Yitenda ya Wapostoli 18
18
Paghulusi muKorinte
1Kutunda po Paghulusi gha shwaghire muAtene, gha yende kuKorinte. 2Ko gha ka kuhanganine naAkwila, Mujuda yu ha shamurukerire muPontusi. Opo, oku ye nga ka tunda namunu wendi Prisila kuItaliya na gha kume mo. Yoyishi fumu shokuru Klaghudighusi gha manine kuraghura eshi, Hajuda wahe ha tunde muRoma. Paghulusi, ko kuyenda gha ka wa dhingure. 3Ene yoyi nawo hayirughani yomatende, gho ha dhirukerire ko no gha ka rughanine nawo.
4Ene mu kehe Sabata nga yendanga musinagoge, gha ka ghambaghure nawanu, no gha ka yerekire kunongwenena Hajuda naWahirika.
5Apa ha ka tundire haSilasi naTimoteghusi kuMasedoniya, Paghulusi ye, pakukon̂omeka muyiyaghura gha nongwenene Hajuda eshi, Jesusi ne yoKristusi. 6Ene pa ha manine kumukanana no kumushamuna, ha kukumuna kwendi rukungu ropayivata yendi no kuwatongwera eshi: “Ngeshi mwa kuyongare ne, murandu wenu. Ame ne yame ghokukanga eshi madimbwerero ghoyinu yi. Apa no kuna kuyenda ni ka rughane mwawa ha dhira kukara Hajuda.”
7Ko kushwagha kwendi musinagoge. Ho gha yendire kundhugho dhamurume ghokuyapa Nyambi, ghodina dyoTitighus Justusi. Ndhugho dhendi ne pepi nosinagoge dha hatire. 8Krispusi ghonduna ghosinagoge nohendi wahe, ha tawire mumatawero ghokwaFumu, Karo nawamweya hohengi homuKorinte, awa ha yuvire mbudhi, ha tawire no ha pwire kuyogha.
9Mughuthiku ghumweya, gha hokokire Fumu kwaPaghulusi no gha ningire eshi: “Wa yapa. Yende kenge yo noyiyaghura no wa porera. 10Yoyishi ame ne, noye ni di. Mbadiko yu sho gha kugundaghure, ngambi kukupatera. Yoyishi mumbara dhino, mwadi hengi wa ha kara hange.”
11Paghulusi naye mo gha karire mwaka ghofotji notughonda kwoko nokofotji no gha hongire hanu mun̂ando dhaNyambi.
12Apa gha karire Galiyo nduna ghomuAgaye, ko kumwiman̂anyena Hajuda Paghulusi pofotji, no ha mu twarire kundhango. 13No ha ningire eshi: “Murume no, kuna kuyereka kuyudhaghura hanu eshi, ha fumaneke Nyambi nomuhingo ghokukutjaka nomuragho.”
14Paghulusi gha shanine kughamba shime. Ko kuninga Galiyo kwaWajuda eshi: “Ngo yina tamba kughuyi ngambi kughuringiringi, mahimeno ghange ngo ghana kara noghudhughutjima, mukutegherera kukwenu Mwajuda. 15Ene ngeshi kun̂anani dhonyaranyara, dhokuman̂ando no kumena no kumuragho wenu, mwa kona kukudimukera mwathinda. Muman̂ando ghokenge, mbadi na haka kukara mupanguri.”
16Kutunda po, ko kuwatjidha kwendi mundhango. 17Awo ne ko kugahukera Sostenesi, mukuru ghosinagoge ha mu kwate no kumupetha. Galiyo ne mbadi gha yi tokomenine.
Mahukero ghaPaghulusi kuAntiyokiya
18Munyima dhonako dhodhire, edhi gha karire Paghulusi shime nawatawi homuKorinte, ko kuwayakunuka no gha yendire pofotji naPrisila naAkwila kuSiriye. Kughutho ghokuthekera muKengeriye, ha mu kururire huki dhendi. Yoyishi gha yarithe medhero ghendi agha gha tendire pakutanga.
19Pakukokera muEfesusi, ko kuthigha Paghulusi hakaruyendo rwendi no gha kengenine musinagoge, omu gha ka ghambaghurire naWajuda. 20Ha mu kumberire eshi, gha kare rure. Aye ne mbadi gha hakire. 21Ene gha wa rumerithire ghuninga eshi: “Ngeshi kuhaka Nyambi, mbo na ka huka karo kukwenu.”
Ko kushwagha kwendi muEfesusi. 22No gha ka kumine muSesareya. Kutunda po, ko kayenda kwendi kuJerusalema, gha ka rumerithe hambunga. Munyima kuAntiyokiya. 23Omu gha ka karire rure.
Shime gha tundire po, ko katjinaghana thiko thaWakagalasiye naFrigiya. Kokuheya gha tanarithire hatawi noghukriste.
Apolosi ghana kuyaghura muEfesusi
24Mumayuwa ghogho, ko kukuma muEfesusi Mujuda ghodina dyoApolosi, oyu ha shamurukerire muAleksandriya. Aye gha twethire kughamba no gha dimukire Yitjanga. 25Karo gha wanine yihonga yondhira dhaFumu. No gha ghambire noghujrjima pakuthothonona hiwana muyihonga yokwaJesusi. Ene diyoghero di gha dimukire ne, dyaJohannesi keho. 26Gha pirire woma, apa gha tangire kuyaghura musinagoge. Apa ha mu yuvire haPrisila naAkwila, ha mu shimbire kukwawo no ha ka mu tjwathanithire shime thiwana ndhira dhaNyambi.
27No apa gha rumbanine Apolosi kuAgaye, ko kumutjokedha hatawi. Gho ha mu pire mbapira gha shimbe kwawatawi ho kuya no kuwaragha eshi mu mutambure ghumenya‐menya. Pakakuma ko, gha ka wanine maghamweni kwawa ha wanine matawero pan̂eke dhaNyambi. 28Yoyishi gha pathwererire Hajuda nongcamu kuthitunumeho thawo. No kuwadimukitha muYitjanga eshi Jesusi ne yoKristusi.
Actualmente seleccionado:
Yitenda ya Wapostoli 18: MHW1986
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Mbunga dhoBayibili dhaNamibia (Bible Society of Namibia) 1986
