwar pour en pti moman, me dan moman tantasyon zot abandonnen.
14Sa bann ki tonm parmi brousay pikan, se bann ki tande, me ki ganny toufe par traka larzan ek plezir lavi; zot pa zanmen donn fri mir.
15Bann lagrenn ki tonm dan bon later se bann ki antann Laparol avek en leker onnet e bon; zot gard li e avek perseverans zot prodwir bokou fri.”
Parabol Lalanp
(Mrk 4.12-25)
16“Personn pa alim en lalanp pour met li anba en bol, oubyen kouver li anba lili! Me i met li lo en portlanp. Konmsa, dimoun ki antre dan lakaz ava kapab war kler.
17Annefe, tou sa ki'n kasyet pou ganny met dan kler; tou sa ki sekre pou ganny devwale e met okler.
18Fer byen atansyon mannyer zot ekoute. Sa enn ki annan, pou ganny plis ankor. Me sa enn ki napa, pou ganny arase, menm sa ki i krwar i annan.”
Manman ek bann Frer Zezi
(Mat 12.46-50; Mrk 3.31-35)
19Manman Zezi ek son bann frer ti vin war li; me zot pa ti kapab ariv kot li, akoz lafoul. 20Alor, dimoun ti dir li, “Ou manman ek ou bann frer i deor; zot oule war ou.”
21Me Zezi ti reponn zot, “Mon manman ek mon bann frer, se sa bann ki antann Parol Bondye e met li an pratik.”
Zezi I Kalmi En Gro Tanpet
(Mat 8.23-27; Mrk 4.35-41)
22En zour, Zezi ti anbark dan en kannot avek son bann disip. I ti dir zot, “Annou al lot kote lak.” Zot ti ale.
23Letan zot ti pe traverse, Zezi ti tonm dormi. En gro divan ti leve lo lak; zot kannot ti pe ranpli avek delo; zot ti dan danze. 24Zot ti al lev Zezi. Zot ti dir li, “Met! Met! Nou pe koule!” Zezi ti reveye e reprimann divan ek gro laroul. Tanpet ti arete e movetan ti kalmi.
25Zezi ti dir zot, “Oli zot lafwa?”
Zot ti ranpli avek lafreyer, me zot ti admir Zezi e zot ti dir ant zot, “Lekel sa zonm? I konmann menm divan ek delo; e zot obei li!”
Zezi I Geri En Zonm Posede avek Demon
(Mat 8.28-34; Mrk 5.1-20)
26Apre, zot ti koste dan pei bann Zerazenyen#8.26 War Mat 8.28., ki vizavi Galile. 27Kan Zezi ti pe debarke, en zonm ki ti reste dan sa lavil, ti vin zwenn li. I ti posede avek plizyer demon. Depi lontan i ti'n aret met lenz lo li. I pa ti reste dan en lakaz me dan simityer. 28Kan i ti war Zezi, i ti konmans kriye. I ti tonm ater devan li, e i ti kriy byen for, “Zezi, Garson Bondye Treo! Ki ou pe rode avek mwan? Mon sipliy ou, pa tourmant mwan.”
29Annefe, Zezi ti pe ordonn sa move lespri pour sorti dan sa zonm. Sa move lespri ti avek sa zonm depi lontan. I ti ganny anmare avek lasenn ek feray dan son lipye pour kontrol li, me i ti kas lasenn e demon ti anmenn li dan dezer.
30Zezi ti kestyonn sa zonm, “Koman ou apele.”
I ti reponn, “Lezyon!”
Annefe, en kantite demon ti'n antre dan li. 31Sa bann move lespri ti sipliy Zezi pour pa anvoy zot dan labim.
32Pre lanmenm, ti annan en gran troupo koson ki ti pe manze lo lapant montanny#8.32 War Mrk 5.11.. Sa bann demon ti sipliy Zezi pour les zot antre dan sa bann koson. Zezi ti permet zot. 33Sa bann demon ti sorti dan sa zonm e antre dan bann koson. Deswit, troupo koson ti tay an desandan; zot ti sot dan lak e zot ti noye.
34Kan bann gardyen koson ti war sa ki ti'n arive, zot ti taye. Zot ti sove e al fann nouvel dan bann lavil ek vilaz.
35Dimoun ti sorti pour al war sa ki ti'n arive. Zot ti ariv kot Zezi; zot ti war sa zonm ki demon ti'n kite. Abiye, i ti pe asiz kot lipye Zezi; son lespri ti normal. Zot ti per. 36Bann ki ti war sa, ti rakont lezot ki mannyer sa zonm ki ti posede avek demon ti'n geri.
37Alor, bann zabitan rezyon bann Zerazenyen ti sipliy Zezi pour kit zot landrwa, akoz zot ti per. Alor, Zezi ti anbark dan kannot e retournen.
38Sa zonm ki bann demon ti'n kite, ti demann Zezi pour les li reste avek li, me Zezi ti fer li ale. I ti dir, 39“Retourn kot ou, al rakont sa ki Bondye in fer pour ou.”
Alor, sa zonm ti al partou dan lavil e rakont tou sa ki Zezi ti'n fer pour li.
Zezi I Lev Fiy Zairis e Geri En Fanm ki Ti Tous Son Lenz
(Mat 9.18-26; Mrk 5.21-43)
40Kan Zezi ti retournen, lafoul ti byen resevwar li, akoz zot ti pe esper li. 41En zonm ki ti apel Zairis, en sef sinagog, ti tonm dan lipye Zezi. I ti sipliy li pour vin se li, 42akoz son sel fiy aze apepre 12 an, ti pre pour mor. Letan Zezi ti pe ale, lafoul ti antour li e ti pe touf li.
43Ti annan en fanm ki ti pe perdi disan depi 12 an. I ti'n depans tou sa ki i ti posede, kot dokter.#8.43 Dan serten ansyen maniskri napa sa fraz: I ti'n depans tou sa ki i ti posede kot dokter. Me personn pa ti kapab geri li. 44I ti vin deryer Zezi e tous bor son lenz. Toudswit, i ti aret perdi disan. 45Zezi ti dir, “Lekel ki'n tous mwan?”
Tou dimoun ti dir pa zot. Pyer ti dir, “Met! Lafoul pe antour ou e zot pe pouse!”
46Zezi ti dir, “I annan en dimoun ki'n tous mwan akoz mon'n santi en lafors ki'n sorti avek mwan.”
47Kan sa fanm ti war ki i ti'n ganny dekouver, i ti aprose e tonm dan lipye Zezi an tranblan. I ti rakonte devan tou dimoun, rezon ki ti fer li tous Zezi, e ki mannyer i ti geri deswit. 48Zezi ti dir li, “Fiy! Ou lafwa in geri ou. Al anpe.”
49Letan Zezi ti ankor pe koze, en zonm ti arive sorti kot lakaz sef sinagog. I ti dir li, “Ou fiy in mor, pa bezwen deranz Met plis ki sa.”
50Me Zezi ti antann sa. I ti dir Zairis, “Pa per, zis krwar, e ou fiy ava geri.”
51Kan Zezi ti ariv kot lakaz, i pa ti les personn antre avek li, eksepte Pyer, Zak, Zan, papa ek manman sa zanfan. 52Tou dimoun ti pe kriye e plere. Me Zezi ti dir, “Pa plere, i pa'n mor, i pe dormi.”
53Me zot ti riy li, akoz zot ti byen konnen ki sa fiy ti'n mor. 54Me Zezi ti atrap lanmen sa fiy e byen for i ti kriy li, “Zenn fiy, leve!”
55I ti reganny lavi e i ti leve deswit. Zezi ti ordonn zot, “Donn li keksoz pour manze.”
56Son paran ti etonnen. Zezi ti ordonn zot pour pa rakont personn sa ki ti'n arive.
Currently Selected:
Lik 8: BSK
Tõsta esile
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.