ROMA 5

Na Noda Vakadonui Vua na Kalou

1Ni sa vakadonui keda vakaoqo na Kalou ena vuku ni vakabauta, eda sa qai veivinakati vata kei na Kalou ena vuku i Jisu Karisito na noda Turaga. 2Sa kauti keda mai o koya ena vakabauta me da curuma yani kina na lolomasavu ni Kalou, eda sa bula tu kina oqo. Ena ka oqo, eda sa cibitaka kina na i nuinui sa tu vei keda ni da sa vakaivotavota ena lagilagi ni Kalou! 3Ia e sega ni koya walega oya, me da cibitaka talega na draki ni bula dredre eso eda dau sota kaya, baleta ni da sa kila ni veika rarawa sa vakavuna na dauvosota, 4na dauvosota sa vakavuna na i valavala sa vakadonui, kei na i valavala sa vakadonui sa vakavuna na i nuinui. 5Io na i nuinui oqo sa sega ni vakamadualaki keda, ka ni sa sovaraka mai na Kalou na nona loloma ki yaloda ena cakacaka ni Yalo Tabu, ka sa nona i solisoli na Kalou kivei keda.

6Ena gauna eda se malumalumu tu kina, sa mai mate oti na Karisito ena vukuda na tamata i valavala ca ena gauna sa lokuca na Kalou. 7Sa sega sara ni ka rawarawa vua e dua me la'ki mate ena vukuna e dua na tamata i valavala dodonu. De rairai tiko beka e dua ena vinakata me mate vakaoqo ena vukuna e dua na tamata vinaka. 8Ia na Kalou sa vakaraitaka vei keda na levu ni nona lomani keda; ka ni da se bula voli ga ena i valavala ca, a sa mai mate oti na Karisito ena vukuda! 9Eda sa qai vakadonui mai vua na Kalou ena vuku ni nona dra; ena qai vakaevei na kena levu cake sara na nona vakabulai keda o koya mai na cudru ni Kalou! 10Eda a veimecaki tu kina kei na Kalou ena dua na gauna, ia sa vakayacora na Kalou me da veivinakati tale kei koya ena vuku ni mate i Luvena. Me vaka ni da sa veitokani vinaka tu oqo kei na Kalou, ena qai vakaevei na kena levu cake na noda vakabulai tiko ena vuku ni bula i Karisito! 11Ia e sega ni o koya walega o ya; eda sa vakavinavinaka tiko vua na Kalou ena vuku ni noda Turaga ko Jisu Karisito, o koya sa mai yaco kina me da veivinakati kei na Kalou.

O Atama kei Karisito

12E a curu mai ki vuravura na i valavala ca ena vuku ni dua ga na tamata, ia na nona i valavala ca sa kauta vata mai na mate. Sa mani yaco kina me tete na mate ki na tamata kecega, me vaka ni da sai valavala ca na tamata kecega.#Vteki 3.6 13A sa tu e vuravura na i valavala ca ni se bera ni soli na Lawa; ia me vaka ni a se sega kina na Lawa sa sega ni mani volai na i valavala ca vua na tamata e cakava. 14Ia mai na gauna i Atama me yacova na gauna i Mosese sa lewai ira kece tu na tamata o mate; e bau lewai ira talega era sega ni valavala ca ena nodra voroka e dua na Lawa, me vaka na cala sa cakava o Atama.

O Atama sai vakatakarakara kei koya ena qai muri mai. 15Ia e rau sega ni tautauvata na lewe rua oqo, ni sega ni tautauvata na i solisoli soli wale ni Kalou kei na i valavala ca i Atama. Sa dina ni sa levu sara na tamata e mate ena vuku ni valavala ca ni dua na tamata. Ia sa levu cake sara na lolomasavu ni Kalou ka vakakina na nona i solisoli soli wale vei ira e vuqa na tamata ena vuku ni lolomasavu ni dua na tamata, o ya ko Jisu Karisito. 16A sa tiko na kedrau duidui na loloma soli wale ni Kalou kei na i valavala ca ni tamata e dua bau. Ni lewa ka sa tau mai ena vuku ni duabulu ga na i valavala ca sa kauta mai na cudruvi, ia na i solisoli ka sa soli wale mai, ka donuya na gauna sa sivia tu kina na i valavala ca, a sa kauta mai na bula vosoti ka sa vakadonui. 17Ni kevaka sa yaco me lewai keda o mate ena vuku ni valavala ca ni lewe dua o ya, sa na qai vacava na uasivi ni ka e rawata na le dua ka tarava, ko Jisu Karisito. Ni o ira kece sara sa ciqoma na lolomasavu vuabale ni Kalou ka ra sa vakadonui vata kaya, era na qaqa ena bula oqo ena vuku i Karisito.

18O koya oqo, me vaka ni sa vakavuna e duabulu ga na i valavala ca na nodra cudruvi na tamata kecega, sa vakavuna talega vakakina e duabulu ga na cakacaka dodonu me ra sereki ka vagalalataki na tamata kecega ka sa soli vei ira na bula. 19Me vaka talega na nodra sa okati me ra i valavala ca na tamata ena vuku ni valavala ca ni dua ga na tamata, ena vakakina na nodra vakadonui talega ena vuku ni talairawarawa ni dua ga na tamata.

20E a kau mai na Lawa me tubu vakalevu kina na i valavala ca; ia ena vanua sa levu kina na i valavala ca, sa uasivi cake kina na lolomasavu ni Kalou. 21Ia oqo, me vaka ni sa gumatua na i valavala ca ki na mate, sa gumatua vakakina na lolomasavu ni Kalou ki na bula sa vakadonui ki na bula tawamudu ena vuku i Jisu Karisito na noda Turaga.

Actualmente seleccionado:

ROMA 5: FNV

Destacar

Copiar