Mateus 18

Wari' co hwara' opa tiquin' ca' nonon oro xucucun wari' co taramaxicon pe ho' ca Iri' Jam

Marcos 9.33-48; Lucas 9.46-50

1Om ca pain homa ne, xuruxut hwet ac urut con na Jeju ma'. Warut pain ca taxipa' urut con ca', tomi' querec ac urut con na: Ma' co hwara' opa tiquin' ca' nonon oro xucucun wari' co taramaxicon pe ho' ca Iri' Jam quem na ca tomi' querec urut con.

2Pe nain i ma' pije' quem. Hap ra ta pije' ac con na Jeju, an xat ac con na pain ximijaxut. 3Tomi' ac caparut na: Coromicat ni je. An xiho' jejem oro wixicacam hwijima' pain ca coromicat nequequem. Mo ta om an xiho' hwehwem pain ca om xec xec taxi' nequequem ca', om ta hwet camain' hun Iri' Jam pain ca taramaxicon pe ca pain pawin cain, tomi' iri'o' inuhu'. 4Wari' co an xiho' non wixicon pije' cwa', pain ca om xec xec taxi' nucun ca', hwara' opa tiquin' pan ca' totoron oro xucucun wari' co taramaxicon pe ho' ca Iri' Jam ta.

5Noro jun pije' cwa', co om hwara' opa cwa' ac caparut na. Wari' co tomi' querec te non pain ca om hwara' opa nucun ca', coromicat ca' iri na ne: Tomi' querec te inem, xi om ne ca howa ara ton Jeju ma', mo ta coromicat ac i ma' ca pain ca tomi' querec te inem con ma', ac ca tomi' querec te capa' na quem. 6Wari' co to' caracat non win ma' ca co om hwara' opa ma', co an xiho' non pije' co howa napa' cwa' iri na ne, wap tamana ac con tara Iri' Jam. Mija tara ca jain jain ca con. Mo xi tucu xine iri' cote ne pacun ca mam' ep xine trigo pain paramacon ma', mo xi xin pocom mi' tocwa pain iri' ca xopain ne cote ne com ma', jain jain pije' ac ca xira. Pain ca wap ton con Iri' Jam pain ca to' caracat con wari' co an xiho' non pije' cwa' iri xira ne, mija tamana pan ac ne xira ca jain jain nucun con ta na ca tomi' caparut ma'.

7Ximin nana oro wari' pain macan' ca', xi mija ara ne oro ca to' caracat nonon ta ac caparut na. To' caracat paxi' tata wari' ma', je cwerein mao na. Ane ximin tamana pan xi' caca oro wari' co to' caracat nonon oro win ma' caca ne. Wap tamana pan totoron Iri' Jam ta.

8Je ca tomi' xuhu' ca', tomi' inem pain ca to' caracat quem mum ma' ac caparut na. Mo ta to' caracat quem mum je caximam ma' ac caparut na. Mo ta to' caracat quem mum pain ca mam' ara main ca om awi wa ma', ara maho' rain e'. Mo ta to' caracat quem caximam pain ca mam' xut mao main ca caracat pe ta' ma ma' quem, mao maho' rain i cain e'. Ac ca ton piripit pin main tara, ac ca wixicao' pin main tara, ac je tara. Hohot na pain ca mao main pawin pain ca om ne mum ma'. Hohot na pain ca mao main pawin pain ca om ne caximam ma' quem. Cain' cain' xira quem? Hohot xira pain ca xin mi' xima pain cote ne xe ca om jo' ra ha' ma', pain ca ma' ma' wet ne mum pain caximam ra? Om xi hohot ne ta. 9Ac i ma' tara tucum ma' quem. Mo ta to' caracat quem tucum pain ca querec param ximao main ca om awi wa ma'. Ta tomi' ha' main me. Ac ca hot pin main tara, ac ca xin pin main tara quem. Hohot na pain ca mao main pawin pain ca om ne tucum ta. Cain' cain' xira quem? Hohot xira pain ca xin mi' xima pain cote ne xe ca om jo' ra ha' ma', pain ca ma' ma' wet ne tucum ra? Om xi hohot ne ta na ca tomi' caparut ma'.

Ca pijim' joc mam' mi' tococwa pain ovelha ca pan' am

Lucas 15.3-7

10Ma' tara xumuhu' me ac caparut na. Ta noc camain' huhun oro wari' co an xiho' nonon hwijima' co om hwara' opa nana cwa' me. Je ca tomi' xuhu' ca': Oro jam co taramaja mi' nonon Iri' Jam ma', co querec wet taxipa' nonon ma', tama' to ho' nonon Te co pe pawin cain. 11Je ca maqui' ta' ca' ac ca na. Wata' pain ca Iri' Wari' ta' ca', maqui' ina, ma' ta to' witan toton inonon oro wari' co pan' ara'am nana ta naparut.

12Tomi' xun wari' co ma' 100 non ovelha ma' ac caparut na. Xut ximao xica' pe ac ne na. Cain' cain' ta' ca quem? Om ta pirao' tain ca ra? Pirao' tain tara. Paca' tarain oro wirain ma', ca ma' 99 nein ma', pain ca cao' to nein tononoin pain ca tamaja pan ne pacun ma'. Mo pirao' tain e' ac cain tara ca xut ximao ma'. 13Mam' pin iri tarain ne, tomi' querec te tamana ac cain tara. Tomi' querec te paxi' nain oro wirain ma', ca ma' 99 nein ca om xuruxut ximama' ma'. Ane tomi' querec te tamana pan tain cain ca xica' pe nein ca pan' am ma' ne, pain ca mam' pin cain ma', tomi' iri'o' inuhu' ta. 14Ac i ma' na Cotere' co pe pawin quem. Noc nain ca pan' am xica' pe ca wari' co an xiho' non pije' pain ca howa con ma' na ca tomi' caparut ma'.

Co win howa iri' co caracat

15Tomi' ac caparut na: Mo ta ma' ca co win howa hwe co caracat ma', tomi' inem pain ca ara cup quem co win howa ma ma'. Hwet ac mon tara, tomi' xo' ac mon tara pain ca em' nucun. Xica' to je, om tara win ma' hwe. Mo ta ha' quem, mo ta cwirin' pin ca, ha' pin ac cuhu' tara pain ca tomi' querec te mami' xujuhu' pain ca xere xujuhu' ma'. 16Mo ta om ha' quem pain ca xica' to nuhu' ma', tomi' ac mon tara xucun co win howa ma ma'. Am 2 caca co tomi' ma ma'. Maji con e', tomi' xo' mami' ton pain ca em' nucun ta. Win ne ca tomi' capari' capijacon Iri' Jam ca', pain ca na e' na pain ca ma' tocwan caca co taraju nunuhu' pain ca tomi' xo' hun wari' pain ca caracat nucun capari'. 17Mo ta om ha' cuhu' quem, mo ta om cwirin' camain' ca pain ca tomi' hun ma', tomi' hwet ac momon tara pain oro win howa hwe pain ca cut in xujuhu' ma'. Mo ta om ha' camain' cocon oro win howa hwe pain ca cut in xujuhu' ma' quem, ac wari' co om howa non Iri' Jam maparut ta ac hun tara, ac iri' caxicon wari' co caracat maparut ta, xi cwirin' ra na ma ta ac hun tara ta na ca tomi' xo' caparut con co win howa iri' co caracat ma'.

18Je ca tomi' xuhu' ca', tomi' iri'o' inuhu' ta ac caparut na. Carawa ca tomi' caho' hwe pain macan' ca', wara tomi' caho' nain Iri' Jam pain pawin. Carawa ca hohot na ta hwe pain macan' ca', wara hohot na ta nain pain pawin quem.

19Tomi' iri'o' inuhu' pain i ca' quem: Wahu' pain ca tomi' xun Iri' Jam hwe pain macan' ca', am 2 e' paxi' hwe. Mo ta ac je ac je ari ne ca coromicat nuhu' pain ca tomi' xun hun ma', ha' ac cuhu' tara Te co pe pawin cain. 20Xi pe ho' ara toton co cut in xucucun pain ca howa cacapa' ta. Mo ta ma' 2 caca, mo ta ma' 3 caca, pe ho' inonon ta na ca tomi' caparut ma'.

Ca na e' ne pain ca tama' ji'am pin xin ca mana' nexi' pain ca ara cup xijexi'

21Xut hwet ac con na Jeju Pedro ma', tomi' querec ac con na: Taramaxicon ne. Mo ta ara cup capa' co win howa ta' cwa', tomi' xo' ac ton tara, maho' xin ca mana' wa ta ac ton tara. Mo ta ara cup mami' capa', tomi' xo' mami' ac ton tara. Mo ta ara cup mami' capa', tomi' xo' mami' ac ton tara. Mo ta ara cup mami' capa' quem. Cain' xi tomi' xo' mami' ac ton quem? Ma' 7 tara ca tomi' xo' ton pain ca caracat nucun ra na ca tomi' querec con Jeju Pedro.

22Om na ta Pedro ac con na. Om ca na ne pain ca toron ximao ne xumum pain ca tama' caracat nucun ma', pain ca je i ca' je i ca' mami' main oro ca caracat nucun. Oro ca ara cup mami' quem ma', na e' na pain ca tomi' xo' mami' mon. Na e' na pain ca maho' xin ca mana' wa ta mami' mon pain ca ara cup ho' ara cup ho' quem ma'. Mana' mana' om pin ron pain ca caracat nucun ta na ca tomi' con Pedro.

23Je ca tomi' xuhu' ca', tomi' xin carawa ca ara ne pain ca taramaxicon pe ho' capari' Iri' Jam cwa'. An xiho' nain carawa ca ara ne con taramaxicon co coromicat ca' ma': Tomi' xo' toton oro co taramaja mi' e' nanapa' cwa'. Mo ta ma' ne carawa ca dever cacapa' ma', pagar pin ac cacapa' pain tara ta na ca coromicat nucun. 24Tomi' xo' toton iri nonon ne, o qui' ac tocwa na co dever tamana non ma'. Iri' cote ne dinheiro ca dever con. Mo xi ma' 10.000 ne cawaxi' ca taramaja ca, om xi pagar pin ac cain dinheiro ca dever con taramaxicon nucun. 25Ane om con dinheiro ca mam' pagar con ne. Na ra pan ac ca na taramaxicon, tomi' ac con na wari' nucun. Vender ron, taramaja mi' e' toron xucun taramaxicon. Wirico, wiricam manacon, wiricoco mana panxica, vender raram ta. Je oro caramaxicon quem, vender pi' pin rain. Je i ma' tara ca mam' pagar capa' pain ca dever capa' ta na ca tomi' nucun.

26Jain jain ac ca na, pan' hwet ac con na pain caximacon taramaxicon nucun. Ame ma e', ta toron ne xumum me ta taramaxicon ne. Main pagar pagar pi' pin xim pain ca dever xim ca' na ca tomi' nucun.

27Xiram pa' ac con na. Maho' inain, om ta pagar ne mami' xim pain. Ac ca om dever mapa' pain tara. In mao rain xurum ta ac con na quem.

28Mao ac ca na, xut cam' ac con na win ma' ca co win taramaja ca ma'. Dever wijimain pan non co ma'. Ma' 100 e' na denário#18.28 Denário na wixinain dinheiro nucucun oro romano pain cara pane. Wari' co taramaja mi' non xucun wari' ma', pain ca taramaja qui' cain iri' xo' xec, taramaja taramaja irawin pa' ac con na pain ca taramaja nucun ma', an xica' pe ac cain na denário pain ca taramaja nucun. ca dever con. Quep mip ac con na pain canemicon. Juhum' pa' ton na ira. Pagar ne pain ca dever mapa' ta ac con na.

29Jain jain ac ca na, pan' hwet ac con na pain caximacon. Ame ma e', ta toron ne xumum me ta. Main pagar xim pain ta ac con na.

30Ane om ha' con ne. Noc inain ta ac con na, mo hwet ac cain na xirinain ca tao' to tao' to to wa ma', tao' pe jun ta ac tococwa na. To wet iri ca ma'. Mo ta pagar pin capa' pain ca dever capa' ma', om pin ac hun tara ta na ca tomi' tococwa ma'.

31Querec iri nonon oro co win taramaja ca ma' ne, querec iri nanain ca ara con win ma' ca ne. Mana' tamana ac cocon na, tomi' hwet ac cocon na taramaxicon nucucun.

32Hap ra ta ac con na taramaxicon. Om ca awi camain' ma. Iri' caxicon pije' ma ta ac con na. Xiram pa' ne e' pan mapa' ne ira. Je ca xiram pa' xim ca'. Om ta pagar mapa' pain cote ne dinheiro ca dever mapa' ta inem. 33Je xi xiram pa' qui' mon win ma' ma quem? Win ne ca xiram pa' xim ne non.

34Mana' tamana ac con na. Tao' pe pin jun ta ac tococwa na co querec wet nanain xirinain ca tao' to tao' to to wa ma'. Wap mip jun ta. Mo ta pagar pin capa' pain ca dever capa' ma', om pin ac hun tara ta tata.

35Je ca tomi' xuhu' ca' ac caparut na Jeju. Mo ta om tomi' xo' xujuhu' pain ca ara cup xujuhu' ma', pain ca xere xujuhu' pain ca howa nuhu' ma', mo ta om maho' xin ca mana' wa ta xujuhu' pain iri' xumuhu' ma'. Wap ac i ma' wap ac i ma' xam' ac cuhu' tara Te co pe pawin cain ta na ca tomi' caparut pane.

Actualmente seleccionado:

Mateus 18: TBPN

Destacar

Copiar