Yitenda ya Wapostoli 14
14
Paghulusi naBarnabasi muIkonighumu
1MuIkonighumu, hengenine haPaghulusi naBarnabasi nomuhingo ghothika dyodyo. Ha yendire karo kumasinagoge ghaWajuda, ha ka yaghure mo. Eyi ya randire ko ne, Hajuda hohengi naWahirika nawo ha tawire. 2Ene Hajuda wa hashwenine kutawa kumbudhi, ha yudhaghurire yihima yawahayidena eshi, ha tjidhe hakakutawa. 3Kutunda po, noghutokota ha karire hapostoli mumbara, ho ha yaghurire nowoma noghutjimapera paFumu. Fumu naye gha tanarithire mbudhi mun̂eke, pakutenditha hapostoli, yidimukitho noyitetukitho. 4Hakambara, ha pwire kuyakunutha, hamweya kwaWajuda, nohamweya kwawapostoli.
5Ene hahayidena naWajuda nawakamiti wawo, ha tangire kumbirimbimba eshi, ha mbandukere hapostoli no kuwapagha nomawe. 6Ape ha yi dimukire hapostoli, ko kutjirera kwawo muthiko thaLisitara naDerbe. MuLikaghoniye, mambara mawadi gha karire mo. 7Mo ha ka yuvithire mbudhi dhodhiwa.
Paghulusi naBarnabasi muLisitara
8MuLisitara mwa karire murume ghokushekesha mapadhi. Kutunda kumushamurukero wendi, gha gharire no mbadi gha konine kuyenda. Gha hungumanine, 9no gha teghererire eyi ghana kughamba Paghulusi. Naye Paghulusi, gha mu nungurukerire no gha mumonine eshi; ghana kara nomatawero ghokumwirukitha. 10Ha mwitha kukwendi eshi: “Wimane ghurura pamapadhi ghoye!”
Murume ko kuregha, no gha tangire kuyendaghura. 11Apa ha monine hanu eyi ghana tendi Paghulusi, ko kukugherera kwawo muThilikaghonisi eshi: “Hanyambi hana piruka munu, no ha neya kukwetu.”
12Ko kumuta kwawo Barnabasi eshi Zeghusi. Paghulusi ne Hermesi. Yoyishi yomutumi ghan̂ando. 13Mupristeri ghotembeli dhaZeghusi, edhi dha karire kununda dhombara, gha shimbire mandwedho nomitemo dhon̂ata kudikorogho. No gha himine kutwara nawanu muyambo kwawapostoli. 14Ene pa ha yi yuvire hapostoli haBarnabasi naPaghulusi, ko kupayaghura kwawo yivata yawo no ha reghirere mudihanga ghukugherera eshi: 15“Mwanu mwe, yinye yi muna kukwata po mwe? Atwe ne twanu vene yira yamwe. Atwe karo tuna mu retera mbudhi dhodhiwa. Eshi mu thighe hanyambi hokudhira kumona, no mu piruke kwaNyambi ghomuyumi. Aye ne yo gha tendire diwiru nomuve nodikuruviya, noyoyiheya yi ya kara mo. 16Aye, yo gha thighire pakare marudhi ghomahe eshi, gha yende mundhirana dhagho. 17Ene ya karire eshi ye ne yomukakutapa yoyihunga. Gha mu pire mvura ghokutunda kudiwiru nomukesho ghororuhe. Mwa wanine yidya yoyingi, no mwa vigharerire.”
18Ene ngambi noman̂ando gha, mbadi ha tawire hapostoli eshi, hanu ne ha wa retere miyambo.
19Ko kwiya Hajuda homuAntiyokiya, no homuIkonighumu, na ha kokerere hanu kukwawo. Awo ha vukumine Paghulusi nomawe no ha mu kokerire panunda dhombara, ghughayara eshi, ngwa ghana fu. 20Ko kwiya hakakutawa ha mu dhingumwetwedhe. Ha pinduka kwendi no ghengenine karo mumbara. Mudiyuwa dyokuranda ko, ko kudhiruka kwawo naBarnabasi kuDerbe.
Paghulusi naBarnabasi hana kuhuka kuAntiyokiya muSiriye
21HaPaghulusi naBarnabasi, ha ka yuvithire karo mbudhi muDerbe. No hengi hanu ha tawire.
Munyima ha kukire kuLisitara no kuIkonighumu no kuAntiyokiya. 22Awo ha tanarithire hatawi mughukriste, no kuwatjokedha eshi, ha tjimape mumatawero. “Tu kare tango mumapethero ghomakuru kughutho ghokwingena mughufumu waNyambi,” dyo ha ningire.
23Mu kehe mbunga ha totorire mo mukungi. Munyima dhondapero no dhokudhirera, ko kuwatwara kwaFumu, omu ha tawa.
24Hapostoli, ko ka runduruka shime ha yende kuPisidiye naPamfiliya. 25Gho ha ka yuvithire n̂ando muPerge, ndani ha ka yendire kuItaliya. 26Ka tunda ko, ko kahuka kwawo nothikepa kuAntiyokiya. Oku ha wa ragha mun̂eke dhaNyambi, ha ka yarithe yirughana yawo. 27Apa ha ka kumine, ko ka kongwedha kwawo mbunga dhawakriste pofotji. No ha ka wa thimwetwedherire yoyiheya yi gha wa tendithire Nyambi. Karo eshi ngepi di gha yandhwererire hahayidena thero thokumatawero.
28Hapostoli ha ka dhighamine thivaka, kwawakakutawa hokuya.
Actualmente seleccionado:
Yitenda ya Wapostoli 14: MHW1986
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Mbunga dhoBayibili dhaNamibia (Bible Society of Namibia) 1986
