Lúkɩ 23

Á fa Zozíi Pilátɩ yà Elódʋ sɔ́ drɩ̀

(Matíe 27.2,11‑14; Málɩ́kɩ 15.1‑5; Záan 18.28‑38)

1Nyʋa a lɔ̀fɩ́ɛ́ soglù, lé á fa Zozíi Pilátɩ gɔ̀. 2Á ŋwʋ́lɔ gbʋ́ wlú, ɩ́mɩ́ ŋwɔ́ɔ mà: «Nyɔ lɩ̀à ɔ́mɔ́ ɔ̀ ŋáta bhlɩ́ a mnɩ́ a nyʋa a wɛ́. Ɔ́ srʋ á mà a ná pɛ́ɛ lóo kádɔ Sezáa a lapóo lé ɔ́ wlele sáà ɔ nyoku lóo lé Kláyɩ́sɩ.» 3Lé Pilátɩ yrɔ́ɔ́ mà: «Mɔ̀ ŋwɔ́ɔ lɛ́ Zúfʋnyʋa a lóo?» Zozíi srʋ ɔ́ mà: «Ɩ́mɩ́ ɩ̀ cíe lɛ́.» 4Lé Pilátɩ srʋ Lagɔ̀bʋ̀bɔ̀nyʋa káda lé jrè a lɔ̀fɩ́ɛ́ mà: «Nyumo wɔlɩdrèè nyɔɔ́ lɩ̀à ká lɛ́ nɩ a, nɩ́ àyɩ má yɛ́.» 5Mà nyʋaá nɩ́ ka ŋwnʋ́, wɔlɩceamúó ɩ́mɩ́ á cíe: «Ɔ́ ŋáta bhlɩ́ɛ́ a mnɩ́ a nyʋa a wɛ́, Galilée mʋ́ ɔ́ bhálɩɩ́ kʋ́, lé ɔ yɩ̀sɔ́ ŋnɩ Zudée lé ɔ́ plɩ́ɩ mɔ̀ɔ a bhlɩ́ a lɔ̀fɩ́ɛ́ a mnɩ́ lé ɔ́ ya lɛ́ dɛ́ ŋnɩ.» 6Mà Pilátɩ nú wɔlɩ́ɛ́ a, ɔ́ yrá námasa, Galiléeyʋ ɔ nɩ ŋwɔ́ɔ a. 7Bhʋ́ á srʋ ɔ́ mà Galiléeyʋ ɔ́ ŋwɔ́ɔ, lóo Elódʋ a bhlɩ́ a mnɩ́ a nyɔ kʋ̀ʋ. Bhʋ́ ɔ́ srʋ nyʋa mà a fɔɔ́ Elódʋ gɔ̀, bhʋ a tányɩɛ́ Elódʋ kʋ Zelízalɛ́mʋ.

8Mà Elódʋ yɛ́ Zozíi a, lɔlɔɔ́ ɔ̀ bhlɔ́ a, ʋ́ plɩ́ ɔ́ gɔ̀, ɔ́ wɔlɩ́ɛ́ á cíé lé ɔ́ núé a, ɩ́zà ɔ yɛ́tʋ bhlɔ́ɔ́, ɔ kɔ́ɔ́ sáà lɛ̀wɔ̀lɩ drɩ̀ nɩ ɔ kɩ́ɩ́ yɛ́ máà. 9Ɔ́ yrálɔɔ́ wɔlɩ́ kɔ́kɔ́mnɩ́ kʋ́, mà Zozíi nɩ́ ɔ́ né sra. 10Lagɔ̀bʋ̀bɔ̀nyʋa káda yà lɔ̀ a másɛnyʋa sɔ́ kʋ ʋ́, á ŋwʋ́lɛ Zozíi gbʋ́ wlú gbabhlesa. 11Bhè Elódʋ yà ɔ sʋ́ja sɔ́ kʋ ʋ́ á nyɩalɔɔ́ á trʋlɔɔ́, lé á plɔ náma kotu mʋ́ lé á yrɩ́bhɔɔ́ sɔ́kʋ́ lé á fɔɔ́ Pilátɩ gɔ̀. 12Bhʋ́ a yruó kʋ́ blɔ̀blɔ́, Pilátɩ yà Elódʋ sɔ́ plɩ́ bheyinyʋa, bhè a nɩ́ wá wàwà.

Pilátɩ ŋwnʋ́ lé a ká Zozíi kúsu jɩ̀ kʋ

(Matíe 27.15‑26; Málɩ́kɩ 15.6‑15; Záan 18.39–19.16)

13Pilátɩ wle Lagɔ̀bʋ̀bɔ̀nyʋa káda, ɔ́ wlele nyɩ́kpɔkáda, lé bhlɩ́ a mnɩ́ a nyʋaá fɩ́ɛ́, 14lé ɔ́ srʋ á mà: «Nyɔ a la lɛ́ mɔ́ dɛ́ gɔ̀ lé a nie lɛ́ mà ɔ̀ ŋáta bhlɩ́ a mnɩ́ a nyʋa wɛ́ a, a klʋ́ jɩ̀ lé ɩ́ yrálɔɔ́ wɔlɩ́ɛ́ fɩ́ɛ́ kʋ́, lé wɔlɩdrèè à nyù lé à kà à zà a nyɛ́lɔɔ́ lɛ́ gbʋ́ a, nɩ́ àyɩ má yɛ́.» 15Elódʋ a sɛ́fʋ céamúó, ɔ nɩ́ sáà mɔ́ nyumo wɔlɩpɩʋ gɔ̀ yɛ́ɛ, ɩ́mɩ́ ka ŋnɩ́ a zà ɔ́ yrɩ́bha àmɔ̀ mɔ́ gɔ̀. A dʋdʋ̀ʋ̀, nyɔɔ́ nɩ́ nyumosa nɩ lé a kɔɔ́ bhlá. 16Naa, ná kɔ́ɔ́ nyʋa nyɛ́ á kɔ́ɔ́ sɩ́á lé kɔ́ɔ́ sá cíe. [17Flíiflíiglɩ̀sɩ́sɩ̀ɛ̀ fɩ́ɛ́ a tányɩ, Pilátɩ cíe kɔ́ɔ̀kɔ́ jɩ̀ŋwʋ̀nyɔ sá.#23.17 Ámá wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.] 18Mà nyʋa fɩ́ɛ́ kʋ̀ ʋ́ a, gá mʋ́ á sa yrè, á nie: «Bhlá nyɔɔ́ lɩ̀à, bhè cíe Balabásɩ sá!» 19Bhè Balabásɩɛ́ nyʋaá sa lɛ́ a, tányɩ a múó kʋ ʋ́ lé yrè klu bhlɩ́ a mnɩ́, gɔ̀mna yà nyʋa sɔ́ a nyièdɩ, lé ɔ́mɔ́ Balabásɩɛ́ bhlá nyɔ, bhʋ́ á ŋwʋ́ ɔ́ jɩ̀ɩ. 20Mà cémʋ́ Pilátɩ yrá lé ɔ́ ká Zozíi sá cíe a, bhʋ́ ɔ́ cílaá sɔ́kʋ́ gɔ̀. 21Ɔ́ niwɔlɩ nɩ́ bhli, lé á ŋwʋ́ ɔ́ yrè: «Kʋ ɔ kúsu jɩ̀, kʋ ɔ kúsu jɩ̀!» 22Lé Pilátɩ srʋ á sɔ́kʋ́ taàda mà: «Wɔlɩdrè gbá kɛtɛkʋ́ ɔ́ nɩ lé à nyù lɛ́ à? Wɔlɩdrèè à kà lɛ́ ɔ́ kwɩ́ɛ́ plɩ́ a, nɩ́ àyɩ má yɛ́, ná ká nyʋa srʋ, lé á kɔ́ɔ́ sɩ́á, fɩ́ɛ́ lé kɔ́ɔ́ sá cíe.» 23Mà nyʋa nɩ́ ka ŋwnʋ́ʋ, á ŋwʋ́ ɔ́ sɔ́kʋ́ yrè fɩ́sa, á nie a kʋ ɔ kúsu jɩ̀, ɩ́mɩ́ tuo ʋ́. 24Cémʋ́ á yrá a, ɩ́mɩ́ Pilátɩ nɩ. 25Ɔ́ cíe Balabásɩ sá, bhè ɔ́mɔ́ fa wá gɔ̀mna kʋbhlalɛ gɔ̀ lé ɔ̀ bhlá wá nyɔ lé á ŋwʋ́ wá jɩ̀ɩ, lé ɔ́ nyɛ́ a Zozíi, lé cémʋ́ á wà a á kɔ́ɔ́ ɔ̀ mɩ́ nɩ.

Á kʋ Zozíi kúsu jɩ̀

(Matíe 27.31‑56; Málɩ́kɩ 15.20‑41; Záan 19.17‑37)

26Á fa Zozíi á mnɛ, lé a yà nyɔ a múó sɔ́ gbɩ́dà a, ɔ́ wlʋ́ɛ́ lágba, ɔ́mɔ́ á wlele Sɩlɛ́nɩ a Simɔ́ɔ, lé sʋ́ja bhlio kʋ́ lé á srʋ ɔ́ mà ɔ bháʋ́ kúsuó, lé ɔ gbɛ Zozíi jɩ̀. 27Bhlɩ́ a mnɩ́ a nyʋa kɔ́kɔ́mnɩ́ gbɛlɔɔ́ jɩ̀, ŋwná kʋ̀ a nyièdɩ á sro sɩɩ́ wlú á ŋwíé á zɩzra ɔ́ zà. 28Lé Zozíi yrɩ́bha wlú lé ɔ́ gà la klʋ́, lé ɔ́ srʋ á mà: «Zelízalɛ́mʋ a ŋwnáyɩ, a ná ŋwí mɔ́ɔ, mà a yà a yúó sɔ́ a zà a nɩ ŋwí! 29A lɛ́bhɛɛ, yruú yi ʋ́ kʋ, lé á yi kɛ́zɔ̀ cí mà: Ŋwnáá à nɩ́ à zà yʋ́ va lé a nɩ ka kɔ́ɔ̀kɔ́ yʋ́ va lé à nɩ ka kɛ́ yʋ́ nyɩ́a a, á ya pʋ́! 30Bhʋ́ a tányɩɛ́, nyʋa yi kíkí srʋ mà: Bhli àmɔ̀ jɩ̀ lé ŋwʋ́ŋwɛ àmɔ̀ kʋ́! 31Naa, a nɩ bhli sɩ́tɛ̀ suyalʋ kʋ́ a, cégbá mʋ́ á yi kɛ́zɔ̀ yɛyɛsu nɩ áa?»

32Nyʋaá à fa Zozíi a, á fa sáà bhʋ́ a yruó blɔ̀blɔ́ kàpàkápányʋa a sɔ́, a ká a yà Zozíi sɔ́ gá bhláa. 33Mà á ŋnɩ á wlele wlúkofó a, bhʋ́ sʋ́jàà kʋ Zozíi kúsu jɩ̀, lé á kʋ sáà kàpàkápányʋaá sɔ́ɔ́, á kʋ múó Zozíi a lilie kʋ́, lé á kʋ ànɔ ɔ́ kɔmɩa kʋ́. 34[Lé Zozíi sané, ɔ́ anɩ́: «À Tʋ́ʋ̀! Cielaá, mà wɔlɩ́ɛ́ á nie a, a nɩ́ɩ yì!»#23.34 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.] Bhè sʋ́jàà kʋ ʋ́ á bhábhalɛ ɔ kótié, nɩ̀gbɩ á pá, mɔ̀ɔ jɩ̀ ɩ́ bhlile a, nà bháʋ́ nànɩ kotu.#23.34 A zɛlɩɩ sáà Lɔlɔ 22.19.

35Bhè dú a nyʋaá fɩ́ɛ́ kʋ ʋ́, á dʋdʋɛ, ɛ̀ nɩ̀ ŋwɔ́ɔ Zúfʋnyʋa kádàà a, áa nyɩalɔɔ́, á nie: «Ɔ́ɔ sa ʋ́ nyʋa neé à, ɔ́mɔ́ nɩ̀ ŋwɔ́ɔ Kláyɩ́sɩ lé Lagɔ nɩ gbázɩ̀ mʋ́ a, ɔ́ sa yɩ́ ʋ́ ɔ nyoku neé a!» 36Bhè sʋ́jàà a sɛ́fʋ ŋnɩ ɔ́ gɔ̀, á nyɩalɔɔ́ lé á nyɛ́ ɔ́ nɔkalʋ mnáada. 37Lé á srʋ ɔ́ mà: «Mɔ̀ nɩ ŋwɔ́ɔ cɩ́cása Zúfʋnyʋa a lóo a, sa yɩ́ ʋ́ ɩ̀ nyoku neé!» 38Kúsuó jɩ̀ á kʋ Zozíi a, á kʋ sáà ʋ wlú kʋ́ kplipá lé á jɩ́jrà jɩ̀ Zúfʋnyʋa a lóo.

39Mà kàpàkápányʋaá sɔ́ɔ́ á kʋ kúsié jɩ̀ a, múó vlávla Zozíi, ɔ́ srʋ ɔ́ mà: «Máà nànɩ́ mɔ̀ ŋwɔ́ɔ Kláyɩ́sɩ a, sa yɩ́ ʋ́ ɩ̀ nyòku neé bhè kà máà ʋ́ àmɔ̀ neé sa à!» 40Bhʋ́ sɔ́ anɔɔ fɔɔ́ cícíé, ɔ́ srʋ ɔ́ mà: «Mɔ̀, nɩ́ gúu Lagɔɔ? Mɔ̀ɔ á na ká bhlá ɔ́mɔ́ bhísakʋ́ a! 41À nɩ ŋwɔ́ɔ àmɔ̀ a, wɔlɩ́ɛ́ à nɩ a, ɩ́ kalɩmɛ mʋ́ à kʋ̀, mà ɔ́mɔ́, ɔ nɩ́ nyumo wɔlɩ́ nɩ!» 42Lé ɔ́ srʋ Zozíi mà: «Zozíi, bhobho ná wɔlɩ́ tányɩɛ́ mʋ́ nà kà nà léyibhlɩɛ́ a mnɩ́ mʋ a!» 43Lé Zozíi srʋ nyɔɔ́ mà: «Cɩ́cása a mnɩ́ a zà, náa srʋɛ mɔ̀ mà zɩmnɛ́ɛ́ lɩ̀à bhlɔ̀bhlɔ̀ yáa mɔ̀ sɔ́ à yi Lagɔ̀duú pla.»

44Yrʋ́ ya yiosa wlú nyièdɩ ŋnɩ, mà fɩɩ́n bhè yrʋ́ɔ́ múò lé cúcú pla bhlɩ́ɛ́ fɩ́ɛ́ jɩ̀, ʋ́ kʋ plaàda ààn lé glíyi á ta kla. 45Yrʋ́ɔ́ mɔ́mnɔ ʋ́ lé Lagɔ̀wlʋ̀ɔ̀ a mnɩ́ a lɔkwɩ kádɛ̀ɛ̀ kʋ̀ mɔ̀ a, ɛ́ nyièdɩ yralɔ mʋ́ pɩ́ sɔ́. 46Bhè Zozíi bhɩa wɔlɩ́: «À Tʋ́ʋ̀! Yáa mɔ̀ ná wúgɔ̀ɔ̀ wlɩ ŋwʋ́!#23.46 A zɛlɩɩ sáà Lɔlɔ 31.6.» Ɩ́ bhli a, ɔ́ɔ dí nyobhuo. 47Sʋ́ja a kámanyɔɔ́ kʋ̀ ʋ́ a, tányɩɛ́ mʋ́ ɔ́ yɛ́ wɔlɩɛ́ plɩ́ a, ɔ́ fa Lagɔ a ŋwnú ɔ́ nie: «Nyɔɔ́ lɩ̀à a nɩnɩgbɩ srí la cɩ́cása sá!» 48Nyʋaá fɩ́ɛ́ kʋ̀ la ʋ́ lé à yɛ́ wɔlɩ́ɛ́ a dá a, bhɔtɔwɔlɩ mʋ́ á yrɩ́bha áa kʋda. 49Nyʋaá fɩ́ɛ́ à yì Zozíi, lé ŋwnáá à jɩ́ɛ́ wá mʋ́ kʋ́ lé ɔ yàsɔ́ wlʋ́ Galilée a, á lɔ̀fɩ́ɛ́ nɩ́ ʋ́ ŋnɩ, á wlʋ́ ʋ́ gwá, mɔ̀ɔmɔ̀ á kʋ lé á dʋdʋ̀ wɔlɩ́ɛ́ fɩ́ɛ́ ɩ̀ plɩ́ a.

Á zízìè Zozíi

(Matíe 27.57‑61; Málɩ́kɩ 15.42‑47; Záan 19.38‑42)

50Nyɔ a múó, ɔ́mɔ́ á wlele wá Zɔ̀zɛ́fʋ, ɔ́ kʋ Zúfʋnyʋa a lɔ̀ a tɩ́tɩ́ jrìkádàà a mnɩ́, duokʋ́namanyɔ lé ɔ nɩnɩgbɩ srí sá. 51Mà Zúfʋnyʋa a dúó ŋwɔ́ɔ Alimatée a, mɔ̀ a nyɔ kʋ̀ʋ. Mà ɔ sɛ́fʋɔ́, Lagɔ a Léyibhlɩɛ́ a yiyitanyɩɛ́ mɛ́ ɔ́ gláa, ɔ́ ŋwɔ́ɔ nyɔ lé ɔ̀ nɩ́ Zozíi a bhlábhlá wɔlɩ́ɛ́ a jrè kʋ. 52Ɔ́mɔ́ Zɔ̀zɛ́fʋɔ́ ɔ́mɔ́ ɔ̀ mʋ lé ɔ̀ srʋ Pilátɩ mà ɔ nyɛ́ ɔ́ Zozíi a gàzɛ̀ɛ̀. 53Ɔ́ a múóó ɔ́mɔ́ sà gàzɛ̀ɛ̀ kúsuó jɩ̀, lé ɔ̀ pɩpɩɛ́ lɔkwɩ lé ɔ̀ ŋwʋ́ɛ́ lésuó a mnɩ́. Mà lésuó, cɔ́kʋ a mnɩ́ á wlúlʋʋ́, a nɩ́ à zà mʋ́ kʋ́ mnɩ́ púò. 54Zúfʋnyʋa a nyɔbhleyru yie lɛ a, ɩ́ ka ŋnɩ́ lé nyʋa a yrɩlɩlɛ yɩ́. 55Ŋwnáá à yà Zozíi sɔ́ námnɩ kʋ́ lé á wlʋ́ Galilée a, á yà Alimatée a nyɔ Zɔ̀zɛ́fʋ sɔ́ mʋ lesuó gɔ̀, lé á dʋdʋ̀ cémʋ́ á púo gàzɛ̀ɛ̀ sá a, á yɩ́ɩ́. 56Ŋwnáá yrɩ́bha lé á yi dú. Á yi a, á yrɩ̀lɩ̀ kpʋ́ lé dàŋwóni a ká lɛ gàzɛ̀ɛ̀ gɔ̀ ŋwʋ́, máà Zúfʋnyʋa a nyɔbhleyru kʋ̀ lɛ ʋ́, a nɩ́ zrɩ nɔnʋ, sɩ́tɛ̀ mʋ́ lagɔ̀jràmáá cíe.

Actualmente seleccionado:

Lúkɩ 23: NEY

Destacar

Copiar