Gén 30

Jacob leles tä ihihlä Bilja

1Tä Raquel hiw'en tä laj lelesahlä Jacob, nech'e y'äytene lechita Lea. Wet tahuyej Jacob wet yok:

–¡Wo olesa! ¡Chik kawoya olesa, is chik oy'il!

2Tä Jacob iläte lech'efwa tä iwoyetso, wuj tä lewäk ihi wet yok:

–¿Hä olham tä ohanej owoyneje yämthilek owo alesa, tä Dios niwoya alesa?

3Raquel nichulho Jacob wet yok:

–Tä mälhyejtso, chuma okawo Bilja wet lemäyej. Wet chik lham iwohla lelesa, hätehlat iwoyek olham t'at chik owo olesa.

4Wet Raquel hiw'enho lech'efwa Jacob häp lakawo'tsinha Bilja wet yen ch'efwaya. 5Wet tä Bilja iwo lhäsa, 6Raquel yok:

–Han'äfwajna lheyla Dan, häp tä Dios iwoyej n'oye m'ak tä is alhoho wet nichulho ot'alhyaj wet hiw'en n'oho olhäs.

Häp n'olhey Dan yiwitej n'olhämet tä yok, Iwoye m'ak tä is alhoho.

7Tä paj Bilja yachajo tä iwo lhäsa. 8Wet Raquel yok:

–Han'äfwajna lheyla Neftalí, tsi wuj tä ottayhlä ochita wet okalhi.

Häp n'olhey Neftalí yiwitej n'olhämet tä yok, Ottayhlä.

Jacob leles tä ihihlä Zilpa

9Tä Lea hiw'en tä nem iwo lhäsa, hiw'enho lech'efwa Jacob häp lham lakawo'tsinha tä lhey Zilpa yämthilek Jacob yen ch'efwaya. 10Wet tä Zilpa iwo lhäsa, 11Lea yok:

–¡Wuj tä is!

Tä mälhyejtso, yen lheya han'äfwaj Gad. N'olhämet Gad häp tä yok, Wuj tä is.

12Tä paj yachajo tä iwo lhäsa häp Zilpa. 13Wet Lea yok:

–¡Wuj tä okäjlhi! Atsinhay yenla n'oye elh tä lakäjyaj ihi.

Tä mälhyejtso, yen lheya Aser häp han'äfwaj. N'olhämet Aser yok, Okäjlhi.

Jacob leles iyhäj tä ihihlä Lea

14Tä tajyäme p'ante nekchämis, wet Rubén thaläkw t'at, wet fwala elh p'ante lham yik tä ihoye n'okäsw'et. Wet fwalatso lhamel ilanhi trigo tä wak'alh. Wet tä lham ilunche t'at yachuyaj, hiw'en p'ante lhay tä lhey mandrágoras#30.14 Häp fwalas p'antetso, häp hal'ä lhay tä lhey mandrágoras, wichi yäme tä atsinha tä sufwnaj chik tuj, wet nech'e iwo lelesa. wet ichäje lako Lea. Tä Raquel hiw'en lhaytso tä iyej lechita, wet tahuyej tä yok:

–Woye tä owoye, w'en n'oho iyhäj häp mandrágoras tä äs ichäj ame.

15Matkat lechita Lea nichulho wet yok:

–¿Hä let'ayhtejen tä leso n'oyej och'efwa? ¡Wet äp let'uhläk leso n'oyej mandrágoras tä olhäs ichäj n'oye!

Raquel yok:

–Honatsina is chik Jacob imä amej, wet lahahla äs kamandrágoras chik lew'en n'oho.

16Wet tä honaj p'ante, näm Jacob tä tälhe yachuyajw'et. Wet Lea yistejlä wet tahuyej tä yok:

–Honatsina lemähla n'oyej, tsi pajche owo lahaya tä otcheyjän amej. Och'inhä t'alhe olhäs kamandrágoras tä yen lahaya chik lemähla n'oyej honatsina.

Tä mälhyejtso, Jacob imäyej Lea 17wet hich'otshan, wet tä paj iwo lhäsa. Wet nech'e cinco leles tä nilhokej, tsi Dios nichulho t'alhyaj. 18Tä mälhyejtso, Lea yok:

–Han'äfwajna lheyla Isacar, häp tä Dios iwo otw'ayhata tä ow'enhohte okawo häp och'efwa.

Häp n'olhey Isacar yiwitej n'olhämet tä yok, Iwo otw'ayhata.

19Tä paj Lea yachajo tä iwo lhäsahlä Jacob. 20Wet yok:

–Wuj tä isilataj otw'ayhat tä Dios hiw'en n'oho. Athana och'efwa nemla yenn'o w'et m'ayeka, tsi nech'e iche seis oles tä ihihlä. Tä mälhyejtso, han'äfwajna lheyla Zabulón.

Häp n'olhey Zabulón yiwitej n'olhämet tä yok, Nem yen w'et m'ayeka.

21Tä ilepese Lea yachajo tä iwo lhäsa, wet nech'e atsinha, wet yen lheya Dina.

Raquel iwo lhäsa

22Dios yen tichunhayaja Raquel, wet nichulho t'alhyaj wet nech'e hich'otshan. 23Wet iwo lhäsa, wet yok:

–Dios iso n'oyej on'äfwlhi tä laj olesa. 24Is chik äp y'isej elh olhäs.

Tä mälhyejtso, yen lheya José häp lhäs. Häp n'olhey José yiwitej n'olhämet tä yok, Is chik äp y'isej.

Labán lhäy'e Jacob iti lhamejen t'akanyajay

25Tä tajyäme ifwalas iyhäj p'ante tä Raquel iwo lhäsa, Jacob tahuyej Labán wet yok:

–Ch'anlha n'oye yämthilek oyäple oka honhat. 26Lehanej t'at tä wuj tä otchumlhi amho. Athana w'en n'oho och'efwas lhäy'e oles, tsi häpe t'at tä okaha, wet ch'anlha n'oye tä oyik.

27Mat Labán nichulho Jacob wet yok:

–Woye tä owoye, yej lhek n'ohlä. Ontäfwelej t'at tä am t'at tä ois amej tä Dios takäpfway n'oye. 28Fwel n'oho, ¿chihätefwaj laha tä lewatläk owo lahaya amej achumet chik letachumlhi n'oho?

29Wet nech'e Jacob yok:

–Am lehanej t'at ochumyaj tä otchumlhi amho tä ot'uyehen aläy. 30Wet aläyte niwuja tä onäm kana, athana lhäy'e lhip tä wujpey, tsi tälhe tä onäm ame Owuk Dios takäpfway ame. Mat nichäte lewhäy athana chik otchumlhi yämthilek nech'e häpe och'efwas lhäy'e oles chik isej.

31Mat Labán inityen tä yok:

–Fwel n'oho, ¿chihätefwaj laha tä lewatläk owo lahaya amej achumet chik letachumlhi n'oho?

Jacob nichulho lewithok wet yok:

–Kha, yej w'en n'oho m'akfwaj. Mat chik lewoye m'ak tä ot'alhej ame, otujlhahichelak ot'uye aläy. 32Chik lewahin n'oyej, wet otiyäjihola aläy wet ow'enhatla tson'atas tä ichalas, lhäy'e kayla lhayis tä lefwukus ihi, lhäy'e iyhäj tä talesachehen, häpkhilek häpe laha ochumyaj tä otchumlhi amho. 33Tä mälhyejtso, chik leho n'oye fwala chik häpe, lew'enla tä is alhoho m'ak tä owoye. Mat chik lew'enla tson'atas chik nichalasa, lhäy'e kayla lhayis chik newache lefwukus wok tek talesachehen chik lhayej oläy, lehanhiyeja tä isit'a m'ak tä owoyej ame tsi ot'etane m'ak tä alewuk.

34Labán nichulho Jacob wet yok:

–Is t'at.

35Matkat fwalatso Labán hiw'enhat nilhokej kayla lhayis tä asnakis tä lefwukus tatshupichehchä, lhäy'e iyhäj tä talesachehen, lhäy'e iyhäj tä atsinhay tä lefwukus ihi, lhäy'e iyhäj tä talesachehen wok lefwukus ipelajiche, lhäy'e nilhokej tson'atas tä ichalas. Wet hiw'enho leles yämthilek t'uye, 36wet nech'e yikchufwi leläytso, wet tres fwalas tä ihi len'äyij tä lhaitontehlä Jacob.

Wet Jacob t'uye t'at Labán läy iyhäj. 37Wet m'ak tä lham iwoye, yisthen hal'äy tä w'atshanhen wet yähäschehen lhipey yämthilek n'älchehen lhipey tä ipelaschehen. 38Wet nech'e itihi tä tson'atas lhaihuthiwek tä iyäyej inät. 39Wet häp tä tson'atas tä iwhäye tä inu'pe elh tä atsinha, tä iwo lelesa talesachehen t'at lhäy'e iyhäj tä lefwukus w'enhache lhamej. 40Wet tä nech'e thänhäy, Jacob hiw'enhathen wet itihi tä Labán leläy tä talesachehen lhäy'e tä ichalas tatache. Wet tä äp iwo lelesa, talesachehen t'at wok ichalas. Tä mälhyejtso, Jacob lhäy'epej lhip tä wuj leläy tä iyej, wet hiw'enhat, tek ilhahtej Labán leläy.

41Wet tä Jacob hiw'en tson'atas tä yätajen tä näme inät, lham tachuma hal'äy tä ilesayenchehen wet itihi tä itshätäy lhäthi, yämthilek tson'ataj chik häpek inu'pe elh iyahin. 42Mat tä nämhen tson'atas tä ilopenhen, tek itihi hal'äy häp itshätäy lhäthi. Häp tä tamenej tä tson'atas tä isis wet yätajen lewuk t'at häp Jacob, wet iyhäj tä ilopenhen imälheyej Labán. 43Tä mälhyejtso, Jacob häpe hin'o tä hiw'en m'ayek. Hiw'en wuj tson'atas, lhäy'e lakawos tä hin'ol lhäy'e tä atsinhay, lhäy'e camellos, lhäy'e asnolis.

Actualmente seleccionado:

Gén 30: WCHB

Destacar

Copiar