Mateus 15

Ca tomi' in pin tococwa oro fariseu pain ca pijim' ximama' nucucun

Marcos 7.1-23

1Ma' ac caca na oro fariseu cocon oro co ca' na taxipa' nanain ca xirao' nucun Moisés. Maqui' nanain Jerusalém. Hwet ac cocon na Jeju. Tomi' querec ac cocon na: 2Para om tomi' ha' caca co taxipa' ma ma'? Para om tomi' ha' cacain oro ca ara je cacapari' oro hwanana nexi' co taramaxicon nana pain cara pane quem? Xi hohoc xo' mam' cacain micocon pain ca cao' xi' nucucun ta na ca tomi' querec cocon ma'#15.2 Je curucucun oro judeu pane. Ca' na ca coromicat nucucun: Mo ta quep xin carawa ca om hohot con Iri' Jam ma', em' pin ac iri' tara. Na e' na pain ca hohoc xo' xin mixi', ma' ta querec hohot mami' capari' Iri' Jam ta nana. Je ca hohoc xo' mam' taxipa' cacain micocon pain ca cao' xi' nucucun pane..

3Wahu' quem inuhu' ac tococwa na. Para om tomi' ha' hwein capijacon Iri' Jam ca tomi' ha' je cuhu' quem? Tomi' ha' e' hwein oro ca tomi' pan nuhu' ta. 4Noro jein ca tomi' pan nucun Iri' Jam ca'. Tomi' ha' ron cote ma cam jim me. Quep xiho' raram quem, ac i ma' na ca tomi' capari' Iri' Jam. Tomi' napari' pain i ca' quem: Wari' co tomi' napat non cote ca cam jicon ma', to' pa' pin ac tocwa tara ta napari'. 5Wahu' iri na ne, tomi' ca' huhun oro win ma' nuhu' pain ca pijim' huhun ma': Ma' paxi' turuhu' carawa ca mam' quep xiho' xun hun cote hwe cam juhu' ma'. Mo ta tomi' cain' hwehwem: Carawa ne ca', wara tomi' pe mi' inon pain Iri' Jam ta. Om ca mi' ac xuhu' pain, mo ta tomi' ac i ma' hwehwem, 6hohot ac ne tara pain ca om quep xiho' hwehwem ta na ca tomi' pan nuhu' pain ca pijim' huhun ma'. Ac i ma' na ca miri'om hwein capijacon Iri' Jam ta. Xi om ne ca tomi' ha' e' ara hwein oro ca tomi' pan nuhu' ta ac tococwa na. 7Ac ca iri'o' xi' ca' tara me hwe ra! Iri'o' na ca tomi' nucun Isaías cara pane, pain ca tomi' hwet cain capijacon Iri' Jam cocon oro hwanana nuhu' pane ta ac tococwa na. Ca' na con pane:

8Tomi' ca' na Iri' Jam:

Tomi' ha' urut pum ta paxi' nanapa' oro wari' cwa',

ane tomi' capijacocon e' caca ne.

Om ca tomi' querec te iri'o' cacapa'.

Ac ca to pira ca' cacapa' na pain ximicocon ta.

9In ac paxi' nanapa' pain ca pe torotop mi' cacapa' ca',

ane om tomi' querec te toton pain ne.

Xi tomi' mixein ara caca pain ca tomi' nucucun ta.

Om na, oro capijaxut ca ca' na urut pahu' ca',

maqui' non Iri' Jam ta nonon oro win ma' caca.

Xi maqui' capa' ca pijim' nucucun pain ca ca' na cacain capija ta.

Maqui' nonon oro hwanana nucucun ta.

Ac i ma' na ca tomi' hwet cain capijacon Iri' Jam Isaías pane, pain ca pan to' cain taraxicocon oro hwanana nuhu' pane na ca tomi' tococwa ma'.

10Harahap je ta ac tococwa na oro wari'. Taraju wet xine, ma' ta taraju pa' hwe quem tata. 11Om ca to' em' cuhu' carawa ca corom hwet nuhu' pain capijahu' ma', pain ca cao' nuhu' ma'. Carawa ca hwet ca' nain capijahu' ma', pain ca tomi' ximama' nuhu' ma' iri na ne, je i ma' ca to' em' nuhu' ta. Om ac ne na ca querec hohot cuhu' Iri' Jam na ca tomi' tococwa ma'.

12Tomi' xun e' ac urut con na pain ca taxipa' urut con ca', mo hwet ac urut con na. Tomi' querec ac urut con na: Taxi' momon oro fariseu cara ne? Mana' nenem pain ca tomi' nem cara ne urut con.

13Je i ma' ira ac caparut na. Oro fariseu ma', an xiho' nanain memem ca om oin' ca Te co pe pawin cwain. Ame hwe e', main horohot pi' pin totoron ta. 14Miri'om jujun. Ca' na xuhu' urut pahu' pain capijacon Iri' Jam paxi' nonon oro wari' ma'. Ma' ta taraju pa' hwein paxi' nonon. Ane om taraju pa' pan cacain ne. An xiho' nonon oro co om tococon ma', co coc papan paxi' nonon oro win ma' caca co om tococon ma' quem. Noro jun wari' co om tocon ma'. Mo ta coc papan ton con win ma' ca co om tocon ma' quem, pan' horot mama' pi' pin ac cacain tara man, ac i ma' na ca tomi' caparut ma'.

15Tomi' xo' xut pain ca tomi' nem cara ne, pain ca om to' em' capari' carawa ca cao' wa ma ne ac na Pedro.

16Cain' cain' xihwe quem? Om ca taraju pa' querec hwe ra ac ca na. 17Om ca taraju pa' hwe ra inuhu'. Carawa ca corom hwet nuhu' pain capijahu' ma', pain ca cao' nuhu' ma', corom hwet e' nuhu' pain pemenuhu'. Aram aram ira' pin ac hwein na quem. 18Ca tomi' nuhu' ca hwet qui' nain capijahu' pain ca tomi' ximama' nuhu' ma' iri na ne, maqui' nain xumuhu'. Je i ma' ca to' em' nuhu' ta. Je ca om querec hohot cuhu' Iri' Jam quem. 19Xi maqui' ara nein ca xumu wa oro carawa ca to' em' nain ca wari' wa ta. Mo na: Ca coromicat pan teretem wa ma', ca to' pa' wa wari' ma', ca quep tacacama oro manacocon oro wari' ma', je pain ca quep ne cocon xucun tarama' oro narima' ma' quem, oro ca caracat wa pain ca quep ximama' wa ma', ca cut noc xa wa carawa ma', ca tomi' mixein wa ma', ca tomi' napat wa ma' quem. 20Je i ma' carawa ca to' em' nain ca wari' wa ta. Ca om hohoc xo' mam' xine ca mu wa pain ca cao' xi' wa ma' iri na ne, om ca to' em' nein ca wari' wa i ma' ta na ca tomi' xo' caparut pain ca taxipa' urut con ca'.

Ca quep xio pin tacama cainacam narima' co om judeu

Marcos 7.24-30

21Maji ta ac caparut na Jeju, mama' ac urut na pain macarain Tiro je Sidom. 22Maqui' ac cama na narima' co om judeu ma'. Wari' nein Canaã na#15.22 Canaã na wixinain macaracam. . Xut hwet ac con na Jeju, merem ac con na: Taramaxicon ne! Winacon Davi! Co hwanana ne non Davi cara pane! Wum co wara tomi' pe ca Iri' Jam pane ta. Xiram pa' ne cam caina cwa'. Ximin na. Corom pe ho' nam caxicon jam ta non.

23Tomi' ac i ma' paxi' non Jeju ma', ane miri'om cam ne. Om ca tomi' camain' cam. Xuruxut hwet ac urut con na pain ca taxipa' urut con ca', tomi' ac urut con na. In mao ra ram cam ma' ta Jeju, xi ja' ja' merem ara capari' ta. Mija a xira ta urut con.

24Om ca hwet roron co om judeu nana ta capa' Iri' Jam quem ac caparut na. Hwet e' roron oro judeu co an xiho' nanain ovelha ca pan' ara'am ca' non waximain napa' ta na ca tomi' caparut ma'.

25Xut hwet pan ac con na narima' ma'. Pe torotop mi' ac con na, quep xiho' ne ta Taramaxicon ne ac con na quem.

26Om na, om ca hohot ne pain ca cut ca' toton pain carawa ca cao' wa oro hwijima' ma', pain ca wixicaracao' mi' ton pain oro wixicon oromijac cwa' quem na ca tomi' cam ma'#15.26 Pain ca pijim' joc mam' mi' nucun Jeju ma', cocon oro hwijima' co cao' camara' nanain pawirinain carawa ma', wiricoco co tomi' joc mam' mi' nonon oro win judeu ca. Oro wixicon oromijac ma' iri na ne, wirico co tomi' joc mam' mi' nonon co om judeu nana quem. Ca' paxi' na ca tomi' cam: Om ca hohot ne pain ca quep xiho' cain' xuhu' pain ca om judeu hwe ma'. Quep xiho' cain' toton oro win ma' ta' co judeu nana cwa' nam..

27Taxi' paxi' ina quem Taramaxicon ne ac cama na. Ane om narain ho' tocwa pain ca cao' wa oro wixicon oromijac ma' ne. Cao' nain oro pawirinain carawa ca cao' pawuru caca co wina nonon ma', ca cao' pawuru to cacain pana ca mam' cao' to caca ma'. Je xi xiram pa' ac i ma' mapa' pain ca om judeu ta' ca' quem na ca tomi' con ma'.

28Wa inem me narima', howa tamana mapa' ta ac cam na. Xiram pa' terem Iri' Jam ta. Ara mi' terem pain ca param ma ma' na ca tomi' cam ma'.

Xio hap pin ac cama na cainacam.

Ca quep xio mija tococwa oro wari'

29Maji ta ac caparut na Jeju, xuruxut mama' ac urut na pain cacarain cote ne com pain Galileia ma'. Piri' mao tain pacun ca' e' ac ca na, piri' piri' xao pe ac ca na quem. 30Mija nana wari' co xuruxut hwet nonon. Om ca paric camain' caca. Cut qui' nonon oro co caji at nana ma', co om tococon ma', co om capijacocon ma' quem. Cut qui' mija nonon co ma' nonon oro xijein ca caxi wa ma' quem. An to ja' pan ac cocon na pain caximacon Jeju. Quep xio quep xio xam' ac tococwa na. 31Wa wa ac cocon na oro wari' pain ca querec cacain ca ara ca ma'. Tomi' pin nana co om capijacocon ma'. Xio pin nana co caji at nana ma'. Xuruxut xo' pin nana co xuruxut xirac nana ma'. Querec pin' nana co om tococon ma' quem. Awi tamana na Iri' Jam co howa iri' pain ca waram winacon Israel iri' cwa' nana pain ca tomi' nucucun.

Ca tomi' hwara' mami' cain capam' con hwam Jeju

Marcos 8.1-10

32Harahap je ac caparut na pain ca taxipa' urut con ca'. Tomi' ac caparut na: Xiram pa' inonon oro wari' cwa'. Ma' 3 ara xi' na xec pain ca to ho' cacapari' ca'. Om nonon carawa ca cao' wa quem. Noc inonon pain ca mama' je toton pain ca pe' nucucun. Mo ta mama' je toton pain ca pe' nucucun ma', am xuruxut camara' to cacain wana pain ca naro ne curucucun pain ca pe' tamana nucucun ta na ca tomi' caparut.

33Cain' cain' xixi' quem ac urut con na. Main xi mam' pe xin carawa ca to' ma'am nonon pain i ca' quem, xi ma' ne xirim ca cut pe xine ta. Mija ara xi' nana oro wari' cwa' quem urut con.

34Cain' ca ma' cuhu' capam' quem ac caparut na.

Ma' 7 e' naparut capam' ca'. Ma' paric ca' e' naparut wixicon hwam cwa' quem ac urut con na.

35Xao to jein macan' ta ac tococwa na oro wari'. 36Cut pin iri nain capam' ca ma' 7 ma' ne, wirico hwam ma' quem, tomi' ac con na Iri' Jam: Tomi' querec te urut pum pain ca mi' maparut pain capam' con hwam cwa' quem Te non, jicaracat ac cain na, cut mi' ac caparut pain na pain ca taxipa' urut con ca'. Maxiram' mi' ac urut cocon pain na oro wari' ma' quem. 37Cao' cao' ma'am pin ac caca na. Ma'am ca' nanain, ma'am ma'am xam' nana. Pan cut xin pawirinain ta ac urut na pain ca taxipa' urut con ca', cut ho' cut ho' ac urut pain na pain coco. Moin' 7 na cotain parut. 38Ma' 4.000 nana ca tarama' nucucun co cao' nana ma'. Ma' paxi' nana oro narima' cocon oro hwijima' co cao' nana ma' quem, ane om tomi' tacacama ne.

39Mama' je iri nonon oro wari' Jeju ne, maji quem ac caparut na, piton to ac urut pain na mam' horoho wa, pan horoho mama' ac urut na pain macarain Magadã cain.

Actualmente seleccionado:

Mateus 15: TBPN

Destacar

Copiar