LAKO YANI 8

Ai Karua ni Totogi: Manumanu na Boto

1A sa qai kaya vei Mosese ko Jiova, “Mo lako vua na tui ka kaya vua, ‘Sa kaya ko Jiova: Laivi ira noqu tamata me ra lako me ra mai sokalou vei au. 2Kevaka o sega ni laivi ira me ra lako, au na ravuta na nomu vanua taucoko ena boto. 3Na uciwai era na sinai ena boto; era na robota yani na loma ni nomu i tikotiko vakatui, ena nomu rumu, na nomu i mocemoce talega, nodra vale na nomu vakailesilesi, o ira nomu tamata, e loma ni nomu lovo kei na sedre ni natu kakana. 4Era na ladevi iko yani, kei ira na nomu vakailesilesi, kei na nomu tamata kecega.”

5A sa qai kaya vei Mosese ko Jiova, “Mo tukuna vei Eroni, ‘Mo dodoka yani nomu i titoko ki uciwai, na veikeli musu, na drano ka me ra lako mai kina na boto ki na vanua taucoko o Ijipita.’ ” 6A sa dodoka na nona i titoko o Eroni ki na veiuciwai e Ijipita ka ra sa lako mai na boto ka robota na vanua kecega o Ijipita. 7Era a cakava talega kina na cakacaka mana vuni na daucakamana ni tui, ni ra a kauta talega mai na boto me sinai kina na vanua o Ijipita.

8A kacivi rau o Mosese kei Eroni na tui ka kaya, “Mo drau masu vei Jiova me kauta tani mai vei au kei ira na noqu tamata na boto, ia ka'u na laivi ira na Isireli me ra lako ka ia na vakacaboisoro vei Jiova.”

9A qai kaya vua na tui o Mosese, “Yalo vinaka tukuna mai vei au na gauna me'u masulaki kemuni kina kei ira na nomuni vakailesilesi kei na nomuni tamata me ra na vagalalataki mai vei kemuni na boto ena nomuni veivale ka me ra lesu tale ki na uciwai na Naile.”

10A sauma o koya ka kaya, “Ni mataka.”

A sa kaya o Mosese, “Me vaka o ni a kaya! Me na rawa kina vei kemuni mo ni kila ni sa sega tale e dua e tautauvata kei Jiova na neimami Kalou. 11Ena lako tani mai vei kemuni na boto, mai na nomuni veivale, mai na nodra i tikotiko na nomuni vakailesilesi, kei ira na nomuni tamata, ka ra na lesu tale ki na uciwai na Naile.” 12E rau a qai lako tani mai vua na tui o Mosese kei Eroni, ka sa masu vei Jiova o Mosese me baleti ira na boto ka ra a sinai tu ena vanua o Ijipita. 13A sa vakayacora ko Jiova na ka sa kerea o Mosese, ka ra sa qai mate na boto ena veivale, ena veirara ni soqo, kei na loma ni vanua. 14Era a kumuna vata na boto mate ka sa curu botea na vanua o Ijipita na kena i boi. 15Ia ni raica na tui ni ra sa mate na boto, a sa vakalomaqataki koya ka sega ni vinakata me vakarorogo vei rau o Mosese kei Eroni, me vaka ga na ka sa tukuna oti na Kalou.

Ai Katolu ni Totogi: Na Kutu

16A sa kaya vei Mosese na Kalou, “Mo tukuna vei Eroni, ‘Mo dodoka yani na nomu i titoko ka samuta na qele, ena qai vuki na kuvu ni qele me ra kutu ena vanua taucoko o Ijipita.’ ” 17Sa qai dodoka o Eroni na nona i titoko mai na ligana ka samuta na qele, ka sa vuki na kuvu ni soso me ra kutu, ka ra sa qasivi ira yani na tamata kei na manumanu talega ena vanua taucoko o Ijipita. 18Era a saga na daucakamana ni Ijipita me ra basika talega mai na kutu, ia era a sega ni rawata. Era a qasivi kutu na tamata kei na manumanu ena veivanua kece sara, 19ka ra sa qai tukuna kina vua na tui o ira na daucakamana, “Oqo na cakacaka ni Kalou!” Ia sa lomaqa ga na tui ka sega ni via rogoci rau o Mosese kei Eroni, me vaka na ka sa kaya oti ko Jiova.#Luke 11.20

Ai Kava ni Totogi: Na Lago

20A sa kaya vei Mosese na Kalou, “Mo sou ena mataka lailai ka la'ki vakaraitaki iko vua na tui, ena gauna e lako yani kina ki wai, ka kaya vua, ‘Sa kaya vakaoqo ko Jiova. Laivi ira na noqu tamata me ra la'ki sokalou vei au. 21Ia kevaka o na sega ni laivi ira na noqu tamata me ra lako, au na vakatalai ira yani na yavusa lago vei iko, na nomu vakailesilesi, na nomu tamata, ena loma ni nomuni veivale kei na veivale kecega ni Ijipita ena vakasinaiti ena yavusa lago; ka vaka talega kina na vanua kece o ni tikora. 22Ena siga o ya, au na biuti Qoseni vakatikitiki, oqori na vanua era tiko kina na noqu tamata, ka na sega e kea na yavusa lago. Au na kitaka oqo mo ni kila kina ni sai au ko Jiova, ka'u sa tiko ena vanua oqo. 23Ia au na vakayacora na veivakaduiduitaki#8.23 Eso na i vakavakadewa makawa veivakaduiduitaki; Vakaiperiu veivakabulai. vei ira na noqu tamata mai na nomu tamata. Na cakacaka mana oqo ena vakayacori ni mataka.” 24A sa vakayacora vakakina ko Jiova, ka sa dua na yavusa lago vakaitamera era a lako yani ki na valenitui ka vakakina na nodra vale na vakailesilesi kei na vanua taucoko o Ijipita a vakarusai ena vuku ni lago.

25A sa qai vakaroti Eroni kei Mosese na tui me rau lako mai vua, ka sa kaya, “Ni lako, ka la'ki vakacaboisoro vua na nomuni Kalou ena loma ga ni vanua oqo.”

26Ia sa kaya o Mosese, “Ena sega ni dodonu me vakayacori vakakina, ka ni vakacaboisoro keimami na vakayacora vei Jiova na neimami Kalou ena veisaqasaqa kei kemuni na kai Ijipita. Ni kevaka keimami sa vakamatea na manumanu me cabori e matadra na kai Ijipita, era na vakaviriki keimami ena vatu me yacova na mate, baleta ni sa cala oqo e matadra. 27O koya oqo sa dodonu kina me keimami lako ga me tolu na siga ki na loma ni vanua lala ka vakacaboisoro vei Jiova na neimami Kalou, me vaka sa vakarota vei keimami.

28A sa kaya na tui, “Au na laivi kemuni mo ni la'ki vakacaboisoro vei Jiova na nomuni Kalou ena vanua lala, o ya kevaka o ni na sega sara ni lako vakayawa. Drau qai masulaki au mai.”

29Sa qai kaya o Mosese, “Ena gauna ga keirau biuti kemuni kina, keirau na masu vei Jiova me kau tani mai vei kemuni na yavusa lago, vei ira talega na nomuni vakailesilesi kei na nomuni tamata. Ia mo ni kakua ga ni lasutaki keimami tale ka sega ni laivi ira na Isireli me ra la'ki vakacaboisoro vei Jiova.”

30A sa gole tani mai vua na tui o Mosese, ka sa masu vei Jiova. 31A sa vakayacora ko Jiova na ka sa kerea o Mosese. Sa qai kauta tani na lago mai vua na tui kei ira na nona vakailesilesi, kei ira talega na nona tamata ka sega tale ni dua e vo. 32Ia sa vakaukauwataka tale na lomana na tui ena gauna talega oqo, ka mani sega tale ni laivi ira na Isireli me ra lako.

Actualmente seleccionado:

LAKO YANI 8: FNV

Destacar

Copiar