Yitenda ya Wapostoli 15
15
Thigongi thomuJerusalema
1Ko kutunda hanu kuJudeya, na ha nyangamithe hakakutawa eshi: “Ngeshi mbadi sho mu tende thika di gha rughanithire. Mosesi eshi, ha mu ken̂e, ngo mbadi sho mupwe kughamwena.”
2Apa ha karire haPaghulusi naBarnabasi mun̂anani nawo, ya kutjakire thikuma yighayara yawo. Munyima ha kunungu kwawo eshi, awa hashawadi nawamweya homumbunga, ha kona kuyenda kuJerusalema kwawapostoli no kwawakungi ha ka yuve dipwero di.
3Munyima dhokuwapa mbunga n̂uta, ko kutjinaghana kwawo muFenisiye naSamaria. No ha ka thimwetwedhire yomapirukero ghawahayidena. Payinu yi, po ha shamberererire thikuma hatawi.
4Eyi ha ka kumine muJerusalema, gho ha ka wa tamburire thiwana hambunga nawapostili nawakungi. Munyima ko kathimwetwedha kwawo yoyiheya eyi gha wa tendithire Nyambi. 5Ene hakakutawa hamweya wa ha karire pakutanga Hafarasayi, ha henyine kughutho no ha ningire eshi: “Awa hana piruka who sho hapwe kuken̂a, no kuwatongwera eshi ha koneke muragho waMosesi.”
6Hapostoli nawakungi, ha kukongwedhire pofotji ha kuvureke dipwero di. 7Munyima dhoyikongothana yoyikuru yi, ghemanine Petrusi no gha wa tongwerire eshi: “Mwayendhange, mwa yi dimuka eshi kare‐kare gha ni tororire Nyambi mwawakamaghano wenu. Ni yuvithe hahayidena mbudhi ha kone kutawa. 8NaNyambi yu gha dimuka mitjima, gha yi tanarithire pakuwapa Mupepo ghoKupongoka, yira yatwe. 9No mbadi gha tendire makutjakero pakatji ketu nawo. Aye gha kushukithire karo mitjima dhawo pamatawero. 10Yinye muna kushedhawera ghudhughutjima waNyambi pakukambeka djoko pamathingo ghawakakutawa, edhi ha dhirire kukona kushimba hakerekandongo wetu, natwe temba? 11Kadi kemo, natwe nawo, twa tawa vene eshi, pan̂eke dhaJesusi ghoFumu twapwa kughamwena.”
12Munyima podigho popo, hanu wahe ha porerire no ha teghererire kwaBarnabasi no kwaPaghulusi. Awo ne ha thimwetwedhire yoyidimukitho, noyitetukitho eyi gha wa tendithire Nyambi.
13Apa ha manine, ha ningi Jakobusi eshi: “Mwayendhange, mu tegherere kukwange! 14Simeghoni, gha twathanithire eshi, ngepi di gha rughanine Nyambi thinda pakutanga mwawahayidena. Gha wa tende diko dyendi, mumwawo. 15Haporofeta nawo dyo ha ningire. Yapwa kutjanga eshi:
16‘Munyima mbo na keya
no mbo na na tendurura ndhugho dhaDavita, dhokuyungu nuka
no mbo na na shokukurura yishokeka yendi.
17Kate mbo ha kone hanu wahe kushana Fumu.
Kemo, hahayidena wahe awa netha eshi ha kare ghutungi wange,
wo hana kutenda yinu yi, dyo ghana kuninga Fumu.’
18Eyi ne yapwa kudimuka kutunda kutukuru. 19Yo na kughayara me eshi, mbadi twa kona kuyikukutitha yi kwawahayidena, awa ha piruka kwaNyambi. 20Ene tu wa tjangere eshi, mbadi ha kona kudya nyama yu hana kuyamba kwawanyambi hombango. Yoyishi mbadi gha kushuka. Eshi ha shwene yothidhira, no kadi wa kudya thiyama thokufa kuhore noghunyinga temba. 21Yoyishi, muragho ghuno waMosesi, wa tunda ngundu kukare-kare, kughuyuvitha roruhe kwawanu mu kehe mbara. No mu kehe Sabata hana kuyitoya mumasinagoge.”
Manungero ghothigongi
22Kutunda po, ko kukuyuva hapostoli nawakungi nombunga eshi, ha torore mumwawo hakamaghano, no kuwatuma pofotji naPaghulusi naBarnabasi kuAntiyokiya. Ko kutorora kwawo Judasi oyu ha toya karo eshi Barsabasi naSilasi. Harume wa ha fumanine thiwana kwawambunga. 23Ko kutuma kwawo mbapira dhimweya, pofotji nawo eshi:
“Kwawatawi wa ha shwagha mughuhayidena,
homuAntiyokiya, muSiriye no muSilisiye.
Twapostoli nawakungi nawayendhenu,
tuna mu rumeritha.
24Atwe twa yuva eshi, hamweya homaghano homumwetu, ko heyire ko na ha mutende thivungenyi. Pakumutongwera yinu yi ha dhira kuwana marawero kukwetu. 25Yo tuna kuyuvera pofotji, tu torore harume hokumutumena. Awo kuna kuwathindekedha hahakwa wetu, ha Barnabasi naPaghulusi. 26Awa ha taterera moyo dhawo, muDina dyaHekudyetu Jesus Kristusi. 27Tuna tumu pan̂anyn̂anyi haJudasi naSilasi eshi, na ha mu tongwere karo yinu yino mutunwa. 28Yoyishi Mupepo ghoKupongoka natwe, nga tu kuyuvu eshi mbadi twa kona kumuwedherera po karo mupango ghumwe. Shimengwa yinu yino yoyikuru eyi twa nyanda. 29Eshi, mbadi mwa kona kudya nyama yu hana kuyamba kwawanyambi hombango. Nomanyinga temba, nothiyama thokufa kuhore temba. No mu kukongore kuyoyiheya yothidhira. Ngeshi ngo mu koneke kuyinu yino, ngo mutende thiwana Dirumeritho.”
30Nawa ha tumine, ha kuyakunukire no na yendire kuAntiyokiya. Ko ka kongwedha kwawo hatawi waheya pofotji, no kuwapa mbapira. 31Mbunga dha toyire mbapira, no dha shambererire thikuma kumbudhi dhino dhomatjokedhero. 32HaJudasi naSilasi, awa ha karire karo hathinda haporofeta, ha ghambire rure nawatawi no ha wa tjokedhire no kuwatanaritha mughukriste. 33Munyima dho ka kara rure, ko kahuka kwawo no ha twaire dirumeritho dyawatawi kwawa ha wa tumine. 34Ene Silasi, gha himine eshi gha tunge momo.
35Paghulusi naBarnabasi, ha karire thivaka thothire muAntiyokiya. No ha hongire nawanu hohengi pofotji, ha yuvithe n̂ando dhaFumu.
Paghulusi naBarnabasi hana kukuyakunuka
36Munyima dhonaka dhodhifupi, ha ningi Paghulusi kwaBarnabasi eshi: “Wiye tu yende tu ka mone eshi, ngepi di yina kuyenda kwawatawi homumambara ghomahe, omu twa yuvithire n̂ando dhaFumu.”
37Barnabasi, gha himine kushimba pofotji nawo Johannesi oyu ha tire karo eshi Markusi. 38Ene Paghulusi gha ghayarire eshi, kadi wa kurogha kushimba murume yu gha wa thighire muPamfiliya, no mbadi gha manithire virughana nawo. 39Payinu yi, po ha kutjakerire thikuma, kate ha kuyakunukire. Barnabasi gha simbire Markusi no ha yendire nothikepa ku Sipurusi. 40Paghulusi ye ne gha tororire Silasi. No ha yendire munyima dhokutapa thiraro kwawatawi. 41Ko kutjinaghana kwendi Siriye naSilisiye no gha tanarithire hambunga mughukriste.
Actualmente seleccionado:
Yitenda ya Wapostoli 15: MHW1986
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Mbunga dhoBayibili dhaNamibia (Bible Society of Namibia) 1986
