San Mateo 1

Jesucristo ä'canä ka̧cui̧nä̧tö̧mä̧

1Pitömä Jesucristo ahuaruhuä pi̧nä̧tö̧do. Ja̧u̧mä̧ Jesucristomä tä̧do̧tö̧ mi̧nä̧ ru̧hua̧ David'inä, Abraham'inä tta̧hua̧ru̧hua̧ pi̧nö̧do.

2Abrahammä, Isaac jä'o pi̧nö̧do. Isaacmä, Jacob jä'o pi̧nö̧do. Jacobmä, Judá ö̧jä̧hua̧tö̧cu̧ ttä'o pi̧nö̧do. 3Ja̧'hua̧ta̧nö̧ Judámä, Farescu, Zaracu ttä'o pi̧nö̧do. Jahuätö tta̧ju̧ Tamar pi̧nä̧ju̧do. Faresmä, Esrom jä'o pi̧nö̧do. Esrommä, Aram jä'o pi̧nö̧do. 4Ja̧'hua̧ta̧nö̧ Arammä, Aminadab jä'o pi̧nö̧do. Aminadabmä, Naasón jä'o pi̧nö̧do. Naasónmä, Salmón jä'o pi̧nö̧do. 5Ja̧'hua̧ta̧nö̧ Salmónmä, Booz jä'o pi̧nö̧do. Booz ja̧ju̧mä̧ Rahab pi̧nä̧ju̧do. Boozmä, Obed jä'o pi̧nö̧do. Ja̧'hua̧ta̧nö̧ Obed ja̧ju̧mä̧ Rut pi̧nä̧ju̧do. Obedmä, Isaí jä'o pi̧nö̧do. 6Ja̧'hua̧ta̧nö̧ Isaímä, ru̧hua̧ David jä'o pi̧nö̧do. Ja̧'hua̧ta̧nö̧ ru̧hua̧ Davidmä, Salomón jä'o pi̧nö̧do. Salomón ja̧ju̧mä̧, Urías mi̧nä̧ recua o'caju pi̧nä̧ju̧do. 7Salomónmä, Roboam jä'o pi̧nö̧do. Roboammä, Abías jä'o pi̧nö̧do. Abíasmä, Asa jä'o pi̧nö̧do. 8Ja̧'hua̧ta̧nö̧ Asamä, Josafat jä'o pi̧nö̧do. Josafatmä, Joram jä'o pi̧nö̧do. Jorammä, Uzías jä'o pi̧nö̧do. 9Ja̧'hua̧ta̧nö̧ Uzíasmä, Jotam jä'o pi̧nö̧do. Jotammä, Acaz jä'o pi̧nö̧do. Acazmä, Ezequías jä'o pi̧nö̧do. 10Ja̧'hua̧ta̧nö̧ Ezequíasmä, Manasés jä'o pi̧nö̧do. Manasésmä, Amón jä'o pi̧nö̧do. Amónmä, Josías jä'o pi̧nö̧do. 11Josíasmä, Jeconíascu, ö̧jä̧hua̧tö̧cu̧ ttä'o pi̧nö̧do. Babilonia rȩjȩra̧'a̧ Israel ttö̧ja̧rö̧ ttȩmi̧pi̧nö̧ pä̧nä̧ uhuäpächinätödo.

12Ja̧u̧ 'cuäopinö o'ca'a, Jeconíasmä, Salatiel jä'o pi̧nö̧do. Salatielmä, Zorobabel jä'o pi̧nö̧do. 13Ja̧'hua̧ta̧nö̧ Zorobabelmä, Abiud jä'o pi̧nö̧do. Abiudmä, Eliaquim jä'o pi̧nö̧do. Eliaquimmä, Azor jä'o pi̧nö̧do. 14Ja̧'hua̧ta̧nö̧ Azormä, Sadoc jä'o pi̧nö̧do. Sadocmä, Aquim jä'o pi̧nö̧do. Aquimmä, Eliud jä'o pi̧nö̧do. 15Ja̧'hua̧ta̧nö̧ Eliudmä, Eleazar jä'o pi̧nö̧do. Eleazarmä, Matán jä'o pi̧nö̧do. Matánmä, Jacob jä'o pi̧nö̧do. 16Ja̧'hua̧ta̧nö̧ Jacobmä, José jä'o pi̧nö̧do. Josémä, María kirecuo pi̧nö̧do. Jahuäjumä, Maríamä, Jesús ja̧ju̧ pi̧nä̧ju̧do. Ja̧'hua̧ta̧nö̧ Jesúsmä koro i̧mi̧ Cristo mi̧cua̧do.

17Ja̧'hua̧nö̧ ja̧'a̧ttö̧, Abraham mi̧nä̧ ahuaruhuä o'cotö juhua'a yabo yabonö tti̧tti̧mö̧mä̧ ttö̧jä̧pö̧ttö̧nö̧ pa̧ja̧cuä̧nö̧ jo̧mȩnä̧ ka̧cui̧nä̧tö̧do David uhuäpächinome jubö. Ja̧'hua̧ta̧nö̧ David ahuaruhuä o'cotö juhua'a yabo yabonö tti̧tti̧mö̧mä̧ ttö̧jä̧pö̧ttö̧nö̧ pa̧ja̧cuä̧nö̧ jo̧mȩnä̧ ka̧cui̧nä̧tö̧do Israel ttö̧ja̧rö̧ Babilonia rȩjȩra̧'a̧ ttȩmi̧pi̧no̧mȩ jubö. Ja̧'hua̧nö̧ Israel ttö̧ja̧rö̧ ttȩmi̧pi̧nö̧ o'ca'a David ahuaruhuä o'cotö juhua'a yabo yabonö tti̧tti̧mö̧mä̧ ttö̧jä̧pö̧ttö̧nö̧ pa̧ja̧cuä̧nö̧ jo̧mȩnä̧ ka̧cui̧nä̧tö̧do Cristo uhuäpächinome jubö.

Jesucristo uhuäpächinö huȩnȩ

18Pa̧'a̧nö̧ ji̧na̧'a̧do Jesucristo uhuäpächinömä. Ja̧ju̧ Maríamä José pä'ö mi̧cua̧ irecua jä̧cua̧ju̧ pi̧nä̧ju̧do. Josécu kö̧jä̧cua̧'a̧ ä'canä muchaju pä'i'inäjudo Espíritu Santo ujuruttu. 19Josémä kirecuo jä̧cua̧mä̧ adihuä i̧sa̧ pi̧nö̧do. Ja̧'hua̧nö̧ ja̧'a̧ttö̧ Maríarö 'cuäopäjimä kudäpecuächi'a'acu pä'ö jiähua pä'ocö pi̧nö̧do. Korotö ttö̧ja̧ ttä̧ju̧cu̧ juiyönä, jaroi'a pä'inödo Maríarö. 20Ja̧'hua̧nö̧ amöcuädomenä, ya̧tȩ ángel, Tu̧ru̧hua̧ huȩ'ä̧hua̧, 'cuo̧ti̧nä̧ i̧jȩcui̧nä̧cu̧do. Ja̧u̧ ángel pä'inödo:

—José, David a̧hua̧ru̧hua̧, Maríarö cuirecua päi'önä cu̧ja̧ pä'ö yecuhuecuä'. Yajutä ki̧tti̧ u̧huä̧pä̧chä̧cua̧mä̧ Espíritu Santo jähuädo. 21Yajutä ki̧tti̧mä̧ ubomä u̧huä̧pä̧chä̧cua̧. Uhuäpächomenä, i̧mi̧mä̧ Jesús o̧cu̧huä̧cua̧jä̧. Ja̧'hua̧nö̧ i̧mi̧ mi̧cua̧ jä̧cua̧do pi̧jä̧ ttö̧ja̧rö̧ suronä jȩttö̧ jȩpö̧ i̧cuä̧cua̧, —pä'inödo ángelmä.

22Pi̧yȩ o'ca juiyönä 'cuäopina'ado, Tu̧ru̧hua̧ i̧huȩnȩ, Dios i̧huȩnȩ jiäcuähuä i̧sa̧ päinö ta'anö 'cuäopäcua'a pä'ö.

23Ja̧u̧ Dios i̧huȩnȩ jiäcuähuä i̧sa̧ pa̧'a̧nö̧ pä'inödo:

Yajute isajumä, uborö yoröiso jerupajumä, muchaju jä̧cua̧ju̧. Ki̧tti̧mä̧, ubomä, u̧huä̧pä̧chä̧cua̧mä̧.

Ja̧u̧ ji̧'qui̧cha̧hua̧ i̧mi̧mä̧ Emanuel pättäcuotödo.

Ja̧'hua̧nö̧ i̧mi̧ mi̧cua̧'a̧ pä'ätöjä: Dios ujutucu kö̧, pä'ö.

24Ja̧'hua̧nö̧ ja̧'a̧ttö̧ José u̧'cuo̧ti̧cuä̧ji̧ o'ca'a porächi'ö, Tu̧ru̧hua̧ huȩ'ä̧hua̧ ángel hueäji ta'anö jȩpi̧nö̧do. Maríarö ȩmi̧nö̧do irecua päi'önä ö̧ja̧ pä'ö. 25Ja̧'hua̧nö̧ ȩmi̧nö̧'ca̧, jahuäjucu ttirecuarö ttö̧jö̧'a̧nö̧ ko̧cö̧ pi̧nö̧do äcuomenä ki̧tti̧ uhuäpächome jubö. Ja̧u̧ uhuäpächomenä i̧mi̧mä̧ Jesús oinäcudo.

Actualmente seleccionado:

San Mateo 1: PIDNT86

Destacar

Copiar