Yitenda ya Wapostoli 9
9
Mapirukero ghaSaghulusi
(Yitenda 22:6–16; 26:12–18)
1Mumayuwa ghogho, gha rundurukire Saghulusi shime mukudhongera hakathishongero waFumu, yira mupepo ghoghumango no kuwapagha. Ho gha yendire kwamupristeri shokuru. 2No gha ka rombire mambapira, ghokumudimukitha masinagoge ghomuDamaskusi. Mahimeno ghendi ne, kukwata hakathishongero wahe, wa ha karire mundhira dhokwaFumu, harume ngambi hakamadi, no kuwatwara kuJerusalema.
3Apa gha kumine muruyendo rwendi pepi naDamaskusi, ko kumusheghenyena thishe thomudiwiru. 4Ko kuwa kwendi pamuve, no gha yuvire diywi dina kuninga kukwendi eshi: “Saghulusi, Saghulusi, nye ghuna kunikutha‐kuthera?”
5Hepura kwendi eshi: “Yowe dye, Fumu?”
“Yame Jesusi,” dyo gha huthire. “Oyu ne yoYame ghuna kukuthakutha. 6Ene, wimane no ka yende kumbara. Ko sho ha ka kutongwere eyi sho ka tende.”
7Hanu wa ha yendire nendi mundhira, hemanine kupira nomwayu. Diywi ne ha di yuvire, ene mbadi ha monine munu. 8Apa gha pindukire Saghulusi pamuve, gha yandhurure meho ghendi, kadi wa kumona. Ko kumukwata kwawo panyara ha mu tware kuDamaskusi. 9Mayuwa mahatu mbadi gha konine kumona no kudya temba no kunwa temba.
10MuDamaskusi, mwa karire mukathishongero ghumweya waJesusi, ghodina dyoAnaniyasi. Fumu gha mwithire muyirota eshi: “Ananiyasi!”
“Yame no Fumu,” dyo gha huthire.
11NaFumu gha mu tongwerire eshi: “Yende wangu mundhira Dhokughororoka, ho kepure mundhugho dhaJudasi murume ghoMukatarsusi, ghodina dyoSaghulusi. Aye ne mukurapera gha di. 12Ghana roto oku ghana kumwiyera murume ghodina dyoAnaniyasi, oku ghana kumukambeka nyara eshi, gha kone kumona karo.”
13Ene Ananiyasi gha ningire eshi: “Fumu, kare na yuva kwawanu hohengi yamurume yu. No maghuyi ghomahe agha gha tenda kwawanu wa ha tawa muMoye, muJerusalema. 14Apa no gha di, gha wana ngcamu dhokuyara kwamupristeri shokuru, mukukwata wahe hokwitha Dina Dyoye.”
15Ha ningi Fumu kukwendi eshi: “Ka yende vene, yoyishi na mu torora yira thirughanitho thange, mukutwara Dina dyange kumarudhi ghawahayidena, nawafumu wawo no kudiko dyaIsragheli. 16Ame nothinda mbo na mu neghedha eshi, rungatji mbo gha nyanda muDina dyange.”
17Ananiyasi gha yendire no gha ka kumine mundhugho dhi. Gha ka kambekire nyara Saghulusi no gha ningire eshi: “Saghulusi, ghomuyendhange. Fumu Jesusi yu gha kuhokokerire pa wa karire mundhira dhokwiya kuno, yo ghana ni tumu kukoye eshi, ghu kone kumona no ghu yare naMupepo ghoKupongoka.”
18Podigho popo, ko kuwa yira kayura mumeho ghaSaghulusi, no gha konine kumona karo. Ko kwimana kwendi no gha pwire kuyogha. 19Gha dire, no ngcamu dhendi, dha hukerire mo.
Saghulusi kuna kuyaghura muDamaskusi
Munyima Saghulusi gha karire mayuwa ghomapu, kwawakakutawa muDamaskusi. 20No pawangu‐wangu, ha tanga kuyuvitha mumasinagoge eshi, Jesusi ne Mwana Nyambi. 21Waheya wa ha yi yuvire ha yapire no ha ningire eshi: “Kadi yomurume yu gha shanine kuharan̂anya muJerusalema, hanu wa hethire Dina di ndi? No kadi yodiye yu gheyire kuno kukuwakwata no kuwatwara kwawapristeri hohakuru ndi?”
22Ene ngepi ne keho gha hongire Saghulusi nongcamu, no kureta Hajuda wa ha tungire muDamaskusi mughushemwa, pakuwaneghedha eshi, Jesusi ne Kristusi.
23Eyi dha pitire po nako, ko kwedha Hajuda wahe pofotji eshi, ha paghe Saghulusi. 24Ene gha yuvire dighano dyawo. Ghuthiku nomutenya hondamenine kumakorogho ghombara eshi ha mu paghe. 25Ene hatawi hamweya hopapendi, ha mu tumburire mughuthiku, ha mu pake muthikote no kumugcubukithera pambadi.
Saghulusi muJerusalema
26Saghulusi gha yendire kuJerusalema, no gha shanine kukununga kwawakathishongero waJesusi. Waheya ne ha yapire kukwendi. Yoyi mbadi ha tawire eshi ye ne mukathishongero waJesusi. 27Barnabasi, gha mu fererire n̂eke no gha mu twarire kwawapostoli. Aye gha ka wa thimwetwedherire eshi, ngepi di gha monine Fumu mundhira noFumu gha ghambaghurire nendi. No ngepi gha di gha yaghurire muthishwaghameho muDina dyaJesusi. 28Ko kuyendaghura nawo Saghulusi kokuhe muJerusalema, no gha yaghurire muthishwaghameho muDina dyaFumu. 29Gha ghambaghurire naWajuda hondimi dho Thihirika no ghawakoghaghurire. Awo ne ha yerekire eshi ha mu paghe. 30Pakuyidimuka hakakutawa, ko kumu twara kwawo kuSesareya. Kutunda po ko kumutuma kwawo kuTarsusi.
31Ndani popo, kukuwana ngirishe nako dhomaturumuthero nothiraro, muJudeya yomuhe no muGalileya no muSamaria. Dha tanarire no dha parire mughutawethi ghokwaFumu. Ngirishe dha pwire kutanaritha paMupepo ghoKupongoka no dha vurire.
Merukitho ghaEneghasi
32Petrusi gha yendaghurire thikuma. Noparumweya, gha ka kumine kwamukakutawa ghomuLida. 33Ko ka kuhangana kwendi namurume ghothirema, ghodina dyoEneghasi oyu gha karire mughudidi myaka kwoko nodhihatu.
34Petrusi gha ningire kukwendi eshi: “Eneghasi, Jesus Kristusi ghana kukwirukitha. Wimane no yarure ghudidi ghoye.”
Naye hemana wangu. 35Hanu wahe homuLida nawakadiyana dyaSaroni ha mu monine no ha pirukire kwaFumu.
Matumweno ghaTabita
36Mujope, mwa karire mukamadi ghokutawa ghodina dyoTabita. Muthihirika ne Dorkasi. Gha karire roruhe mukutenda ghuhunga no kughamwena hahepwe. 37Munako dhi oku Petrusi muLida gha di, ko kukorwa kwendi no gha fire. Ko kuyogha kwawo yirama yendi no kumutura kungonda dhokuwiru. 38Yoyishi Lida gha karire pepi naJope, nawakakutawa ha yuvire eshi Petrusi ne mo gha di, ko kumutumena harume hawadi ha ka mu kumbere eshi: “Ngo tambuke wiye kukwetu.”
39Petrusi gha yendire wangu pofotji nawo. Apa gha ka kumine ko, ko kumutwara kwawo kungonda dhokuwiru.
Hadidhi wahe heyire hemane kukwendi ghudira, no kumuneghedha yitere yi gha fumine Dorkasi ku ye muyumi. 40Eyi gha manine Petrusi kushwaghitha wahe, ha tongamena gha rapere. Ko kupiruka kwendi kumwimba ghuninga eshi: “Tabita, pinduke!”
Ha yandhurura meho ghendi, no apa gha monine Petrusi, ko kuhengetera kwendi. 41Ko kumughamwena pakumukwata panyara ghemane. Hetha kwendi hadidhi nawakakutawa hamweya, no gha mu twarire kughutho wawo ghuyumi. 42Hakajope waheya ha yi yuvire. Nawanu hohengi ha tawire mwaFumu.
43Naye Petrusi gha ka dhighamine muJope, kwaSimoni ghomukakunyuka yikumba.
Actualmente seleccionado:
Yitenda ya Wapostoli 9: MHW1986
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Mbunga dhoBayibili dhaNamibia (Bible Society of Namibia) 1986
