Luk 22

Jisu Gei Ngumvü Do Rhükecü

(Mat 26:1-5; Mark 14:1-2; Joh 11:45-53)

1Siro Ciekevonyi ükecü Khreiüshükemo Niekhrüdanyiu penuotazhü. 2Sitse zievokezhako mu thezhokepethako kimhie di Jisu dukhrilietuo shikecü rhü, ukoe themiako prei bacü la.

Judas Jisu Tekeshü Puo Medokelie

(Mat 26:14-16; Mark 14:10-11)

3Süki Satan-e Iskariot ükezha Judas nou leta, puo kerekenieko donu mia puo. 4Süla puo vo di zievokezhako mu rüsuoki pfheyakezha kezhako ze kimhie di puo tepie uko tsülie vituo shicü kerüchü. 5Sitse uko nei phita di raka kha puo tsütuoülie. 6Sitse Judas süu puo medota di themia krodiu tuo kemo ki puo nu Jisu tepie uko tsüshüketuo puotei kevi puo rü terü tuota.

Jisu Ciekevonyiu Nyiketuo la Kesekecü

(Mat 26:17-25; Mark 14:12-21; Joh 13:21-30)

7Süsie Khreiüshükemo Niekhrüda zha, Ciekevonyi kuonuo dukhriyakezha teisozhau vorta. 8Süla Jisue Pitor mu Johan unie ketseshü di sie, “Nnie vo di úko keze Ciekevonyiu nyiketuo la mha keseliecie.” 9Sitse unie puo ki, “No hienie bu kirapuo nu süu kesekecü n medo ga?” idi ketso. 10Sitse puo unie ki, “Harie, nnie tuo nadiu nu le tse mia puo dzü lipfhü puo pie tuo di ze keselietuo ho; nnie puo siemedzi puo kinu zo lelie, 11sidi ki niepuu ki, ‘Kepethaue n ki, “A bu ae pethakelieko ze Ciekevonyi nyiketuo la kibouu kirapuo ba ga?” iyalie, sicie.’ 12Sitse puo pesogei kese tseipiekeba kibou kezha puo thashütuo ho. Sünunu úko la mha keseliecie.” 13Sitse unie tuo vo ru Jisu unie ki pukeshü mhie tou di ngulie, mu unie Ciekevonyiu la mha keselie.

Niepuu Kerükra Ca

(Mat 26:26-30; Mark 14:22-26; 1 Kor 11:23-25)

14Süsie puotei tso vorlie tse, puoe pethakelieko ze mhacütuoü ke balie. 15Sidi puo uko ki, “A kemezhieketa mhodzü nieko ze Ciekevonyi hau nyi nyüthor vor zo; 16a nieko ki pushütuo, Ukepenuopfü kedi nu süu chü tsei vorlie kemochie, a mhakipuorei nieko ze hau nyi lalie lhoketa la.” 17Süsie puo tehieu pielie di kethezie khashülie di sie, “Nieko hau pielie di keza kriecie; 18kekreilamonyü a nieko ki pushütuo, Ukepenuopfü kedi vorlie kemochie tsie yawinu a nieko ze khubedzü hau krie salie lhoketa la.” 19Süsie puo niekhrüdau chülie, sidi kethezie khashü, tsiu süu bietshielie di khapie uko tsü di sie, “Hauha nieko la khakeshü a mo-u zo. Nieko a rükra tuolieketuo la hau chüchücie.” 20Süsütuoi uko mhacükelie sie, puo tehieu rei pielie di sie, “Tehie hauha rei nieko la pekrukeshü a zieu la dietseidiekhokelie kesau zowe. 21Derei harie, a teshüketuou rei a ze ba, mu puo dzie rei mizhü gei ba zo. 22Siro Themia Nuou rüli we pedzüperie chütuo üdi rhüpieketuo tuoi chü zotuocü la, derei ce, puo teshüketuou we chülietie.” 23Süsie uko huoniehuo ketso di supuonie hau chütuoü bate shi sü, ibata.

Kezha Chüketuo la Keprüliketa

24Siro pethakelieko sie uko donu supuonie kezhatho-u chütie shicü keprülita. 25Derei puo uko ki, “Judakemoko donu kediko we uko mho diya, mu uko mho kekuo kenyiko üse u razou krü chüya. 26Derei nieko bu we silie lho; sikecüumonyü nieko donu kezhatho-u bu kecütho-u kemhielie, mu krütau bu mia thekemia mhielie. 27Ka, siro mizhü ki kebau mo, mia lie chü kethau zhakuo ütuo ga? Mizhü khieki kebau mo üme? Derei a we nieko donunu mia thekeyakezhamia mhie tuoya ze.

28“Sirei nieko we a dophi ngukelie pete nu rei a ze thakelieko zo; 29süla a Puou kedi khapie a ketsü tuoi a rei süu pie nieko tsütuo, 30sidi nieko bu a kedi nu a ze mhacümhakrietuo, tsiu nieko bu a kedibau gei ba di Israel seyie kerekenieko nyie kecütuo.

Pitor Jisu Phra Mvütaketuo Pukeshü

(Mat 26:31-35; Mark 14:27-31; Joh 13:36-38)

31“Harie Simon, Simon, thoulha tuoi nieko rüzotuo üdi Satan-e chaliete, 32derei n kepele bu jüta molieketuo la a n la chashüwe, siro no rürei la vorkelie ki, n kezeko chü kethepfuliecie.” 33Sitse puo sie puo ki, “Niepuu a n ze kedieki nu rei mu kesia nu rei vo zoketuo dojüpfü bawe!” 34Sitse Jisu sie, “Pitor, a n ki pushütuo, no a si mo üdi va se pu kemochie tsiezhü thevü khoulie lho.”

Priesabou, Likhuo mu Zhiecha

35Sitse puo uko ki, “A hadzü nieko bu priesabou, likhuo morei phikou se mo di ketsekeshü ki nieko mha huo tsopfhüte me?” Sitse uko sie, “Mhapuorei tsopfhüta mo.” 36Süla puo uko ki, “Derei tsie we kehoupuorei priesabou morei likhuo kebau süu selie morosuo. Siro kehoupuorei zhiecha puorei ba kemo-u puo boulie zelie di puo khrülie morosuo. 37Kekreilamonyü a nieko ki pushütuo, ‘Puo phrüpie thezho kevarhuoko saliete;’ ikecü thupieketuou a geinu chü tseilie morosuokecü la; kekreilamonyü a dze die süko chü tsei vorta zo.” 38Sitse uko sie, “Harie, Niepuu hieko haki zhiecha kenie pie tuolie!” Sitse puo sie, “Sü zorei vi,” sita.

Jisu Oliv Kijüthou Geinu Chakecü

(Mat 26:36-46; Mark 14:32-42)

39Süsie puo tuo pra di puo zho ki tuoi Oliv Kijüthou gei vota; mu pethakelieko rei puo ze vo. 40Sidi puo vo thechüu tsolie tse, puo uko ki, “Nieko dophi nu leta molieketuo la cha baliecie.” 41Sishü di puo uko kinu tsiedei chie puo mese pecie phi khoutoupfülie mu cha di sie, 42“Apuo, n medotuo liro, a kinu tehie hau chüwacie; derei a medo monyü n medo-u chüliecie.” 43Sishü tse teigei nu dieliemia puo ker puo chü pekuoshü. 44Süsie puo kemezhie phi di cha puo teitsochü sakuo bata; tsiu puo rükhru thezie tuoi di po kijü tsurta. 45Süsie puo chakeshü sie sier di tuo puoe pethakelieko ki phir ru uko noukemezhiekecü pfü zezhüketa ngulie, 46sitse puo sie uko ki, “Nieko kiüdi zezhü zo mu? Nieko medokephi nu leta molieketuo la sie di cha baliecie.”

Jisu Tekelie

(Mat 26:47-56; Mark 14:43-50; Joh 18:3-11)

47Puo die süko pu ketha nu harie, mia krodi puo Judas ükezha pethakelie kerekenieko donu mia puo bu uko cha tha ze vor mu puo Jisu meboshütuoü puo ki phir, 48derei Jisu puo ki, “Judas, no Themia Nuou meboshü di puo teshütuo üya me?” 49Süki puo ze ketuoko kedipuo chütatuo üzhü shicü ngulie tse, uko puo ki, “Niepuu, hieko bu zhiecha pie mia dutieya mo?” 50Sidi süko mia puo zhiecha pie zievokezhatho-u kituou du di puo nyieto thezatsa metakreiwa. 51Derei Jisu sie, “Ci zota;” sidi puo themia süu nyieto bie di chü pevi lashüwa. 52Siro Jisu sie puo tetuo üdi kevor zievokezhako, rüsuokiu nu kezhako mu phichüko ki, “Nieko zhiecha mu seideko pie di thezho kevarhuomia puo teketuo tuoi a tetuoü vorzhü me? 53A teisonhie nieko ze rüsuokiu nu baya ze, mu nieko süki nie dzie pie a gei shü chie mo. Derei tsie nieko teiute, mu kezeiu puo kekuo nyite!” sita.

Pitor Jisu Phra Mvüketa

(Mat 26:57-58,69-75; Mark 14:53-54,66-72; Joh 18:15-18,25-27)

54Siro puo telie di puo ze zievokezhatho-u kinu vota. Derei Pitor-e ratsanu puo siemedzi tuo. 55Süki mia kitiezha nu mi chü peguo ba, mu Pitor rei süki kebako ze ba. 56Sitse kituomiapfü puoe puo mi peguokeba ngulie di puo meho terü di sie, “Themia hau rei puo ze tuoya zowe!” sita. 57Derei puo mo üdi sie, “Thenupfü, a puo si mo,” sita. 58Geza ba tse mia kekreimia puoe puo ngulie di sie, “No rei uko mia puo zo!” sita. Derei Pitor sie, “Themiau, a mo zo,” sita. 59Siro si ba di bavüdo puo mese sie nu mia kekreimia puo puo thochü di, “Themia hau puo ze tuoya ketho zo, puo Galilmia zocü la.” 60Derei Pitor sie, “Themiau, a no kedipuo pu tha shicü si mo zolie,” sita. Siro puo die süu pu ketha nu thevü khoushüta. 61Süki Niepuu reipra Pitor mehoshü, sitse Pitor hadzü Niepuu puo ki, “No thevü kekhou mhodzü va se a phra mvütatuo” idi pukeshü dieu rükralieta. 62Sidi puo chazou vo di krapie mhapuochüta.

Jisu pie Kethekre mu Vükecü

(Mat 26:67-68; Mark 14:65)

63Süki puo merhashüse kethako puo pie kethekre di puo vüta; 64uko puo mhi dzelie mu puo ketso di, “Ka supuo n vü ga? Chieshüliecie!” sita. 65Sidi uko puo kengakecü die neiü puta.

Mechükehouu Mhodzünu Jisu Ketsokecü

(Mat 26:59-66; Mark 14:55-64; Joh 18:19-24)

66Teiso par tse phichüko, zievokezhako mu thezhokepethako vor kengulie, sidi uko puo ze mechükehouu nu vo. 67Sidi uko sie, “No Khristau zo üliro hie ki pushücie.” Sitse puo sie, “A nieko ki pu rei niekoe pelelie lho; 68mu a mha nieko ketso shierei, nieko süu a ki pulie lho. 69Derei tsie yawinu Themia Nuou Kepenuopfü kekuou zatsa batatuo.” 70Sitse uko pete sie, “Di siro no Kepenuopfü Nuou me?” idi ketsota. Sitse puo uko ki, “Nieko a üse süu üya.” 71Sitse uko sie, “Úko zhapu kikecüpuo pfhü sa ta? We puo tie nunu silieta ze ru!” sita.

Actualmente seleccionado:

Luk 22: ANBRBSI

Destacar

Copiar