Lik 7
7
Zezi I Geri Serviter En Zofisye Romen
(Mat 8.5-13)
1Apre ki Zezi ti'n fini koz avek lafoul, i ti al Kapernaoum. 2La, en zofisye Romen ki ti annan en lesklav ki i ti kontan bokou, ti byen malad e pre pour mor. 3Kan sa zofisye ti antann koz lo Zezi, i ti anvoy detrwa ansyen parmi bann Zwif, pour demann Zezi pour vin geri son lesklav. 4Kan zot ti ariv kot Zezi, zot ti sipliy li, “Sa zofisye i merite ki ou fer sa pour li. 5I kontan nou pep. I'n konstri nou sinagog.”
6Alor, Zezi ti al avek zot. I ti'n ariv pre avek lakaz, kan sa zofisye ti anvoy son bann zanmi dir li, “Senyer! Pa deranz ou. Mon pa diny pour mwan resevwar ou dan mon lakaz. 7Pour sa rezon, ki mon pa'n oze vin mwan menm kot ou. Me zis dir en parol, e mon serviter ava geri. 8Mwan osi, malgre ki mon anba lotorite, mon annan en bann solda anba mon lord. Mon dir avek enn: Ale! I ale. Mon dir avek en lot: Vini! I vini. Mon dir avek mon lesklav: Fer sa! I fer li.”
9Kan Zezi ti antann sa, i ti admir sa zofisye. I ti tourn ver lafoul ki ti pe swiv li. I ti dir, “Mon dir zot, menm parmi pep Izrael, mon pa'n war en tel lafwa.”
10Kan bann zonm ki ti'n ganny anvoye ti retourn kot lakaz, zot ti war ki sa lesklav ti'n geri.
Zezi I Resisit Garson En Vev
11Answit, Zezi ti al dan en lavil ki ti apel Nain. Son bann disip ek en gran lafoul ti al avek li. 12Kan i ti pe apros laport lavil, dimoun ti pe anmenn en mor, sel garson en vev, pour al antere. En gran kantite zabitan lavil ti pe akonpanny sa vev. 13Kan Zezi ti war sa vev, i ti pran pitye pour li. I ti dir li, “Pa plere!”
14I ti aprose e tous serkey. Sa bann dimoun ki ti pe anmenn sa serkey ti arete. Zezi ti dir, “Zennonm, mon ordonn ou, leve!”
15Sa zennonm ti asize e i ti konmans koze. Zezi ti rann li avek son manman.
16Tou dimoun ki ti la ti ranpli avek lafreyer. Zot ti loue Bondye. Zot ti dir, “En gran profet in leve parmi nou; Bondye in vin sekour son pep.”
17Sa nouvel lo Zezi ti fannen partou dan Zide e dan sa rezyon.
Bann Mesaze Zanbatis
(Mat 11.2-6)
18Bann disip Zan ti rakont li tou sa ki ti pe arive. 19Zan ti apel de son bann disip. I ti anvoy zot kot Zezi pour demann li: Ou menm sa enn ki devre vini, oubyen eski nou bezwen esper en lot?
20Kan zot ti ariv kot Zezi, zot ti dir li, “Zanbatis in anvoy nou pour demann ou: Eski se ou menm sa enn ki devre vini, oubyen eski nou devre esper en lot?”
21Dan sa menm moman, Zezi ti pe geri bokou dimoun malad, paralize, ek bann ki ti posede par bann move lespri. I ti pe fer bokou aveg war kler.
22Apre, Zezi ti reponn zot, “Al rakont Zan sa ki zot in war e tande: Bann aveg i war kler; bann paralize i marse; bann ki annan maladi parey lalep i ganny geri; bann sourd i tande; bann mor i reganny lavi; bann pov i antann Bonn Nouvel. 23Byennere sa enn ki pa refize krwar dan mwan!”
Zezi I Koz lo Size Zanbatis
(Mat 11.7-11)
24Kan bann disip Zan ti'n ale, Zezi ti koz avek lafoul lo size Zan. I ti dir zot, “Ki zot ti al war dan dezer? En tiz banbou ki pe sekwe dan divan? 25Alor, ki zot ti al war? En zonm abiye dan zoli lenz? Me dimoun ki abiye dan zoli lenz e ki viv dan liks, zot reste dan bann pale. 26Alor, ki zot ti al war? En profet? Wi, mon dir zot, e menm plis ki en profet. 27Se lo son size ki'n ganny ekri:
La mon anvoy mon mesaze devan ou,
pour li prepar en semen devan ou#7.27 Mal 3.1..
28Mon dir zot, parmi bann ki'n ne par en fanm, napa personn ki pli enportan ki Zan. Pourtan, sa enn ki pli pti dan Rwayonm Bondye i pli enportan ki li.
29Tou dimoun ki ti ekout Zan, menm bann kolekter taks ti rekonnet lazistis Bondye. Alor, zot ti ganny batize par Zan. 30Me bann Farizyen ek bann profeser Lalwa, ti rezet sa ki Bondye ti oule fer pour zot. Zot ti refiz batenm Zan.”
31Zezi ti kontinyen, “Avek kwa mon pou konpar dimoun sa zenerasyon? Ki zot resanble? 32Zot parey bann zanfan ki pe asiz lo laplas piblik, e ki kriy avek kanmarad: Nou ti zwe lanmizik pour zot, me zot pa ti danse! Nou ti sant kantik dey, me zot pa ti plere!
33Annefe, Zanbatis i'n vini; i pa ti manz dipen e i pa ti bwar diven. Me zot dir: I posede par en demon! 34Fis-de-Lonm i'n vini; i manze e i bwar, e zot dir: Get sa! I en zonm voras e en soular, i zanmi bann kolekter taks ek bann peser! 35Me tou dimoun ki aksepte lasazes Bondye i rekonnet ki i byen azir.”
Zezi kot Simon, En Farizyen
36En Farizyen ti envit Zezi manze kot li. Zezi ti antre dan son lakaz e pran plas atab. 37Dan sa lavil, en fanm ki ti pe anmenn en move lavi, ti'n tande ki Zezi ti kot sa Farizyen. I ti anmenn en flakon ranpli avek lesans. 38I ti debout deryer Zezi, kot son lipye. I ti plere e avek son larm, i ti mouy lipye Zezi e i ti eswiy avek son seve. I ti anbras son lipye e vers lesans lo la.
39Kan sa Farizyen ki ti'n envit Zezi, ti war sa, i ti dir dan li menm: Si sa zonm ti en profet, i ti pou konnen lekel sa fanm ki pe tous li, e ki i en fanm movez vi.
40Alor, Zezi ti dir, “Simon, mon annan keksoz pour dir ou.”
Simon ti reponn, “Dir mwan, met.”
41Zezi ti dir, “De zonm ti dwa larzan ki zot ti'n ganny prete avek en dimoun ki pret larzan. Enn ti dwa li 500 pyes larzan, e lot ti dwa li 50. 42Koman zot pa ti kapab rann li, alor, i ti anil det tou le de. Lekel ant sa de ki ou krwar pou kontan li plis?”
43Simon ti reponn, “Mon krwar sa enn ki ti annan pli gro det.”
Zezi ti dir li, “Ou'n byen zize.”
44Alor, i ti tourn ver sa fanm, e dir avek Simon, “Ou war, sa fanm? Mon'n antre kot ou, me ou pa'n donn mwan menm en pe delo pour mwan lav mon lipye#7.44 Sa i en pratik lospitalite dan Loryan. War Zen 18.4; 19.2.. Me li, i'n lav mon lipye avek son larm e eswiy avek son seve.
45Kan mon ti antre, ou pa ti anbras mwan. Me li, depi ki mon'n arive, i pa'n arete anbras mon lipye.
46Ou pa ti vers delwil lo mon latet#7.46 War Ps 23.5.. Me li, i'n kouver mon lipye avek lesans. 47Pour sa rezon, mon dir ou ki tou son pese, ki bokou, in ganny pardonnen, akoz i kontan bokou; sa enn ki'n ganny pardonnen en pti gin, i kontan en pti gin.”
48Alor, Zezi ti dir avek sa fanm, “Ou bann pese in ganny pardonnen.”
49Bann ki ti pe manze avek li, ti konmans dir ant zot: Lekel sa zonm, ki oze menm pardonn pese?
50Zezi ti dir avek sa fanm, “Ou lafwa in sov ou; al anpe.”
Currently Selected:
Lik 7: BSK
Tõsta esile
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.