Lúkɩ 17

Nyumosa a ninie lé nyɔ a ciecú

(Matíe 18.6‑7,21‑22; Málɩ́kɩ 9.42)

1Lé Zozíi srʋ ɔ́ kʋjɩ̀nyʋ̀àà mà: «Wɔlɩ ka lé ɩ ká yrúkanyɔ nɩ lé ɔ ká nyumosa nɩ. Mà mɔ̀ nyɔɔ́ kɔ̀ɔ nɩnɩgbɩ nà kà ɩ̀ liyʋ nɩ lé ɔ ká nyumosa nɩ a, kplé ya mɔ̀ kla! 2Bhʋ́anɩ nyɔ a nɩnɩgbɩ ká nyʋaá à ŋwnʋ́ Lagɔ̀wɔ̀lɩ̀ɛ̀ kʋ́ a, nɩ lé a ká nyumosa nɩ a á zà a, áa yio cókpalɩ́bhuo blɛɛ́ gʋa lé á yio jié páà. 3Naa, a mányɩ a nyoku kʋ́! Ɩ̀ nɩ́ayʋ́ nɩ nɩ nyumosa a, cílo gɔ̀, ɔ nɩ yɩbhlɩ ɔ́ nyumoé a, cielo. 4Ɩ́zà ɔ nɩ bhli mɔ̀ nyumosa kʋ́ yruú a mnɩ́, gbàásɔ́ kʋ́ a, lé ɔ nɩ yɩbhlɩ ɔ́ nyumoé gbàásɔ́ kʋ́ a, lé ɔ nɩ bhibhie mɔ̀ a, cielo!»

Lagɔ a fádùò a mʋ́ tɛmɛɛ́

5Lé Zozíi a cíecíenyʋaá srʋ ɔ́ mà: «Kanyɔɔ̀, nɩ lé à ditátɩ́ɛ́ ká mʋ́ tama!» 6Kanyɔ anɩ́: «A fádùò a mʋ́ tɛmɛɛ́ nɩ wlʋ́ cɩ́cása mà mutádɩ̀yie a, a yi míi lé a yi suó lɩ̀à srʋ mà: Suú, soglù, lé ŋwnʋ́vʋ̀ jie a mnɩ́, lé suó yi amɔ kpá ŋwʋ́!

A plɩ́ coyuó à zrɩɛ náma nɔnʋ a

7Á nyièdɩ a nyɔ gbá yi cóyʋ ka, lé ɔ́ yi ɔ lágbaá nɔnʋ wlʋ́, ɩ́zà ɔ mnaá kʋ́ lɔ́bhʋ ka wlʋ́ lé ɔ̀ yio srʋ mà: Vʋ́vʋ̀à kʋ́ gblà tébhle jɩ̀ kà li áa? 8Mà ɔ̀ nɩ kɔɔ́ srʋ mà, ɔ pi lelilɩ, lelilɩɛ́ nɩ yri a, ɔ cɩ́cɩ fɩ́ɛ́ ɔ́ nɔnʋzrɩ̀kòtìè lé ɔ kɔ́ lelilɩɛ́ drɩ̀ ŋwʋ́ ɔ ká li, ɔ ká mná fɩ́ɛ́ lé ɔ́mɔ́ mɔ̀glʋ̀ ká cɩɩ li ɔ ká mná à? 9Kanyɔɔ nɩ́ ka cóyʋɔ́ yúó pá, nɔnʋɔ́ ɔ́ zrɩlɔɔ́ gà a zà a? 10Naa, a sɛ́fʋ, nɔnʋɔ́ Lagɔ nyɛ́ amɔ a, a nɩ zrɩ ʋ́ a, a srʋ á nyoku mà: Cóyuo à ŋwɔ́ɔ, nɔnʋɔ́ à nà kà la zrɩ a, ʋ́mʋ́ à zrɩ.»

Zozíi yalɩma kosugɔ̀bhlànyʋa a kʋ́gbá

11Tányɩɛ́ mʋ́ Zozíi mnɛ wá Zelízalɛ́mʋ a, Samalíi yà Galilée sɔ́ a gbùgblùyɩ̀ kʋ́ ɔ́ plɩ́ɩ. 12Mà dúó mnɩ́ ɔ́ pla a, kosugɔ̀bhlànyʋa a kʋ́gbá yio nyúzɔ kʋ́, mà a nɩ́ ɔ́ gɔ̀ mɛ́ 13lé á pɔ́ɔ́ wɔlɩ́: «Másɛɛ̀, Zozíi, Ɩ́bhìè yɛ́ à ŋazɩ kʋ́ àyé!» 14Zozíi yɛ́ a, ɔ́ srʋ á mà: «A mʋ Lagɔ̀bʋ̀bɔ̀nyʋa gɔ̀ a ká amɔ dʋdʋ̀.» Á kʋ Lagɔ̀bʋ̀bɔ̀nyʋa a dú a nyúzɔ kʋ́ lé áa kʋ́gbáá yalɩma. 15Mà tányɩɛ́ mʋ́ á nyièdɩ a gupuonyɔ a múó yɩbhlɩ saá mà ɔ́ ya yalɩma a, ɔ́ wlʋ́ a nyièdɩ lé ɔ́ yrɩ́bhà, ɔ́ pá gbányìdi ɔ́ falɛ Lagɔ ŋwnú. 16Ɔ́ yi lé ɔ́ sra Zozíi a drɩ̀ koti sá, ɔ́ srɔɔ wlú lé ɔ́ pɔ́ɔ́ yúó. Samalitɛ́ɛyʋ kʋ̀ʋ. 17Bhʋ́ Zozíi yrá mà: «Bhè áa kʋ́gbá nɩ́ lɛ́ yalɩma a, dɛ́gbá ànàà fɛnaá kʋ áa? 18Á nyièdɩ a nyɔ a múó coco nɩ́ pɛ́pɛ́lɩ bhobho ɔ ká yrɩ́bha lé ɔ ká Lagɔ yúó pá, ɛ̀ nɩ̀ nɩ́ lówùdùyʋ̀ɔ̀ lɩ̀à a múó ŋwɔ́ɔ a?» 19Lé Zozíi srʋ ɔ́ mà: «Soglù kà mʋ, mà nà fádùò ya mɔ̀ pʋ́a!»

Lagɔ a Léyibhlɩɛ́ a yiyitanyɩɛ́ a wɔlɩ́

(Matíe 24.23‑28,37‑41)

20Tányɩ a múó Falizɩ́ɛnyʋa yrá Zozíi mà: «Tányɩ gbá mʋ́ Lagɔ a Léyibhlɩɛ́ a pɔ́waá na ká yi áa?» Bhʋ́ ɔ́ srʋ á mà: «Lagɔ a Léyibhlɩɛ́, ɛ́ɛ nɩ́ náa lé ɛ ká yi lé nyʋa kɛ́ɛ́ dʋdʋ̀. 21Lé a ká cí mà: A dʋdʋ̀ Lagɔ a Léyibhlɩɛ́ mɛ́ lɛ̀, ɛ́mɛ́ kʋ̀ dɛmɔ̀! Mà Lagɔ a Léyibhlɩɛ́ kʋ amɔ nyièdɩ.»

22Lé ɔ́ srʋ ɔ́ kʋjɩ̀nyʋ̀àà mà: «Yruú yi ʋ́ kʋ, lé Nyɔɔ́ a Yuwliyʋɔ́ a yɛ́tʋ yi amɔ bhlá mà a nɩ́ ka yɩ́ míi. 23Nyʋa yi amɔ srʋ mà: Ɔ́mɔ́ kʋ dɛ́! Lé àna yi amɔ srʋ mà: Ɔ́mɔ́ kʋ̀ dɛmɔ̀! Á yi céana cí, a ná jɩ́ á kʋ́ a ká soó fa lé a ká dɛ́ á kʋ a, mʋ! 24Mà cémʋ́ lagɔ̀ɔ̀ nɩ wɛ́zɛ lé ʋ́ ŋana lɛ́ dáa fɩ́ɛ́ a, sɩ́tɛ̀ Nyɔɔ́ a Yuwliyʋɔ́ a yiyitanyɩɛ́ a yruó na ká kʋ. 25Mà ɔ́ ka lé ɔ yɛ́ fɩ́ɛ́ kalɩmɛ, lé janyɩ̀ɛ̀ lɩ̀à mnɩ́ a nyʋa ná ŋwnʋ́ ɔ́ wɔlɩ́ kʋ́. 26Wɔlíɛ́ ɩ̀ ŋnɩ lɛ́ Nowée a tanyɩɛ́ a, ɩ́mɩ́ tɛ̀ɛ̀ nà kà Nyɔɔ́ a Yuwliyʋɔ́ a yiyitanyɩɛ́ ŋnɩ. 27Nowée a tányɩɛ́ a nyʋa lie wá, á mna wá, á síé wá, á sie wá sáà a ŋnɩ́keyuo, lé a yuwliyuo. Á kʋ sɩ́tɛ̀ a nɩda àààn, lé Nowée pla gékpoó a mnɩ́, lé nyúkádʋ̀ɔ̀ bhla, lé ʋ́ bhlá nyʋaá a lɔ̀fɩ́ɛ́.#17.27 A zɛlɩɩ sáà Bháàda 7.6‑24. 28Ɩ́ na ká sáà wlʋ́ mà Lɔ́tʋ a tanyɩɛ́ a wɔlɩɛ́ ɩ̀ plɩ́ wá a. Lɔ́tʋ a tanyɩɛ́, nyʋa lie, á mná, á pá pɛ́lʋ́, á glɩɛ a lágbɩ, á pá wá sáà ghlɩ. 29Mà yruó kʋ́ Lɔ́tʋ wlʋ́ Sɔdɔ́mʋ a, kosu lé mʋ́mʋɩ́, ɩ́mɩ́ ɩ̀ wlʋ́ lagɔɔ́ lé ɩ́ kɔ́sɔ Sodɔ́mʋdùò jɩ̀ nànɩ́ cémʋ́ nyú bhla a, lé ɩ̀ sie dú a lɔ̀fɩ́ɛ́.#17.28‑29 A zɛlɩɩ sáà Bháàda 18.20–19.25. 30Yruó kʋ́ Nyɔɔ́ a Yuwliyʋɔ́ na ká ʋ́ flʋ a, sɩ́tɛ̀ mʋ́ ɩ́ na ká sáà nyʋa zɔ̀ vú. 31Bhʋanɩ yruó kʋ́, ɔ̀ nɩ kʋ̀ gbògbú zɔ̀ a, lé ɔ̀ nɩ kà lɩ́ sré a, ɔ ná pla sré ɔ ká mɔ̀ɔ mɩ́ bhá. Lé ɔ̀ nɩ kʋ̀ la lágbaá a, ɔ ná yrɩ́bha dú! 32Wɔlíɛ́ ɩ̀ ŋnɩ wá Lɔ́tʋ a ŋwnɔ́ a, a pɩ́ duo gɔ̀! 33Ɔ̀ nɩ̀ yrá ɔ̀ kà ɔ kɔ́ kʋ́ bhla a, ɔ yiú tɩ. Ɩ́zà ɔ̀ nɩ́ tɩ ɔ́ kɔ́ a, ɔ́ yi ʋ́ neé wlʋ́. 34Náa srʋɛ yɩ́ sáà amɔ mà, dɩ́bɩ̀ɛ̀ lɩ̀à nyʋa sɔ́ yi bɔ̀gɩ a múó jɩ̀ pʋ́, múó yi ʋ́ bhálɔɔ̀, lé anɔ yi ʋ́ tuo. 35Ŋwná sɔ́ yi gwlè zɔ̀ kʋ, lé múó yi ʋ́ bhálɔɔ̀ lé ànɔ yi ʋ́ tuo. [36Nyʋa a sɔ́ yi lágbaá kʋʋ, múó yi ʋ́ bhálɔɔ̀, lé ànɔ yi ʋ́ tuo.#17.36 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.]» 37Zozíi cí sɩ́tɛ̀ a, ɔ́ kʋjɩ̀nyʋ̀àà yrɔ́ɔ́ mà: «Kanyɔɔ̀, dɛ́gbá mɔ̀ ɩ̀lɩa á lɔ̀fɩ́ɛ́ na ká lɛ́ nilo áa?» Zozíi anɩ́: «Dɛ́ gàzɛ̀ɛ̀ na ká kʋ a, bhʋ́ kɔ̀kɔ̀bàyrɩ́ɛ́ na ká wlú ŋnɩlɔ̀.»

Actualmente seleccionado:

Lúkɩ 17: NEY

Destacar

Copiar