Éx 15

Moisés letenek

1Moisés lhäy'e wichi nech'e iten letenek tä ichoywethä tä iwujyen Lhawuk. Wet yok:

“Otenla otenek tä owunit Lhawuk,

tsi lhain'älit tä matche tä nehit katsik w'awulhi.

Ikalhi letayhfwa wet hich'ahthen yel'atas tä ihi lewomek,

lhäy'e hin'ol tä takhajayhen tä iche'pe.

2Owujyenej otenek häp Lhawuk

tä häpe okhajyhayaj wet äp Ofwayhthi.#Isa 12.2

Lham häpe oka Dios wet on'okwihiyeja.

Häpe ojcha laka Dios wet owunthila.

3Lhawuk häpe n'oka'tshayajwo.

Häpe t'at Dios tä N'ilataj.

4“Lhawuk hich'ahthen Egipto kaniyat kanifwotaj

tä ihi lewomek, lhäy'e kaletas.

¡Laka sip'äl tä lhamenya

hich'ahen tä ihi Lewomekchät!

5Hätet iwoye tuntey tä tiyäj inät lech'oye,

wet inät hip'o'pe lhamel.

6“Iwuk, matche tä takhajay akwey tä afwomkat,

wet iwasthi lhatayhfwa.

7Akhajyhayaj hip'ajtit katsi

wichi tä fwetaj tatay ahilä.

Awäk hätet iwoye itäj,

wet lhamel hätet iwoye hup tä y'uho.

8Leyalh tä tälhe awäk

taji inät wet lhaihutwek.

Inät takasitchephä, hätet iwoye chenhas.

Imälhewek lewomek nemhit yik.

9Lhatayhfwa letichunhayaj yok,

Ohänla pajla'tha ofwit lhamel,

wet otsoklawethä.

Wet ow'enhihomchela oka nifwotaj

m'ak chik osoyej lhamel,

pajla'tha tet iwoyek oyakw'etej.

Otonhihila ofwajnhat

wet olänhihena lhamel.

10“Matkat lhafwuthi inät

wet lewomek timche lhamel.

Y'uyhchä hätet iwoye tuntey

tä tiyäj inät lech'oye.

11“¡Iwuk, ihichet'a dios elh chik te iwoye am!

¡Ihichet'a elh tä häpe n'ot'amajchet

wet äp takhajay, mälhyej iwoye am!

¡Am lhenlhi m'ayhay tä wichi iseltejen

lhäy'e tä äyteschehen!

12Lechätyenpe akhajyhayaj atayhfwas,

wet honhat tim lhamel.

13Häp tä isej ahumnhayaj tä nittäya,

wet lechunch'oye häp wichina tä lefwayhthen,

wet lehäne honhat tä amajchet,

häp tä isej akhajyhayaj.

14Wichi tä i'pe honhat lenowayhyaj ihiyeja

chik lhamel ihanch'oye täjtso,

wet Filisteo lhayis hits'ulhakhiyejchehena

letichunhayaj tä äytaj.

15Niyatey tä ihi Edom

lhäy'ehila lhip chik inuhat lhamhohen,

wet niyatey tä ihi Moab

ichettihiyejchela lenowayhyaj,

wet nemla takhajayhen wichi tä ihi Canaán.

16“Iwuk, ¡is chik nowayhen!

¡Is chik akhajyhayaj iwelanhat tunteya,

pajla'tha tajyäme wichi

tä lhen häpeya aka wichi!

17Iwuk, hän n'oyehen chenaj tä amajchet,

häpkhilek oihi t'at häp lhip

tä lewaklhat yämthilek lhen Haw'eta,

häp haw'et tä Amajchet tä akwey lhenek.

18Lhawuk häpe Niyat yämthilek tiyäj'attsiy.”

Miriam letenek

19Tä Egipto kaniyat laka'tshayajchal kaletas tiyäjo lewomekitaj, lhäy'e yel'atas, lhäy'e hin'ol tä takhajayhen tä iche'pe, Lhawuk hip'oyejpe inät. Mat Israel lhayis inukwe honhat tä tamchäy tä lhamel yistho lewomekitaj.

20Wet Miriam, Aarón lech'inhä, häpe profeta, wet tachuma pandereta, lhäy'e nilhokej atsinhay tä yikche. Wet lhamel ikoy wet isichäthiche häp panderetas tä ichäjwethä.

21Wet Miriam ichoylhi wet yok:

“Otenla otenek tä owunit Lhawuk,

tsi lhain'älit tä matche tä nehit katsik w'awulhi,

Ikalhi letayhfwa wet hich'ahthen yel'atas tä ihi lewomek,

lhäy'e hin'ol tä takhajayhen tä iche'pe.”

Inät tä tapayhi

22Wet Moisés ne'tek Israel lhayis yikhen tä iwhäye Lewomekchät. Wet lhamel inukwe honhat tä ts'anis tä lhey Shur, tres ifwalas tä lhamel iwo lew'ekyaja mat tek nilhoke inät. 23Tä nichäte lhip tä lhey Mara, iche inät tä ihi mat isit'a, tapayhi. Häp tä tamenej tä õyen lheya honhat lhiptso Mara, häp n'olhämet tä yok, Tapay. Wet ihichet'a inät chik Israel lhayis iyäyej. 24Wet lhamel itiyej lhämtes tä ni'isachehen häp Moisés, wet tay'ätshane tä yok:

–¿Atsi m'ak tä lewoye tä y'achimhen?

25Wet Moisés t'änch'oye Lhawuk, wet Lhawuk ipäyne hal'ä tälhe tä yelaj. Moisés tachuma wet ithatho inät, wet nech'e akäji inät.

Tä Israel lhayis ihi lhiptso, Lhawuk yelhtshaynej lhämet lhamel yämthilek hiw'en chik lhamel iwoye. 26Yok:

–Chik amel letach'ahu n'oye tä ohäpe amel Awuk Dios, wet lewoye t'at nilhokej olhämtes tä isen tä ot'uhläk lewoye, tek ochätyenla atapehen elh chik häpe n'owit'äyhyajay tä ochätyenpe Egipto lheley. Tsi ohäpe Awuk tä Achesthi.

27Tä paj lhamel nichätho honhat lhip tä lhey Elim, häp honhat tä iche doce ts'ifwik lhayis lhäy'e setenta fwitsuk tä ihi. Wet häp tä lhamel iwo kasthawetahi tä iwhäye inät.

Actualmente seleccionado:

Éx 15: WCHB

Destacar

Copiar