Yohannis 11

Alazaar rabi

1Beetcaniyalle, amaa Maryam kee tee sacla Martah dikille wuli Alazaar akko yarhxin laxuute xiyawti yine. 2Maryam, tamaa Maddara zeetih kaa lakuk tuskuteyaako ishi dagarah xishiiteyahi sacal Alazaar laxuute. 3Amaymih kaa lamma sacla: “Maddara, tamaa atu kixinitoti laxuutak yane” arhxuk alle farriimen. 4Yeesus laakin tayim yoobbe gedda: “Yallih Barhi akah yanabo Yallih nabneh kiyah, ta laxuu rabi guddussam maki” yerhxe.

5Kado Yeesus Marta, tee sacla kee Alazaar kixinuk yine. 6Amaymih, Alazaar laxuu yoobbek sarrah amaa alle yinelle lamma lellec suge. 7Sarrah ishi katattaynitik: “Malammih Yahuudiya fanah nadawok kata” akko yerhxe. 8Kaa katattaynit lel: “Mudarris, Yahuud dhayit kolle cidoona farhak yinin, malammih amalle tadaw fadhdhe?” akko yerhxin. 9Yeesus: “Inki lellecidde lamman kee taman saacatiya makini tanem? Lellec yadiyeti caalamti ifo yablemhi sabbatah mandafita. 10Akkinnanti bar gerhemko laakin ishedde ifo malemhi sabbatah andafita” akko yerhxe. 11Tayim yerhxemko sarrah: “Alazaar ni carki dhiineh yane, kaa uguso lel adaw kiyo” akko yerhxe. 12Amaa katattaynit: “Maddara, dhiineh yinniyemko, uro kinni” akko yerhxin. 13Kado, Yeesus kaa rabih sabbatah waanishak yine, usun laakin yacrafo dhiine arhxuk yane yekkelin. 14Sarrah Yeesus cadimbililih: “Alazaar rabeh yane. 15Atin taamanoona ciloh amalle suge wayemih xedeneena kiyo. Kado laakin kaa fanah hayyaanta” akko yerhxe. 16“Ganga” akko yarhxin Toomaas kaa zooba kin katattaynitik: “Nanu gantah kaalih rabno nadaw” akko yerhxe.

Anu rabaakohi ugut kee aniina kiyo

17Kado Yeesus yemeete gedda, Alazaar mece geddaako qabredde affara lellec abeh akah suge. 18Beetcaniyaati dhedhdhan Yerusaalemko lel adooxa kiilometer takkem kinni. 19Mango Yahuud Marta kee Maryam ten sacalhi sabbatah imaan abshiishoona yemeetiinih yinin. 20Amaymih, Yeesus amiituk yanem toobbe gedda Marta tedeeh akah garayte, Maryam laakin caredde defeyak racte. 21Marta Yeesusuk: “Maddara, atu talle tineh takkeedo, yi sacal rabeh anniye mirhaarho. 22Kado gantah atu kaa esserinnannim, Yalli koh yaxaw kinam aarhige” akko terhxe. 23Yeesus Martak: “Ku sacal malammih rabaako uguto kinni” akko yerhxe. 24Marta lel: “Abayshimat lellec rabaako uguto kinam aarhige” akko terhxe. 25Yeesus: “Anu rabaakohi ugut kee aniina kiyo. Yottah aamininnanti, walaa rabemih, lissac maro kinni. 26Inkoh yottadde martah, yottah taaminem lel caduruh raboona makinooni. Taymih taamine?” akko yerhxe. 27Ishi: “Yoo, Maddara; atu ta caalamalle amiituk yane Masiix kee Yallih Barha kitom aamine” akko terhxe.

Yeesus weeca

28Ishi lel tayim terhxemko sarrah tedeyeyaako Maryam tee saclak ulah: “Mudarris talle yane, koh deecimak lel yane” akko terhxe. 29Maryam amayim toobbe gedda lel uguggut-terhxeyaako kayya fanah tedee. 30Kado, Yeesus amaa dikille kaddih yemeeteh miyineeki amaa Marta alle kaa geyte makaanolle yine. 31Amaa caredde teelih yekkiinih imaan tee abshiishak yinin Yahuud lel Maryam uguggut-terhxeyaako awcuk tee yublin gedda, qabre fanah tedeyeyaako wecto lem tee yekkeliinih adde katayen. 32Kado, Maryam amaa Yeesus alle yinelle temeeteh kaa tuble gedda: “Maddara, atu talle tineh takkeedo, yi sacal rabeh anniye mirhaarho” arhxuk iballe akko radde. 33Yeesus weecak tee yuble gedda, teelih temeeteh tine Yahuud lel weecak ten yuble gedda rooxe adde bakiteh mangum yemsheeqhele. 34“Awla carhah kaa hayteeni?” yerhxeh lel ten essere. Usun lel: “Maddara, amowaaki ubul” akko yerhxin. 35Yeesus lel weece. 36Amaa gedda amaa Yahuud: “Ubul ayidhdha kaa kixinam!” yerhxin. 37Tenko gari laakin: “Inti maleh intit faaketi, ta xiyawto gantah rabaako raacisho dhiice mirhaarho?” yerhxin.

Yeesus Alazaar rabaako ugusa

38Sarrah lel Yeesus, malammih rooxi adde bakiteyaako, amaa qabrelle yemeete. Amaa qabri lel wuli duma alle cikitte galba kuuk yine. 39Yeesus: “Ta duma asac akko ishanta” akko yerhxe. Amaa rabe tiyahi sacla kin Marta lel: “Maddara, rabemko taahe affara lellec sugeh yanemhi sabbatah, unrayeh yannaw kinni” akko terhxe. 40Yeesus: “Teemenemko Yallih nabne tablo kito kok erhxeh miiniyoho?” akko yerhxe. 41Amaymih lel amaa duma asac akko ishen. Yeesus lel aganalle kulux-yerhxeyaako: “Abba, yi toobbemih ku cawwatoyshita. 42Umman gedda yi taabbem lel aarhige. Tayim lel atu yi fartem yaamanoona ciloh taymille daw-arhxuk tane mango xiyawah arhxeh arhxem kinni” yerhxe. 43Tayim yerhxemko sarrah, dhaw xaf-isheh wac-yerhxeyaako: “Alazaar, ewec” yerhxe. 44Amaa rabeh yine xiyawti lel gabub kee lakukko sareenat akutuh yumudhdhuweh, nifko lel gamedih agoogiteh yewce. Yeesus lel: “Akah iftixantaaki yadaw” akko yerhxe.

Yeesus gidfohi xagara

(Maatiyos 26:1-5; Markos 14:1-2; Luukas 22:1-2)

45Amaa Maryamlih yemeetiinih amayim tubleh tine Yahuudko mango mari lel, kayyah yeemenin. 46Tenko gari laakin Faarisiin fanah yedeynih Yeesus abeh yinem akah warishen. 47Amaymih, sheekhat manabottit kee Faarisiin araba abeenih: “Ta xiyawti mango ishaarar abak yanek, ayim abtam kino? 48Taginah yadaw sik akko nerhxemko inkoh kayyah yaamanoona kinon. Roomaati xiyaw lel yemeetiinih ni maqhdas care kee ni wathan nok beyoona kinon” yerhxin. 49Tenko inketti lel, Kayaafas, amaa iggidadde naba shekh kuuk yineya: “Atin inkim mitafhimiini. 50Umbuka wathan yalayemko inki xiyawti xiyaw idhdhah rabo alle tanem sinah tashshem gantah duhteenih mitaniini” akko yerhxe. 51Tayim usuk ishi amooko yerhxem akkekkah amaa iggidadde naba shekh kuuk yinemhi sabbatah, Yeesus wathanah rabo kinam nabii balih waanisheh yinemhi sabbatah kinni. 52Wathanah bisa akkekkah lel, irolle faax-terhxeh tane Yallih cindham lel inkille yaskatto kinni. 53Amaymih, to maxko sarrah kaa yagdafoona yixiggirin.

54Amaymik sarrah, Yeesus wuli ziboh dhaye wakale, Efreem akko yarhxin daafo fanah yedeeh amalle ishi katattaynitlih defeyenkah Yahuud fanadde ambulluuk hel arhxuk miraaco.

55Yahuud Faasigi kab-yerhxeh yine. Mango mari lel Faasigaako basolle sinne yaythaharoona sinni diikakko Yerusaalem fanah yewcin. 56Usun Yeesus wagiyak yinin, amaa maqhdas carih afalle daw-arhxuk lel sinne-sinneh: “Aymih sinalle higgida? Usuk inkinnah ta cidih yamaato maki?” sittak yerhxin. 57Sheekhat manabottit kee Faarisiin lel kaa yabbarhoona ciloh, usuk adde yane makaano aarhiginnanti akah warisho amre yoxoyin.

Actualmente seleccionado:

Yohannis 11: SCC

Destacar

Copiar