Yitenda ya Wapostoli 10
10
Petrusi naKornelighusi
1MuSesareya, mwa karire murume ghodina dyoKornelighusi. Nduna wawakayita homuItaliya. 2Aye ne mukakukarera Nyambi no mukakuyapa Nyambi gha karire. Naye thinda nohadidhiko dyendi wahe. Gha tendire yinu yoyingi mukughamwena hahepwe, kudiko dyaWajuda no gha raperire rwingi kwaNyambi.
3Diyuwa dimweya pathitengeyuwa, ko kumona kwendi thiwana rupara rwamuengeli waNyambi runa tamba kukwendi, runa kumwitha eshi: “Kornelighusi!”
4Ko kututukwa Kornelighusi ghureva‐reva no kwipura eshi: “Nye ne, mukadikuto?”
Muengeli gha mu tongwerire ehsi: “Nyambi, ghana koneka kumandapero ghoye, no kuyitenda yoye yokwawahepwe no ghana kughayara. 5Tume wangu hanu kuJope, ha kethe Simoni oyu ha ta karo eshi, Petrusi. 6Mudighumbo gha di, kwaSimoni ghumweya ghothinyuka yikumba, oyu gha tunga kudikuruviya.”
7Munyima dhokutunda po, muengeli yu gha ghambaghurire nendi, ko kwitha kwendi hakareri ndhugho dhendi hawadi, noyofotji ghopawanatanyi wendi oyu gha karerire Nyambi. 8Ha wa thimwetwedhera kwendi yoyiheya, no gha wa tumine kuJope.
9Mudyuwa dyokuranda ko pamutwekatji, eyi hana kukuma pepi nodighumbo muruyendo rwawo, ko kudhina Petrusi pamutuya gha karapere. 10Munyima ko kufa kwendi ndhara, no gha shanine thokudya. Oku shime ha karera hanu, mukuyareka yidya, ko kukuvutaghura kwendi. 11Ha mono diwiru dina yandhuruka, nodimuhina dyodikuru edi dina pu kughangadheka mumashonga ghadyo mane, oku dina kuwa pamuve. 12Mudihina di, mo ya karire yoyihe yomaghuru mane noghurondodhi ghokukokawa pamuve, noyinyunyi yoyihe yoyirunga. 13Ko kuyuva kwendi diywi dina kumutongwera eshi: “Wiye Petrusi, paghe no dye.”
14Ene Petrusi ha ningi eshi: “No kamanana temba Fumu! Shime ni shemwa ehsi kudya thokudhira kupongoka, ngambi thokudhira kukushuka.”
15Ko kuyuva kwendi karo diywi paruwadi, dina kumutongwera eshi: “Ethi gha kushukitha Nyambi, mbadi wa kona kuthipiritha ghukushuki we.”
16Paruhatu ya hokokire, munyima thinu thi ha thi huthire karo mudiwiru.
17Oku shime gha karera Petrusi mukuthinganyeka eshi, nye rwa ninga rupara ru ghana mono, ko kwiya harume wa gha tumine Kornelighusi kuthero. Ha karire mukushana ndhugho dhaSimoni. 18No kwipura eshi, Simoni yu ha ta karo eshi Petrusi ne mo gha di mundhugho ngwa. 19Shime gha karera Petrusi mukundhundha rupara, ko kumutongwera Mupepo eshi: “Harume hahatu waya hana kukushana. 20Wiye, yende mwishi, no wa shwena kuyenda nawo. Yoyishi Yame na wa tumu.”
21Ko kushuruka Petrusi no gha ningire kwawarume eshi: “Yame no. Yame yu muna kushana. Nye mu neyera kuno?”
22Awo ha huthire eshi: “Nduna Kornelighusi, murume ghomuhunga no ghokuyapa Nyambi, oyu ghawana fuma mudiko dyodihe dyaWajuda. Nga wana mahokwero ghaNyambi pamuengeli ghokupongoka. Eshi na ha kushimbe kundhugho dhendi, gha ka yuve eyi sho ka ghambe.”
23Petrusi gha wengenekire no kuwayumbura.
Mudiyuwa dyokuranda ko, gha yendire Petrusi nawo nawakakutawa hamweya homuJope. 24Dyokuranda ko, ko kakuma kwawo muSesareya Kornelighusi gha wa tatererire, no ghethire hapendi nawashere pofotji. 25Pakwingena Petrusi mundhugho, ko kumutjingawera Kornelighusi no kutongamena kughutho wendi ghumukutekera. 26Ene Petrusi gha mwimekire ghuninga eshi: “Wimane! Name nothinda karo nomunu.”
27Oku shime gha karera Petrusi mukughamba naKornelighusi, ko kwingena kwendi mundhugho, omu ha kukongwedherire hanu. 28Hogha ningire kukwawo eshi: “Mwa yidimuka eshi mbadi yapwa kufundhwera kwaMujuda eshi, gha kuyuve namunu ghodiko dyadyo‐nadyo, no kwingena mundhugho dhendi temba. Ene Nyambi ghana ni neghedha eshi, mbadiko munu yu sho ni toye eshi mbadi gha pongoka, ngambi mbadi gha kushuka. 29Yo neyera non̂anani temba apa muna ka ni shimba. Mu ni tongwere keho eshi nye muna ka ni shimbera.”
30Kornelighusi gha mu huthire eshi: “Pa na piti mayuwa mane, oku me shime na karera mukurapera pathitengeyuwa mundhugho dhange. Kapupi ko kwimana kughutho wange, murume ghoyivata yokurwedhima. 31No gha ningire eshi: ‘Kornelighusi, Nyambi ghana yuverera ndapero dhoye, no ghana koneka ko yi ghuna kutenda kwawahepwe. 32Tume ghumweya kuJope, ha ka shimbe Simoni yu ha ta karo eshi Petrusi. Mudighumbo gha di kwaSimoni ghumweya, ghomukakunyuka yikumba, oyu gha tunga kudikuruviya.’ 33Yona kutumena wangu hanu, no yina rogho eshi ghuneya. Pan̂anyi‐n̂anyi, yatwe no twaheya kughutho waNyambi, tu yuve yoyiheya yi ghana kuragha Fumu.”
Yiyaghura yaPetrusi kwaKornelighusi
34Ko kukuma Petrusi pan̂ando no gha ningire eshi: “Yashemwa, ndani na kutjwathana eshi, Nyambi ne mbadi gha tenda makutjakero. 35Ene mu kehe diko, gha tambura hanu wa hu mu kutekera, na wa ha tenda ghuhunga. 36Mwa yidimuka eshi, Nyambi gha tumine n̂ando dhendi kudiko dyaIsragheli. Eshi mbudhi dhothiraro edhi gha retire Jesus Kristusi. Oyu Jesusi ne Fumu ghokokuheya no kwawaheya. 37Mwa dimuka karo eyi ya hokokire, muditunga dyaJudeya yomuhe. Ya tangererire muGalileya kuyuvitha munyima dhodiyoghero dyaJohannesi. 38Karo mwa dimuka yaJesusi ghoMukanasareti eshi, Nyambi gha mu wethire naMupepo ghoKupongoka no gha mu pire ngcamu. Gha yendaghurire, no gha tendire kokuhe yirughana yoyikuru. No gherukithire waheya wa ha karire mungcamu dhashatani. Yoshi Nyambi, Nendi gha karire.
39“Atwe ne twatunonga ghoyoyihe, eyi gha tendire muditunga dyaWajuda nomuJerusalema. Awo, ha mu paghire no paPendi ha mwambire kuthikurushe. 40Ene Nyambi gha mu tumunine mudiyuwa dyoghuhatu mwawafu no gha mu hokorire. 41Kadi kudiko dyodihe, ene kukwetu twe twa dire no kunwa Nendi, munyima dhomuvumbukero wendi mwawafu. 42Aye gha tu rawerire eshi, tu yuvithe ghutanaritha kudiko eshi Ye ne yo gha tumbire Nyambi gha kare Mupanguri, wawayumi nawafu. 43Papendi ha nongonona haporofeta wahe eshi, kehe yu ghokutawa muMwendi, ghana kuwana mathigherero ghomaharwero muDina dyendi.”
Hanu wa ha dhirire kukara Hajuda, hana kutambura Mupepo ghoKupongoka
44Oku shime ha ghamba Petrusi, ko kushuruka Mupepo ghoKupongoka pawaheya wa ha teghererire kun̂ando dhi. 45Hatawi waWajuda awa heyire naPetrusi, ha tetukire thikuma. Eshi Nyambi ne gha tapire karo Mupepo ghoKupongoka kwawanu wa ha dhirire kukara Hajuda. 46Yoyi ha yuvire edi hana kughamba hanu mandimi no kukugha Nyambi. Ha ningi Petrusi eshi: 47“Hanu wa ne thika di twa tamburire natwe Mupepo ghoKupongoka. Yinye sho yi wa shinye kukuwayogha nomeyu?”
48Ko kuraghura kwendi eshi, hapwe kuyogha muDina dyaJesus Kristusi. Munyima ha mu kumberire gha kare mayuwa ghomapu kukwawo.
Actualmente seleccionado:
Yitenda ya Wapostoli 10: MHW1986
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Mbunga dhoBayibili dhaNamibia (Bible Society of Namibia) 1986
