Gén 29
29
Jacob nichäte lewithok Labán lew'et
1Jacob tujlhache len'äyij tä ihoye honhat tä tumej hichä. 2Tä yäm p'ante kanhi, hiw'en n'opek, wet iche wujpe tson'atas tä iwhäye tä lhay'upthen, tsi häpe t'at tä iyäyej inät tä ihi. Wet iche tunte tä wuj tä õhp'oyejpe, 3wet tä nämhenpej nilhokej lewos tä ihäne leläy häp n'opektso, lhamel ihut kanhi tunte yämthilek iyäynej leläy. Wet tä ileyej, lhamel yachajopej tä hip'oyejpe tunte häp n'opek. 4Wet Jacob tay'ätshane lewos wet yok:
–Yaiyhäj, ¿chi tä ihi haw'et?
Lhamel nichulho wet yok:
–Olhamel ow'et Harán.
5Wet Jacob yok:
–¿Hä letäfwelayej Labán, Nacor lhäs?
Lhamel yok:
–Ontäfwelej.
6Wet Jacob äp yok:
–¿Chiwoye lham, hä is t'at?
Lhamel yok:
–Is t'at. Lhek yahinlä atsinha tä yokwes leläy tson'atas. Labán lhäse t'at, lhey Raquel.
7Wet Jacob yok:
–Kamaj ifwala, honajit'a yämthilek amel lethatho lehi aläy. ¿Chipte tä kaw'enaho inät wet chik ileyej, lhachajo tä let'ekyenwethä?
8Tson'ataswos yok:
–Kha, olhamel onihihläk nämhen iyhäj tson'ataswos häpkhilek nilhokej olhamel ohut kanhi tunte tä õhp'oyejpe n'opek, wet nech'ehilak oyäynej häp oläy.
9Tä Jacob yämhoplhi lhamel, näm Raquel tä yokwes lajcha läy tson'atas, tsi lham t'at tä t'uye. 10Tä Jacob hiw'en, ikelit tä ihut kanhi tunte tä õhp'oyejpe n'opek wet hiw'enho inät lhamel. 11Tä ileyej, n'okwiyej Raquel wet hits'u lech'alo. Wet tafwlhi 12wet yok:
–Olham ohäpe ajcha ch'inhä Rebeca tä lhäs.
Tä Raquel iläte, yik tä inu alhoho tä iwo silätaye lajcha Labán. 13Tä Labán ihanej tä lech'inhä lhäs Jacob näm, yik tä inu alhoho tä ihoye. Tä nichäte, tatsufwelej wet hits'u lech'alo, tä ileyej wet ihäne lew'et. Wet Jacob ifwenho nilhokej m'ayhay. 14Wet Labán yok:
–Matche tä ahäpe elh tä olhip t'at.
Jacob tachumlhi'pe Raquel lhäy'e Lea
Jacob iyej t'at lewithok lew'et pajtha iwel'a tefwaji. 15Wet tajyäme lewhäytso, Labán tahuyej wet yok:
–Tetshan, tej tä ahäpe owakla, mat t'uhawetej chik akaha ihi t'at chik letachumlhi n'oho. Tä mälhyejtso, ¿chihätefwaj akaha chik let'alh n'oye tä letachumlhi?
16Wet iche p'ante täkwfwas leles tsinhay, elh tä thaläkw lhey Lea wet lech'inhä lhey Raquel. 17Wet Lea tatey isis, mat Raquel imälhewek t'isan tä lhäy'e lhip tä isilataj. 18Wet tä Jacob ihumin Raquel, lham nichulho lewithok Labán wet yok:
–Chik lew'enla n'oho äse Raquel, otchumhilhila amho siete nekchämis.
19Wet Labán yok:
–Is t'at. Tä mälhyejtso, is chik lhet kana, ow'enlat amho, tsi tek ot'uhläk ow'enho hin'o chik w'enha lhamej.
20Tä mälhyejtso, Jacob tachumlhi'pe Raquel siete nekchämis. Mat mälhyej chik nipitaja ifwalas, tsi wuj tä ihumin Raquel. 21Wet tä tajyäme p'ante nekchämistso, Jacob tahuyej Labán wet yok:
–W'en n'oho atsinha yämthilek oiyej, tsi w'awulho t'at nekchämis tä laha tä otchumlhi'pe.
22Tä mälhyejtso, Labán t'äne nilhokej lew'etfwas yämthilek iwo lakäjyaja'pe lhäse tä tawhayey. 23Matkat tä honatsi Labán ihäne Jacob häp lhäse elh tä thaläkw tä lhey Lea wet imäynej. 24Wet äp hiw'enho lhäse häp lakawo'tsinha tä lhey Zilpa yämthilek yen lakawoya.
25Tä nech'e fwala Jacob ihanej tä häpkhit'a Raquel tä lham imäyej, mat imäyej Lea. Tä mälhyejtso, tahuyej Labán wet yok:
–¿Atsi m'ak tä lewoyej n'oye? Tsi olham otchumlhi'pe Raquel, häpkhit'a Lea. ¿Chipte tä let'akan n'oyej?
26Labán nichulho Jacob wet yok:
–Olhamel tä oihi honhatna okeyhit'a chik olhäse tä nithaläkwa ichunlä lechita tä iwo lech'efwaya. 27Olham oyok, hämit t'at semanana tä lhen akäjyaja tä lhen hach'efwaya Lea. Wet chik tajyäme täjtso, nech'e äp ow'enla amho Raquel, chik äp letachumlhi'pe iyhäj siete nekchämis.
28Tä mälhyejtso, Jacob iwoye t'at. Wet tä tajyäme semana tä iwo lakäjyaja'pe tä tawhayey, nech'e Labán hiw'enho lhäse tä nithaläkwa tä häpe Raquel, yämthilek häte yen ch'efwaya. 29Wet äp hiw'enho Raquel häp lakawo'tsinha tä lhey Bilja yämthilek yen lakawoya. 30Wet Jacob imäyej Raquel wet wuj tä ihumin, inu'pe Lea. Wet äp tachumlhi'pe siete nekchämis.
Jacob leles tä ihihlä Lea
31Tä Lhawuk hiw'en tä Jacob nhumina Lea, yen häpeya atsinha tä iwo lelesa, mat Raquel sufwnaj t'at. 32Wet hich'otshan Lea, wet iwo lhäsa, wet yok:
–Lhawuk hip'altsenn'o tä ofwitajayaj ihi, wet tamenej tä athana och'efwa ihuminhilatn'o.
Wet häp tä yen lheya Rubén, tä yiwitej n'olhämet tä yok, Hiw'en ofwitajayaj.
33Tä tajyäme täjtso, yachajo tä Lea iwo lhäsa. Wet yen lheya Simeón, tsi yok:
–Lhawuk iläte t'at lhämtes och'efwa tä y'ulhann'o, wet häp tä tamenej tä hiw'en n'oho elh olhäs.
Häp n'olhey Simeón yiwitej n'olhämet tä yok, Iläte.
34Wet äp yachajo tä iwo lhäsa Lea, wet yok:
–Athana nemla koyhyaj chik och'efwa lhaip'ajtit n'oyej, tsi nech'e tres leles tä ihi n'ohlä.
Wet häp tä yen lheya Leví, tä yiwitej n'olhämet tä yok, Õhp'ajtej.
35Tä paj yachajo tä iwo lhäsa Lea, wet yok:
–Athana owunthila Lhawuk.
Wet häp tä yen lheya Judá, tä yiwitej n'olhämet tä yok, Owunit. Wet nech'e tajlhama leles.
Actualmente seleccionado:
Gén 29: WCHB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Wichí, Dios Lhämtes tä Matchehen © Sociedad Bíblica Argentina, 2002.
