Gén 36

Esaú leles tä nichäthihchä p'ante Canaán

1Häp tähesna leles häp Esaú, wok oyok, Edom: 2Esaú yen ch'efwasa atsinhay tä lew'et honhat tä Canaán. Elh lhamel lhey Ada, häp Het lhayis elh tä lhey Elón lhäse. Wet elh lhey Oholibama tä Aná lhäse wet lechäti tä häpe Hiv lhayis elh lhey Sibón. 3Wet elh lhey Basemat tä häpe Ismael lhäse, lechila lhey Nebayot. 4Wet Esaú lhäs tä ihihlä Ada lhey Elifaz, wet lhäs elh tä ihihlä Basemat lhey Reuel. 5Wet Oholibama leles lheyis Jeús, Jaalam, lhäy'e Coré. Häp tähestso Esaú leles tä nichäthihchä p'ante Canaán.

Esaú yen lew'eta Seír

6Esaú yikch'oye honhat tä Canaán, lhäy'e lech'efwas, lhäy'e leles, lhäy'e nilhokej wichi tä iyej, lhäy'e leläy, lhäy'e nilhokej m'ak tä ikalhi tä ihi Canaán, wet yik tä lhaitontehlä lech'inij Jacob. 7Tsi tä wuj lakäywet, lhäy'e lech'inij, häp tä nemhit lew'et ihi lhamel tä hap'akwek, wet honhat tä ihi w'awulhiyejt'a leläy tä hiw'en. 8Häp tä tamenej tä Esaú yik wet yen w'eta honhat tä chenhas tä lhey Seír.

Esaú leles lhäy'e lechetsos tä ihi p'ante Seír

9Häp tähesna wichi tä tälhe p'ante Esaú, häp Edom lhayis letes, tä lhamel ihi p'ante lew'et häp honhat tä chenhas tä lhey Seír: 10Iche lhäs tä ihihlä Ada tä lhey Elifaz, wet iche lhäs tä ihihlä Basemat tä lhey Reuel. 11Wet Elifaz iwo lelesa wet lheyis Temán, Omar, Zefo, Gatam, lhäy'e Kenaz. 12Wet Elifaz lech'efwa elh tä lhey Timna iwo lhäsa wet lhey Amalek. Häp tähestso Esaú leles tä ihihlä lech'efwa Ada. 13Wet Esaú lhäs elh tä lhey Reuel iwo lelesa, wet lheyis Nahat, Zera, Sama, lhäy'e Miza. Häp tähestso leles häp Esaú tä ihihlä lech'efwa Basemat. 14Wet Esaú leles tä ihihlä lech'efwa elh tä lhey Oholibama, lheyis Jeús, Jaalam, lhäy'e Coré. Oholibama häpe Aná tä lhäse, wet lechäti lhey Sibón.

Esaú leles tä häpehen p'ante niyatey

15Häp tähesna Esaú leles kaniyatey: Iche lhamel tä tälhe p'ante lhäs tä lechunkatsek tä lhey Elifaz, lhamel lheyis Temán, Omar, Zefo, Kenaz, 16Coré, Gatam, lhäy'e Amalek. Häp tähestso Elifaz leles tä häpehen niyatey tä ihi p'ante honhat tä Edom. Lhamel häpehen Esaú lech'efwa Ada tä lechetsos. 17Wet Esaú lhäs elh tä lhey Reuel leles kaniyatey lheyis Nahat, Zera, Sama, lhäy'e Miza. Häp tähestso Reuel leles tä häpehen niyatey tä ihi p'ante honhat tä Edom. Lhamel häpehen Esaú lech'efwa Basemat tä lechetsos. 18Wet Esaú lech'efwa elh tä lhey Oholibama tä Aná lhäse, niyatey tä tälhe lham leles lheyis Jeús, Jaalam, lhäy'e Coré. 19Nilhokej lhamel tä lheyis täjtso häpe Esaú, wok oyok, Edom leles t'at tä häpehen niyatey.

Wichi tä tälhe hin'o p'ante lhey Seír

20Häp wichi tä ichun p'ante tä ihi honhat tä Edom, lhamel lhey Hor lhayis wet letes p'ante häpe hin'o tä lhey Seír. Wet leles lheyis Lotán, Sobal, Sibón, Aná, 21Disón, Eser, lhäy'e Disán. Häp p'ante tähestso Hor lhayis kaniyatey. 22Wet Lotán leles lheyis Horí lhäy'e Hemam, wet Lotán lech'inhä lhey Timna. 23Wet Sobal leles lheyis Alván, Manahat, Ebal, Sefo, lhäy'e Onán. 24Wet Sibón leles lheyis Aja lhäy'e Aná. Wet Aná häp p'ante tä hiw'en inät lhayis tä ts'ifwik tä ihi ts'anis tä lham hit'ekyenwethä lajcha Sibón w'utey asnolis. 25Aná lhäs lhey Disón, wet elh tä atsinha lhey Oholibama. 26Wet Disón leles lheyis Hemdán, Esbán, Itrán, lhäy'e Kerán. 27Wet Eser leles lheyis Bilján, Zaaván, lhäy'e Acán. 28Wet Disán leles lheyis Us lhäy'e Arán.

29Tä mälhyejtso, Hor lhayis kaniyatey häpehen p'ante Lotán, Sobal, Sibón, Aná, 30Disón, Eser, lhäy'e Disán. Lhamel ihi p'ante honhat tä lhey Seír, wok oyok, Edom.

Reyes tä ihi p'ante Edom

31-39Häp tähesna honhat tä Edom laka niyatey tä häpe reyes tä elh icheyäjompej leniyatyaj tä kamaj newache p'ante Israel lhayis laka rey:

Bela, häp Beor lhäs, tä lew'et p'ante Dinaba

Jobab, häp Zera lhäs, tä lew'et p'ante Bosra

Husam tä lew'et p'ante honhat tä lhey Temán

Hadad, häp Bedad lhäs, tä lew'et p'ante Avit (Hadad häpe hin'o tä ikalhi p'ante letayhfwas Madián lhayis tä ihi honhat tä Moab)

Samla tä lew'et p'ante Masreka

Saúl tä lew'et p'ante Rehobot tä iwhäye tewok

Ba'al-hanán, häp Acbor lhäs

Hadad tä lew'et p'ante Pau (Hadad lech'efwa lhey Mehetabel tä häpe Matred lhäse, wet lechäti lhey Mezaab)

Häp reyesna, tä elh ileyej honhat wet elh tä ihän icheyäjo leniyatyaj.

Edom lhayis tä ihiche laka honhates

40Häp tähesna lheyis häp wichi tä tälhe letes Esaú. Iyhäjpej tä lhalepuhfwas lhaiw'enhat wet ihiche t'at laka honhates. Lheyis Timna, Alva, Jetet, 41Oholibama, Ela, Pinón, 42Kenaz, Temán, Mibsar, 43Magdiel, lhäy'e Iram. Häp tähestso lheyis häp leles Esaú, wok oyok, Edom. Elh weihalhapej ihi t'at honhat tä laka honhat. Tä mälhyejtso, Esaú häpe t'at Edom lhayis letes.

Actualmente seleccionado:

Gén 36: WCHB

Destacar

Copiar