Gén 41

Egipto kaniyat lefwilhek iche

1Tä tajyäme p'ante täkwfwas nekchämis, wet iche honatsi tä Egipto kaniyat lefwilhek ihlä tä onta takasitwhäye tewokitaj tä lhey Nilo. 2Wet iche siete w'asetas tä isis wet yätajen tä tälho tewok tä inukwephä wet t'ekwethä tä tufw hup tä i'pe ufw. 3Wet nech'e äp iche siete iyhäj w'asetas tä inukwephä tä tälho tewok, mat lhäy'e lhip tä ni'isahen, wuj tä ilopenhen. Wet ihoye iyhäj tä t'ekwethä tä i'pe ufw, 4wet tufwen iyhäj tä yätajen.

Tä niyat n'om, 5yachajo tä imä wet nech'e tafwilhanej siete trigo lhiley tä wuj tä isis wet tapokwe tä ihi letes weihalha. 6Wet nech'e äp iche siete lhiley iyhäj, mat lelemsas wet leyalh tä chayo tä tälhche tä ifwala tälhche ilän. 7Wet tufwen lhiley iyhäj tä isis tä tapokwe.

Tä n'om niyat, ihanej tä lefwilhek t'at. 8Matkat tä ifwala elh tä nech'e fwala wuj tä yen tichunhayaja lefwilhektso, wet t'äne nilhokej han'ältshantses lhäy'e hin'ol tä ahantses tä ihi Egipto. Wet lham ifwenho lefwilhey häp lhamel, mat niwohit elh chik ihanej m'ak tä häpe. 9Wet nech'e hat'eswos kaniyat tahuyej Egipto kaniyat wet yok:

–Athana ohanej tä isit'a m'ak tä owoye. 10Tsi täjte am, ika niyat, letiyej awäk häp panwos kaniyat lhäy'e olham tä ohäpe akawo, wet lethat n'ohohen n'op'onthi tä iyej sip'äl kaniyat lew'et. 11Wet ichehte honatsi tä olhamel otfwilhanhen, wet oelh lefwilhek iche t'at m'ak tä häpe, lhäy'e olham ofwilhek iche t'at m'ak tä häpe. 12Wet iche mamse tä häpe Hebreo tä ihi n'op'onthi, wet lham häpe t'at sip'äl tä t'uye niyat lhamel laka niyat kawo. Wet olhamel ofwenhohte mamsetso häp ofwilhey, wet lham ifwelte n'ohohen m'ak tä häpe. 13Wet tä nichätehte ifwala tä lham yäme tä häpkhila, wet matche t'at. Am lewoyej n'oyehen m'ak tä häpe t'at tä lham ifwel n'ohohen. Lene'tek olham oyachajo tä otchumlhi, wet lene'tek õ'fwuhatlhi oelh tä op'akej.

José hin'älit m'ak tä häpe Egipto laka niyat lefwilhey

14Tä Egipto kaniyat iläte hat'eswo lhämet, wet ne'tek õt'äne José. Wet yofwajkwet õ'nuhatphä tä ihi n'op'onthi. Wet yisetche lepäsey, iwo iyhäja lew'uyis wet ihoye niyat. 15Wet niyat tahuyej wet yok:

–Ofwilhek iche mathi, mat newache hin'o chik ihanej m'ak tä häpe. Mat ohanch'oye tä am, chik õ'fwel amho n'ofwilhek, lehanej t'at m'ak tä häpe.

16José nichulho wet yok:

–Olhamhit'ak ohanej, ika niyat. Mat Dios ifwenla amho häpkhilek aisej.

17Niyat yok:

–Otfwilhan tä onta otkasthi tewokitaj lhip. 18Wet iche siete w'asetas tä isis wet yätajen tä tälho tewok tä inukwephä tä t'ekwethä tä tufw hup tä i'pe ufw. 19Wet äp iche siete iyhäj tä inukwephä tä tälho tewok, mat wuj tä ilopenhen, lhäy'e lhip tä ni'isahen. Wet oyok, ¡ihichet'a ifwalak ow'en w'asetas chik lhäy'e lhip tä ni'isahen chik ihi Egipto! 20Wet tufwen iyhäj tä yätajen, 21mat nehit katsik ihanej tsi kamaj ilopenhen t'at.

“Wet tafwaytshi täjtso wet on'om. 22Mat yachajo tä omä, wet nech'e otfwilhanej siete trigo lhiley tä tälho letes weihalha, wuj tä isis wet tapokwe. 23Wet äp inuphä siete lhiley iyhäj tä äp tälho t'at letes, wet leyalh tä tälhche tä ifwala tälhche ilän, wet tamchäy wet lelemsas. 24Wet tufwen iyhäj tä isis. Pajche ofwenho hin'ol tä han'ältshantses häp ofwilheytso, mat niwohit elh chik ihanej m'ak tä häpe.”

25Tä José iläte, wet nichulho niyat wet yok:

–Ika niyat, häp afwilheytso elh w'enhahit'a lhamej. Dios iwo siläta amej m'ak tä iwohiyela. 26Häpet siete w'asetas tä isis, häpe siete nekchämis, wet siete trigo lhiley tä isis wet tapokwe, w'enhahit'a lhamej. 27Wet häp siete w'asetas tä ni'isahen wet äp ilopenhen tä imälheche iyhäj tä isis len'äyij, häpe t'at siete nekchämis, hätet iwoye siete trigo lhiley tä nahayoj ilän. Täjtso häpkhila siete nekchämis tä nehläs iche honhat. 28Mälhyej täje ofwel amho, ika niyat, Dios iwo siläta amej häp m'ak tä iwohiyela. 29Nämla siete nekchämis tä wuj n'olhäk tä ihi mälhewek honhatna tä Egipto. 30Wet chik tajyäme, nämla siete nekchämis tä wujla nehläs. Wet nehit katsik yenla letichunhayaja ifwalas tä wuj n'olhäk tä ihi Egipto, tsi nehläs ikänchihla honhat. 31Häpkhila nehläs tä äytaj wet nofwila nilhokej m'ak tä iyej wichi. 32Wet tä nitäkwfwas afwilheytso, ika niyat, häp tä Dios iwo siläta amej m'ak tä kamlelhäj tä iwohiyela. Wet matche, iwohiyela'thahya.

33“Tä mälhyejtso, ika niyat, ukwe hin'o tä lehusek ihi wet ahantsaj, wet en niyatayej mälhewek aka honhat. 34Wet is chik letshupyenehen niyatey tä ihi honhat, yämthilek lhamel inukwe honhat wet ihutwek yachuyaj lhay tä ihi Egipto häp nekchämis tä wuj yachuyaj. 35Is chik ihutwek trigo häp nekchämis tä isen tä tatay alhoho, wet is chik itihiche lew'etes yämthilek am tä aniyat letetshan. Wet is chik t'amajej tä ihiche hupuy yämthilek lhäk ihi wichi, 36häpkhilek nehläs nilänahen chik näm siete nekchämis tä ni'isahen.”

Õyen häpeya José gobernador tä ihi Egipto

37Egipto kaniyat lhäy'e leniyatfwas lhamel ihuminche José letichunhayaj. 38Wet niyat tahuyej leniyatfwas wet yok:

–Ihichet'a hin'o chik mälhyej iwoye José tä Dios laka espíritu iyej.

39Wet nech'e tahuyej José wet yok:

–Ihichet'a hin'o chik lehusek ihi wet ahantsaj chik mälhyej iwoye am, tsi Dios itäfwnhat amej nilhokej m'ayhay tä lhämetso. 40Tä mälhyejtso, am t'at tä aniyatej ow'et wet nilhokej oka wichi iwohiyela ämet. Tajlhama oniyatyaj häp tä inu atape. 41Tetshan olhämet, olham oayen niyatayej imälhewek honhatna tä Egipto.

Tä iwoyetso, 42ilanhi lefwujhi tä laka sello wet y'uyitche José lefwuj. Wet ne'tek õhw'uyyenhi lew'uyis tä isis wet õyen lhamisa n'olhamis tä oro. 43Wet hiw'enho kaletaj tä isilataj tä gobernador lehi, wet hin'ol tä ichunlä tä yik, lhamel ifwitsenej tä t'änhen wet yopejkwe:

–¡Wo len'äyija!

Mälhyej p'antetso tä José niyatej häp Egipto. 44Wet niyat tahuyej tä yok:

–Olham ohäpe niyat. Mat oyok, nilhok wichi tä ihi Egipto isit'ak iwoye m'ak at chik häpe chik ka'ämetayej.

45Wet niyat yen lheya Safenat-panea häp José tä ihi Egipto. Wet äp itiyej atsinha tä lhey Asenat tä lajcha sacerdote tä lhey Potifera tä lew'et häp hupuy tä lhey On.

Wet mälhyej p'antetso tä José nech'e lham tä itetshan Egipto. 46Hiw'en p'ante treinta nekchämis tä iwo tesa tä tachumhoplhi Egipto kaniyat. Tä paj yikch'oye lew'et wet ilunche mälhewek honhat tä Egipto.

47Wet siete nekchämis tä wuj yachuyaj, 48wet José ne'tek wichi t'amajej trigo. Wet nilhokej hupuy José ihutwek trigo tä tälhomche yachuyajw'etes tä tott'ahomche wet t'amajej tä ihi. 49Wet lhäy'e lhip tä wuj, hätet iwoye holo tä iwhäye tewok, pajtha nemhit ihanej iwoyneje yämthilek ikalelhätlä.

50Wet iche p'ante täkwfwas José leles tä ihihlä lech'efwa Asenat, häp ifwalas tä kamaj p'ante nichätaye nekchämis tä nehläs iche. 51Wet elh tä ichun yen lheya Manasés, tsi yok:

–Dios hip'etthayen n'ohlä nilhokej oteläythayajay lhäy'e nilhokej opuhfwas.#41.51 Häp n'olhey Manasés yiwitej n'olhämet p'ante yok, Õhp'etthayenlä. 52Wet lhäs elh yen lheya Efraín, tsi yok:

–Dios yen n'oye hin'o tä leles ihi tä oihi honhat tä oteläythayaj in'oyej.#41.52 Häp n'olhey Efraín yiwitej n'olhämet p'ante yok, Owo olesa.

53Tajyäme p'ante nekchämis tä wuj yachuyaj tä ihi Egipto, 54wet nech'e iwo tesa nehläs pajtha siete nekchämis, mälhyej tä José pajche yäme. Wet wuj tä nichuyuhen wichi tä ihiche honhates tä w'enhache lhamej. Ts'ilak Egipto tä nehläs newahi, tsi lhäk iche t'at häp wichi tä ihi. 55Mat tä paj häte iwo tesa tä noj t'at lhäk tä iyej wichi tä ihiche lhipey häp Egipto. Wet häp tä lhamel ihoye niyat wet t'alhe. Wet niyat ifwenho lhamel wet yok:

–Hoyaye José wet woyayela m'ak chik ne'tek lewoyaye.#Juan 2.5

56Wet tä nilhokej wichi tä ihi Egipto noj lhäk tä iyej, José nech'e iwom trigo tä ihiche lakapuchehis yämthilek lhamel ichäj. Tsi nekchämpej lhäy'e lhip nehläs tä iche. 57Wet nämhen wichi tä tälhomche honhates iyhäj tä lhamel ihoye Egipto tä t'ukwe lhäk yämthilek ichäj tä tälhe José. Tsi nilhokej honhates tä nehläs ihi.

Actualmente seleccionado:

Gén 41: WCHB

Destacar

Copiar