SAN JUAN 2

1Te ni yāha unī quɨvɨ̄, te ni īyo ɨɨn vico nándāha ñuu Caná ndañúū Galilea. Te yūcuan íne náná Jesús. 2Te suni ni cacana i Jesús jiín tée cáscuáha jíín yá, ni jehēn yā vico un jíín de. 3Te ni ndoco vino. Te náná Jesús ni cahān ña jíín yá:

Ni ndoco vino i, áchí ña.

4Te ni cahān Jesús jiín ña:

¿Naun cáhán ni súcuan jíín ná nánā? Chi ná tu quee quɨvɨ̄ jeē sáha ná jniñu jéhnu, áchí yá.

5Te náná yā chi ni cahān ña jíín ñáyuu cájeni cohō:

Sáha ró jíjnáhan ró táca jéē cahān yā jiín ró. Achí ña.

6Te yūcuan íyó íñū tenéjá yuū jeē ñúhun ndute cájichi ñayuu hebreo jeē ndúndoo i nuū Yaā Dios. Te ɨɨn ɨɨn tenéjá un cánda cuhun cuūn xico chí ciento litro ndute. 7Te ni cahān Jesús jiín ñáyuu cájeni cohō:

Scútú ndɨ́ɨ̄ rō tācá tenéjá yáha.

Te ni cascútú ndɨ́ɨ̄ i. 8Te ni cahān yā jiín i:

Vijna te quēen ró jecu te quindeca ró coto ndee tēe ndíto vico, áchí yá.

Te ni cajendeca i nuū de. 9Te ni séyūhú de ndute jeē ní nduu vino, te tu jíní de ndé ní canihīn i. Chi máni mozo un cúu jeē cájini, chi máá i ni caquēen ndute ún. Yūcuán na te tēe ndíto vico ni cana de tēe nándāha. 10Te ni cahān de jíín:

Tāca ñáyuu chi xīhna gā vino váha cájēhe i, te núu je ni cajihi vāha ñayuu cáhīin vico, yūcuán na te jéhe de vino ndahú na. Te máá ró tucu ni sáha ró, chi nde jeē sándɨ̄hɨ́ te jéhe ró vino jeē yóhyo vāha ga jíhi, áchí de.

11Jniñu yáha jéē ni sáha Jesús ini ñuu Caná ndañúū Galilea cúu jniñu jéhnu xīhna ñúhún jéē ni sáha ya jeē steén yā poder yā. Te súcuan ni steén yā jeē yóhyo cújéhnu ya. Te tēe cáscuáha jíín yá ni cacandíje de ya.

12Te ná ni yāha jniñu yáha, te cuahān yā ñuu Capernaum jiín náná yā jiín táca ñani yā jiín tée cáscuáha jíín yá. Te ni coyūcu yá yūcuán jecu quɨvɨ̄.

Jeē ní quenehen ya ñayuu ini templo

(Mt. 21.12‑13; Mr. 11.15‑18; Lc. 19.45‑46)

13Te jeē cuácuyajni vico pascua casáha jnáhan ñuu yā hebreo, te cuahān yā ñuu Jerusalén. 14Te ini templo cáhnu ni jito ya ñayuu cáxīcó stɨquɨ̄ jiín lanchi jíín paloma, jiín ñáyuu castáyɨ xūhun, cáyūcú i nuū mesa i. 15Te jeē súcuan ni jito ya, te ni sáha ya ɨɨn cuarta ñɨɨ. Te ni scúnu ya tācá i ini templo, nde jiín lanchi jíín stɨ́quɨ̄ i. Te ni jete yā xūhun ñáyuu castáyɨ. Te ni scotúú yá tāca mesa i. 16Te ni cahān yā jiín ñáyuu cáxīcó paloma:

Tava tācá quɨtɨ yáha. Te ma sáha ró yáhu ini vehe Tátá rī. Achí yá.

17Yūcuán na te tēe cáscuáha jíín yá, ni canucūhun ni de jnūhun yósó núū tútu iī: Je yajni cuu na jéē yóhyo ndɨ́hvɨ́ ni na sɨ́quɨ̄ vehe ní, áchí yá jiín Tátá yā, achí tutu.

18Te tēe ñuu yā hebreo ni cacajnūhún de ya:

¿Na jniñu jéhnu sáha ró jéē steén rō poder rō, te cucáhnu ni rī jeē ndíso jníñu ró sáha ró súcuan? áchí de jíín yá.

19Te ni cahān yatá Jesús:

Canu rō templo yáha, te nuū uní quɨvɨ̄ te nucondichi sáha ri, achí yá.

20Yūcuán na te ni cacahān tēe hebreo un:

Uū xico iñū cuiyā te ni jīnu ni cuvāha templo yáha. Te róhó, ¿á núū uní‑ni quɨvɨ̄ te nucondichi sáha ró naún? Achí de.

21Te templo jeē cahán Jesús cúu máá yɨquɨ cúñu yā, chi cahni ñayuu yā te natecu yā nuū uní quɨvɨ̄. 22Jeē yúcuan cúu jeē ná ni natecu yā jeē ni jíhī yā, te tēe cáscuáha jíín yá ni canucūhun ni de jeē ni cáhān yā jnūhun yáha. Te ni cacandíje de jnūhun jeē yosó núū tútu iī, jiín jnúhun yáha jéē ni cáhān Jesús.

Jeē jiní Jesús ndese cáa ini anuá ñayuu

23Te ná íne Jesús ñuu Jerusalén máá vico pascua, te cuehē ñayuu ni cacandíje i jeē cúu ya Cristo, chi ni cajito i tācá jniñu jéhnu sáha ya jeē steén yā poder yā. 24Te máá Jesús chi tu ní jétáhú yá i, chi je jíní yā ndese cáa ini anuá i jíjnáhan i. 25Te tu jíni ñúhún yá jeē cáchi ni ɨɨn ñayuu nuū yā ndese íyó táca ñáyuu, chi máá yá je jíní yā ndese cáa ini anuá i.

Jeē ní candajnūhún Jesús jiín Nicodemo

Actualmente seleccionado:

SAN JUAN 2: mibDBL

Destacar

Copiar