San Mateo 2

Mo̧ro̧jä̧ jähuä huo̧juä̧tö̧mä̧ Jesúsru topö 'chi̧nä̧tö̧do

1Jesús Belén ötahuiyättö Judea rȩjȩttö̧ uhuäpächinödo. Ja̧u̧nu̧ pä̧nä̧ Herodes pä'ö mi̧cua̧ juhua'attö ru̧hua̧ pi̧nö̧do. Ja̧'hua̧nö̧ ja̧'a̧ korotö, mo̧ro̧jä̧ jähuä huo̧juä̧tö̧mä̧, kara'attö kä̧hua̧ räopa'acuttu ichö, rȩbȩhui̧nä̧tö̧do Jerusalén ötahuiyära̧'a̧. 2Jahuätö jä'epinätödo:

—¿Tojä̧ttö̧ judíos ttö̧ja̧ ttu̧ru̧hua̧mä̧, jareönä uhuäpächinömä? Yottö kä̧hua̧ räopa'acuttu ja̧u̧ jähuä siri'corö topinätöjä. Ja̧'hua̧nö̧ ja̧'a̧ttö̧ ujutumä ichäjätöjä ä'ca jo̧mȩ tihue'quiyunä kä̧mä̧dö̧ tesehuarö pä'ö, —pä'inätödo.

3Ru̧hua̧ Herodes ja̧'hua̧nö̧ ä̧ju̧cuo̧mȩnä̧, rö̧ȩnä̧ yecunänö a̧mö̧cuä̧ri̧nö̧do ami iso'quinä. Ja̧'hua̧ta̧nö̧ o'ca toi'önä Jerusalén ötahuiyänä ka̧cui̧nä̧tö̧ rö̧ȩnä̧ a̧mö̧cuä̧ri̧nä̧tö̧do ja̧u̧ juäi ä̧ju̧cu̧. 4Ja̧'hua̧nö̧ ja̧'a̧ttö̧ ru̧hua̧ Herodes huopinödo o'ca toi'önä sacerdotes ruhuotörö'inä, hueähuä huȩnȩ ttö̧ja̧rö̧ huo̧juȩtä̧tö̧rö̧'i̧nä̧ jä'epö ä̧ju̧cua̧ pä'ö jahuätörö ja̧u̧ huȩnȩ.

—Ja̧u̧ judíos ttö̧ja̧ ttu̧ru̧hua̧ Cristomä, ¿tȩnȩ uhuäpächäcua'ajä̧ttö̧? —jä'epinödo jahuätörö.

5Jahuätö pättinäcudo:

—Belén ötahuiyänä Judea rȩjȩttö̧ u̧huä̧pä̧chä̧cua̧, pä'ö huȩyu̧ti̧nö̧do Dios i̧huȩnȩ jiäcuähuä i̧sa̧mä̧. 6Ja̧u̧ huȩyu̧ti̧nö̧do:

Belén ötahuiyä, Judá ttö̧ja̧ tti̧rȩjä̧ttö̧,

pi̧jä̧ hueähuomettö kara'attö'inä abonänö ttucuotome.

Belén ötahuiyättö u̧huä̧pä̧chä̧cua̧ ya̧tȩ ru̧hua̧mä̧,

o'ca toi'önärö chidepiyu Israel tta̧huä̧rä̧cua̧mä̧,

pä'ö huȩyu̧ti̧nö̧do.

7Ja̧'hua̧nö̧ ja̧'a̧ttö̧ ru̧hua̧ Herodes yä̧huä̧i̧nä̧ huopinödo jahuätö mo̧ro̧jä̧ jähuä huo̧juä̧tö̧rö̧. Jahuätörö jä'epinödo:

—¿Ti̧yȩnö̧ ja̧'a̧ i̧jȩcui̧nä̧ttö̧ ja̧u̧ siri'comä? —jä'epinödo.

8Ja̧u̧nu̧ o'ca'a Belén ötahuiyära̧'a̧ tti̧'cha̧ pä'ö hueinä̧u̧do. Ja̧'hua̧nö̧ jȩpö̧ pä'inödo jahuätörö:

—Juhua'a 'chä̧nö̧ jä'epö ä̧ju̧cuä̧tu̧cui̧ ja̧u̧ru̧ ji̧'qui̧cha̧hua̧rö̧. Cu̧'o̧cui̧'ä̧tu̧cuo̧mȩnä̧, ttörö jicuhuähuätucuaja, ttö'inä ö̧jo̧mȩ 'chä̧nö̧ ä'ca jo̧mȩ chihue'quiyunä kä̧mä̧dö̧ chesehuarö pä'ö, —pä'inödo.

9Chutä ru̧hua̧ jiähua'a ttä̧ju̧cuo̧mȩnä̧, jahuätö mo̧ro̧jä̧ jähuä huo̧juä̧tö̧mä̧ 'chi̧nä̧tö̧do. Ja̧'hua̧nö̧ ja̧'a̧ttö̧ tti̧'cha̧'a̧nä̧, ja̧u̧ siri'co kä̧hua̧ räopa'acuttu tottinömä, ttä'canä 'chi̧nö̧do ji̧'qui̧cha̧hua̧ ö̧'o̧mȩ huäme kä̧mä̧dö̧. 10Jahuätö mo̧ro̧jä̧ jähuä huo̧juä̧tö̧mä̧ ja̧u̧ siri'corö topö, rö̧ȩnä̧ esehuinätödo. 11Ja̧'hua̧nö̧ ttesehuomenä, isodenä do'ächö topinätödo ji̧'qui̧cha̧hua̧rö̧, ja̧ju̧ Maríacu ö̧'a̧'a̧. Ja̧'hua̧nö̧ topö, ttihue'quiyunä kä̧mä̧dö̧ esehuinätödo ji̧'qui̧cha̧hua̧rö̧. Ja̧u̧nu̧ o'ca'a tti'cächäjimä ba'epö, rö̧ȩnä̧ micuäu juäi ttiyinäcudo oro'inä, koro adiu ameu juäi'inä. 12Ja̧'hua̧nö̧ jȩttä̧ji̧ o'ca'a, Dios 'cuo̧ti̧nä̧ jiähuinä̧u̧do ru̧hua̧ Herodesrö ppa̧'ä̧chö̧ jittäu juiya pä'ö. Ja̧'hua̧nö̧ ja̧'a̧ttö̧ ko̧ro̧mä̧nä̧ ppa̧'ä̧chö̧ i̧hui̧nä̧tö̧do tti̧rȩjä̧ra̧'a̧.

Egiptora̧'a̧ tö'ipächinätödo

13Jahuätö mo̧ro̧jä̧ jähuä huo̧juä̧tö̧ tti̧'chä̧ji̧ o'ca'a, ya̧tȩ ángel, Tu̧ru̧hua̧ huȩ'ä̧hua̧ i̧jȩcui̧nö̧do Josérö 'cuo̧ti̧nä̧. Ja̧u̧ pä'inödo:

—Ä̧rä̧mi̧'ö̧, ji̧'qui̧cha̧hua̧cu̧, ja̧ju̧cu̧ tö'ipächätucui Egipto rȩjȩra̧'a̧cu̧. Juhua'atä ka̧cuä̧tu̧cui̧ ttö jidähuome jubö päi'önä. Herodes ji̧'qui̧cha̧hua̧rö̧ cuä'ö icua pä'ö u̧sä̧cua̧, —pä'inödo ángel.

14Ja̧'hua̧nö̧ ja̧'a̧ttö̧ José ä̧rä̧mi̧'ö̧, ja̧u̧nu̧ yodo tö'ipächinödo ji̧'qui̧cha̧hua̧cu̧, ja̧ju̧cu̧ Egipto rȩjȩra̧'a̧cu̧. 15Juhua'a ka̧cui̧nä̧tö̧do Herodes hua'ö icuome jubö päi'önä. Ja̧u̧ o'ca juiyönä 'cuäopina'ado Tu̧ru̧hua̧ i̧huȩnȩ, Dios i̧huȩnȩ jiäcuähuä i̧sa̧ päinö ta'anö 'cuäopäcua'a pä'ö. Ja̧u̧ huȩnȩ päina'a: “Egipto rȩjȩra̧'a̧ttö̧ huopinösä Chi̧tti̧rö̧.”

Herodes hue'inödo o'ca toi'önä ppo̧'ä̧tö̧ u̧mä̧tö̧rö̧ cuä'ö tticua pä'ö

16Jahuätö mo̧ro̧jä̧ jähuä huo̧juä̧tö̧ ko̧ro̧mä̧nä̧ ppa̧'ä̧chö̧ tti̧hui̧na̧'a̧ ä̧ju̧cu̧, juiyo ra̧huä̧ri̧nö̧do Herodesmä. Ja̧'hua̧ ji̧yä̧cu̧ su̧ro̧da̧u̧ru̧ hue'inödo o'ca toi'önä ppo̧'ä̧tö̧ u̧mä̧tö̧rö̧, todäre a̧'ȩ jui'ätörö, cuä'ö tticua pä'ö Belén ötahuiyänä ka̧cuä̧tö̧rö̧'i̧nä̧, tö'cönänö ka̧cuä̧tö̧rö̧'i̧nä̧. Ja̧'hua̧nö̧ hue'inödo jahuätö mo̧ro̧jä̧ jähuä huo̧juä̧tö̧ jittähuinö huȩnȩ amöcuädö. 17Ja̧'hua̧nö̧ 'cuäopina'ado Dios i̧huȩnȩ jiäcuähuä i̧sa̧ Jeremías i̧huȩyu̧ti̧nö̧mä̧. 18Ja̧u̧ huȩyu̧ti̧nö̧do:

Ramánä ttä̧ju̧cui̧na̧'a̧

yajute ki̧huȩnȩnä̧ huopönö kajuähua'a.

Raquel pi̧nä̧ju̧do ki̧tti̧mö̧rö̧ kajuähua'a.

Ppättädaju pä'ocoju pi̧nä̧ju̧do. Täcö hua'ö tticuiyäcua,

pä'ö huȩyu̧ti̧nö̧do.

19Ja̧'hua̧nö̧ ja̧'a̧ttö̧ Herodes hua'ö icuinö o'ca'a, ya̧tȩ ángel, Tu̧ru̧hua̧ huȩ'ä̧hua̧, Josérö i̧jȩcui̧nö̧do 'cuo̧ti̧nä̧ Egipto rȩjȩnä̧ ö̧ja̧'a̧. Ja̧u̧ pä'inödo:

20—Ä̧rä̧mi̧'ö̧ ji̧'qui̧cha̧hua̧cu̧, ja̧ju̧cu̧ ppa̧'ä̧chä̧tu̧cui̧ Israel rȩjȩra̧'a̧. Täcö hua'ö icuinätödo ji̧'qui̧cha̧hua̧rö̧ cuä'ö tticua pä'inätömä.

21Ja̧'hua̧nö̧ ja̧'a̧ttö̧ José ä̧rä̧mi̧'ö̧, ppa̧'ä̧chi̧nö̧do Israel rȩjȩra̧'a̧ ji̧'qui̧cha̧hua̧cu̧, ja̧ju̧cu̧. 22Juhuorö'inä Herodes i̧tti̧ Arquelao Judea rȩjȩnä̧ ru̧hua̧ päi'önä ö̧ja̧'a̧ ä̧ju̧cu̧, José ye'ecuinödo juhua'a i̧'cha̧ pä'ö. Ja̧'hua̧nö̧ ja̧'a̧ttö̧ José u̧'cuo̧ti̧cuo̧mȩnä̧ Dios jiähuäji ta'anö, Galilea rȩjȩra̧'a̧ 'chi̧nö̧do. 23Juhua'a rȩbȩhui̧pö̧, Nazaret ötahuiyänä ö̧ja̧ pä'ö 'chi̧nö̧do. Dios i̧huȩnȩ jiäcuähuä isotö pä'inätödo: “Jesúsru pättäcuotö nazareno i̧sa̧do.” Ja̧'hua̧nö̧ Dios i̧huȩnȩ jiäcuähuä isotö pättinö ta'anö 'cuäopa'a pä'ö 'chi̧nö̧do José.

Actualmente seleccionado:

San Mateo 2: PIDNT86

Destacar

Copiar