LAKO YANI 7
7
1Sa kaya vei Mosese ko Jiova, “Raica, au sa qisi iko mo vaka na Kalou ena mata ni tui, ia o Eroni na tuakamu sa na nomu parofita. 2Mo tukuna kece na veika au sa vakarota vei iko, ia o Eroni na tuakamu ena qai kaya vua na tui me laivi ira na Isireli me ra lako tani mai na nona vanua. 3Ia ka'u na vakaukauwataka na lomana na tui, ka'u na vakalevutaka na noqu i vakatakilakila kei na cakacaka mana ena vanua o Ijipita.#Caka 7.36 4Ena gauna sa na sega ni vakarorogo kina vei iko na tui, au na qai kauta mai ki Ijipita na cudru levu sa veivakatotogani, ka kauti ira tani na veimataqali kece sara ni noqu tamata na Isireli. 5Era na kila na kai Ijipita ni sai au ko Jiova, ena gauna au sa na dodoka yani kina na ligaqu vei ira ka kauti ira tani mai na Isireli mai Ijipita.” 6E rau a vakayacora vakakina o Mosese kei Eroni na veika sa vakarota vei rau ko Jiova. 7A sa 80 na yabaki i Mosese ka 83 na yabaki ni bula i Eroni ena gauna e rau a vosa kina vua na tui.
Na i Titoko i Eroni
8A sa kaya vei Mosese kei Eroni ko Jiova, 9“Kevaka sa tukuna na tui vei kemudrau, mo drau vakayacora e dua na cakacaka mana, mo qai tukuna vei Eroni, ‘Taura na nomu i titoko ka viritaka ki na qele ena mata ni tui ka sa na vuki me gata.” 10E rau a lako yani o Mosese kei Eroni vua na tui ka vakayacora na ka sa vakarota vei rau ko Jiova; a viritaka o Eroni na nona i titoko ena mata ni tui kei ira na nona vakailesilesi, ka sa mani vuki me gata. 11A qai vakarota na tui me ra lako mai na nona tamata vuku kei ira na daucakaisausau; era vakayacora talega vakakina, ena nodra i valavala na daucakamana ni Ijipita, 12era a dui viritaka yadua na nodra i titoko ki na qele, ka ra sa vuki talega me gata, ia na i titoko i Eroni a tiloma kece na nodra i titoko. 13Ia a loma qa tikoga na tui, ka sega ni via vakarorogo vei rau, me vaka a kaya ko Jiova.
Ai Matai ni Totogi: Vuki na Wai me Dra
14A sa kaya vei Mosese na Kalou, “A vakaukauwataka na lomana na tui ka sega kina ni via laivi ira na tamata me ra lako. 15Mo lako vua na tui ena mataka, ena gauna e lako sobu kina ki na uciwai o Naile; ia mo tucake tu ena bati ni uciwai mo drau sota, ka mo taura tiko na i titoko ka a vuki me gata. 16Mo kaya vua, “Ko Jiova, na nodra Kalou na Iperiu sa talai au mai me'u mai tukuna vei kemuni oqo: “Mo laivi ira na noqu tamata me ra lako, ka me ra la'ki qaravi au ena loma ni vanua lala.” Ia me yacova mai oqo, o se sega ga ni via rogoca. 17A sa kaya vakaoqo ko Jiova, “Ena vuku ni ka oqo, o sa na kila kina ni sai au ko Jiova, raica na i titoko oqo, au na samuta kina na uciwai na Naile, ka na vuki me dra.#Vtaki 16.4 18Era na mate na ika e uciwai ka sa na boi ca talega, ka na sega ni rawa kina vei ira na kai Ijipita me ra gunuva na wai mai na uciwai.”
19A sa kaya vei Mosese na Kalou, “Tukuna vei Eroni, ‘Taura na nomu i titoko ka dodoka yani ki na uciwai e Ijipita, ki na kena veiuciwai kecega na i keli musu, na drano kei na veivanua kecega sa tu kina na wai ka me ra sa vuki kece me dra; ka sa na yaco kina me dra na wai ena loma ni vanua taucoko o Ijipita, ka na vaka talega kina ena veidari kau kei na i gunugunu vatu.’ ”
20Rau a vakayacora o Mosese kei Eroni na ka a vakarota vei rau ko Jiova. Ena mata ni tui kei ira na nona vakailesilesi a laveta cake kina na i titoko ka samuta na wai e uciwai, ka sa yaco me dra na wai kecega ena veiuciwai. 21Era a mate kece na ika ena veiuciwai. Sa bona na veiuciwai ka ra sa sega ni gunu wai rawa kina na kai Ijipita, ni sa dra wale ga na loma ni vanua taucoko. 22Ia o ira na daucakamana kei ira na daucakaisausau ni Ijipita era a mai cakava talega vakakina na nodra cakamana ena nodra i valavala vuni, ia a se loma qa tikoga na tui, ka sega kina ni via rogoci rau; me vaka a kaya ko Jiova. 23A vuki na tui ka lako yani ki na nona vale, ka sega sara ga ni kauwaitaka na i tukutuku oqo. 24O ira kece na kai Ijipita era a keli wai ni gunu ena bati ni uciwai na Naile, baleta ni ra sa sega ni gunu rawa mai na uciwai.
25A sa sivi yani e vitu na siga na kena vakacacani na uciwai na Naile mai vei Jiova.
Actualmente seleccionado:
LAKO YANI 7: FNV
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Fijian New Version Bible, Revised Edition © Bible Society of the South Pacific, 2017, 2021.
