Pe eya 26
26
Isaku ma ne Abimelek
1Baktar gwan dol suwal go, a be baktar ge dḛ ne dé dam ma ge Abraham ne go to. Isaku ɗage, mbo Abimelek gan ge Filistiya ma ne ta ya, ge suwal Gerar ya. 2Bage ɗiŋnedin dyan tene Isaku ta, jan na go: Mbo suwal Masar to. Ká suwal ge mbi ne mbo ŋgay mo na ya go. 3Ká suwal mbe no go baba, mbi mbo kat dagre ne mo, mbi mbo e wak busu mo pal. Ago mbi mbo hon aŋ ne mo pehir ma suwal mbe no mwaɗak. Go no mbi mbo wi wak tuli ge mbi ne ke ne mo bá Abraham wak. 4Mbi mbo zuli mo pehir ma se la̰y dimma ne guwa̰r ma ne digi digi ya go, mbi mbo hon mo pehir ma suwal mbe ma no mwaɗak. Ne mo pehir ma ta, pehir ge ne suwar pal ma pet a mbo ɓol wak busu. 5Ne da pe, Abraham za̰ mbi wak, koy mbi wak honna ma, ne mbi wak yuwaleya ma, ne mbi eya ma. 6Isaku gá katɗa suwal Gerar go.
7Swaga ge naa ge suwal ma ne ele na fare ge na gwale ne ɗe, ka jan nama go na na ná vya ge gwale ne, ká sya vo nama ma̰ hat hun na ne na pe. Ago Rebeka ka kale gḛ ge be to. 8Swaga ge ne ke kaal katɗa suwal mbe go ɗe, dam a̰me ɗu, Abimelek gan ge Filistiya ma ne njole swaga ya zok ndwala go, kwar Isaku ne lase na gwale Rebeka. 9Abimelek tol Isaku ya na ta, jan na go: «Fareba, a mo gwale ne! Kyaɗa mo ba jan i go, na mo ná vya ne ɗaa?» Isaku jan na go: «Mbi jya̰ go no, ne da pe, mbi ka sya vo go naa ma̰ hat hun mbi ne na pe.» 10Abimelek jan na go: «Mo te ke i da go ɗaa? Ndu a̰me ne ɓase ma buwal zi te ya fí ne na baŋ ɗar, mo te ya saŋge é i fare.» 11Swaga mbe go no, Abimelek hon na naa pet na wak go: «Ndu ge ne mbo tat na tok ya ndu mbe no ta, ko na gwale ta, a mbo hun na uzi.»
12Del mbe go, Isaku gar kaŋ suwal mbe go, ɓol kaŋ gḛ ge be to, kaŋ pul kis ta pal. Ago Bage ɗiŋnedin e na wak busu na pal. 13Na kaŋ ma ga ser se gḛ gḛ, saŋge gan njwanjway. 14Ká da ne vog ge gii ma, ne nday ma ne, ne dore ma gḛ ge be to. Filistiya ma ká ke na yil.
Wak tuli ge Isaku ne ke ne Abimelek
15Tub ma mwaɗak ge na bá Abraham dore ma ne á nama na dam ma zi ya, Filistiya ma mbul nama digi ne suwar. 16Abimelek jan Isaku go: «Ɗage ne i buwal zi uzi, ago mo hatɗa pool gḛ waɗe i.»
17Isaku ɗage ne swaga mbe go, mbo kat baal pul ge suwal Gerar ne ya, gá katɗa swaga mbe go. 18Tub ge a ne á nama na bá Abraham ndwara go ma, ge Filistiya ma ne mbu nama digi go̰r ge na bá siya go ma, Isaku gwan al nama digi, gwan hon nama dḭl ge na bá dḛ ne tó nama.
19Isaku dore ma gwan al tub ge ɗogle baal pul se, a det mam ge ɗermel jargalak pal. 20Naa ge koy kavaar ge suwal Gerar ne ma, a ɗage gool ne naa ge koy kavaar ge Isaku ne ma, a jan nama go: «Mam mbe no a ge i ne ne.» Go mbe no, Isaku hon tub mbe dḭl Esek, ndwara go «Gool», ne da pe, a ke ta gool. 21Isaku dore ma gwan al tub ge ɗogle uwale, a gwan ke ta gaage na pal. Isaku hon tub mbe dḭl Sitna, ndwara go «Gaage.» 22Zwagre tene ne swaga mbe go, gwan al tub ge ɗogle. Na ge no, a ke gool na pal to. Hon na dḭl Rehobot, ndwara go «Swaga katɗa ge kwaɗa», jya̰ go, Bage ɗiŋnedin hon i swaga katɗa ge kwaɗa go, i mbo gá a̰yya suwal mbe go.
23Gwan zwagre tene ne swaga mbe go, mbo suwal Bercheba ya. 24Bage ɗiŋnedin dyan tene na ta ɗaal mbe no zi, jan go: «Mbi Dok ge mo bá Abraham ne ne, sya vo to, ago mbi ya go poseya ne mo. Mbi mbo e mo mbi wak busu, mbi mbo zuli mo pehir ma se lala̰y ne mbi dore Abraham pe.» 25Isaku sin twal tuwaleya swaga mbe go, gá kaɗe Dok ne na dḭl ge Bage ɗiŋnedin. Na sḛ ɗur na gur swaga mbe go, na dore ma gwan al tub ge ɗogle.
Isaku ma ne Abimelek ke wak tuli ta buwal zi
26Abimelek ɗage ne suwal Gerar ya, poseya ne na kondore Ahuzat ma ne Pikol ge na garlaŋ pore me, a mbo ya ɓol Isaku. 27Isaku jan nama go: «Aŋ te gwan kare mbi pe ya gyana ɗaa? Aŋ te va ɓyare mbi to, aŋ ya̰ mbi ne aŋ suwal ya no to’a?» 28Nama sḛ ma jan na go: «I da ne kwarra tyatyat go Bage ɗiŋnedin a dagre ne mo. Da ne pe no, i jya̰ no go, nee guni me ta, ke wak tuli ta buwal zi. 29Guni tene i ndwara se go mo mbo ke i sone to, dimma ca ne i sḛ ma ne ke mo sone to go, i ke mo kwaɗa, i ya̰ mo mborra halas zi. Ndi ne se no, Bage ɗiŋnedin é mo wak busu.» 30Isaku ke nama gwasal, a zam kaŋzam, a njot me. 31A ɗage digi cya̰wak vḛ, a ke wak tuli ta buwal zi ne guniya. Isaku ya̰ nama mborra, a ɗage, a mbo halas zi. 32Dam mbe go juju, Isaku dore ma mbo ya waage na fare ne tub ge bama ne á pe, a jan na go: «I ɓol mam ja.» 33Isaku hon tub mbe dḭl Chiba, ndwara go «Guniya.» Da ne pe no, ɗiŋ ma̰ no a tol suwal mbe dḭl no Bercheba.
Yàl katɗa ge Esawu ne
34Swaga ge Esawu ne ke del wara-anda, kat yàl ne Judit ge Beeri vya, ma ne Basmat, ge Elon vya, Hittitiya ma vya ma. 35Amma naa zaab mbe ma hon Isaku ma ne Rebeka laar pisil ge be to.
Actualmente seleccionado:
Pe eya 26: FGN2013
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
La Bible en langue Kim © Alliance Biblique du Tchad, 2013.
