Luk 12

Ji lesl avu ɓi mi mucuw cuwo

(Yo pura Mat 10.26-27)

1Tapas nah na, zigiduw a kus durmuk mbeˀ mbeˀ, hã a kurpam vu ar wala taŋ. Yesu a zla a ɓa mizli ngi seˀeheye: «Dumbuŋ na, jam lesl avu ˀis#12.1 ˀIs i wiɗi ngi nasaray ngi slikiɗa hapa milihiɗa le. ngi slikiɗa hapa ngi Farisahay, ɓi mi taŋ mucuw cuw na. 2Gwat muɗum masa njik ta na anta. Gwat miyaŋŋa masasinta na anta. 3Asi mike na, ɓi kum miɓaka le angi luvuŋ gar na, a sa cin njoy ar li babaraŋ. Ɓi kum misisikam di ˀay le a viŋ na, a sa tilam di mi deŋ a balak.

Mbur ngi zluwun di

(Yo pura Mat 10.28-31)

4Kum ngama ɗuwoy, yi ɓukum na: Mizli makiɗaka dumvu ngi mburo vagay, yo a dirba nah a gam gwat mifineˀ nah gu mata na, ki zluwunam ti taŋ ta. 5Mbur ngi zluwun di na, yi sa bugukum di: Naŋ na, a dirba naŋ mikiɗa mburo le vagay na, naŋ ti gidaŋ ngi hizigaŋ ng'ar vu ma. Haˀaw, yi ɓukum na, sey ki zluwunam di i naŋ.

6Anta hiɗikam jur zlum, sisi cuw ta kwa? Dambalaka ko Buymisemuŋ anta puyuk hirnga ti jur pal asi taŋ ta. 7Wãˀ naŋ ma na, ko himac ngi hirnga kum kwana, a slufaka taŋ le gar. Ki zluwunam ta so, kum puɗaw haɗa fineˀ juroyo gar!

Gi sedewo ar Yesu a mbuŋ mizli

(Yo pura Mat 10.32-33; 12.32; 10.19-20)

8Yi ɓukum na: Ko wa gar masa ɓi njah a mbuŋ mizli, naŋ i mbur ɗu na, Mangal ngi mbur a sa ɓi njah a mbuŋ modro ngi Buymisemuŋhoyo, naŋ i mbur naŋ ya. 9Amma mbur masa ɓi njah a mbuŋ mizli, a siniy ta na, Mangal ngi mbur a sa ɓi njah a mbuŋ modro ngi Buymisemuŋhoyo, a sinaŋ ta ya.

10Ko wa gar masa ɓi ɓi malambaˀ ar Mangal ngi mbur na, a sa pulakaŋ di avra, amma mbur masa za ˀUf Mipal na, anta sa pulakaŋ di avra ta.

11Taŋ misa ram ti kum le ngi gukum kiita a mi hay ngi dira dibiɗey, a mbuŋ buyoy, malla a mbuŋ mizli madiɗahay na, kum masa cikam vu vur hirnga kum, yo ɓi kum masa ɓaka gar na, ki zluwuna ka ta 12Asi ɓi kum masa ɓaka na, i ˀUf Mipal masa ɓukum di hirak ti nah vuna si.»

Ɓi ngi mbur gilaw misi zlili

13Mbur a ɓo Yesu ti wuzla zigiduwo: «Kumani, inga ɓa sukum ɗu na, ɓa i wunkaka zlili cine ndra mupula ndra di na takwa?» 14Yesu a ɓaŋ: «Micifiy ya ngi gi kiita kum, malla ɓa ngi wunka zlili kum, i waka?»

15Yesu a ɓa mizli ma: «Jam lesl, wam vu avu may gwatay gar, asi ko da mbur a lum zlili le haɗi tekeɗe kwana, a ndir ti siifa aseˀe ta.» 16Joˀ a ɓa taŋ ɓi miweˀ ti wi ani: «Mbur misi zlili ada, guva naŋ a gaŋ gwat haɗi. 17A ɓi ti kwacay naŋ: ‹I sa gi mike? Asi li ngi kuso gwat ngi migam ɗuwoy anta.› 18Dar a ɓi: ‹Gwat ya masa ga ani: i sa waha dirgwaɗ ɗuwoy avra, i sa ndir madiɗahay mifineˀ fineˀ hanayna, i sa kuso daw ɗu ati zlili ɗu gar ar taŋ. 19Yo i sa ɓa vu ɗu na: Kˀani, ki wi vu le ti gwat haɗi ngi gi vi mbeˀ mbeˀe. Musuk vu, zum, si gwat huruˀ huruˀ, mumul so.› 20Amma Buymisemuŋ a ɓaŋ: ‹Gilaw lambaˀ! A sa zuɓaka siifa ɗike ar duvuɗ hana vuna si. Na, gwat ka mukuso taŋ hana, a sa ndir da waka?›» 21Dar Yesu a kiɗa mi naŋ, a ɓa taŋ: «Mbur makuso zlili da hirnga naŋ, mbak gi zlili ngi Buymisemuŋ le na, a sa gi avaˀa kanah ya.»

Pula vu mbak da Buymisemuŋ

(Yo pura Mat 6.25-34)

22Dar Yesu a ɓa mizli ngi seˀeheye: «Vurˀe, yi ɓukum na: Gwat kum masa zumam ngi ngir ti naŋ, yo zana kum masa kam avu vu gar na, ki likam vurˀe ta. 23Asi siifa a funa gwat ngi zumo le, yo dumvu kwana, a funa zana le. 24Puraka magagakay ɗi: t'anta zligam gwat ta, t'anta kusom gwat ngi sifi ta, li ngi wi vu ti gwat ngi zumoy malla dirgwaɗ anta, amma Buymisemuŋ ara zum ti taŋ. Kumo, kum puɗaw haɗi fineˀ ɗiyuwoyo! 25Mbur a wuzla kumo, mamurɗo hin ngi siifa naŋ, ko neˀ gu ti lik naŋ na, ada kwa? 26Da kum anta ti gidaŋ ngi gi gwat ko meciɗek wãˀ vuna ta na, is naŋ mindir gar na, ki likaka vur mike? 27Puraka matay ngi ɓuhoy: t'anta siram gugumay ta, t'anta jam zana ta. Yo i ɓukum na: Ko Salomoŋ ti dudok naŋ gar kwana, a ki zana mezle ka taŋ na ɗaˀ ta. 28Kum mizli misi tiɓi keɗeccehey, giziŋ misi a ɓuh dana, tiprike, a sa hizigakaŋ vu, da Buymisemuŋ ara kaŋ zana kanah na, a sa kukum di da kumo fineˀ nah ta jak kwa? 29Kumo na, ki giraka lesl kumo ngi sipi gwat kum masa zumam ati ngi sipi gwat kum masa sama ta. 30Gwat tayna gar na, maram ti sipi naŋ ndrehhe, i mizli duniyahay. Amma kumo, Cine kum a si na le, ki roko ti may naŋ. 31Sipam Zumabuy naŋ jaka, ɓa gwat mindiramaya, a sa pukum di ameˀeŋ.

Zlili ngi muŋ

(Yo pura Mat 6.19-21)

32Kum minjreˀ ka ginew gezleŋ meciɗek na, ki zluwunam ta, asi Cine kum a hĩyã le ɓa a vulukum Zumabuy naŋ. 33Hiɗikaka gwat kumoy avra, vulaka dala nah da misi murgahay. Tufam birtete mangiram tahay, cikilam zlili mahiryi ta wãˀ a muŋ. Ko muhul a ndil a diga gu ta, ko tiler a hirya gu ta. 34Vur ar li zlili kum misi ara na, mevel kum kwana, naŋ ara ya.

Ɓi ngi gawlahay makutukom buy taŋ

35Ndiram ti zana ngi slra ɓaˀ ɓaˀ avu vu, yo lampe kumoyo, vu kaw kaw avu taŋ. 36Ndiram ka gawlahay makutukom buy taŋ masa mawa tir muguzlum ngi vula ngwasa. Naŋ misa ndilo le, yo naŋ misa kiɗa miviŋ le na, ɓa a sa wunakaŋ di. 37Gawla tayna, da buy taŋ a ndilo le, a sa luuma taŋ le titiri na, a mumulom! Gisiŋ, yi ɓukum na: A sa ka zana ngi slra, a sa cifa taŋ jojoˀ ngi zuma gwat, joˀ naŋ a so taŋ ti gwat ngi zumo. 38Yo ko a ndilo ng'avu wuzla duvuɗ, malla wuzla duvuɗo cuh le kwana, da a luuma taŋ le titiri na, a mumulom! 39Ki sinaka le, da buy ngi hay a si na pas ngi muhul masa sawa le na, anta sa pula a slinakaŋ dalama ta. 40Kumo kwana, wam vu, asi Mangal ngi mburo, a sa so ti pas kum misinaka ta ya.»

Gawla miteŋteŋ ati gawla malambaˀa

(Yo pura Mat 24.45-51)

41Dar Piyer a ɓaŋ: «Buy, ka miɓa ɓi miweˀ ti wi hana na, vur ndra kwa? Malla vur mizli gar kwa?» 42Buy Yesu a ɓaŋ: «Gawla miteŋteŋ misi lesl i wana ska? I mbur, buy ngi hay masa pula hay naŋ gar asi haŋ naŋ, ɓa a wunka dawa da mizli ngi hayaya kaslsla angi pas taŋ muwuɗam le gar. 43Gawla nah na, da buy naŋ a ndilo, a sa luuma le ar li gi slra nah na, a mumul! 44Gisiŋ, yi ɓukum na: Buy naŋ a sa cifaŋ i madiɗa a hirnga zlili ngi hay naŋ gar. 45Amma da gawla nah, ara ɓi ti kwacay naŋ: «Buy ɗu a mur le ngi mawa.» Dar a zla a kiɗa gawla ati diili migi slraˀahaya, yo a zum, a si hã a wi na, 46buy naŋ a sa ndilawa angi hin, naŋ makutuko mata, yo angi pas naŋ misina ta. Kay, a sa gaŋ bonoy kuyta wãˀ, a sa vulaŋ dangay ngi mizli miteŋteŋ tahay.

47Gawla misina gwat ngi buy naŋ mawuɗo le, amma a cici gak ngi ga gwat buy naŋ mawuɗo ta na, a sa mbakaŋ ti kiɗ. 48Amma gawla misina gwat buy naŋ mawuɗo ta, yo da a gi gwat zliv a ndila le ɓa a lum kiɗ na, a sa kiɗakaŋ neˀkini si. Mbur muvulakaŋ gwat le haɗi na, a sa cufuɗam ava haɗa ya. Mbur mupulakaŋ gwat le haɗi na, a sa cufuɗam ava haɗi ti vendeke.

Yesu muso ti wunkaˀay

(Yo pura Mat 10.34-36)

49Yi so di i vu asi ruwuyo. Yi wuɗ na, anja a bul le zleˀe si na, kuy! 50Yam ada, ɓa sey yi ci araŋ#12.50 Yesu miɓi ɓi ngi ci ar yam aka na, a wuɗ a ɓi, wãˀ naŋ na, naŋ masa muc ngi buna mungra ngi mizli., yo i ra ɓusa ɓa hã tapas naŋ mikiɗ mi le! 51Ki waka na, yi so di i zuy asi ruwuyo kwa? Naŋ kanah ta, yi ɓukum na: Yi so di i wunkaˀay jaka. 52Asi zle wurenna, mizli zlum ar hay purla na, a sa wunkam ˀay. Mimakirey anta sa jumom ˀay ati mucuwoyo ta, mucuwoy kwana, anta sa jumom ˀay ati mimakireye ta. 53Cine ngi mangal a sa wunkamˀay ati mangal naŋ, mangala kwana, a sa wunkam ˀay ati cine naŋ. Mumuŋ ngi zuŋ a sa wunkamˀay ati zuŋ naŋ, zuŋ kwana, a sa wunkamˀay ati mumuŋ. Mumuŋ ngi mangal a sa wunkam ˀay ati ngwas ngi mangal naŋ, ngwasa kwana, a sa wunkam ˀay ati mumuŋ ngi zil naŋ.»

Sli wala ngi gwatay magam wurenna

(Yo pura Mat 16.2-3)

54Yesu a ɓa zigiduwo ma: «Da kum mupuram gazlavay a bo le tisi pas ngi pastaˀ#12.54 Angi hirwuy Palestine, da vuŋ a wuɗ a sa gi na, gazlavay a zuɓo tisi pas ngi pastaˀa. na, a haŋhaŋ si na, ki ɓam: «Vuŋ a sa gi» na, ara gi gisiŋ. 55Yo da ki puraka le, himiɗ ara so tir vay ngi ruwuy#12.55 Angi hirwuy Palestine, da pas a wuɗ a zlum na, himiɗ a so tir vay ngi ruwuy. na, ki ɓam: «Lihriɓ a sa gi haɗi» na, ara gi gisiŋ. 56Kum miɓi mi cuw cuwoy, gwatay magam a ruwuy ati magam ar birngiŋ ngi muŋ na, ki slaka wala taŋ gu ɓula. Na, gwatay magam wurenna na, ki slaka wala taŋ gu ta mbrike?

Ɗiyam ɓi ati mbur mazlir ti ka ta

(Yo pura Mat 5.25-26)

57Kumo, kum anta slaka wala ngi ɓi mijeŋŋe ta, vur mike? 58Naŋ kine, mbur miwidi ti ka le, da ki ra ram cuwa nga mbuŋ mbur migi kiita na, cik vu ɓa ki ɗiyaka ɓi naŋ zle a jiviɗi. Vur naŋ masa ru ti ka nga mbuŋ mbur migi kiita, migi kiita, a sa vuluw da mijigina dangay, yo mijigina dangay a sa cuw ar dangay. 59Yi ɓuw na: K'anta sa bi tir dangaya ta wãˀ, sey da ka muwuruk le, ko sisi a ndir ta.»

Actualmente seleccionado:

Luk 12: BEGDC

Destacar

Copiar