Yitenda ya Wapostoli 19
19
Paghulusi muEfesusi
1Apa gha karire Apolosi muKorinte, gha yendaghurire Paghulusi muditunga, ho gha ka kumine muEfesusi. Omu ya mo gha ka wanine kambunga kawatawi, 2awa gha kepurire eshi: “Apa mwa tawire ne mwa tamburire Mupepo ghoKupongoka ndi?”
Ko kuhutha kwawo eshi: “Mbadi twa yuva shime eshi ko ghadi Mupepo ghoKupongoka.”
3Ha wepura kwendi eshi: “Diyoghero munye mwa tambura mwe?”
“Diyoghero dyaJohannesi,” dyo ha huthire.
4Po gha ghamberire Paghulusi eshi: “Johannesi, gha yoghangire hanu ngeshi ku hana piruka. Ene gha tongorire kudiko eshi, mba tawe kwayofotji yu mbo gheya munyima dhendi, oyu ne Jesusi.”
5Apa ha yi yuvire, ko kuwayogha kwawo muDina dyaFumu Jesusi. 6Paghulusi ha wa kambeka kwendi nyara. Ko kwiya Mupepo ghoKupongoka papawo.
Nawo ha tangire kughamba mandimi ghagho, no ha yuvithire mbudhi dhaNyambi. 7Waheya pofotji ha karire yira dikumi nohawadi.
8Paghulusi, gha ka yaghurire mo tughonda tuhatu musinagoge yokughufumu waNyambi. No gha yerekire kunongwenena hanu kupira nowoma. 9Ene hamweya ha karire hathururu, no mbadi ha shanine eshi ha wa nongwenene. Awo ha shanine kushwahura ndhira dhaFumu, kuthishwagha meho. Paghulusi ko kuwathigha, no gha shimbire hatawi pithawo, no gha kuvurekire nawo kehe diyuwa muditara‐tara dyaTirannusi. 10Eyi ne ho ya yendire myaka dhiwadi. Kate ha yuvire waheya wa ha tungire muthiko thaAsiya n̂ando dhaNyambi, naWajuda naWahirika karo kemo.
Hana Sikeva
11NaNyambi gha tendire yinu yothitetu paPaghulusi. 12Aye ne ngambi matuku endi mahina ghopayipo yendi, pakughakambeka hakakukorwa, yina kuwapwa yikorwa yawo. No mipepo dhodhimango dhina kuwashwagha.
13Hamweya Hajuda hoyiyendaghudhi, mukwedhera mipepo dhodhimango. Ha yerekire nawo kutoya Dina dyaFumu Jesusi. No ha ningire eshi: “Na kumwedhera muDina dyaJesusi oyu ghana kuyuvitha Paghulusi.” 14Awa ha yi tendire ne, hana Sikeva kwoko nohawadi, aye ne mupristeri shokuru waWajuda.
15Ene yofotji ghopawamipepo dhodhimango, gha wa huthire eshi: “Jesusi ne na mu dimuka, no yaPaghulusi na yi dimuka. Amwe ne yamwe mwadye?”
16Murume yu gha karire nomupepo ghoghumango, ha reghera mumwawo no gha wa pumurire kate kafe‐kafe. Ko kuwahanyaghura kwendi nonyinya pakuwandaghura, kate tjirire thiheha mundhugho dhi.
17Yinu yi ya yukire kwaWajuda wahe, naWahirika wa ha tungire muEfesusi. Ko kuwawana waheya woma ghoghukuru, ghoha kughire shime thikuma Dina dyaFumu Jesusi. 18Wingi wawo hanu wa ha tawire, heyire nawo, no hana tongononine yitenda yawo yoghurodhi. 19Nothingi thawo awa ha dimukire yoghurodhi, ha ka retire mambapira ghawo, no ha gha tumekerire kughutho wawahe. Gho ha tarire manyinga agha gha pitire mambapira. Ko kuwana kwawo eshi, mayovi makumi kwoko.
20Kemo dha hokokire ngcamu dhon̂ando dhaFumu, no dha tapathanine kokuhe.
Didhongera dyomuEfesusi
21Munyima dhoyihokoka yi, gha himine Paghulusi kutjinaghana Masedoniya naAgaye, gha yende kuJerusalema. Ko kuninga kwendi eshi: “Apa na kukakuma ko, na kona karo kudhingura kuRoma.”
22Ha tumu kwendi kuMasedoniya haghamweni wendi hawadi. Ha Timoteghusi naErastusi. Thinda ne gha thigharire tango shime nakoghana dhodhire kunyima, muAsiya.
23Shemwa ko kukara meman̂anyeno ghomakuru, ghokundhira dhaFumu. 24Mufuri ghodina dyoDemetirighusi, gha furangire yitjwandjo yoyikuvo yotembeli waArtemisi. Ene hafudhi ha wanine ndjambi dhodhiwa. 25Ha wetha kwendi, nawanu hamweya hoyirughana yokenge yo wahe pofotji no gha wa tongwerire eshi: “Mwanu mwe, muna dimuka eshi twa wana ghuwa muyirughana yi. 26Kumona muna kumona mwathinda eshi, oyu Paghulusi ne, kadi muEfesusi pithamo gha konine kuwana maghamweno. Ene nomukunda ghoghuhe ghomuAsiya karo. Aye ghana kuninga eshi: ‘Kemo, eyi yokutenda nonyara ne kadi hanyambi.’ 27Yirughanitha yetu ne mughukukutu thikuma yidi. Mu kuwana dina dyodiyi. Ene kadi yoyi pithayo keho. Ghukukutu karo ne eshi, tembeli dhan̂urunyambi ghomukadhi Artemisi. Fuma dhendi mbo dhina yongara no mbana mu tunditha ghukuru wendi. Oyu ne yon̂urunyambi ghomukadhi, oyu gha pupana muAsiya yomuhe nomukaye kokahe.”
28No apa ha yi yuvire yi, ha patire thikuma no ha kughererire eshi: “Mukuru shemwa, Artemisi waWakaefesusi!”
29Thivunganyi tha tapathanine mumbara dhodhihe. Ko kukongosha hanu wahe kumbandha, yira munu yofotji. Awo ha kwatire Gayusi naArisitagusi, naWakamasedoniya hawadi awa ha yendire naPaghulusi no ha wa kokakokire.
30Paghulusi thinda ne gha hakire kughamba nombunga dhi. Ene hatawi ha mu shwenekire. 31Hakamakuto hamweya homuAsiya hohahakwa wendi, ha mu tumenine mbudhi dhokumushinga eshi: “Mbadi gha kona kuyenda mudimbandha di.”
32Waheya ha kushomononine, no mbunga dhodhihe dha karire mudidhongi. Thingi hawanu, mbadi ha yi dimukire eshi, nye hana pongera pofotji. 33Apa ha thindekire Hajuda Aleksanderi kughutho. Ko kumutongwera hanu hamweya eshi yinye yidi po. Ha neghi nyara dhendi eshi ghana haka kughamba nawo. 34Ene pa ha mu dimukire eshi nane Mujuda, ko kukushomonona waheya yira kanwa kofotji maviri mawadi eshi: “Mukuru shemwa Artemisi waWakaefesusi!”
35Munyima kamutjangi ghombara gha porerithire mbunga ghuninga eshi: “Mwakaefesusi mwe, munu munye gha dhira kuyidimuka eshi, mbara dha Wakaefesusi ne dho dha kunga tembeli waArtemisi shokuru. Nothishwi dhendi ethi tha shwaghire muwiru? 36Noyofotji temba yu gha kona kuyikanana. Yodigho, mu turumuke no mwa tenda thinu mukapipi. 37Amwe muna reta wa harume kuno, ngambi kenge di ha dhirire kukungura tembeli, no kushamuna nyambi wetu ghomukadhi. 38Ndhango dhina kukara po, hapanguri ne wano. Ngeshi Demetirighusi nawarughani wendi, noyinyeghenya yawo kwamunu, ha yende ha ka yi hete kwako‐nako. 39Ene ngeshi muna yi tu mutwi, ha kona kuyipangura pathinamuragho ghodiko. 40Yoyishi tuna kara mughukukutu, pakutuheta mumeman̂anyeno payinu yi yina hokoka dyarero. Mbadipo thinu padidhongi dino. Natwe temba mbadi mbo tu kwata ko.”
41Apa gha manine kughamba yi, ko kuyakunutha mbongarero.
Actualmente seleccionado:
Yitenda ya Wapostoli 19: MHW1986
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Mbunga dhoBayibili dhaNamibia (Bible Society of Namibia) 1986
