Luk 13

Mbiɗi gwat ngi gi malla zizi

1Ti di nah na, mizli a soko ng'avu Yesu, a ɓakaŋ ɓi ngi Galilehey, Pilat mikiɗa taŋ vagay vagay ti taŋ magam mikuli da Buymisemuŋ. 2Yesu a mbiɗa taŋ di: «Ki waka na, Galile mumicam tayna, i migi mungrahay haɗi fineˀ Galile mekelemey gar sukwani? 3Yi ɓukum na: Naŋ kanah ta, amma da kum vuna, ki mbiɗaka mevele ta na, kum gar, kisa zizam kanah ya. 4Yo mizli mukuruˀ nga dangafaɗ, hay musubur ngi slala Silowe mimbizli angi taŋ na, ki waka kaɓa taŋ i malambaˀhay haɗi fineˀ Zeruzalemey gar sukwani? 5Yi ɓukum na: Naŋ kanah ta, amma da kum vuna, ki mbiɗaka mevele ta na, kum gar, kisa zizam kanah ya.»

Ɓi ngi ˀuruf miyi ta

6Dar Yesu a wa taŋ ɓi miweˀ ti wi ani: «Mbur ada, naŋ ti ˀuruf naŋ mihirva kaˀ a hur guva naŋ ngi gudubun. Aru, da a lum yi naŋ kwani, amma ko a lum ta. 7Dar a ɓa mbur migi slra ngi guva: «Pura, vi ani makir, i ra so pura da i lum yi avu ˀuruf misenna kwana, amma ko y'anta lum ta. Nguma avra! A tika gidaŋ ngi hirwuyo ngi mi aruŋ maka?» 8Amma mbur tuwa a mbiɗaŋ di: ‹Kumani, inga pula tumbulumna ɗagay. I sa la virzi naŋ gun, yo i sa paŋ zay gwatay. 9Asinta, a sa yi didirba kwani. Da a yi ta ma na, kisa ngumaŋ.›»

Yesu miɗiya ngwas misi ble ti hin ngi sabat

10Ngi hin ngi sabat mekelem ada na, Yesu ara dubun gwat da mizli ar hay ngi dira dibiɗ. 11Ngwas ada akẽh, setene a hirnga, a gaŋ ble le. A gi di le vi kuruˀ nga dangafaɗa. A guɓoŋ girjaŋ wãˀ, ko a slikiɗ deŋ cir cire gu ta. 12Yesu mupura keɗ na, a zilaŋ, a ɓaŋ: «Ngwasa, ki lih le avu ble ɗike.» 13A buca haŋ a hirnga ngwas tuwa. A haŋhaŋ si na, a slikiɗ deŋ, a hunuma Buymisemuŋ. 14Amma buy ngi hay ngi dira dibiɗ a ji mevel, asi Yesu miɗiy mbur ti hin ngi sabat na. Joˀ a ɓa zigiduwo: «Hin ada merkeɗ ngi gi slra. Soko ɓa ki mbulomo angi hin tayna, amma anta ti hin ngi sabat ta.» 15Buy Yesu a mbiɗaŋ di: «Kum miɓi mi cuw cuwoy, ko wa gar a wuzla kumo, a pula sla naŋ malla zungu naŋ tir li zumo, ɓa ara vulaŋ yam ti hin ngi sabata takwa? 16Ngwas misenna, Satan a juwaŋ le, vi naŋ ani kuruˀ nga dangafaɗa. Naŋ kwana, i dideˀ ngi Abraham aya. A zlir le ɓa a puskakaŋ tir bonoy naŋ na ti hin ngi sabata takwa?» 17Yesu miɓi kanah na, a ga mesem le haɗi da mesene naŋhaya gar, yo zigiduw gar ara mumul vur Yesu magi gwat hirngahay na.

Ɓi ngi zinga ngi lar ada

(Yo pura Mat 13.31-32; Mark 4.30-32)

18Yesu a ɓi na: «Zumabuy ngi Buymisemuŋ a bam vu ati mike? I sa wa ati mike? 19A bam vu ati zinga ngi lar ada#13.19 Lar nah na a zilaka ti mi frasẽ mutarde, i kalaf, zinga naŋ, a luguɗom di lar., mbur muzuɓa, a dika a hur guva naŋ. A pus hã a tiri widis, ɗiyuwoy a ɗiyam hay angi mihaŋ naŋhaya.»

Ɓi ngi ˀis ngi slikiɗa hapa

(Yo pura Mat 13.33)

20Yesu a ɓi ma: «I sa wa Zumabuy ngi Buymisemuŋ ti mike? 21A bam vu ati#13.21 Is i wiɗi ngi nasarahay ngi slikiɗa hapa milihiɗa le. ˀis ngwas muzuɓa, a lihiɗa angi hapa kilo kukur cuw nga zlum, hã a slikiɗa gar.»

Mizlingre muɓucco

(Yo pura Mat 7.13-14,21-23)

22Yesu aru bal ti dubuna gwat da mizli angi walahay madiɗahay ati prokoy gar, hã sesẽŋ a Zeruzalem. 23Mbur ada, a ɓaŋ: «Buy, masa lahama i mizli neˀkini si kwa?» Yesu a ɓa taŋ: 24«Tumom vu ɓa ki cam tir mizlingre muɓucco. Yi ɓukum na: Mizli haɗi a sa puram jiviɗ ngi ci, amma t'anta sa cam gu ta. 25Da buy ngi hay misa slikiɗ le, a gica mizlingre le na, kum mindiram avra na, kisa zlaka tila mi a mizlingre: «Buy, wuna ndra mizlingre.» Joˀ naŋ a sa mbuɗukum di: «Da ki soko ti damaka na, yi sinukum ta.» 26Dar kisa ɓam: «I zumam, yo i sam gwat le bumoˀ takwa? Ki dubuna gwat le da mizli ar luuma ndraˀahaya takwa?» 27Joˀ naŋ a sa ɓukum ma: «Da ki soko ti damaka na, yi sinukum ta. Kiraham kileŋ avu ya, kum migi gwat malambaˀhay gar.» 28Ti kum misa puraka ti Abrahama le, Izak, Zakop waɗ mijiviɗey gar angi Zumabuy ngi Buymisemuŋ, amma kumo, a hizigukum le avra na, kisa tuwam, kisa ngirɗam sliŋ a diga. 29Mizli a sa soko tisi pas ngi miprik waɗ tisi pas ngi pastaˀ, tir vay muŋ waɗ tir vay ruwuy, a sa cifam ngi zuma ɗaf ngi muguzlum angi Zumabuy ngi Buymisemuŋ. 30Naŋ kine, mizli ngi dirbahay wurenna, a sa tiram ngi mbuŋhoy, yo mizli ngi mbuŋhoy wurenna a sa tiram ngi dirbahay.»

Yesu mutuwa Zeruzalem

(Yo pura Mat 23.37-39)

31Hirak ti nah na, Farisa mekelemey a kirohoko ng'avu Yesu, a ɓakaŋ: «Cuhu, aru ng'ar li mekelem, asi Herod ara wuɗ kiɗ ɗike vagay.» 32Yesu a ɓa taŋ: «A ram, ɓaka biigaɗ nah na: Dana waɗ tiprik na, i ra ɓul setenehey avra, yo i ra mbul mizli. Hã duwul na, a kiɗ mi le. 33Amma dana, tiprik ati duwul na, sey i zuɓa jiviɗ ɗu, asi ɓa a kiɗaka mijiviɗe vagay ar li mekelem pal, mbak a Zeruzaleme le na, a gi ta.

34Kay, Zeruzalem, Zeruzalem, ka makiɗa mijiviɗey vagay vagay, ka makuyupa mizli mislinukuw taŋ na! Yi wuɗ le zleˀe sar mbeˀ mbeˀ, ɓa yi cikila ziri ɗikeye, kaɓa kucukur mahuruk ar ziri naŋhay, amma ki ngum ta. 35Ani, hay ɗik a sa tiri diŋ wãˀ! Yi ɓuw na: Kum anta sa purikiy mata, hã tapas kum masa ɓam: ‹Anja Bumbulvuŋ a ɗuwula mi da mbur maso ti slimiɗ naŋ!›»

Actualmente seleccionado:

Luk 13: BEGDC

Destacar

Copiar