Lúkɩ 18

A ná sɩa bhibhie kʋ́

1Zozíi pá núnúó a múó, ɔ ká á pápa cémʋ́ á na ká nɩ lé a ká kɔ́ɔ̀kɔ́ bhibhie bhè a nɩ́ ka sɩa a. 2Ɔ́ anɩ́: «Dú a múó a mnɩ́, mɔ̀ɔ lɔ́ya a múó kʋ, mà ɔ nɩ́ ŋwʋ́ ʋ́ Lagɔ, lé ɔ nɩ́ ŋwʋ́ sáà ʋ́ nyɔ. 3Ʋ́mʋ́ dúo mnɩ́, kʋ́zrɩ̀ŋwnɔ a múó kʋ mɔ̀, lé ɔ́ yie kɔ́ɔ̀kɔ́ lɔ́yaá yɛ́ ka lé ɔ́ srʋ ɔ́ mà: Ɩ́bhìè, ná wɔlɩ́ɛ́, nàa drʋlɩɩ́ kʋ́ bhè ɩ ká yɩ́ cílo! 4Ŋwnɔ́ɔ́ nɩ cí a, lɔ́yaá nɩ́ mányɩlɔɔ́. Mà yruú a múó kʋ́, lɔ́yaá srʋ ɔ nyoku mà: Aan, nɩ́ ŋwʋ́ cɩ́cása ʋ́ Lagɔ lé nɩ́ mányɩ sáà nyɔ, 5mà cémʋ́ ŋwnɔ́ lɩ̀à yie lɛ́ kɔ́ɔ̀kɔ́ mɔ́ɔ kwlɩ́ yɩa ka a, ɩ́ yrá lé ká ɔ wɔlɩ́ mányɩ bhè ɔ ká mɔ́ wlú wlʋ́.» 6Kanyɔ cí sɔ́kʋ́ mà: «A pʋ wɔlɩ́ɛ́ bhàlʋ̀lɔ̀nyàà cí a, nyúkwlí! 7A nɩ́ saá yì mà Lagɔ nɩ́ ka ɔ yúó à wleó gàgàzrɩ̀ lé dɩ́bɩ sɔ́ a, wɔlɩ́ mányɩ, mà ɔ́ yi fɩ́ɛ́ tányɩ pláa a? 8Náa srʋɛ amɔ mà Lagɔ yi ɔ yúó à wleó a, wɔlɩ́ kʋ́ vʋ́vʋ̀à. Nyɔɔ́ a Yuwliyʋɔ́ nɩ yi sɔ́kʋ́ a, ɔ́ yi nyʋa kà bhʋ́anɩ fádùò a, zɩkpa zɔ̀ ŋnɩɩ?»

Falizɩ́ɛyʋ yà lapóo a kʋbhlinyɔ sɔ́ a núnúó

9Nyʋa àna kʋ ʋ́ lé á bhá a nyoku náma nyʋa kʋ́ Lagɔ a drɩ̀ lé á zi a lía kʋ́, ɩ́mɩ́ kà ŋnɩ́ a zà Zozíi pá sɔ́kʋ́ núnúó lɩ̀à. 10Ɔ́ anɩ́: «Nyʋa a sɔ́, ámá mʋ Lagɔ̀wlʋ̀kádʋ̀ɔ̀ a mnɩ́ bhibhie ka. Múó ŋwɔ́ɔ Falizɩ́ɛyʋ, lé ànɔ ŋwɔ́ɔ lapóo a kʋbhlinyɔ. 11Mà Falizɩ́ɛyʋɔ́ nynʋ́vʋ̀ kʋ́, lé ɔ́ bháʋ́ bhibhie wɔlɩ́, ɔ́ anɩ́: Aan, à tʋ́ Lagɔ àyúó kà cémʋ́ ɩ̀ nɩ mɔ́ɔ lé nɩ́ wlʋ́ mànɩ́ nyʋa àna a, ɩ́ pá mɔ̀ ɩ yúóó! Ámá, á ghlíe, á nɩnɩgbɩ nɩ́ sá srí, á yrá a lía a ŋwná! Ná nɩnɩgbɩ nɩ́ wlʋ́ mànɩ́ lapóo a kʋbhlinyɔɔ́ lɩ̀à! 12Ɩ́ pʋ́lɛ kleé sɔ́ɔ kʋ́ wúkɩ a mnɩ́, lé ɩ́ pɛ́lɛ ná kakalɩɛ́ fɩ́ɛ́ a wlú dímʋ. 13Mà, à nɩ̀ ŋwɔ́ɔ lapóo a kʋbhlinyɔɔ́ a, bɩ́ kʋ́ mɔ̀ ɔ́ nynʋ́vʋ̀, ɔ nɩ́ míi ɔ ká wlú kʋ́ bhá, ɔ́ bhite ɔ́ digblè bhè ɔ́ bhibhie, ɔ́ nie: Wé! Ɩ́bhìè Lagɔ, wɔtɔma duo ná zà mà ɩ́ yi saá mà nyumonyɔ ɩ́ ŋwɔ́ɔ! 14Náa srʋɛ amɔ mà cémʋ́ lapóo a kʋbhlinyɔɔ́ bhibhie lɛ́ a, Lagɔ ŋwnʋ́ ɔ́ bhibhiewɔlɩɛ́ kʋ́, lé ɔ́ mʋ gbó, mà Falizɩ́ɛyʋɔ́, Lagɔ nɩ́ ɔ́ bhibhiewɔlɩɛ́ kʋ́ ŋwnʋ́. Nyɔɔ́ ɔ̀ yrá lé ɔ̀ kà ɔ nyoku nyɔ kʋ́ bhá a, Lagɔ ɔ́ɔ kwléloó sá, mà nyɔ ɔ̀ kwléle ɔ nyoku sá a, ɔ́mɔ́ Lagɔ bhá kʋ́.»

Zozíi pá yúó nyú

(Matíe 19.13‑15; Málɩ́kɩ 10.13‑16)

15Nyʋa la aa yísradàda Zozíi gɔ̀ ɔ ká á glɔ̀gbɩ jɩ̀ ŋwʋ́. Mà ɔ́ kʋjɩ̀nyʋ̀àà yɛ́ nyʋaá à la yúó a, áa jɩ́laá. 16Mà Zozíi srʋ nyʋaá mà, a la aa yúó, ɔ́ anɩ́: «A cíe yúó sá, a ká mɔ́ gɔ̀ yi, a ná jɩ́laá, mà Lagɔ a Léyibhlɩɛ́, nyʋa à wlʋ́ mànɩ́ yúó lɩ̀à a, ámá kɛ̀ɛ̀. 17Cícása a mnɩ́, náa srʋɛ amɔ mà, ɔ̀ nɩ̀ nɩ́ Lagɔ a Léyibhlɩɛ́ a wɔlɩ́ɛ́ kʋ́ bhli yʋ́ bhísakʋ́ a, ɔ́ nɩ́ ka mɔ̀ɔ pla.»

Lóo a múó yrá pʋ́pʋ́ɛ́

(Matíe 19.16‑30; Málɩ́kɩ 10.17‑31)

18Zúfʋnyʋa a kámanyɔ a múó yrá Zozíi mà: «Námamasɛɛ̀, cégbá mʋ́ ɩ́ yi nɩ lé ɩ́ yi kɔ́ɔ́ ʋ̀ nɩ́ bhɩàda ka a, yɛ́ a?» 19Zozíi anɩ́: «Ɛ̀kʋ̀ʋ̀ lé ɩ̀ wlele mɔ́ɔ náma masɛ áa? Nyɔ nɩ́ kɔ́ kʋ lé ɔ ká námaa, à nɩ̀ nɩ́ Lagɔ a múó ŋwɔ́ɔ a. 20Lé ɩ̀ yì Jràmáá nie mà: Nà bháʋ́ ɩ̀ liyʋ a ŋwnɔ́, nàa bhlá nyɔ, nàa ghlíì, nàa gʋa ɩ̀ liyʋ gbʋ́ jɩ̀, ɩ́zà ŋwʋ́ sáà ʋ́ ɩ̀ nɛ́ lé ɩ̀ tʋ́!#18.20 A zɛlɩɩ sáà Námɛɛ́ 20.12‑16; Detro 5.16‑20.» 21Nyɔɔ́ srʋ ɔ́ mà: «Másɛɛ̀, bháa ná zɔ̀kpɩ́anɔ kʋ́ lé kà zɩmnɛ́ ŋnɩ a, ɩ́ ŋwʋ́ɛ́ ʋ́ jràmá a lɔ̀fɩ́ɛ́.» 22Zozíi nú wɔlɩ́ɛ́ nyɔɔ́ cí a, ɔ́ srʋ ɔ́ mà: «Wɔlɩdrè a múó tuo mɔ̀ɔ lé nɩ̀ɩ́ àyɩ nɩ. Mʋ lé ŋwʋ́ nà kakalɩɛ́ fɩ́ɛ́ pɛ́lʋ́, moníe nà kà yɛ́ a, bhábhalɩɩ́ ŋazɩ̀nyʋa, mà ɩ̀ yi lagɔduú mɔ̀ léyri lii, lé yi lé jɩ́ mɔ́ɔ kʋ́!» 23Mà wɔlɩ́ɛ́ Zozíi cí a, ɩ́ nyumò nyɔɔ́ a klʋ́, cémʋ́ ɔ́ ŋwɔ́ɔ lɛkanyɔ a, ɩ́ ka ŋnɩ́ lé wɔlɩ́ɛ́ ɔ́ nú a, ɩ́ bhlɔ́ɔ́ lé ɩ́ wɔtɔmalɔɔ́ kpɩkpɩ gɔ̀.

24Tányɩɛ́ mʋ́ Zozíi yɩbhlɩ saá mà kpɩkpɩ yɔɔ́ gɔ̀ wɔtɔma a, ɔ́ srʋ ɔ́ mà: «Wé! Lɛkanyɔ ká Lagɔ a Léyibhlɩɛ́ a mnɩ́ pla a, ɩ́ ka gbʋ́! 25Ɩ́ ka gbʋ́ lé ɩ́ zi mnagwlì ká kwʋɛ́ a fleé a mnɩ́ blée a, kʋ́.» 26Ɔ́ cí sɩ́tɛ̀ a, nyʋaá à pʋɔ nyúkwlí a, á sa né: «Naa, sɩ́tɛ̀ mʋ́ ɩ ká kʋ a, nyɔ gbá yi míi lé ɔ̀ yi ʋ́ neé wlʋ́ à?» 27Lé Zozíi srʋ á, ɔ́ anɩ́: «Wɔlíɛ́ nyɔ nɩ́ ka míi a, Lagɔ yii míi.»

28Lé Pɩ́ɛ́lɩ srʋ ɔ́, ɔ́ anɩ́: «Másɛɛ̀, dʋdʋ̀ʋ̀, àmɔ̀ à wlʋ́ à kakalɩɛ́ fɩ́ɛ́ a gbʋ́ lé à jɩ́ mɔ̀ kʋ́.» 29Zozíi anɩ́, cɩ́cása mnɩ́ a zà a, ná srʋɛ amɔ mà, nyɔɔ́ nɩ̀ wlʋ́ Lagɔ a Léyibhlɩɛ́ a zà ɔ gbó a, lé ɔ nɩ wlʋ́ ɔ ŋwnɔ́ gɔ̀, ɔ nɩ́ayʋ gɔ̀, ɔ nɛ́ yà ɔ tʋ́ sɔ́ gɔ̀, ɔ yúó gɔ̀ a, 30lɩ́ɛ́ fɩ́ɛ́ ɔ́ wlʋ́ lɛ́ sɩ́tɛ̀ gɔ̀ a, ɔ́ yii dɛ́ zɩkpa lɩ̀à zɔ̀ yɛ lé ɔ́ yii gɔ̀ plɩ, fɩ́ɛ́ lé zɩkpa àna yie a, ɔ́ yi kɔ́ɔ́ ʋ́ nɩ́ bhɩàda ka a yɛ́.

Zozíi anɩ́ ɔ́ yi kú lé ɔ́ yi galɔ̀

(Matíe 20.17‑19; Málɩ́kɩ 10.32‑34)

31Zozíi wle ɔ́ kʋjɩ̀nyʋ̀àà kʋ́gbá sɔ́ɔ lé ɔ yàsɔ́ gbʋ́gbʋʋ̀ lé ɔ́ srʋ á mà: «A dʋdʋ̀ʋ̀, àa mnɛ yɩ́ lɛ́ Zelízalɛ́mʋ lé wɔlɩ́ɛ́ fɩ́ɛ́ Lagɔ a nékʋ́cinyʋaá jɩ́jrà wá Nyɔɔ́ a Yuwliyʋɔ́ a zà a, ɩ́ ká yɩ́ neé sralɔɔ̀. 32Á yio nyʋaá à nɩɩ Zúfʋnyʋa ŋwɔ́ɔ a, wlɩ ŋwʋ́ lé á yio nyumosa kʋ́ bhlii, á yio nyɩa, á yio dàdɩ kʋ́ pá. 33A yio sɩ́á, lé á yio bhlá. Mà ɔ nɩ kú a, tayruó kʋ́, ɔ́ yi galɔ̀.» 34Wɔlíɛ́ fɩ́ɛ́ Zozíi cí lɛ́ sɩ́tɛ̀ a, ɔ́ kʋjɩ̀nyʋ̀àà nɩ́ ɩ mnɩ́ nú, a nɩ́ sáà ɩ́ gba yì.

Zozíi yalɩma yɩ́cucúbhlanyɔ

(Matíe 20.29‑34; Málɩ́kɩ 10.46‑52)

35Zozíi ŋnɩ Zelikóo a, yɩ́bhlanyɔ a múó bɔ́ɔ nyúzɔ kʋ́ ɔ́ zra plɩ́plɩ́nyʋa. 36Ɔ́ nú nyʋa à plɩ́ɛ́ a á yrè a, bhʋ́ ɔ́ yraá mà: «Wɔlɩ gbá kʋ̀ʋ̀ bhè nyʋa sa yrè à?» 37Bhʋ́ á srʋ ɔ́ mà: «Nazalɛ́tɩ a Zozíe ɔ́mɔ́ ɔ̀ plɩ́ɛ́.» 38Bhè ɔ́ blì, ɔ́ pá wɔlɩ́: «Zozíi ooo, à tɩtɔ Davídɩ a yʋ́ʋ! Ɩ́bhìè, yɛ́ ná ŋazɩ kʋ́ àyé!» 39Mà nyʋaá à kʋ̀ ɔ drɩ̀ a, á salɔɔ́ yrè wlú, ɔ bhli nékʋ́. Mà ɔ nɩ́ pʋ a nyúkwlí, ɔ́ wle kɔ́ɔ̀kɔ́, ɔ́ nie: «À tɩtɔ Davídɩ a yʋ́ʋ, yɛ́ ná ŋazɩ̀gbɩ kʋ́ àyé!» 40Mà tányɩɛ́ mʋ́ Zozíi nú ɔ cícíwɔlɩ a, ɔ́ nynʋ́vʋ̀, lé ɔ́ srʋ nyʋaá mà a yɔ̀sɔ́ yi, á yi lé á ŋnɩ Zozíi gɔ̀ a, bhʋ́ ɔ́ yrɔ́ɔ́ mà: 41«Wɔlɩ cegbá á, ɩ̀ yrá lé nɩ nɩ nàa zà a?» Yɩ́bhlanyɔɔ́ anɩ́: «Kanyɔɔ̀, nɩ lé ká sɔ́kʋ́ kʋ́ yɛ́!» 42Ɔ́ cíí a, Zozíi srʋ ɔ́ mà: «Yɛ́ kʋ́, mà nà fádùò ya mɔ̀ pʋ́à, yà yalɩma!» 43Fɩɩn lé ɔ yɩ́ɛ́ ylée, ɔ́ yɛ́ yɩ́ kʋ́, ɔ́ɔ jɩ́ yɩ́ Zozíi kʋ́, bhè ɔ́ bhlɩɛ ɔ́ falɛ Lagɔ ŋwnú. Nyʋaá kʋ̀ ʋ́, lé à yɛ́ ɔ́ a, á bhá sáà ʋ́ Lagɔ a ŋwnú falɛ kʋ́.

Actualmente seleccionado:

Lúkɩ 18: NEY

Destacar

Copiar