Yitenda ya Wapostoli 16
16
Timoteghusi ghana kunungu kwaPaghulusi
1Paghulusi gha ka kumine muDerbe no muLisitara. Mo gha karire mutawi ghodina dyo Timoteghusi. Nyina naye mutawi, mukamadi ghoMujuda. Wihe ne Muhirika. 2Hatawi homuLisitara no homuIkonighumu, ha kuyongire roruhyea yoyihunga kukwendi. 3Yoyishi Paghulusi, gha himine kuyenda naTimoteghusi, yo gha mu ken̂enine. Eyi gha yi tenderire, pamurandu waWajuda wa ha karire mumukunda ghu. Yoyishi waheya ha yidimukire eshi, wihe ne Muhirika.
4Thika di ha yendaghurire kengeyo, tunda dighumbo yenda dighumbo, ha shimbire makuyuvero ghawapostoli nawakungi muJerusalema. No kughatapa kwawatawi, pakuwarawera eshi ha tende kemo. 5Dyo ha pwire kutanaritha hatawi mumatawero. Nothitara thawatawi tha vurire thikuma mudiyuwa.
Rupara romuToroghasi
6Ko kupayura kwawo ha yende muthiko thaFrigiya naGalasiye. Yoyishi Mupepo ghoKupongoka, gha wa shingire eshi mbadi ha kona kuyuvitha n̂ando muthiko thaAsiya. 7Apa ha kumine kumururwani waMisiya, ha yerekire eshi ha yende kuBitiniya. Ene Mupepo waJesusi, mbadi gha yi wa tawedhire. 8Munyima ko kutjimaghana kwawo Misiya, ha yende kuToroghasi. 9Oku ya ne ko gha ka monine Paghulusi paghuthiku rupara rwamurume ghoMukamasedoniya, oyu ghana mwimanena ghumukumbera eshi: “Wiye kuMasedoniya, ghu ka tu ghamwene.”
10Apa gha manine kumone rupara Paghulusi, ko kurongera kwetu wangu tu yende kuMasedoniya. Yoyi twa yi dimukire shemwa eshi, Nyambi ghana twitha ko, tu ka wa yuvithe mbudhi.
Mapirukero ghaLidiya
11Eyi twa tundire mu Toroghasi, twa voghedhire ghurura kate kuSamotarake. Nomudiyuwa dyokuranda ko, ho twa yendire kuNeghapolisi. 12Kutunda po, ho twa ka kumine muFilipi. Mbara dhokutangerera muthiko thaMasedoniya, thomarawero ghaWakaroma. Mumbara dhi, twa karire mo mayuwa ghomapu.
13Mudiyuwa dyoSabata, ha tu shwagha kwetu mumbara tu ghurumuke kukakuro. Yoyishi ko twa ghayarire eshi, ko dya kara dyango dyokuraperera Hajuda. Ko twa ka hungumanine, tu ka ghambaghure nawakamadi wa ha kukongwedherire ko. 14Yofotji ghopawateghereri, gha karire mukamadi ghodina dyoLidiya. Oyu gha kwatire matawero ghaWajuda. Aye gha karire nomughuro ghomakehe ghomakihu, no gha tundire kuTiyatira. Fumu gha yandhurire yighayara yendi, gha kwate man̂ando ghaPaghulusi. 15Ko kupwa kuyogha ye, nohendi wahe. Munyima ko kuturagha gha twithe eshi: “Kenge di muna yi nongonona eshi na tawa mwaFumu, mu tu yende kudighumbo dyange.”
Ene gha tu hongaghurire tu kone kuyitenda.
Mutorongo dhomuFilipi
16Diyuwa dimweya, oku shime twa karera mundhira dhokudyango dyondapero, ko kukuhangana kwetu namukadhipika, oyu gha karire nomupepo ghokupumba yokughutho. Payipumba yendi po ha wanenine manyinga hahekudyendi. 17Ha kuthu kwendi Paghulusi natwe ghukugherera eshi: “Hanu wa ne hakakukarera Nyambi ghoMukakupiterera. Awo kutongwera hana kumutongwera eshi, ngepi di sho mupwe kughamwena.”
18Aye gha yi tendire mayuwa ghomengi kenge yo, kate gha yi ndhanyine Paghulusi. Ha piruka kwendi no gha ningire kwamupepo eshi: “Na kukawera muDina dyaKristusi, shwaghe mumwendi.”
Mupepo ghoghumango nagho, popo ko kushwagha mumwendi.
19Apa ha monine hakekudyendi eshi, mbadi ghana kureta karo manyinga, ko kukwata kwawo haPaghulusi naSilasi, ha wa kokere panunda kwawamayami. 20Awo ha wa twarire kwamuporitha shokuru no ha ningire eshi: “Hanu wa ne Hajuda, wo hana kutenda maghukukutu mumbara dhetu. 21Hana shana kutuhonga yikaritha yi twa dhira kutawa twe Twaroma no kuyikutha temba.”
22Mbunga dha weman̂anyenine. Muyendithi ghombara, gha tumine ha wa payawere yivata yawo, no kuraghura ha wa mwashure. 23Apa ha manine kuwapumura nonyinya, ko kuwapaka kwawo mutorongo. Gho gha rawerire mukungi, gha wa kunge momuyi thikuma. 24Pamarawero gha, naye gha wa tjaperire mungonda dhomwimi dhodikokore, no gha ghangire mapadhi ghawo kudithikithiki.
25Pakatji koghuthiku haPaghulusi naSilasi, ha karire mukurapera no hembire membo ghokudifumanekero dyaNyambi. Hakatorongo hamweya ha teghererire kukwawo. 26Kambiru‐mbiru, ko kukara makin̂eno ghomuve ghomakuru. Agha gha nyunganyungire tushemandhugho totorongo. Yero yoyiheya yotorongo, ko kuyandhuruka popo. Nomenge ghomaheya ghawakatorongo, gha shutaghukire. 27Mukungi gha pindukire ghututuma. No pa gha monine ghana yandhuruka mavero ghomahe ghodorongo, gha shwamunine thimende thendi eshi, gha kumine. Yoyi gha ghayarire eshi, hakadorongo ne ha nombo. 28Ene Paghulusi gha mu kughererire thikuma eshi: “Wa kupagha ghothinda, twaheya mo tudi shime muno.”
29Mukugungi ha kumbera munyenge, no kureghera mukayugho komwimi ghututuma, no kukuvama kughotho waPaghulusi naSilasi. 30Ha wa shwaghitha kununda no kuwepura eshi: “Mwakadikuto, nye sho ni tende ni pwe kughamwena?”
31Ha mu hutha kwawo eshi: “Tawe mwaFumu Jesusi, no mbo ghuna pu kughamwena we nohoye.”
32Munyima ko kuyuvitha kwawo n̂ando dhaFumu kukwendi, nawanu wahe homumwendi. 33Muviri dhodho, ko kushimba haPaghulusi naSilasi gha ka yoghe yitombo yawo. Aye nohendi wahe po ha karire po no ha pwire kuyogha. 34Ko kuwetha kundhugho dhendi, no kuwayarekera. Popo naye nohendi wahe ha yarire noyishamberera, yoyishi hana tawa mwaNyambi.
35Mudiyuwa dyokuranda ko pamathiku‐thiku, ko kutuma muyendithi ghombara hakareri ghomuragho nombudhi eshi: “Mu ka thighe hanu wo.”
36Mukungi ko kutwara mbudhi dhi kwaPaghulusi eshi: “Muyendithi ghombara ghana kuyidimukitha eshi ha mu thighe. Mu yende popano, nothiraro muruyendo rwenu.”
37Ene Paghulusi gha ningire kwamukareri ghondhango eshi: “Nga ha tu pumura muthitunumeho no kutupaka mutorongo, oku mbadi hana tu pangura. Atwe ne twakakakoghatji kaRoma. Munyima ne hana shana kutushwaghitha mughudhindo. Kadi kemo! Ha keye hathinda na ha tu shwaghithe mo.”
38Mukareri ghondhango, gha ka yitongorire kwamuyendithi ghombara. Aye ne gha yapire thikuma, apa gha yuvire eshi Haroma. 39Nawo ha yendire, ha ka rombe mathigherero. Ko kuwashwaghitha kwawo mutorongo, no ha wa kandererire eshi, ha shwaghe wangu mumbara. 40Munyima dhokushwagha mutorongo, ghoha yendire kundhugho dhaLidiya, omu ha ka monine hatawi no ha ka wa tjokedhire. Kutunda po ko kayenda kwawo.
Actualmente seleccionado:
Yitenda ya Wapostoli 16: MHW1986
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Mbunga dhoBayibili dhaNamibia (Bible Society of Namibia) 1986
