VAKATEKIVU 44
44
Sa Vesuki Penijamini o Josefa
1Sa qai vakaroti koya na nona dauveiqaravi o Josefa ni sa kaya, “Tawana na kakana ki na nodratou taga na tamata oqo me vaka na ka e rawa ni ratou colata, ka biuta na nodratou i lavo ki na nodratou dui taga. 2Biuta na noqu bilo siliva kei na i sau ni nona sila ki na loma ni taga nei koya ka gone duadua.” A sa vakayacora me vaka na ka sa vakaroti kina. 3Ia ni sa kida cake na mataka, e ratou sa vakalesui tale me ratou gole yani na veitacini kei na nodratou asa. 4Ni ratou se bera ni yawa mai na koro, a sa kaya o Josefa vua na dauveiqaravi ena nona vale, “Totolo ka muri iratou na tamata o ya. Ni o sa yacovi iratou, mo tarogi iratou mada, ‘A cava dou sa sauma kina na vinaka ena ca? 5A cava dou sa butakoca kina na nona bilo siliva na noqu turaga. Sai koya oqo na bilo ka dau vakayagataka me kaya kina na ka sa bera mai. Sa dua sara na cala levu dou sa vakayacora oqo!’ ”
6Ni sa yacovi iratou yani na dauveiqaravi, a sa kaya vei iratou na vosa kece o ya. 7E ratou sa kaya lesu vua, “A cava o ni sa vosa saka kina vakaoqo? Sa sega sara ni rawa vei keitou na nomuni tamata me keitou cakava na mataqali cakacaka vakaoqo. 8O ni sa raica ni keitou a kauta lesu mai na i lavo ka kunei ena loma ni neitou taga mai na vanua o Kenani. E rawa vakacava me keitou butakoca na siliva se na koula mai na vale ni nomuni turaga? 9Kevaka e kune vua e dua vei keitou na nomuni tamata, me na vakamatei, ia oi keitou na kena vo me keitou qai nomuni bobula ga.”
10A sa kaya o koya “Sa donu vinaka oqori; ia o koya ga e kunei vua na bilo ena noqu bobula, ka dou lako yani ena galala na kena vo.” 11E ratou sa mai dui vakasobura vakatotolo yani na nodratou taga, ka ratou dui dolava sara. 12A mai vaqaqara yani na dauveiqaravi, me tekivu mai vei koya e qase sara ka yaco vei koya ka gone duadua, ka qai kunea na bilo ena taga nei Penijamini. 13E ratou sa dresulaka na nodratou i sulu na veitacini ena levu ni nodratou rarawa, a ratou vakavodoka na nodratou asa, ka lesu ki na koro.
14Ni sa yaco yani o Juta kei iratou na tuakana ki na vale i Josefa, a sa tiko ga kina o koya. A ratou sa mai cuva e matana, 15ka sa kaya o Josefa, “A cava dou sa cakava? Dou sega li ni kila ni mataqali tamata vakataki au e rawa ni kitaka na cakacaka ni daurairai me kilai kina na veika e sa bera ni yaco?”
16Sa qai kaya o Juta, “A cava tale me keitou qai kaya na noqu turaga? Me keitou qai veiba rawa vakacava? Me keitou qai vagalalataki keitou rawa vakacava? Na Kalou sa vakatakila na neitou cala. Keitou sa nomuni bobula taucoko sara, ka segai wale ga ni o koya sa kune vua na bilo.”
17Sa qai kaya o Josefa, “Sega, au na sega ni cakava na ka oqori; o koya ga sa kunei vua na bilo ena noqu bobula. Na kena vo mo dou lesu vakavinaka yani vua na tamamudou.”
Sa Vakamamasu o Juta
18Sa qai lako o Juta vei Josefa ka la'ki kaya, “Mo ni yalovinaka na noqu turaga, ni vakadonuya me'u veivosaki mada kei kemuni. Mo ni kakua ni cudruvi au na nomuni tamata, ni kemuni sa vakataka na tui. 19O ni sa tarogi keitou na noqu turaga, ‘E dua tiko na tamamudou se na tacimudou?’ 20Keitou sa qai kaya, ‘E tiko e dua na tama i keitou, ka dua na taci keitou, ka a qai sucu ni sa qase sara o koya. Sa mate na tuakana, ka sai koya duadua ga na luve i tinana e sa bula tiko; ka sa lomani koya vakalevu sara o tamana.’ 21O ni a qai kaya vei keitou, ‘Dou la'ki kauti koya mai ki ke me'u rawa ni raici koya.’ 22Keitou sa qai kaya vei kemuni, ‘Ena sega ni rawa ni laivi tamana na cauravou, ia kevaka e biuti koya, sa na mate o tamana.’ 23O ni sa qai kaya, ‘Dou na sega ni vakatarai mo dou rairai mai ki mataqu, ka vakavo ga kevaka sa tiko kei kemudou na tacimudou gone sara.’
24Keitou sa lesu yani vua na nomuni tamata na tama i keitou ka kaya vua na nomuni vosa. 25A sa qai kaya, ‘Dou lesu tale ka volia mai vakalailai eso na keda.’ 26Keitou sa qai kaya, ‘Keitou na sega ni lako; ena sega ni vakatarai me keitou rairai ki matana na tamata o ya, vakavo kevaka sa tiko kei keitou na taci keitou.’
27A sa kaya vei keitou na tama i keitou, ‘Dou sa kila ni sa vakasucuma vei au na watiqu e rua na luvequ tagane. 28E dua sa biuti au. E rairai sa basuraki koya na manumanu kila, ka'u sa sega tale ni kunei koya me yacova mai oqo. 29Kevaka dou kauti Penijamini tani tale mai vei au, ka sa mani la'ki leqa, ena vakamatei au na rarawa ni yalo dou sa vakavuna ena ka oqo.’
30A sa tomana o Juta na nona vakamamasu ka kaya, “Ia oqo, kevaka au na lesu yani vei tamaqu ka sa yali na cauravou, sa na vakavuna oqo na nona mate. Sa veivolekati sara na nona bula kei na bula ni cauravou. 31Keitou na qai vakavuna na nomuni tamata me yalo rarawa vakalevu na tamai keitou ka vakavuna na nona mate, ka ni sa qase sara. 32Au a sa yalataka talega na noqu bula vei tamaqu me baleta na cauravou oqo, ka'u sa kaya vua ni kevaka au na sega ni kauti koya lesu yani vua, me qai tau vei au na kena veibeitaki ena vo ni noqu bula taucoko. 33Ia oqo, au sa na tiko mai me'u nomuni bobula me i sosomi ni cauravou. Ia mo ni vagalalataki koya ka me lesu tale kei iratou na tuakana. 34Ena rawa vakacava me'u lesu tale vei tamaqu kevaka sa yali na cauravou oqo? Sa dredre sara vei au me'u raica na veika ca ena yacovi tamaqu.”
Actualmente seleccionado:
VAKATEKIVU 44: FNV
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Fijian New Version Bible, Revised Edition © Bible Society of the South Pacific, 2017, 2021.
