Gén 37

José lhäy'e lepuhfwas

1Jacob yen lew'eta Canaán, häp honhat tä lajcha yen p'ante lew'eta. 2Wet häp täja m'ak tä Jacob leles iwoye.

Tä José nech'e mamse p'ante tä hiw'en diecisiete nekchämis, lham t'uye t'at lajcha Jacob leläy, lhäy'e lechilalis tä lako Bilja lhäy'e Zilpa leles, häp atsinhay iyhäj tä Jacob yen ch'efwasa. Wet José ifwenhopej lajcha häp m'ak tä ni'isa tä lechilalis iwoye.

3Jacob, wok oyok, Israel, lham wuj tä ihumin lhäs José, inu'pe lehumnhayaj tä itiyej leles iyhäj, tsi José nichätchä tä lham häpe hin'o tä hich'ut t'at. Wet häp tä yenhoplhi lew'uy tä wuj tä isilataj. 4Matkat tä lechilalis hiw'en tä lajcha lhäy'e lhip tä ihumin, inu'pe lhamel, nech'e lhamel n'äyiho wet isit'a lhämtes tä iwoyeje.

5Wet José lefwilhek iche wet ifwenho lechilalis. Mat tä lhamel iläte, nech'e nem koyhyaj tä n'äyiho lech'inij. 6Tsi ifwenho lhamel tä yok:

–Ch'ahuyay n'oye, ofwel amhohen ofwilhek. 7Otfwilhan tä n'amel y'ehi yachuyajw'et wet y'äythomche trigo. Wet oseltejpa tä trigo tä olham oyäytho nephä wet takasit. Wet nech'e iyhäj tä amel lhäythomche lhamel lhailunkatej wet t'upechehchä wet n'okwiyej.

8Lechilalis nichulho wet yok:

–¿Hä lefwetaj ahäpkhila olhamel oka niyat wet ohäpkhihena akawos?

Wet nem koyhyaj tä lhamel n'äyiho'pe lefwilhey lhäy'e lhämtes.

9Tä paj yachajo tä lefwilhek ihi, wet ifwenho lechilalis wet yok:

–Honatsimattso ofwilhek iche. Otfwilhanej ifwala lhäy'e iwel'a lhäy'e once katetsel tä nilhokej lhamel t'upechehchä wet n'okwi n'oyejpa.

10Tä José ifwenho lefwilhektso lajcha lhäy'e lechilalis, wet lajcha ifwoneje wet yok:

–¿Atsi m'ak tä häpe afwilhektso? ¿Hä olham lhäy'e ako lhäy'e achilalis olhamel ot'upechehlahchä wet on'okwihla amej p'iya?

11Wet lechilalis itiyej t'ischenyaj häp José. Mat lajcha wuj tä yen tichunhayaja m'ayhay tä José yäme.

Lechilalis ithatche chowej José

12Fwala elh p'ante José lechilalis ihoye Sikem tä lhamel ihänch'oye hup häp lajcha läy. 13Wet Jacob, wok oyok, Israel, tahuyej lhäs José wet yok:

–Lehanej tä achilalis ihi Sikem, lhamel hit'ekyenwethä oläy. Mäh, is chik lehoye lhamel.

José nichulho lajcha wet yok:

–Is t'at, ohohiyela.

14Israel yok:

–Chik lechäte, tetshana chik isen t'at lhamel wet newache lewit'äyhyaj oläy, häpkhilek lefwel n'oho chik lenäm.

Tä mälhyejtso, Israel ichen lhäs José tä tälhe honhat tä w'awulhchä tä hupuy tä lhey Hebrón ihi. Wet tä José nichäte p'ante Sikem, 15weta. Mat iche hin'o tä hiw'en, wet tay'ätshane tä yok:

–¿Atsi tä let'ukwe?

José nichulho wet yok:

16–Ot'ukwe ochilalis. ¿Hä lekalhik lefwel n'oho lhip tä lhamel ihi tä t'uye leläy?

17Hin'otso yok:

–Pajche yikhen. Olätenaj tä lhamel yok, “N'ahoye Dotán.”

Tä José iläte, wet yik tä ihoye Dotán tä t'ukwe lechilalis. 18Tä lhamel hiw'enlä tä tott'aye, lhamel yok:

19–¡Lhek yahin, näm hin'o tä afwilhnhatsaj! 20¡Mäh n'alän wet n'athatchela chowej lep'itsek wet n'olak, “T'owalhaj tä tufw”! ¡N'ayahinak isej lefwilhey!

21Mat tä Rubén iläte lech'inhis, lham t'uhläk ifwayhat José wet yok:

–Kha, isit'ak y'alän. 22Yej wo m'akayej, mat n'athatche chowej tä ihi ts'anisna.

Rubén iwoynejetso lhämet, häp tä t'uhläk ifwayhat lech'inij José wet yachaje lajcha. 23-24Wet tä José nichäte p'ante lechilalis, lhamel itsoklhi wet isoyej lew'uy tä isilataj tä lajcha lhenek. Wet lhamel ithatche José chowej tä laj inätahi, 25tä ileyej wet t'ekhen.

Õ'häne Egipto José

Tä paj tä lhamel t'ekhen t'at, nech'e hiw'enlä wichi tä Ismael lhayis tä nämhen tä tälhe Galaad tä lhamel ilhuhyenejen camellos häp m'ayhay tä lenij akäjche tä ihäne Egipto. 26Wet Judá tahuyej lepuhfwas wet yok:

–Niwohit m'ak chik y'akalhik y'alän lhach'inij wet y'askat lep'itsek wet y'opejkwe, “Olhamenhit'a tä olän.” 27M'ak tä is chik y'awoyeje, n'awom, n'aw'enho Ismael lhayis tä nämhen, wet lhamel hiw'enla n'amhohen chinaj t'äj. Isit'ak y'alän tsi lhapuhfwa t'at.

Tä iyhäj iläte Judá lhämet, wet yok:

–Is t'at atichunhayaj. Häp täjtso m'ak tä is chik y'awoyeje.

28Wet Ismael lhayis, tä lhey elh Madián lhayis, tä lhamel inukwe lhip tä José lechilalis ihi, wet lechilalis itonphä lech'inij José tä ihi chowej wet iwom, hiw'enho Ismael lhayis, wet õhw'enho lhamel laha tä veinte chinaj t'äj. Wet Ismael lhayis ihäne José Egipto.

29Wet tä paj Rubén fwetaj yäple chowej tä t'uhläk itonphä lech'inij José. Mat tä nichäte, hiw'enhit'a. Wet hich'esajche lham lew'uy tä yen tetnekayej tä lhäy'e lhip lelhakli lhäy'e lewäk. 30Wet yäple lech'inhis wet yok:

–¡Lhach'inij José nemhit ihi chowejmat y'athatche! Athana ¿atsi m'ak tä owoye?

31Tä mälhyejtso, lhamel ilän kayla wet y'ilenej lew'oyis häp José lew'uy, 32wet yikhen tä ichäje lajcha. Tä nichäte, wet ifwenho tä yok:

–Olhamel onlhoke mathi täja. Tetshan chik häpe äs w'uy wok kahäpeya.

33Jacob iyahinlhi wet yok:

–¡Häpe t'at olhäs José tä lew'uy! ¡Tshäwet tä fwitsaj tä tufw olhäsaj José!

34Wet Jacob hich'esajche lham lew'uy tä yen tetnekayej lelhakli tä äytaj. Wet taw'uyhi lew'uy tä yelaj, wet pitaj lewhäy tä yen lhafwyhayaja lhäs. 35Wet nilhokej leles lhäy'e leles tsinhay t'uhläk tach'ote yämthilek niwujak lefwitajayaj ihi, mat iwohiyet'a. Yok:

–Olehiyejt'a tä oyen lhafwyhayaja olhäs, pajla'tha oy'il wet op'akej t'at tä oihi honhat tä n'op'itseyhay lew'et.

36Wet tä Madián lhayis nichäte Egipto, lhamel iwom José. Elh tä ichäj lhey Potifar, häpe Egipto kaniyat lech'otfwa wet sip'äl tä t'uye niyat lhamel laka niyat.

Actualmente seleccionado:

Gén 37: WCHB

Destacar

Copiar