Yohannis 12

Maryam Beetcaniyalle Yeesus iba taskute

(Maatiyos 26:6-13; Markos 14:3-9)

1Amaa Faasigaako lixa lellecik basolle, Yeesus amaa usuk rabaako uguse Alazaar alle yine Beetcaniya fanah yemeete. 2Amaymih amalle usun dirar akah aben. Marta ten teyseese, Alazaar lel amaa thawlalle kaalih defeyteh beetak tinemko inketta kuuk yine. 3Maryam lel litrot abrha yakke qaali kin zeet qarce-le “nardos” akko yarhxin xarhaako siraaximeyah Yeesus iba tuskuteh ishi dagarah kaa iba xishiite. Amaa cari lel amaa zeet ureh yemmeege. 4Kaa katattaynitko kin Iskariyootti Yahuuda, amaa kaa yasxaw leya lel: 5“Ta zeet adooxa bool diinaariyah yimibbixeh baaxentitih aymih amxawwe waye?” yerhxe. 6Tayim yerhxem lel baaxentitih xaaliiteh makiiki, garceena kuuk yinemhi sabbatah kinni. Maxfuda usuk yibbirheh yine, amadde sayinnannimko lel isheh akko bishshiitak yine. 7Yeesus: “Yi macagih maxah sugussem kinnik tee xab. 8Baaxentit umman gedda sinlih yanin. Yotta laakin umman gedda yi taalloona makitiini” akko yerhxe.

Alazaar gidfohi xagara

9Yahuudko mango mari Yeesus amalle yinem yoobbin gedda, kayyah arhxuk bisa akkekkah, usuk rabaako uguseh yine Alazaar yabloona amalle yemeetin. 10Amaymih, sheekhat manabottit amaa Alazaar yakkeedo yagdafoona yixiggirin. 11Amayim lel mango Yahuud kaa sabbatah aduuk Yeesusuh aaminuk yiniinimhi sabbatah kinni.

Yeesus Nugus balih Yerusaalem oroba

(Maatiyos 21:1-11; Markos 11:1-11; Luukas 19:28-40)

12Malammit max, tamaa cidih temeeteh tine mango xiyaw Yeesus Yerusaalem fanah amiituk yanem yoobbin. 13Amaymih lel tamri xorh hi xakuk yibbirhiinih akah garawna yewcin. Wac-yerhxiinih lel: “Yalla xamdishinna! Maddari migacalle amiituk yane Israa-eel Nugus dhaacole kinni”#Zaabur 118:25-26 yerhxin. 14-15Tamaa:

“Tsiyoon barhäw, mimashshiitin;

ku nugus amiituk yane.

Usuk cullutti bukak defeyeh yane!” #Zakariyya 9:9

yarhxiinim tunkuttubeh akah taneekah, Yeesus cullutta geyeh akko kore.

16Kaa katattaynit erherhih tayim mafhaminnooni, Yeesus nabneh carshelle kore gedda laakin, tayim kaa sabbatah tunkuttubeh tinem kee usun lel tayim akah abeenim sarrah yizzikkirin. 17Amaa Alazaar qabreeko akah deecimeh rabaako uguseh kaa ayyaacuk kaalih tine mango xiyaw lel kaa sabbatah sinni shahaada katattayshen. 18Mango xiyaw kaa geyoona akah aduuk yinin sabab lel usuk ta ishaara abem yoobbiinimhi sabbatah kinni. 19Amaymih Faarisiin sinne-sinneh: “Ubula atin inkim geyak mitaniini. Kulux-erhexa, caalam kaa sarradde aduuk tane” yerhxin.

Giriikko gari Yeesus wagiyan

20Amaa agana cidih cibaada aboona yewceh yine maradde wuli dago Giriik xiyaw yinin. 21Amaymih lel ta mari Galiilaati Beet-saydaako kin Filibboosulle yemeetiinih: “Maddara, Yeesus geyno farhneh nine” akko yerhxin. 22Filibboos yedeeh Indiryaasah warishe, Indiryaas kee Filibboos lel yedeynih Yeesusuh warishen. 23Yeesus lel: “Xiyawti Barhi adde yanabo-le saaca gufteh tane. 24Sinraa zaratti baarholle radeh rabe wayemko, inkettak raaca, rabemko laakin mango zara baaham rummah, rummah sinak arhxiyuk ane. 25Ishi aniina akxininnanti tee waya, ta caalamalle ishi aniina ancibinnanti lel umman geedit aniinah tee geyo kinni. 26Yi akhduminnanti, yi kataw alle tane, anu alle anniinnanille lel yi khaddaam gantah yannaw kinni. Akkinnanti yotta yukhdumemko lel Abba kaa yaynabo kinni.

Xiyawti Barhi xaf-yarhxo alle tane

27Kado yi rooxi yimribbisheh yane. Ayim arhxo kinni? ‘Abba, ta saacaako yi garger?’, laakin ta saacah arhxiyuk kinni emeeteh anem. 28Abba, ishi migac eyneb” yerhxeh alle yedebbe. Sarrah, wuli dhaw caranko yemeeteh: “Anu kaa eynebeh aniyo, malammih lel kaa aynabo kiyo” yerhxe. 29Amalle daw-terhxeh tayim toobbe mango xiyaw lel, “Angudeh yine” yerhxin. Aki mari lel: “Malaykatti aalih waanishe” yerhxin. 30Yeesus: “Ta dhaw yemeetem sinah arhxuk kibah, yottah maki. 31Ta caalamhi firdi kado kinni, kado kinni lel ta caalamhi reezanti irolle ciddito lem. 32Anu lel, ta baarhooko takarima gedda, xiyaw inkoh innelle hiriigo kiyo” yerhxe. 33Usuk tayim yerhxem lel aaginale rabah rabo kinam yayballaw yerhxeh kinni. 34Amaymih amaa mango xiyaw: “Masiix umman gedda maram, sercatko noobbeh nane. Xiyawti Barhi takarimo kinni tarhxo aaginah dhicta? Xiyawti Barhi miyatto kinni?” yerhxiinih alle yedebbin. 35Amaymih Yeesus: “Wuli dago waqhteh ifi sin fanadde amiituk yane. Dite sin tasciremko, ifo liitin gerha. Ditedde gerhati awlalle aduuk yanem miyaarhige. 36Ifi cindham takkoona ciloh lel ifo liitin ifoh imina” akko yerhxe.

Xiyaw imaan wayto

Yeesus tayim yerhxemko sarrah, yedeeyaako tenko ishe sucuse. 37Usuk mango ishaarar ten nifille abe hanuk, Yahuud kaddih kayyah maamaninnooni. 38Tayim tekkem lel nabii Isayas:

“Maddara, nottaako tomobbemih miyatti yeemene?

Yallih agada lel miyah tumbulluwe?”#Isayas 53:1

yerhxeh yine waani takmalo ciloh tekkem kinni.

39Isayas lel malammih:

40“Sinni intitih yabliinimko,

sinni afcaadoh yifhimiinih

yottalle lel gaxaanamko

anu lel ten urusamko

tena intit ten wayshisheh yane,

ten afcaado lel yiytirireh yane”#Isayas 6:9-10

akah yerhxeekah, amaydo, yaamanoona mirhiicinnooni.

41Isayas tayim yerhxeh kaa sabbatah waanishem kaa nabne yublemhi sabbatah kinni. 42-43Yakko kibah, mango mari, amaa reezonko gantah kayyah yeemenin. Yallaako tamiite nabneeko ziyaada xiyawko tamiite nabne yikxiniinimhi sabbatah kee Sunagoogeeko ten yayyaaciinimko Faarisiin mashshiiteenimhi sabbatah laakin micaddoyshinnooni.

Yeesus caalam gargeero yemeete

44Yeesus lel wac-yerhxeh: “Yottah aamininnanti, yottah makiiki, tamaa yotta fareh yanetiyah kinni yaaminem. 45Yotta yableti, tamaa yotta fare tiya yable. 46Yottah yaamineti ditedde maramko ciloh ta caalamalle ifo balih emeeteh aniyo. 47Anu gargeero kibah caalam afrado maamaatiyomhi sabbatah, yi waani yaabbeh abbirhinnixe tiya, kaa mafride. 48Tamaa yi xinayaako, yi farto kabbaatinnixe tiya lel kaa yafrideti yane. Anu waanisheh aniyo waani, abayshimat lellec kaa tafrado kinni. 49Anu tamaa yi fare Abba ayim arhxem kee ayim waanishamhi amre yoh yoxoyenkah, anu inni amooko miwaanisha. 50Kaa amri umman geedit aniinalle xiyaa baaham aarhige. Anu waanisham, amaydo, tamaa Abba akah yoh warisheh yaneekah kinni” yerhxe.

Actualmente seleccionado:

Yohannis 12: SCC

Destacar

Copiar