Mateus 19

Ca tomi' xo' tococwa pain ca an pe tacama narima'

Marcos 10.1-12

1Pi' pin iri na ca tomi' nucun ne, maji ta ac caparut na, paca' ac urut pain na Galileia. Mama' urut pain oro xijein cidade ca to nain Judeia ma', pain xijein cacarain Jordão ma'. 2Mija nana wari' co ja' ja' nanaparut. Quep xio quep xio xam' ac tococwa na co caxi nana ma'.

3Ma' ac caca na oro fariseu co xuruxut hwet nonon ma'. Am tomi' xo' ca, am om tomi' xo' ca quem nonon. Je ca tomi' querec cocon ma'. Hohot na pain ca an pe ximao wa narima' ra? Om ca narain ho' capari' pain Iri' Jam ra? Ac i ma' na ca tomi' querec cocon Jeju.

4Om ca noro hwein capijacon Iri' Jam ra ac tococwa na. Ca' na ca xirao' pe xine con: Quep iri non wari' Iri' Jam pain cara pane ne, pain ca xo' quep qui' con wari' pane, quep ac con na tarama', quep ac cam na narima' quem. 5Je ca xirao' pe xine pain i ca' quem: Tarama' ma', pe ho' pe ho' om pin toron cote ca cam jicon. Pe ho' pin ac cam tara manacon. Ac ca xica' pe pin ne tara cwerequequem ta na ca xirao' pe nucun pane. 6Je ca tomi' xuhu' ca' ac tococwa na. An pin iri nam narima' tarama' ma' ne, xica' pe pin ac ne na cwerequequem. Om ca tocwan mami' ne cwerequequem. Je ca om na camain' ne pain ca to ni ca' xequequem ta. Xi wirico ara ca Iri' Jam co mi' nanam pain ca an xequequem ta na ca tomi' tococwa oro fariseu ma'.

7Tomi' querec mami' ac cocon na: Je xi narain ho' capari' pain ca an pe pin wa narima' Moisés pane quem? Hohot na ta ara xi' nain pane. Mo ta an pe pin tam cam narima' tarama' ma', na e' na pain ca xirao' mi' cam pain documento. An pe pin inem ta tara ca xirao' nucun pain documento. Mi' xo' iri taram pain ne, hohot ac ne tara pain ca an pe pin cam ta na ca xirao' nucun Moisés pane ta nonon.

8Xi opain ara ne xumuhu' ta ac tococwa na. Je ca xirao' cain i ma' Moisés pane. Ane om wara coromicat ac i ma' ca Iri' Jam pain cara pane ne, pain ca xo' quep qui' con wari' pane. 9Je ca tomi' xuhu' ca' ac tococwa na. Wari' co an pe pin nam manacon ma', pain ca om caracat cama ma', pain ca om quep cam xucun tarama' ma', mo ta an pe ximao cam, mo ta an pin cam xequem narima' ma' quem, caracat ac ca tara. Ac i ma' na ca tomi' xo' tococwa ma'.

10Wa ina me ac urut na pain ca taxipa' urut con ca'. Mo ta om na ne pain ca an pe pin tacama narima' ma', awi na pain ca om an tacama ta urut.

11Tomi' ac caparut na Jeju: Oro wari' ma', om ca taraju pa' xam' ac cacain ca tomi' nuhu' ma', pain ca awi na pain ca om an tacama narima' ta hwe ma' naparut. Taraju pa' e' nana co mi' wawa pain ca coco' e' wa ma'. 12Noro jujun oro wari' co om cut nana narima' ma', xi om ne ca wara ma' ara cocon ca xirac wa pain ca xo' camara' nucucun. Ma' ac caca na oro xucucun co om cut nana narima', xi om ne ca wac ara xine towiracocon. Ma' ac caca na oro xucucun co om cut nana narima', xi om ne ca win xumu e' ara cacain ca taramaja nucucun pain ca taramaja mi' cocon Iri' Jam. Co ha' tarapa' nain ca taraju pa' wa i ma', taraju pa' ma' tatara ne na ca tomi' xo' caparut pain ca an tacama narima' je pain ca om an tacama quem.

Ca na e' ne pain ca an xiho' xuxun oro hwijima' co om xec xec querec nana

Marcos 10.13-16; Lucas 18.15-17

13Ma' ac cacama na co o qui' nanam humaxicacam. O mi' nanam con Jeju. Ma' ta quep mamam pain winacacam pain ca tomi' mi' mamam con Iri' Jam ta nonon. Ane tomi' in pin urut cacam pain ca taxipa' urut con Jeju ca' ne. Ta cut mi' hun cacam humajuhu' me ta urut cacam.

14Tomi' in pin ac caparut na Jeju. Ta narain ho' hwehwem pain ca hwet cacapa' hwijima' cwa' me. Ta tomi' in pin hwehwem me ta. Oro wari' co an xiho' nanam pain ca om xec xec nequequem ma', pain ca howa cacapa' ma', wiricoco tatara co taramaxicon pe ho' ca Iri' Jam ta naparut.

15Quep ac tacacama na pain winacacam. Param inon Iri' Jam pain ca ara mi' cuhu' pain oro ca awi wa ta hwijima' tata. Mao ac ca na quem.

Ca to' i'ina capari' oro caramajixi' pain ca xin ne xun Iri' Jam pain ca taramaxicon pe ho' xim capari'

Marcos 10.17-31; Lucas 18.18-30

16Ma' ac ca na wari' co xut hwet non Jeju. Tomi' querec ac con na: Taramaxicon co ca' na taxipa' capijacon Iri' Jam ac con na. Cain' cain' xita' quem? Ma' carawa ca awi ca ara ra mapa', ma' ta e' cara pe ho' ton Iri' Jam quem na ca tomi' querec con ma'.

17Para tomi' querec mapa' pain carawa ca awi quem ac con na. Ma' xica' pe na co awi. Mo ta e' cara pe ho' ton mon Iri' Jam ma', na e' na pain ca tomi' ha' main oro ca xirao' nucun Moisés ca tomi' ha' je capari' ta non.

18Main ca xirao' nucun ca tomi' ha' je capari' ca' quem ac ca na.

Main ca' con ac con na. Ta to' pa' mon wari' me ta. Ta quep mam manacon win ma' ma me ta. Ta an noc xa ma me ta. Ta tomi' mixein mi' mon pain ca em' wa win ma' ma me ta. 19Tomi' ha' ron cote ma cam jim ta. Ta noc momon win ma' ma me ta. Win ne ca om noc pan xijem ma'. Je ca tomi' ha' je capari' ca' na ca tomi' xo' con ma'.

20Om na, tama' tomi' ha' tomi' ha' pi' pin inain i ma' ta. Ma' tara xijein carawa ca ara ra mapa' quem ac con na.

21Tomi' ac ca na: Mo ta iri' wari' xita' na ma ma', mo ta an xiho' ton Iri' Jam ma pain ca om noc cocon oro wari' ma' quem, mo vender vender pi' pin ac main tara oro caramajum. Cut iri rain dinheiro nein ne, cut mi' ac momon pain tara co om nonon carawa. Caramaju pe ac main tara pawin cain. Cut mi' cut mi' pi' pin iri roron pain dinheiro nem ne, in hwet ac mapa' tara, ja' ja' ac mapa' tara ta non.

22Taraju iri nain i ma' ne, in ca' ac con na Jeju, tomi' xaxa' mao ac ca na quem, xi caramaju tamana ara ca ta.

23Tomi' ac caparut na Jeju, tomi' naparut pain ca taxipa' urut con ca'. Je ca tomi' xuhu' ca', tomi' iri'o' inuhu': Wari' co caramaju ma', i'ina tamana non pain ca xin ne con Iri' Jam pain ca taramaxicon pe ho' xim ta con ma'. 24Win ne camelo ma'. Cote ne carawa na camelo. Ha' xirain pain ca corom nein wijimain manain ca mam' oc tocwa wom ra? Om xi ha' nein. I'ina xirain, om xi corom ac nein. Ac i ma' na con wari' co caramaju ma' quem. I'ina tamana non pain ca xin ne con Iri' Jam pain ca taramaxicon pe ho' ton con ta. Tomi' iri'o' inuhu' ta na ca tomi' caparut pane.

25Taraju iri urut pain ca tomi' nucun ma' ne, wa wa tamana ac urut na. Cain' cain' xira quem? Cain' xi witan ac wa quem urut con.

26Noro ac caparut na. Om na, wari' ma', om ca to' witan pan ac xucun. Iri' Jam ma' iri na ne, ha' non pain ca to' witan cocon oro wari'. Ha' ha' pi' pin non oro carawa ta naparut.

27Tomi' ac con na Pedro. Win urut ca'. An to an to pi' pin urut pain oro caramajuxut, ma' ta ja' ja' xim urut pum. Ma' carawa ca awi ca mi' xim caparut Iri' Jam quem na ca tomi' con ma'.

28Ame hwe e' ac caparut na. Maqui' cain' tara xec nein ca quep xocori pin tain cain oro carawa pain macan' ta na Iri' Jam ca'. Xao pe ho' pin ac tain tara ca mam' xao pe ne pain ca taramaxicon pin ta' ta' ca'. Wata' pain ca Iri' Wari' ta' ca', taramaxicon hwara' opa pin ac ta' tara ta. Awi tamana tara ca taramaxicon ne. Taramaxicon wi ac mahu' tara quem. Wahu' pain ca taxipa' mahu' ma', xao to xao to xam' ac hwein tara ca mam' xao pe nucun taramaxicon. Ma' 12 tara ca mam' xao to nuhu' pain ca taramaxicon wi mahu'. Taramaxicon to ho' ac huhun tara waram winacocon mana panxica Israel cara pane, co ma' 12 nana cara pane. Tomi' iri'o' inuhu'. 29Oro wari' co paca' nanain xiricocon cocon xurucucun cocon cote caca cacam jicocon cacam mana panxicaca je totacocon quem, oro wari' co ara ac i ma' nana pain ca taramaja mi' xim cacapa' ma', cut tamana ac cacain tara carawa ca awi. Mija tara carawa ca awi ca cut xi' caca ma', mija tiquin' ca' tarain carawa ca paca' caca. Moin' tamana tara cocon. Mi' ac tococwa tara pain ca om pi' ra ha' ne ca e' wa quem. 30Je ca tomi' xuhu' ca': Oro co hwara' opa nana pain xocori ca', ame hwe e'. Mija ac caca tara co hwara' opa hwara' opa om pin xi' nana. Oro co om hwara' opa nana pain xocori ca' iri na ne, ame hwe e'. Mija ac caca tara co hwara' opa pin xi' nana quem na ca tomi' xo' caparut pain ca taxipa' urut con ca'.

Actualmente seleccionado:

Mateus 19: TBPN

Destacar

Copiar