VAKATEKIVU 43
43
Sa Kau ki Ijipita o Penijamini
1Sa qai levu sara na dausiga ena vanua o Kenani. 2Ena gauna era sa kania oti kina na vuvale i Jekope na sila era a kauta mai Ijipita, a sa kaya tale o Jekope vei iratou na luvena tagane, “Dou lako ka la'ki volia tale mai vakalailai eso na kakana me keda.”
3Sa qai kaya vua o Juta, “Sa vakaroti keitou matua sara na tamata o ya ka kaya ni na sega ni vakatarai me keitou lai raici koya tale ka vakavo duadua kevaka sa tiko talega na taci keitou. 4Kevaka o na solia na taci keitou me keitou lako vata, keitou na qai la'ki voli kedatou kakana mai. 5Ia kevaka o na sega ni soli koya, keitou na sega ni lako, baleta ni sa kaya na tamata o ya, ‘Dou na sega ni vakatarai mo dou rairai tale mai ki mataqu, vakavo ke sa tiko kei kemudou na tacimudou.’ ”
6Sa qai kaya o Jekope, “A cava dou sa cakava kina vakaoqo vei au, ena nomudou kaya vua ni dua tale tiko na tacimudou?”
7E ratou sa qai kaya, “Sa vakataroga vakavinaka sara na tamata o ya na veika me baleti keitou kei na matavuvale, ‘E se bula tiko na tamamudou? E dua tale tiko li na tacimudou?’ Keitou a sauma kece na nona taro. E rawa vakacava me keitou kila ni na tukuna me keitou mai kauta yani na taci keitou?”
8Sa qai kaya o Juta vei tamana, “Vakatalai Penijamini vata kei au, keirau sa na lako sara ga oqo. Ena sega kina ni dua vei kedatou me mate ena vuku ni viakana. 9Au sa yalataka na noqu bula ena vukuna; ka mo solia vei au na i tavi me'u na dau raici koya tiko. Kevaka au na sega ni kauti koya lesu bula mai vei iko, au sa tu vakarau me'u beitaki kina ena noqu bula taucoko. 10Kevaka tou a sega ni wawa tiko vakadede, ke keitou a sa lesu tale mai oqo vakarua.”
11Sa qai kaya vei iratou o tamadratou, “Kevaka e sa vakaoqori, dou cakava na ka oqo: dou kauta eso na vuata vinaka sara ni vanua oqo me i loloma vua na kovana: me vakalailai na i lumu wainimate, na oni, na drega, na mura, na ivi, kei na amodi. 12Me vakaruataki talega na levu ni lavo mo dou kauta, baleta ni dou na kauta lesu tale tikoga na i lavo ka vakalesui mai ena nomudou taga. De rairai a vakacalakataki na kena a biu cala mai. 13Dou kauta na tacimudou ka totolo lesu tale mai. 14Ia me vakavuna na Kalou Kaukauwa#43.14 Vakaiperiu (Hb) El Shaddai vua na tamata o ya me lomani kemudou, ka me soli tacimudou kei Penijamini lesu vei kemudou. Kevaka sa dodonu me ratou kau tani vei au na luvequ, ia me ratou kau tani ga.”
15E ratou sa mai taura yani na i loloma, kei na i lavo a vakaruataki na kena levu vata kei Penijamini. E ratou a cavutu sara ka lako yani ki Ijipita, me ratou la'ki rairai sara vei Josefa. 16Ni sa raici Penijamini kei iratou o Josefa, sa kaya vua na tamata sa dau qarava na nona vale, “Kauti iratou na tamata oqo ki vale, mokuta e dua na manumanu, ka vakarautaka, ka ni ratou na la'ki vakayakavi vata kei au” 17A sa vakayacora na tamata o ya na ka sa vakarota vua o Josefa, ka kauti iratou ki na vale i Josefa.
18Sa dua tani na nodratou rere ni ratou sa kau ki na vale i Josefa, ka ni ratou nanuma, “E datou sa kau mai ki ke baleta na i lavo ka a vakasukai ki na nodatou taga e liu. Era na vesuki kedatou, ka taura na nodatou asa, ka kauti kedatou me nona bobula.” 19Ia e ratou sa lako yani vua na i vakatawa ni vale ka kaya vua e katuba, 20“Ni yalo vinaka na turaga, keitou sa lako mai ki ke e liu, me voli kakana. 21Ia ni keitou sa yaco ki na vanua me keitou vakacegu kina, keitou sa qai dolava na neitou dui taga, ka raica na neitou dui taga i lavo ni tiko kecega kina na neitou dui i lavo. Keitou sa kauta lesu tale mai oqo, 22Keitou sa kauta mai eso tale na i lavo me keitou mai voli kakana kina. Keitou sega sara ni kila se o cei a biuta lesu tale na neitou i lavo ki na dui neitou taga”
23Sa qai kaya na dauveiqaravi, “Dou kakua ni taqaya, dou kakua ni rere. Na nomudou Kalou, na nona Kalou na tamamudou sa rairai biuta vakaidina na i yau oqori ki na nomudou taga me baleti kemudou. Au a sa taura oti na nomudou i sau ni kakana e liu.” A sa qai kauti Simione mai vei iratou.
24Sa qai kauti iratou o koya na dauveiqaravi ki na vale i Josefa ka solia vei iratou na wai me ratou vuya kina na yavadratou; ka vakania talega na nodratou asa. 25E ratou sa mai vakarautaka sara toka yani na nodratou i loloma me baleta na lako mai i Josefa ena yakavi, ka ni ratou sa rogoca ni ratou na kana e kea. 26Ni lesu mai o Josefa, e ratou sa la'ki cuva sobu ki na qele e matana. 27Sa mai taroga yani na i tuvaki ni nodratou bula, ka kaya, “E sa vakacava tiko na tamamudou o dou a kaya vei au? E vakaevei, e se bula tiko?”
28E ratou sa qai kaya, “Na nomuni tamata na tama i keitou e se bula, ka bulabula vinaka tiko.” E ratou sa qai cuva sobu yani ena vakarokoroko vua.
29Ni sa raici Penijamini na tacina dina o Josefa, a sa kaya, “Sai koya li oqo na tacimudou o dou a kaya vei au? Me vakalougatataki iko na Kalou, i na luvequ.” 30A qai biuti iratou yani vakasauri o Josefa, baleta ni sa rui luluvu na yalona ena vuku i tacina, ka sa voleka sara ni turu na wai ni matana; ia sa gole ga yani i loma ni nona rumu ka tagi. 31Ni sa savata oti na matana, a sa lako tale mai ki tuba, ni sa qai tauri koya vakavinaka, ka vakarota me vakarautaki na kakana. 32A sa vakarautaki na kakana kei Josefa ena dua na teveli, ka vakarautaki na kedratou na tuakana ena dua tale. A sa vakarautaki tani ga na kedra na kai Ijipita, baleta ni tabu vei ira na kai Ijipita me ra kana vata kei ira na Iperiu. 33E ratou sa dabe na veitacini ena teveli, ka ratou veiraici mata toka kei Josefa, ka ratou tuvani veitarataravi mai vei koya e qase sara kivei koya e gone duadua. Ni ratou sa raica na veitarataravi ni nodratou i dabedabe, e ratou sa veiraici ena kurabui. 34A sa vakarautaki mai na teveli i Josefa na kedratou kakana, ka sa vakalimataki na i vakarau ni kakana e soli vei Penijamini mai vei iratou na kena vo. E ratou sa qai kana ka gunu vata kei Josefa ena marau.
Actualmente seleccionado:
VAKATEKIVU 43: FNV
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Fijian New Version Bible, Revised Edition © Bible Society of the South Pacific, 2017, 2021.
