Lúkɩ 22
22
Zudáa ŋwnʋ́ʋ lé ɔ ká Zozíi saà
(Matíe 26.1‑5; Málɩ́kɩ 14.1‑2; Záan 11.45‑53)
1Zúfʋnyʋa a flíiflíiglɩ̀sɩ́sɩ̀ɛ̀ ɛ̀ kɛ̀ɛ̀ tányɩ mʋ́ a nɩ́ ŋwʋ́ wá flɔ́ɔ bháabháagɔ̀zɩ mnɩ́ a, ɛ́ ya ʋ́ mɛ́. 2Mà Lagɔ̀bʋ̀bɔ̀nyʋ̀àkádàà yà lɔ̀ a másɛnyʋaá sɔ́ bhobho cémʋ́ á yi nɩ lé á yi Zozíi kʋ́ bhli lé á yio bhlá a, mà á gúle sáà nyʋaá à yi glɩ̀sɩ́sɩ̀ɛ̀ kʋ́ a, kʋ́. 3Naa Zozíi a kʋjɩ̀nyʋ̀àà kʋ́gbá sɔ́ɔ, á nyièdɩ a nyɔ á wlele Zudáa Sɩkalɩ́ɔ́tʋ a, Dɩ́blʋ̀ɔ̀ kwlílo mʋ́. 4Lé Zudáa mʋ lé ɔ yà Lagɔ̀bʋ̀bɔ̀nyʋ̀àkádàà yà Lagɔ̀wlʋ̀ a dɛdɛ̀nyʋa sɔ́ núnuu, lé cémʋ́ á na ká Zozíi kʋ́ bhli a, á ŋwʋ́lɩɩ́ kʋ́. 5Wɔlíɛ́ a lɔlɔɔ́ nɩ́ á lé a yɔ̀sɔ́ núnuu a kɔ́ɔ́ moníi nyɛ́. 6Zudáa ŋwnʋ́lɩɩ́ kʋ́, ɩ́ ka ŋnɩ́ lé ɔ́ nie sáà fɩ́ɛ́ ɔ ká cásɩ yɛ́ bhè ɔ ká á Zozíi wlɩɩ́ ŋwʋ́ bhè nyʋaá à yi glɩ̀sɩ́sɩ̀ɛ̀ kʋ́ a, a nɩ ka saá yɩbhlɩ.
Zozíi a kʋjɩ̀nyʋ̀àà yrɩ̀lɩ̀ flíiflíiglɩ̀sɩ́sɩ̀ɛ̀ a zà
(Matíe 26.17‑25; Málɩ́kɩ 14.12‑21; Záan 13.21‑30)
7Flíiflíiglɩ̀sɩ́sɩ̀ɛ̀ ɛ̀ kɛ̀ɛ̀ tányɩ mʋ́ a nɩ́ ŋwʋ́ wá flɔ́ɔ bháabháagɔ̀zɩ mnɩ́ a, lé ɛ̀ kɛ̀ɛ̀ yruú kʋ́ á bhlalɛ wá bhlábhlɩ́ɛ́ a, ʋ́ ŋnɩ a, 8Zozíi cíe Pɩ́ɛ́lɩ lé Záan, ɔ́ anɩ́: «A mʋ lé a ká flíiflíiglɩ̀sɩ́sɩ̀ɛ̀ a zà dʋ̀dʋ kʋ́ gɩglà, a ká pi à kà li!» 9Lé á yrɔ́ɔ́ mà: «Dɛ́gbá à nɩ̀ gɩglà lé à kà pi áa?» 10Ɔ́ srʋ á mà: «Dúó kʋ̀ amɔ drɩ̀ mɔ̀ɔ a, a nɩ ŋnɩ mɔ̀ɔ a, a yà nyɔ a múó sɔ́ yi gbɩ́dà, ɔ́ sro nyúkonyìde wlú, a jɩ́ ɔ́ kʋ́, dɛ́ ɔ́ na ká pla a, a pla ʋ́, 11a nɩ pla ʋ́ a, a srʋ gbó a kanyɔ mà: Másɛ anɩ́, pápa àmɔ̀ wlʋdrèè mnɩ́ ɔ yà ɔ́ kʋjɩ̀nyʋ̀àà sɔ́ na ká flíiflíiglɩ̀sɩ́sɩ̀ɛ̀ yɛ́ a. 12A nɩ yrá sɩ́tɛ̀ a, ɔ́ yi amɔ wlʋ a lagowlú mɔ̀ ghlɩdrìkáda a múó dá pápa a, a mnɩ́ ya gɩglɔ̀, mɔ̀ɔ a na ká glɩ̀sɩ́sɩ̀lèlìlɩ̀ɛ̀ piì.»
13Zozíi bhɩa cícíé zɔ̀ a, nyʋaá sɔ́ɔ soglù lé á mʋ dúo mnɩ́, céé tɛ̀ɛ̀ ɔ́ srʋ á a, sɩ́tɛ̀ tɛ̀ɛ̀ ɩ́ plɩ́ɩ. Lé á pi lelilɩɛ́.
Zozíi yà ɔ cíecíenyʋaá sɔ́ li flíiflíiglɩ̀sɩ́sɩ̀ɛ̀ a lelilɩ
(Matíe 26.26‑30; Málɩ́kɩ 14.22‑26; 1 Kɔlɛ́tɩ 11.23‑25)
14Lelitanyɩ ŋnɩ a, Zozíi yà ɔ cíecíenyʋaá sɔ́ gblà tébhle jɩ̀. 15Lé ɔ́ srʋ á mà: «Ná duo kʋ la kpanyɩ flíiflíiglɩ̀sɩ́sɩ̀ɛ̀ lɩ̀à jɩ̀, ɩ́ yra la lé ya amɔ sɔ́ à kà la kʋ́ li, fɩ́ɛ́ lé ná kalɩmɛ a tányɩ ká la ŋnɩ. 16Ya amɔ sɔ́ à nɩ ka yɩ́ sɔ́kʋ́ kʋ́ li lé Lagɔ a Léyibhlɩɛ́ a yiyitanyɩɛ́ yi ŋnɩ.» 17Lé ɔ́ bhá duváaplɩ kʋ́, lé ɔ́ pá Lagɔ yúó lé ɔ́ srʋ á mà: «A bhá a ká mná, a bhábha plɩɛ́ né kʋ́, 18mà náa srʋɛ yɩ́ lɛ amɔ, bháa yɩ́ lɛ́ zɩmnɛ́ jɩ̀ a, nɩ́ ka yɩ́ sɔ́kʋ́ duváa mná lé Lagɔ a Léyibhlɩɛ́ a yiyitanyɩɛ́ yi ŋnɩ.» 19Lé ɔ́ bhá flɔ́ɔbhuo kʋ́ lé ɔ́ pá Lagɔ yúó lé ɔ́ dédìà mʋ́ lé ɔ́ bhábha á lɔ̀fɩ́ɛ́ lé ɔ́ srʋ á sɔ́kʋ́ mà: «Flɔ́ɔbhuó lɩ̀à, ná yɛ́kɛ́ kʋ̀, ɛ́mɛ́ ɩ́ nyɛ́ amɔ a zà. Sɩ́tɛ̀ a nɩ nɩ ná zà bhè a ká kɛ́zɔ̀ mɔ́ɔ luo!» 20Á bhɩa lilie zɔ̀ a, ɔ́ bhá duváaplɩ kʋ́, lé ɔ́ nyɛ́ à mɛ́ lé ɔ́ srʋ á mà: «Duváa lɩ̀à, ná dòlú kʋ, ʋ́mʋ́ ŋwɔ́ɔ mɛnʋ́yalʋ a dòlúó ɔ̀ kɔ́sɔ a zà sá a. 21Bhè a dʋdʋ̀, nyɔɔ́ ɔ̀ nà kà mɔ́ɔ sa a, ɔ́ kʋ dɛ́ àmɔ̀ nyièdɩ, tébhleé lɩ̀à jɩ̀ yɔ́ɔ̀ sɔ́ à lile kʋ́. 22Aan, Nyɔɔ́ a Yuwliyʋɔ́, ɔ́ɔ mnɛ yɩ́, sɩ́tɛ̀ á jɩ́jrà wá ɔ zà Lagɔ̀bɔ̀gʋ a mnɩ́, mà nyɔɔ́ nà kɔ̀ɔ̀ sa a, kplé lé ɛ́ klɔɔ́!» 23Zozíi cí sɩ́tɛ̀ a, á yráyralɛ, á nie mà: «Bhè nyɔ gbá kʋ̀ àmɔ̀ nyièdɩ ɔ̀ nà kɔ̀ɔ̀ sa áa?»
Kʋjɩ̀nyʋ̀àà gbá zi aa lɔ̀fɩ́ɛ́ a nyièdɩ kʋ́ a?
(Matíe 19.28; 20.25‑28; Málɩ́kɩ 10.35‑45)
24Á kʋ ayɩ ʋ́ lida lé á pʋpʋ a nyièdɩ, á bháa ʋ́ wɔlɩdrè a kʋbhlalɛ kʋ́, ɩ́mɩ́ ŋwɔ́ɔ mà: «Nyɔ gbá zi aa lɔ̀fɩ́ɛ́ a nyièdɩ kʋ́ áa? Á yrá lé á kɔ́ɔ́ yɩbhlɩɩ̀.» 25Lé Zozíi srʋ á mà: «Bhlɩ́ a mnɩ́ a léyuó kʋ̀ mɔ̀ a, nyʋaá á kámalɛ a, áa kwlé a, lé á yrá lé a cí kɔ́ɔ̀kɔ́ a námasa. 26Mà amɔ, a nɩ wɔlɩ́ɛ́ yà ámá ánɩɛ́ sɔ́ nɩ́ céamúó ŋwɔ́ɔ. Amɔ a nɩ nyɔɔ́ ɔ̀ zi kʋ́ a, a bɩ́kʋ́ anɔ bhísakʋ́ ɔ́ na ka nɩ, nyɔɔ́ kámalɛ a, a cóyʋ bhísakʋ́ ɔ́ na ká nɩ. 27Bhè ànɔ gbá kɛtɛkʋ́ zi yɩ́ lɛ́ aa nyièdɩ kʋ́ áa? Ɔ̀ kʋ̀ tébhle jɩ̀ aa? Mà ɔ̀ ŋwʋ́ɛ́ tébhleé áa? À nɩ́ ɔ̀ kʋ̀ tébhle jɩ̀ a ŋwɔ́ɔ? À nɩ̀ ŋwɔ́ɔ mɔ́ a, aa nyièdɩ a cóyʋ ɩ ŋwɔ́ɔ. 28Amɔ, kalɩmɛ fɩ́ɛ́ ɩ́ yɛ́ lɛ́ a, á nyièdɩ a nyɔ nɩ́ mɔ́ɔ gwá wlʋ́, aa tɛ́ma duo kʋ́ lé a kʋ mɔ́ gɔ̀. 29Ɩ ŋnɩ́ɛ́ mʋ́ náa ká amɔ Léyibhlɩɛ́ nyɛ́, cémʋ́ ɩ Tʋ́ nyɛ́ lɛ́ mɔ́ɔ a. 30Ɩ́zà ná Léyibhlɩɛ́ a mnɩ́, ya amɔ sɔ́ nà kà kʋ́ lii, à kà kʋ́ mnáa, lé a yi sáà ɛ mnɩ́ a léyikpié jɩ̀ bɔ́ɔ, a ká Izrayɛ́lɩnyʋa lɔ́lɔ́kpɩɛ́ kʋ́gbá sɔ́ɔ́ a tɩ́tɩ́ plɔɔ̀.»
Simɔ́ Pɩ́ɛ́lɩ yi Zozíi jɛɛ
(Matíe 26.31‑35; Málɩ́kɩ 14.27‑31; Záan 13.36‑38)
31Zozíi bhɩa cícíé zɔ̀ a, ɔ́ wle Simɔ́ Pɩ́ɛ́lɩ: «Simɔ́ɔ̀, Simɔ́ɔ̀, Dɩ́blʋ yrá lé ɔ ká amɔ mʋ́ gbázɩ̀, cémʋ́ á pʋɛ lɛ́ sɩ́ká lé á gbázɩɛ lɛ́ a fɩfɩ mʋ́ a. 32Mà yáa nà wlú bhibhie, lé nà fádùò nɩ ka mɔ̀ dá trʋma, lé nà duo nɩ yrɩ́bha a, cíi ɩ̀ níayúó gɔ̀ a ká sáà mʋ́ tɛ́ma.» 33Ɔ́ cí sɩ́tɛ̀ a, Pɩ́ɛ́lɩ anɩ́: «Kanyɔɔ̀, yáa ghlɩ̀lɩ̀, dɛ́ɛ́ nà kà pla a, ɩ́ yi ʋ́ pla, ɛ́ yi náa jɩ̀ɩ à yie pla, ɛ́ yi náa kwɩ́ɩ, yáa mɔ̀ sɔ́ à yi pla.» 34Pɩ́ɛ́lɩ cíi a, Zozíi anɩ́: «Pɩ́ɛ́lɩ náa srʋɛ mɔ̀, mà zɩmnɛ́ lɩ̀à, zizìèdɩ̀kɔ̀kʋ̀ɛ̀ nɩ́ ka wɔlɩ́ pá lé ɩ̀ yi taa kʋ́ ziè mà nɩ́ mɔ́ɔ yì.»
Zozíi srʋ ɔ́ kʋjɩ̀nyʋ̀àà mà a yrɩ̀lɩ
35Zozíi srʋ á sɔ́kʋ́ mà: «Tányɩɛ́ mʋ́ ɩ́ cíe wá amɔ lé a mʋ wá lé a nɩ́ wá moníi fa, a nɩ́ wá bódu fa, a nɩ́ wá sáà síi fa a, a mʋ a, lɛ́ mákɩ wá amɔɔ?» Á anɩ́: «Másɛɛ̀, à mʋ a, lɛ́ nɩ́ wá àmɔ̀ mákɩ.» 36Bhʋ́ ɔ́ srʋ á mà: «Mà náa srʋɛ yɩ́ cɩɩ́ amɔ, ɔ̀ nɩ̀ kà moníi a mʋ́ŋwʋ̀lɛ a, ɔ bháʋ́ mɛ́, ɔ̀ nɩ̀ kà mʋ́tɩtalɛ a, ɔ bháʋ́ mɛ́, ɔ̀ nɩ̀ nɩ́ jrɛ̀ ka a, ɔ ŋwʋ́ ɔ kótu pɛ́lʋ́ ɔ ká jrɛ̀ kla. 37Mà náa srʋɛ amɔ mà wɔlɩ́ɛ́ ɩ̀ jɩ́jrɔ̀ Lagɔ̀bɔ̀gʋ a mnɩ́ a, ɩ́ ká lé ɩ ŋnɩ. Á jɩ́jrà mɔ̀ɔ mà: Nyɩ́kpɔbhlanyʋa á nyièdɩ á ŋwʋ́ ɔ́.#22.37 A zɛlɩɩ sáà Eza 53.12. Na, wɔlɩ́ɛ́ fɩ́ɛ́ ɩ̀ jɩ́jrɔ̀ ná zà a, ɩ́ tanyɩɛ́ ya ŋnɩ.» 38Ɔ́ cí saá a, ɔ́ kʋjɩ̀nyʋ̀àà anɩ́: «Kanyɔɔ̀, à kà jɛ̀lɩ̀ sɔ́, ɩ́mɩ́ lɛ!» Zozíi anɩ́: «Ɩ́ náa!»
Zozíi faa Olivíe kikéé a gbaka
(Matíe 26.36‑46; Málɩ́kɩ 14.32‑42; Záan 18.1‑2)
39Zozíi flʋzɔ̀ lé ɔ́ fa Olivíe kikéé a gbaka, sɩ́tɛ̀ ɔ́ nie kɔ́ɔ̀kɔ́, lé ɔ́ kʋjɩ̀nyʋ̀àà jɩ́ɔ́ mɔ̀ɔmɔ̀ kʋ́. 40Á ŋnɩ mɔ̀ɔmɔ̀ a, ɔ́ srʋ á mà: «A bhibhie, a nɩ ka amɔ zɔ̀ sa à.» 41Lé ɔ́ wlʋ́ la tòyipɛ gwá, lé ɔ́ sra koti sá, lé ɔ́ cíe bhibhie kʋ́. 42Ɔ́ bhibhie wɔlɩɛ mnɩ́ ɔ́ anɩ́: «Wé! À Tʋ́, nɩ̀ wà a, wláa mɔ́ɔ kalɩmɛ lɩ̀à gwá! Mà nàa nɩ cémʋ́ ná duo yrá a, nɩ cémʋ́ ɩ̀ yrá a!» 43Ɔ́ kʋ bhibhieda, lé kplɔkplɔzùzu kwlíi, lé ʋ́ nyɛ́ ɔ́ fɩ́. 44Mà ŋanɩmɛ yi Zozíi kʋ́, lé bhobhoé zio wlú, sɩ́tɛ̀ ɩ́ kʋ lé ɔ́ ŋwʋ́ fɩ́ lé ɔ́ bhibhie, ɔ́ kʋ bhibhieda lé bhúbhú gbíó wlʋ́, mà nɩ̀ yɩ́ʋ́ a, nànɩ dòlú, ʋ́ wlʋ́ɔ́ mʋ́ ʋ́ tʋɛ dʋ̀dʋ kʋ́. 45Ɔ́ bhɩa bhibhie zɔ̀ lé ɔ́ soglù lé ɔ́ yi ɔ́ kʋjɩ̀nyʋ̀àà gɔ̀, mà ɔ́ yi a, kpɩkpɩ a wɔtɔmalɛɛ́ ya á yrá pá, á ya ŋwɔ́ɔ. 46Bhʋ́ ɔ́ srʋ á mà: «Ɛ̀kʋ̀ʋ̀ bhè a ŋwɔ́mɛ áa? A soglù a ká bhibhie, bhè a nɩ ka amɔ zɔ̀ sa à!»
Nyʋa yi Zozíi kʋ bhli ka
(Matíe 26.47‑56; Málɩ́kɩ 14.43‑50; Záan 18.3‑11)
47Wɔlíɛ́ kʋɔ́ bhlà neé bhè blà nyʋa pla. Nyʋaá à pla a, a nɩ́ zumole bɛ́, Zozíi a kʋjɩ̀nyɔ Zudáa kʋ á drɩ̀. Ɔ́ yi lé ɔ́ ŋnɩ Zozíi gɔ̀ lé ɔ́ gbɩlɔɔ lé ɔ́ kpɛ́ ɔ nékʋ́. 48Lé Zozíi yrɔ́ɔ́ mà: «Zudáà, nékʋ́kpɛkpʋ́ ɩ̀ bhá lé ɩ̀ sà Nyɔɔ́ a Yuwliyʋɔ́ ɔ́?»
49Nyʋa yà Zozíi sɔ́ námɛ a, tányɩɛ́ mʋ́ á yɛ́ wɔlɩ́ɛ́ nà kà ŋnɩ a, bhʋ́ á yrɔ́ɔ́ mà: «Kanyɔɔ̀, à yàsɔ́ à vʋ jɛ̀lɩɩ?» 50Ɩ́ kʋ bhlà má neé, bhè á nyièdɩ a nyɔ a múó kpla mɔ̀ jrɛ̀, lé ɔ́ di Lagɔ̀bʋ̀bɔ̀nyɔ̀kádɔ̀ɔ̀ a cóyʋ a lilinyuklú kʋ́. 51Zozíi anɩ́: «Ɩ náa cío sá.» Lé ɔ́ gbɔ́ nyɔ a nyúklúó lé ɔ́ yalɩma. 52Lé Zozíi srʋ Lagɔ̀bʋ̀bɔ̀nyʋ̀àkádàà lé Lagɔ̀wlʋ̀ a dɛdɛ̀nyʋ̀àkádàà lé dɔ̀panyʋaá yio kʋ bhli ka a, mà: «A dʋdʋ̀ cémʋ́ a náa lé a yi a, a ka jɛ̀lɩ̀, a ka sií, nànɩ cémʋ́ a yi lɛ́ kàpàkápányɔ kʋ bhli ka a. 53Bhè Lagɔ a yrié fɩ́ɛ́ kʋ́, ya amɔ sɔ́ kʋ̀ kɔ́ɔ̀kɔ́ Lagɔ̀wlʋ̀kádʋ̀ɔ̀ a mnɩ́, a nɩ́ ɔ̀ mɔ́ɔ kʋ bhli ka mʋ, máà aa nɩ tányɩɛ́ ŋwɔ́ɔ nyumozìzi a pɔ́wa a tányɩɛ́ a, ɛ́mɛ́ ŋnɩ.»
Simɔ́ Pɩ́ɛ́lɩ ziè Zozíi a zà
(Matíe 26.57‑58,69‑75; Málɩ́kɩ 14.53‑54,66‑72; Záan 18.12‑18,25‑27)
54Lé nyʋaá bhli Zozíi kʋ́, lé á fɔɔ́ Lagɔ̀bʋ̀bɔ̀nyɔ̀kádɔ̀ɔ̀ a gbó. Mà Pɩ́ɛ́lɩ jɩ́ á kʋ́ dɩgàsa, dɩgàsa, ɔ nɩ́ mɛ́ á gɔ̀. 55Mà nyʋa pápa kosugàla kʋ́ Lagɔ̀bʋ̀bɔ̀nyɔ̀kádɔ̀ɔ̀ a gbó a nyièdɩ, á glàlàà klʋ́, Pɩ́ɛ́lɩ plɩ́ aa nyièdɩ lé ɔ́ bɔ́ɔ sá. 56Mà cóŋwnɔ a múó bɔ́ɔ kosuó gɔ̀, ɔ́mɔ́ yɩbhlɩ Pɩ́ɛ́lɩ a sabɔ̀anɔ kosuó gɔ̀ dʋ̀dʋ kʋ́, ŋwnɔ́ dʋdʋ̀ ɔ̀ diin ɔ́ anɩ́: «Ɔ̀lɩa, ɔ yɔ̀sɔ́ námɛ wázɔ̀!»
57Mà Pɩ́ɛ́lɩ ziè, ɔ́ srʋ ŋwnɔ́ɔ́ mà: «Nyɔɔ́ ɩ̀ sa a, nɩ́ ɔ́ yì.» 58Fɩɩn, lé nyɔ a múó yɛ́ sɔ́kʋ́ Pɩ́ɛ́lɩ lé ɔ́ srʋ ɔ́ mà: «Mɔ̀, á nyièdɩ a nyɔ ɩ̀ ŋwɔ́ɔ!» Pɩ́ɛ́lɩ anɩ́: «Kpɔkplá, nɩ́ a nyièdɩ a nyɔ ŋwɔ́ɔ!» 59Glíyie a múó plɩ́ a, nyɔ ànɔ a múó yi sɔ́kʋ́, ɔ́ anɩ́: «Nyɔɔ́ lɩ̀à Galiléeyʋ kʋ̀ʋ, cɩ́cása a mnɩ́ ɔ yɔ̀sɔ́ námɛ wázɔ̀.» 60Pɩ́ɛ́lɩ anɩ́: «Mɔ̀ɔ, wɔlɩ́ɛ́ ɩ̀ yrá kà lɛ́ cí a, nɩ́ɩ yì!» Mà ɔ́ niwɔlɩɛ́ bhli bhlà saá bhè, kɔkʋɛ́ pá wɔlɩ́. 61Lé Kanyɔ yrɩ́bha wlú, ɔ́ dʋdʋ̀ Pɩ́ɛ́lɩ yɩ́. Mà tányɩɛ́ mʋ́ ɔ́ dʋdʋ̀ ɔ kɔ́ɔ̀kʋ́ a, wɔlɩ́ɛ́ Kanyɔ srʋ ɔ́ wázɔ̀ a, bhlilo duo kʋ́, ɔ́ srʋ ɔ́ wázɔ̀ mà: «Pɩ́ɛ́lɩɩ̀ zɩmnɛ́ɛ́ lɩ̀à, ɩ̀ yi fɩ́ɛ́ ná wlú a zà taa kʋ́ ziè, mà nɩ́ mɔ́ɔ yì, fɩ́ɛ́ lé zizìèdɩ̀kɔ̀kʋ̀ɛ̀ ká wɔlɩ́ pá.» 62Wɔlíɛ́ bhlá Pɩ́ɛ́lɩ ɩ́ nio lé ɔ yà nyúgbu sɔ́ flʋ zɔ̀, ɔ́ ŋwí àààn lé ɔ́ sɩa.
Á bhɩtɩ Zozíi
(Matíe 26.67‑68; Málɩ́kɩ 14.65)
63Mà nyʋaá à dɛdɛ Zozíi a, á nyɩalɔɔ́, lé á bhitoó. 64Á gʋa ɔ yíjɩ̀, lé á srʋ ɔ́ mà: «Lagɔ a nékʋ́cinyɔ ɩ̀ ŋwɔ́ɔ, nyɔ ɔ̀ bhite mɔ̀ a, zɛlɔɔ ŋnɩ́.» 65Á trʋlɔɔ́ lé á srʋ ɔ́ nyumo wɔlɩ́ kɔ́kɔ́mnɩ́.
Á ŋwʋ́ Zozíi tɩ́tɩ́
(Matíe 26.59‑66; Málɩ́kɩ 14.55‑64; Záan 18.19‑24)
66Zrɩ̀ɩ zɩ a, zúfʋnyʋa a dɔ̀panyʋa, Lagɔ̀bʋ̀bɔ̀nyʋa káda, lé lɔ̀ a másɛnyʋa, á ŋnɩlɔ̀ wlú, lé á wle Zozíi aa lɔ̀ a tɩ́tɩ́plɔjrè a mnɩ́. 67Lé á srʋ ɔ́ mà: «Mɔ̀ nɩ̀ ŋwɔ́ɔ cɩ́cása Kláyɩ́sɩ a, srʋ àmɔ̀!» Zozíi anɩ́: «Nɩ srʋ amɔ a, a nɩ́ kɩɩ cɩ́cása kʋ́ bhá. 68Lé nɩ yráa sáà amɔ wɔlɩ́ kʋ́ a, a nɩ́ ka lɛ mɔ́ ɩ ása nyɛ́. 69Mà a yɩbhlɩ saá mà: Bháa yɩ́ lɛ́ zɩmnɛ́ jɩ̀ a, Nyɔɔ́ a Yuwliyʋɔ́ na ká yɩ́ Lagɔɔ kà pɔ́wa a, lilie kʋ́ bɔ́ɔ.» 70Bhʋ́ á yrɔ́ɔ́ mà: «Mɔ̀ ŋwɔ́ɔ cɩ́cása Lagɔ a Yuwliyʋɔ́ ɔ?» Ɔ́ anɩ́: «Ɩ́mɩ́ fɩ́ɛ́ a cí lɛ́.» 71Zozíi cíi a, á anɩ́ mà: «Àmɔ̀ à klʋ́ mʋ́ ɔ́ ŋwʋ́ wɔlɩ́ɛ́, à nɩ́ a ká yɩ́ sɔ́kʋ́ ŋwɔ́nɩ́srɩ̀nyʋa mʋ́mɔɔ̀.»
Actualmente seleccionado:
Lúkɩ 22: NEY
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© (Active), Wycliffe Bible Translators, Inc. All rights reserved.
