Pe eya 25

Hir ge Abraham ne, ne na gwale Ketura ta

(1Maa 1:32-33)

1Abraham gwan san gwale a̰me ɗu, na dḭl Ketura. 2Ketura tol na vya sonmo ma: Zimran, Yokchan, Medan, Madiyan, Yichebak ne Chwa. 3Yokchan tol Saba ma ne Dedan, Dedan pehir ma no: Achuriya ma, ne Letuchiya ma, ne Lemitiya ma. 4Madiyan vya ma no: Efa, Efer, Henok, Abida ne Elda. Nama mbe ma no pet, a Ketura vya ma ne.

5Abraham hon Isaku nà joo mwaɗak. 6Gale ne na ndwara ɗe, var na vya ge na gwale ge wanna digi ma vya ma bobo ma, yan nama le ham ya, uzi ya kaal ne na vya Isaku ta.

Siya ge Abraham ne

7Abraham ke del kis para wara ɓyalar para anuwa̰y. 8Abraham sú siya sabar gwagwa tuli zi, jyat mbo na bá ma pe ya. 9Na vya Isaku ma ne Ismayel mbul na ge njal pṵṵl ge Makpela ne zi, na ge ne Efron ge Sohar vya ndu ge Hittitiya gaaso pul zi, Mamre ziyar go gwa. 10Abraham yá gaaso mbe da ne Hittitiya ma tok go. A mbu Abraham ma ne na gwale Sara gaaso mbe zi. 11Go̰r siya ge Abraham ne go, Dok e na vya Isaku wak busu. Na sḛ gá katɗa tub Lahay-Roy ziyar go gwa.

Hir ge Ismayel ne

12Pehir ge Ismayel ge Abraham vya, na ge na gwale Sara kale Agar, vya gwale ge suwal Masar ne, ne tó na ma dḭl no: 13Nama dḭl ma ne ga̰l pe go no: Nebayot, Kedar, Adbeel, Mibsam, 14Misma, Duma, Masa, 15Hadad, Tema, Yetur, Nafis ne Kedma, nama mbe ma no mwaɗak. 16No a Ismayel vya ma dḭl ma ne, naa wol para azi, ga̰l ge bama hir ma ne, ne bama suwal ma, ne bama swaga katɗa ma go. 17Ismayel ke del kis para tapolɗu para ɓyalar, ɗage jyat na bá ma pe ya no. 18Ismayel vya ma ká da ne suwal Havila go ɗiŋ mbo suwal Chur ya, na ge ne suwal Masar ndwara ŋga, ndwara mbo le Asiriya ya. A ne bama bá vya ma ka ho̰l ta buwal zi.

MAANA GE ISAKU MA NE NA HIR MA NE

(25:19—26:35)

Tolla ge Esawu ma ne Yakub ne

19Pehir ge Isaku ge Abraham vya ne ma no:

Abraham tol Isaku. 20Isaku ne del wara-anda, san Rebeka ge Betuwel vya, Laban ná vya, ndu ge Arameya ge suwal Paddan-Aram ne. 21Amma Rebeka be tol vya to. Isaku kaɗe Bage ɗiŋnedin ne na gwale pe, Bage ɗiŋnedin za̰ na kaɗeya, na gwale her emel. 22Vya ma ka mbyale ta na laar zi. Rebeka jan go: «A ma kaŋ ke mbi ne go ɗaa?» Na sḛ mbo, mbo ele fare pe Bage ɗiŋnedin ta. 23Bage ɗiŋnedin jan na go:

«Pehir ma azi, a ya mo laar zi,

Pehir ma azi, a mbo varse se swaga tolla ge mo ne go,

Ge ɗu mbo waɗe ge may ne pool,

ge ga̰l pala mbo gwan ge jyale pe se.»

24Swaga ge na dam tolla ne mbya go, a set go na bumurma ne na laar zi ne 25Ge ne tó ya se zaŋgal ka kaal kekeŋ, na sḛ duur susu dimma ne ba̰r ge tame susu ne go, a hon na dḭl Esawu. 26Go̰r go, na ná vya tol ya se, na tok kat wanna Esawu koo pitigil go, a hon na dḭl Yakub.

Swaga ge a ne tó go, Isaku ka da ne del wara myanaŋgal.

Esawu yat joo ge na ne ge vya pul soy ne uzi Yakub tok go

27Naa jabso mbe ma ke ga̰l. Esawu saŋge bage ke kyare, ndu son ge ful, Yakub kat ndu ge cwacwagat katɗa yadiŋ me. 28Isaku laar wan Esawu, ne da pe, na laar wa̰ duur, Rebeka me ɗe, na laar wa̰ Yakub me. 29Dam a̰me ɗu Yakub ka ke kaŋzam, Esawu yan ne na swaga kyare ya lwageya kakatak, 30jan Yakub go: «Ya̰ mbi za mo kaŋzam ge káál mbe no nde, mbi ɓyare saareya.» Da ne pe no, a hon Esawu dḭl no Edom, ndwara go káál. 31Yakub jan go: «Ya̰ mbi mo joo ge vya pul soy ne gale ɓya.» 32Esawu jan na go: «Mbi ɓyare saareya, joo ge vya pul soy ne ke ne mbi da!» 33Yakub jan na go: «Guni tene ɓya!» Esawu guni tene. A go no, Esawu yá na joo ge vya pul soy ne uzi Yakub tok go no. 34Yakub hon Esawu kaŋzam, ne tààl tṵniya. Esawu zam, njot mam, ɗage mbo na mborra. A go no Esawu ndi na joo ge vya pul soy ne kaŋ senna no.

Actualmente seleccionado:

Pe eya 25: FGN2013

Destacar

Copiar