KOLOSE 3
3
1Kam enggo ipekeke Dibata ras Kristus. E maka darami lah erta-erta si i Surga, i bas ingan Kristus kundul arah kemuhen Dibata. #Msm 110:1 2Bulatkenlah ukurndu nandangi erta-erta Surga, labo nandangi perkara-perkara doni enda. 3Sabap kam enggo mate janah kegeluhenndu si tuhu-tuhu genduari la iidah doni enda sabap terbuni ras Kristus i bas Dibata. 4Kegeluhenndu si tuhu-tuhu e me kap Kristus, janah asum IA teridah pagin, kam pe ikut teridah ras IA, dingen dat bagin i bas KemulianNa.
Kegeluhen si male ras kegeluhen si mbaru
5Dage bunuhlah biak-biak doni si la mehuli, umpamana: erlua-lua, erlagu la mehuli, peraten daging, sura-sura si jahat, bage pe rangap (sabap rangap e me nembah man berhala). 6Sabap erkiteken si e maka reh rawa Dibata nandangi kalak si la ngikutken kataNa. 7Nai kam nggeluh rikutken lagu langkah si la mehuli, e me asum kam ercebah i bas kubang dosa.
8Tapi genduari ambekkenlah kerina si bage rupa: merawa, ngamuk, ras segat ate. Ola cekurak ntah pe melasken cakap melket. 9Ola perguak, sabap enggo itangtangindu manusia si male ras kerina kebiasanna, #Ep 4:22 10janah genduari enggo ipakendu manusia si mbaru. Kam genduari manusia si mbaru si tetap ipebarui Dibata si njadiken kam rikutken tempasNa jine. Tujunna e me gelah itandaindu alu serta Dibata. #Kej 1:26; Ep 4:24 11E maka lanai bo erndobah kalak Jahudi ntah la kalak Jahudi, si ersunat ntah la ersunat; lanai erndobah suku-suku asing, kalak Sekyt si ianggap hina, budak ntah bebas; sabap Kristus kap kerina. Kristus ersada ras kerinana.
12Kam anak-anak Dibata. Kam ikelengi dingen ipilih Dibata jadi sikerajangenNa. E maka pakekenlah paken ate perkuah, mehuli, rukur meteruk, lemah-lembut dingen saber. #Ep 4:2 13Ola kam pergelut dingen si alem-alemen salah adi kitik ukurndu ibahan kalak. Kam arus sialem-alemen salah bagi Tuhan enggo ngalemi salahndu. #Ep 4:32 14Janah i babo si e kerina, arus kam sikeleng-kelengen sabap keleng ate mpersadaken kerinana alu serta. 15Dame si ibereken Kristus i bas pusuhndu min si ngajari kam i bas erbahan keputusen-keputusenndu. Sabap guna dame kam ipilih Dibata jadi sada kula. E maka ngataken bujurlah. 16Kata Kristus si dem alu kinibayaken nggeluh min i bas pusuh peratenndu. Siajar-ajarenlah kam alu kepentaren. Endekenlah masmur, ende-enden pujin ras ende-enden pertendin. Rendelah muji Dibata dingen ngataken bujur i bas ukurndu. #Ep 5:19-20 17Dage ntah kai gia ibahanndu, subuk i bas ngerana ntah i bas perbahanen, bahanlah e i bas gelar Tuhan Jesus janah ngataken bujur man Dibata Bapa arah IA.
Erbage-bage pedah man keluarga Kristen
18O, kam ndehara, patuhlah man perbulangenndu, sabap bage me arusna ibahanndu selaku kalak Kristen. #Ep 5:22; 1Pet 3:1
19O, kam perbulangen, kelengilah ndeharandu janah ola kasar man bana. #Ep 5:25; 1Pet 3:7
20O, kam anak-anak, kalak Kristen, patut kam tetap patuh man orang-tuandu sabap bage nge si ngena ate Dibata. #Ep 6:1
21O, kam orang-tua ola rusursa junguti anakndu gelah ola bene ukurna. #Ep 6:4
22O, kam budak-budak patuhlah man tuanndu i bas kai pe. Labo saja tupung ia i je tempa-tempa kam ndarami pujin i bas manusia nari saja; tapi bahanlah e alu ukurndu bulat, erkiteken kemalangenndu man Tuhan. #Ep 6:5-8 23Kai pe si ibahanndu, dahikenlah e alu tutus, tempa-tempa kam erdahin guna Tuhan, labo guna manusia. 24Ingetlah, i bas Tuhan nari kap upahndu. IAlokenndu me kai si enggo isikapken Tuhan man anak-anakNa. Sabap Kristus nge Tuanndu si tuhu-tuhu, janah kam budakNa. 25Janah kalak si erbahan salah, ise pe jelmana iukum rikutken salahna, sabap kerina manusia la erndobah i lebe-lebe Dibata. #Ul 10:17; Ep 6:9
Actualmente seleccionado:
KOLOSE 3: BTX
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Batak Karo Bible © Indonesian Bible Society, 2003.